4 ᐊᑯ ᒪᒃ ᒐ ᒥᔨᑕᓐ ᓂᓱᐛᔨᒋᒐᐅᓐ ᐊᒺᔭ ᐳᓂᐱᒪᑎᓯᔭᓐ᙮”
ᒋ ᓱᐛᔨᑕᑯᐛᐤ ᐊᑉᕋᒪ, ᐊ ᐃᔅᒋᔄᑦ, “ᓱᐛᔨᑕᑯᐃᑯᐤ ᐊᑉᕋᒻ ᒋᓴᒪᓂᑐᐛ ᒪᐅᒡ ᐃᔅᐱᒥᒡ, ᑲ ᐅᓯᑕᔨᒋ ᒋᒋᒋᓯᑯᔪᐤ ᑭᔭ ᐊᔅᒋᔪᐤ,
ᒪᒂᒡ ᑲ ᐛᒋᔭᒪᒡ ᕋᐸᑲᔨᒋ, ᒋ ᐃᔅᒋᔄᐅᒡ ᐅᔭ ᐊᔭᒥᐊᐅᓂᔪᐤ, “ᑭᒪ ᐃᑐᑐᐛᑦ ᒋᓴᒪᓂᑐᐤ ᕋᐸᑲᔨᒋ ᒐᒋ ᐅᑲᐎᒪᐅᔨᒋ ᒋᓴᒥᑕᓯᒥᑎᓄᐤ ᐊᓂᔅᑯᑕᐸᓇ᙮ ᑭᒪ ᒋᓴᒪᓂᑐᐤ ᒥᔭᑦ ᒋᑦ ᐊᓂᔅᑯᑕᐸᓇ ᒐᒋ ᓴᒂᐊᔨᒋ ᐊᓂᔭ ᑲ ᐛᐧᑲᑎᑯᔨᒋ᙮”
ᒐᑭᑉ ᒂ ᓂᑐᐛᐱᒪᑦ ᓂᓱ ᒥᔅᑐᓯᓴ, ᒂᓂᐸᐊᑦ ᑭᔭ ᐱᔭᑐᐛᑦ ᐅᑲᐎᔭ᙮ ᐊᑯ ᕋᐸᑲ ᒂ ᐱᒥᓄᐛᑦ ᒧᔭᒻ ᐅᑕᐎᔪᐛ ᐊᓯᐎᔅᑎᒥᔨᒋ᙮
ᒪᒃ ᒂ ᒥᔭᑦ ᐎᔭᓯᔪᐤ ᑲ ᐱᒥᓄᐛᑦ ᒋᒡ ᐱᔅᒐ ᐸᒂᓯᑭᓇ ᒐᒋ ᐃᑐᑐᐛᔨᒋ ᐅᑕᐎᔪᐛ᙮
ᒐᑭᑉ ᐃᑕᐤ ᐅᑕᐎᔭ, “ᓂᔾ ᐅ ᐃᓴᐅ ᒋᓂᔅᑎᒧᓴᓂᒻ᙮ ᓂᒋ ᐃᑐᑕᓐ ᑲ ᐃᑎᓱᒥᔨᓐ᙮ ᓯᒥᑎᐱᔾ ᑭᔭ ᒐ ᒥᒋᔨᓐ ᐱᔅᒐ ᐎᔭᔅ ᑲ ᐱᒥᓄᐛᔭᓐ ᐊᑯ ᒪᒃ ᒐ ᒥᔨᓐ ᒋᓱᐛᔨᒋᒐᐅᓐ᙮”
ᓇᒪ ᒋᒋᐛ ᐅᒋ ᒋᔅᒐᔨᒪᐤ ᐊᐃᓯᒃ ᐊ ᔭᐅᒂᓂ ᐃᓴᐅᐛ,
ᐊᑯ ᐊᐃᓯᒃ ᐊᑕᑦ, “ᐸᑐᐎ ᐎᔭᔅ, ᒋ ᒥᒋᓱᔭᓇ ᐊᑯ ᒐ ᐛᑕᐱᒥᑕᓐ ᒧᔭᒻ ᐊᓐ ᐊᐛᓐ ᒐ ᑎᐸᐊᒪᑯᑦ ᒋᓴᒪᓂᑐᐛ᙮” ᒪᒃ ᒐᑭᑉ ᐊ ᐃᑐᑐᐛᑦ ᐅᑕᐎᔭ ᒥᒋᒥᔪᐤ᙮ ᑲᒋ ᐃᓯ ᒥᒋᓱᔨᒋ, ᒐᑭᑉ ᒋ ᒥᔭᐤ ᐃᔭᐱᒡ ᓱᒥᓇᐳᔪᐤ ᒐ ᒥᓂᔨᒋ᙮
ᐊᑯ ᓂᔭᑕᑦ ᐅᑕᐎᔭ ᑭᔭ ᓴᐛᔨᒪᑦ᙮ ᐃᔅᐱ ᐊᐃᓯᒃ ᒪᔭᑎᒺᑦ ᐅᑦ ᐊᐱᒋᑕᐅᓂᔪᐛ, ᒂ ᒥᔭᑦ ᐅᓱᐛᔨᒋᒐᐅᓐ ᑭᔭ ᐊᑕᑦ, “ᐊᓯᒪᑯᔅᑦ ᓂᑯᔅ ᐊᐅᑯᓐ ᒧᔭᒻ ᐊᓯᒪᑯᓂᔨᒡ ᓄᒋᒥᔪᐤ ᐊᔅᒋᔪᐤ ᑎᐸᔨᒋᒐᓱᐛ ᑲ ᓱᐛᔨᑕᑯᑕᔨᒋ᙮
ᒋ ᐱᒥᓄᐛᐤ ᐃᓴᐅ ᓄᒋᒥᔪᐤ ᒥᒋᒥᔪᐤ ᑲ ᓂᐸᑕᑦ ᑭᔭ ᒂ ᐃᑐᑐᐛᑦ ᐅᑕᐎᔭ᙮ ᒂ ᐃᑕᑦ, “ᓯᒥᑎᐱᔾ ᓄᑕ ᑭᔭ ᒐ ᒥᒋᔨᓐ ᓄᒋᒥᔪᐤ ᒥᒋᒻ ᑲ ᐱᒥᓄᑎᑕᓐ᙮ ᐊᑯ ᒪᒃ ᒐ ᒥᔨᓐ ᒋᓱᐛᔨᒋᒐᐅᓐ᙮”
ᒪᒃ ᕋᐸᑲ ᒋ ᐸᑐᐛᐤ ᒐᒂᓂᔪᐤ ᐊᐃᓯᑲ ᑲ ᐃᑕᔨᒋ ᐃᓴᐅᐛ᙮ ᐃᔅᐱ ᑲᒋ ᐃᔨᒥᑦ ᐊᐃᓯᒃ, ᐃᓴᐅ ᒋ ᔅᑐᑕᐤ ᒐᒋ ᓂᑐᐛᐊᑦ ᐅᑕᐎᔭ᙮
‘ᒐ ᐸᑐᐎᓐ ᒥᒋᒻ ᑭᔭ ᒐ ᐱᒥᓄᐛᔨᓐ ᒪᒃ ᐊᐎᑭᓯᒡ ᒥᒋᒻ ᒐᒋ ᒥᒋᔭᓐ, ᐊᑯ ᒪᒃ ᒐ ᒥᔨᑕᓐ ᓂᓱᐛᔨᒋᒐᐅᓐ ᑎᐸᔨᒋᒐᓱᐤ ᐊ ᐛᐱᒥᑕᐧᒄ ᐊᒺᔭ ᐳᓂᐱᒪᑎᓯᔭᓐ᙮’
ᐃᑐᑕᒪ ᒥᔅᑐᓯᒡ ᐊᑕᒡ ᑭᔭ ᒐ ᐸᓱᐅᑥᐤ ᓂᓱ ᐊ ᐎᔪᐅᒡ ᒥᔅᑐᓯᓯᒡ, ᐊᑯ ᒐ ᐱᒥᓄᑎᒃ ᒍᑕᐎᔾ ᐊᐎᑭᓂᔨᒡ ᒥᒋᒥᔪᐤ ᒧᔭᒻ ᐊᓯ ᐎᔅᑕᐧᒃ᙮
ᒂ ᐃᑕᑦ ᐊᐃᓯᒃ, “ᑭᒪ ᒋᓴᒪᓂᑐᐤ ᐊᓐ ᒥᓯᐛ ᐊᓯ ᓱᐧᑲᑎᓯᑦ, ᐃᑐᑕᐧᒃ ᒐᒋ ᐃᔅᐱᔪᑦ ᒥᔪ ᒐᒂᓂᔪᐤ᙮ ᑭᒪ ᒥᒐᑦ ᐊᐛᓴ ᒥᔨᔅᒃ ᑭᔭ ᒥᒐᑎᒡ ᒋᑦ ᐊᓂᔅᑯᑕᐸᓐᒡ ᐊᑯ ᒪᒃ ᒐ ᒥᒐᑐᔅᑲᓇᓯᒡ᙮
ᐊᑯ ᒍᓯᑉ ᐊᑕᑦ ᐅᑕᐎᔭ, “ᐊᐅᑯᓐᒡ ᐅᒡ ᓂᑯᓯᒡ ᐊᓂᔭ ᑲ ᒥᔨᑦ ᒋᓴᒪᓂᑐᐤ ᐅᑕ ᐃᒋᑉᑎᒡ᙮” ᐊᑯ ᒐᑭᑉ ᐃᑕᐤ, “ᐸᓱᐅᒡ ᐅᑕ ᐊᑯ ᒪᒃ ᒐ ᒥᔨᒂᐤ ᓂᓱᐛᔨᒋᒐᐅᓂᔪᐤ᙮”
ᐊᐅᑯᓐᒡ ᐅᒡ ᐃᔅᕋᐃᓪ ᓂᓱᓴᑉ ᑲ ᐃᑎᔅᑲᓂᓯᒡ ᑭᔭ ᐊᐅᑯᔪᐤ ᐅᔭ ᒐᑭᑉ ᑲ ᐃᓯ ᐃᔨᒪᐊᑦ ᑲ ᓂᓱᓴᐳᔨᒋ ᐅᑯᓴ ᑭᔭ ᑲ ᐛᒋᔭᒪᑦ᙮ ᒥᓯᐛ ᐊᑎ ᐸᐸᐃᑯᓯᔨᒋ ᐅᑯᓴ ᒋ ᒥᔭᐤ ᒥᔪᐃᔨᒧᐅᓂᔪᐤ᙮
ᐊᑯ ᐊᓐ ᒋᓴᐃᔪᐤ ᓯᒥᐅᓐ ᒥᓯᐛ ᑲ ᓱᐛᔨᒪᑦ, ᐊᑯ ᒂ ᐃᑕᑦ ᐊᓂᔭ ᒪᕆᔨᒋ, ᒋᓴᓴ ᐅᑲᐎᔪᐛ, “ᐅ ᐊᐛᔅ ᒋ ᐅᑎᓂᑯᐤ ᒋᓴᒪᓂᑐᐛ, ᒋᑭ ᐃᑐᑐᐛᐤ ᐊᓂᔭ ᐃᔅᕋᐃᓪ ᐃᔪᐛ ᒐᒋ ᐸᒋᓯᓂᔨᒋ, ᐊᑯ ᐊᓂᔭᔪᐛ ᑲ ᑕᑈᔭᔨᒥᑯᑦ ᒋᑭ ᐅᐱᑲᐳᐛᐤ᙮ ᐅ ᐊᐛᔅ ᒋᑭ ᐛᐸᑎᔨᐛᐤ ᒋᓴᒪᓂᑐᐛ ᐅᐱᒪᒋᐃᑯᓯᐅᓂᔪᐤ, ᒥᒄ ᒪᒃ ᒥᒐᑦ ᐊᐛᔪᐛ ᒋᑭ ᓂᔅᑯᔅᑕᑯᐤ᙮
ᐊᔅᒄ ᒪᒃ ᒪᒂᒡ ᐊ ᓱᐛᔨᒪᑦ ᐊᑯᑕ ᒂ ᐅᒋ ᓂᑭᑕᑦ, ᒋᒋᒋᓯᑯᒡ ᒂ ᐃᓯ ᐅᐱᔨᑦ᙮
ᐊᑯ ᒪᒃ ᒥᓐ ᑯᑎᑭᒡ ᐊᐛᓐᒋ ᒐ ᐊᔨᒧᒥᒂᐤ ᑕᑈ ᐊᒋ ᑕᑈᔭᔨᒪᒡ ᒋᓴᒪᓂᑐᐛ᙮ ᐊᐃᓯᒃ ᒋ ᑕᑈᑎᒻ ᑕᓐ ᑲ ᐃᑎᑯᑦ ᒋᓴᒪᓂᑐᐛ᙮ ᐊᑯ ᒪᒃ ᐊᔅᒄ ᒐ ᐊᑲ ᓂᐱᑦ, ᒋ ᓱᐛᔨᒪᐤ ᐅᑯᓴ ᒐᑭᐸ ᑭᔭ ᐃᓴᐅᐛ, ᐊᑯ ᑲ ᐎᑎᒧᐛᑦ ᑕᓐ ᒐ ᐃᔅᐱᔨᒡ᙮
