15 ᒥᓄᐛᒡ ᒋᒋᒋᓯᑯᒡ ᐛᒋ ᑕᑈᑎᑯᑦ ᑎᐸᔨᒋᒐᓱᐛ ᐅᑦ ᐊᓐᒋᓂᒥᔪᐛ᙮
ᒥᒐᑦ ᒋᑭ ᒥᔨᑎᓐ ᐊᓂᔅᑯᑕᐸᓐᒡ ᒐ ᐊᑲ ᒋ ᐊᒋᒪᑭᓄᐅᒡ ᒐ ᐃᔅᐱᒐᑎᒡ᙮”
ᑎᐸᔨᒋᒐᓱᐤ ᐅᑦ ᐊᓐᒋᓂᒪ ᒋ ᒥᔅᑯᐛᐤ ᐦᐊᐃᑲᕋ ᒥᒋᒪ ᒧᓇᐃᐸᓂᒡ ᐅᐱᒪ ᒪᔅᑭᓇᒡ ᓱᕐ ᐊᑎᒧᐎᒡ᙮
ᑎᐸᔨᒋᒐᓱᐤ ᒂ ᐃᑕᑦ ᐊᑉᕋᐊᒪ, “ᒋ ᐸᐃᑯᔅᑕᐤ ᑕᑐᐤ ᐱᓯᒺᔭᒐ, ᑲᐤ ᐅᑕ ᓂᑭ ᑎᑯᓯᓐ ᑭᔭ ᓴᕋ ᒋᑭ ᐅᑯᓱᐤ᙮” ᓴᕋ ᐅᑕᒡ ᒋ ᐅᒋᑲᐳᔅᑐᐛᐤ, ᒋᐱᔎᒡ ᐅᒡ ᐅᐱᒍᐎᔭᓂᒋᐛᐳᐛᒡ ᐛᒋ ᓂᑐᑐᐛᑦ᙮
ᒪᒃ “ᑎᐸᔨᒋᒐᓱᐤ ᑲ ᐅᑎᓂᒪᒐᑦ,” ᒋ ᐃᓯᓂᐧᑲᑎᒻ ᐊᑉᕋᐊᒻ ᐊᓂᔭ ᐃᑕᐅᓂᔪᐤ ᑭᔭ ᐃᔪᒡ ᐃᔭᐱᒡ ᐊᓄᒡ ᑲᓯᑲᔨᒡ ᒂ ᐃᔅᒋᔄᒡ, “ᐊᓐᑕ ᐅᐱᔅᑯᑎᓇᒥᒡ ᑎᐸᔨᒋᒐᓱᐤ, ᒋᑭ ᐅᑎᓂᒪᒐᐤ᙮”
ᒂ ᐃᑎᑯᑦ, “ᓂᑦ ᐃᓯᓂᐧᑲᓱᐅᓂᒡ ᐅᒡ ᓂ ᑐᑕᓐ ᐊᓱᑎᒪᒐᐎᓐ ᐃᔅᒋᔄᐤ ᐅᑎᐸᔨᒋᒐᐤ, ᐛᔅ ᐊᓐ ᑎᔭᑈᑐᐎᓐ ᑭᔭ ᐊᑲ ᐅᒋᑯᔅᑎᔨᓐ ᑲ ᐸᐃᑯᑦ ᒋᑯᔅ᙮
ᐊᑯ ᒋᓴᒪᓂᑐᐤ ᐅᑦ ᐊᓐᒋᓂᒪ ᓂᒋ ᐃᔨᒥᑯᔪᐛ ᓂᐳᐛᒧᐅᓂᒡ ᑭᔭ ᓂᒋ ᐃᑎᑯᔪᐛ, ‘ᒐᑭᑉ,’ ᑭᔭ ᒂ ᐃᑎᒃ, ‘ᒐᒂᓐ ?’
ᒋᔾ ᐅ ᐃᔭᐱᒡ ᐊᓐᒋᓐ ᐊᓐ ᑲ ᐱᐧᑯᒋᐃᑦ ᒥᓯᐛ ᐊ ᐃᓯᓇᑯᓂᔨᒡ ᑲ ᒪᔭᑎᓂᔨᒡ ᐅᒡ, ᒋᓴᒪᓂᑐᐤ, ᓱᐛᔨᑕᑯᔨᒡ ᐅᒡ ᑲᓂᓯᒡ ᓇᐸᓯᒡ᙮ ᑭᒪ ᐃᔪᒡ ᒋᔅᒋᑕᒡ ᓂᑦ ᐃᓯᓂᐧᑲᓱᐅᓂᔪᐤ ᑭᔭ ᐅᑦ ᐃᓯᓂᐧᑲᓱᐅᓂᔪᐛ ᓄᑕᐎᔭ ᐊᐃᓯᑲ ᑭᔭ ᓂᒧᓱᒪ ᐊᑉᕋᐊᒪ ᐅᔭ ᓇᐸᓴ ᐅᒡ᙮ ᑭᒪ ᐅᒡ ᓇᐸᓯᒡ ᒥᒐᑎᔨᒋ ᐅᑦ ᐊᓂᔅᑯᑕᐸᓄᐛᐛ᙮”
ᐊᑯᑕ ᒪᒃ ᑲ ᓄᑯᓯᔅᑕᑯᑦ ᑎᐸᔨᒋᒐᓱᐛ ᐅᑦ ᐊᒋᓂᒥᔪᐛ ᐊᓐᑕ ᑕᑕᐅᒡ ᐊ ᐃᔅᑯᑕᐎᒡ ᓯᑲᒡ ᐅᒡ᙮ ᐊᑎᓱᐧᒄ ᒧᓱᔅ ᐛᐸᑕᐧᒃ ᐊ ᐛᔭᑕᔨᒋ ᓯᑲᐛ, ᓇᒪ ᐅᒋ ᐃᔎᑕᔪᐛ᙮
“ᐃᔅᐱ ᒪᒃ ᓇᐎᔪᐛ ᐱᐳᓇ ᑲ ᑕᑦ ᒧᓱᔅ ᐊᓐᑕ ᒥᑎᔭᓐ ᐊᔅᒋᒡ, ᐸᐃᒂᐤ ᐊ ᒋᓯᑲᔨᒡ ᒋ ᑕᐤ ᐊᓐᑕ ᐸᐧᑯᑎᔅᑭᒥᑲᒡ, ᒥᒋᒪ ᐊᓐᑕ ᐱᔅᑯᑎᓇᐤ ᓴᐃᓇᐃ ᑲ ᐃᓯᓂᐧᑲᑕᔨᒡ᙮ ᒋ ᐛᐸᑎᒻ ᐊ ᐱᔅᑯᑲᐳᐃᔨᒡ ᐊᓐᑕ ᐊ ᐃᔎᑕᐱᔨᒋ ᓂᐱᓯᔭᑎᒂ, ᐊᑯᑕ ᒪᒃ ᐊᓐᑕ ᒂ ᐅᒋ ᓄᑯᓯᔅᑕᑯᑦ ᐊᓐᒋᓇ᙮
ᒪᒥᑐᓇᔨᒪᐧᒄ ᒪ ᒋᓴᒪᓂᑐᐤ ᐊ ᐃᔅᐱᔅ ᒋᔅᑕᔨᑕᑯᓯᑦ᙮ ᐎᔾ ᑎᐱᔨᐛ ᐅᑦ ᐃᓯᓂᐧᑲᓱᐅᓐ ᒋ ᐊᐱᒋᑕᐤ ᐊ ᐃᔅᒋᔄᑦ ᒐᔅᑎᓇᔅ ᒐ ᐊᑲ ᓂᑕ ᐅᒋ ᐊᑎᔅᑕᐛᑦ ᑕᓐ ᑲ ᐃᓯ ᒐᔅᑎᓄᒡ ᐃᑕᑦ ᐊᑉᕋᐊᒪ ᒐ ᐃᑐᑎᒧᐛᑦ᙮ ᓇᒪ ᑯᑎᑲ ᐊᐛᔪᐛ ᐅᒋ ᐎᐊᐤ ᒐᒋ ᐛᐸᑎᔭᑦ ᐊᑉᕋᐊᒪ ᐊ ᑕᑈᑦ ᑕᓐ ᑲ ᐃᔅᒋᔄᑦ, ᐛᔅ ᑕᐸ ᑕᐤ ᑯᑎᒃ ᐊᐛᓐ ᐊᔅᐱᔅ ᒋᔅᑕᔨᑕᑯᓯᑦ ᐊᔅᐱᔅ ᒋᔅᑕᔨᑕᑯᓯᑦ ᐎᔾ ᒋᓴᒪᓂᑐᐤ᙮
ᐊᑯ ᐊᓐ ᐊᓐᒋᓐ ᓂᐱᑕ ᐊᓐᑕ ᐎᓂᐸᑯᒡ ᑭᔭ ᓂᐱᑕ ᐊᔅᒋᒡ ᑲ ᐃᓯ ᑕᐧᑯᔅᒐᑦ ᑲ ᐅᐱᓂᔅᒐᐱᔨᑕᑦ ᐅᒥᔪᓂᑎᒋᔾ ᒋᒋᒋᓯᑯᒡ ᐃᔅ᙮
