3 ᒋᑭ ᓂᑭᑕᓇᓄᐤ ᐅᑕ ᑭᔭ ᐸᑕᓪ ᒋᑭ ᐃᑐᑕᓇᓄᐤ, ᐊᓐᑕ ᒐ ᐃᑐᑎᒧᐛᐧᒄ ᐱᔅᑎᓂᒐᐅᓇᐱᔅᑯᔪᐤ ᒋᓴᒪᓂᑐᐤ ᐊᓐ ᑲ ᐎᒋᐃᑦ ᑲ ᐅᔅᑕᐱᔪᐅᒡ ᑭᔭ ᐊᓐ ᑲ ᐎᒐᐅᑦ ᒥᒂᑕ ᑲ ᐊᑎ ᐃᑕᐅᒡ᙮”
ᐛᐸᑕ ᓂᑦ ᐊᓱᑎᒪᒐᓐ ᒐ ᐎᒐᐅᑕᓐ ᑭᔭ ᒐ ᑭᓄᐛᔨᒥᑕᓐ ᒥᒄ ᐊᓐᑕ ᐊ ᐃᑐᑕᔨᓐ ᑭᔭ ᑲᐤ ᒋᑭ ᐸᓱᐅᑎᓐ ᐅᑕ ᐊᔅᒋᒡ᙮ ᓇᒪ ᒋᑭ ᒋ ᓂᑭᑎᑎᓐ ᐸᑎᒪ ᒋ ᐃᑐᑎᒪᓇ ᒥᓯᐛ ᐊᓐ ᑲ ᐊᓱᑎᒪᑕᓐ᙮”
ᐊᑯ ᐅᑎᐸᔨᒋᒐᐛ ᒂ ᐃᑎᑯᑦ, “ᑲᐤ ᐊᓐᑕ ᒐ ᐃᑐᑕᔨᓐ ᑲ ᐎᒋᒡ ᒋᑦ ᐊᓂᔅᑯᑕᐸᓐᒡ, ᐊᓐᑕ ᐊᓄᒡ ᐛᒋᒡ ᒋᐧᑲᓂᓯᒡ᙮ ᓂᑦ ᐊᓱᑎᒪᒐᓐ ᒐ ᑭᓄᐛᔨᒥᑕᓐ᙮”
ᐊᑲ ᐅᒋ ᑭᓄᐛᔨᒥᑕᒂ ᐊᐃᓯᒃ ᑭᔭ ᐊᑉᕋᐊᒻ ᐅᒋᓴᒪᓂᑐᒧᐛᐛ, ᒐᔅᑎᓇᔅ ᐱᓯᒄ ᒋᐸ ᒋᑎᓴᐅᓇᐱᓐ᙮ ᒋ ᐛᐸᑎᒻ ᒋᓴᒪᓂᑐᐤ ᑲ ᐃᓯ ᐎᓯᒐᔨᑎᒧᒡ ᑭᔭ ᑲ ᐃᓯ ᐅᔅᑯᐎᔭᓐ ᐊ ᐊᑐᔅᒐᔭᓐ᙮ ᐊᐅᑯᓐ ᑲ ᐅᒋ ᐛᐸᑎᔨᔅᒃ ᐅᑎᐸᔅᑯᓂᒐᐅᓐ᙮”
ᒥᒄ ᐎᔾ ᒂ ᑕᑦ ᐊᓐᑕ ᐊ ᐸᐃᑯᓯᑦ᙮ ᐊᑯ ᑕᑯᓯᓂᔨᒋ ᓇᐸᐛ ᑭᔭ ᒥᔭᓯᐧᑲᑯᑦ ᐃᔅᐱᔅ ᐊᒺᔭ ᐸᑕᐱᓂᔨᒡ᙮
ᒋᒋᐛ ᒋ ᓴᒋᓱᐤ ᒐᑭᑉ ᑭᔭ ᒋ ᒥᑯᔅᑲᑕᔨᑎᒻ᙮ ᒂ ᓂᓱᐎᒡ ᐃᓯ ᑎᐸᓇᐊᑦ ᐃᔪᐛ ᑲ ᐎᒐᑯᑦ ᑭᔭ ᒋᒡ ᐅᒪᔭᑕᓂᓯᒪ, ᒥᔅᑐᓴ, ᒥᒋᑎᒂ ᑭᔭ ᑲᐱᔎᐅᑯᒡ᙮
ᒋ ᐃᑐᑎᒧᒡ ᐃᔪᒡ ᑲ ᐃᑎᑯᒡ ᒐᑭᐸ᙮ ᒋ ᓂᔅᑐᓇᐅᒡ ᒥᓯᐛ ᒥᓂᑐᐧᑲᓇ ᑭᔭ ᒂ ᒥᔭᒡ ᒐᑭᐸ᙮ ᐃᔭᐱᒡ ᒋ ᒥᔭᐅᒡ ᐎᑐᑲᐛᒡ ᑲ ᒋᑭᒧᑕᒡ᙮ ᐊᑯ ᒐᑭᑉ ᓯᐸᔭᔅᑎᑯᒡ ᒥᔅᑯᐛᑎᑯᒡ ᒋ ᐃᔨᔅᑭᒥᒋᓇᐤ ᒥᒋᒪ ᓴᑭᒥᒡ᙮
ᐊᑯᑕ ᑭᔭ ᒋᓴᒪᓂᑐᐤ ᐸᑕᓪ ᐅᒡ ᒋ ᐃᓯᓂᐧᑲᑎᒻ ᐊᓂᔭ ᐅᑕᓇᔪᐤ ᐛᔅ ᐊᑯᑕ ᐊᓐᑕ ᑲ ᓄᑯᓯᔅᑐᐛᑦ ᒋᓴᒪᓂᑐᐤ ᒐᑭᐸ ᐃᔅᐱ ᑲᒋ ᒋᑎᓴᒪᔨᒋ ᐅᔅᑕᓯᔪᐛ᙮
ᐊᑯ ᒂ ᒥᔭᑦ ᐅᓱᐛᔨᒋᒐᐅᓐ ᒐᑭᐸ ᑭᔭ ᐅᑯᓯᔪᐛ ᐊ ᐃᔅᒋᔄᑦ, “ᐅ ᒋᓴᒪᓂᑐᐤ ᒋᔾ ᐅ ᓂᒧᓱᒻ ᐊᑉᕋᐊᒻ ᑭᔭ ᓄᑕᐎᔾ ᐊᐃᓯᒃ ᑲ ᐊᔭᒥᐊᔅᑐᐛᒡ, ᒋᔾ ᐅ ᒋᓴᒪᓂᑐᐤ ᑲ ᐸᒋ ᒥᔪ ᑭᓄᐛᔨᒥᔨᓐ ᒥᓯᐛ ᑕᑐᐤ ᒋᓯᑲᐛ ᑲ ᐃᔅᐱᔅ ᐱᒪᑎᓯᔭᓐ᙮
ᐊᑯ ᒥᔭᑐᐛᒡ ᑎᐸᔨᒋᒐᓱᐛ ᐊ ᐊᔨᒥᓯᒡ, ᒋ ᐎᐧᑯᒋᐃᑯᐅᒡ ᒪᒃ ᐅᑦ ᐊᔨᒥᐃᑯᓯᐅᓄᐛᒡ ᐅᒡ᙮
ᐅ, ᑭᒪ ᐃᔪᒡ ᒪᒥᒋᒪᒡ ᑎᐸᔨᒋᒐᓱᐛ ᐅᒥᔪᑐᑕᒐᐅᓂᔪᐤ ᐅᒡ, ᑭᔭ ᑲ ᐃᓯ ᒪᒥᔅᑲᒡ ᑐᑐᐛᔨᒋ ᐃᔪᐛ ᐅᑦ ᐊᐛᓯᒥᓯᔨᐛ !
ᒋᓴᒪᓂᑐᐤ ᐊᐅᒄ ᒋ ᒋᔅᐸᐛᑎᑯᓯᐅᓄᐤ ᑭᔭ ᒋᒥᔅᑯᐅᓯᐅᓄᐤ, ᑲ ᐎᒋᐃᐛᑦ ᐊ ᐊᔨᒥᓯᓇᓄᐎᒡ᙮
ᓇᓂᑐᒥ ᒪᒃ ᐊᔨᒥᓱᐤ ᒋᓯᑲᒐ: ᒋᑭ ᐎᐧᑯᒋᐃᑎᓐ, ᐊᑯ ᒐ ᒋᔅᑕᒋᒥᔨᓐ᙮”
ᓂᑭ ᓇᓂᑐᒥᒄ, ᓂᑭ ᓂᔅᑯᒪᐤ ᒪᒃ: ᓂᑭ ᐎᒐᐊᐤ ᐊᔨᒥᓯᒐ; ᓂᑭ ᐱᒪᒋᐊᐤ, ᑭᔭ ᓂᑭ ᒋᔅᑕᔨᒪᐤ᙮