15 ᐊᑲᐎᔾ ᒋᑭ ᑭᒐᒧᑎᓐ᙮
ᐊᐛᓐ ᐊ ᒋᒧᑎᑦ ᑯᑎᑲ ᐊᐛᔪᐛ ᐊ ᐎ ᑕᐛᒐᑦ ᑭᔭ ᒪᒃ ᒐᒋ ᑭᓄᐛᔨᒪᑦ ᒧᔭᒻ ᐊᐱᒋᐊᑭᓇ, ᒋᑭ ᐎ ᓂᐸᐊᑭᓄᐤ᙮
ᐛᔅ ᒥᑕᐃᒡ ᐅᒋᐱᔪᐤ ᒥᒋ ᒪᒥᑐᓇᔨᑎᒧᐅᓐ, ᓂᐸᐃᐛᐅᓐ, ᐱᓯᒂᑎᓯᐅᓐ, ᓂᑎᒥᒄ ᐃᑐᐅᓐ, ᑭᒐᒧᑐᐅᓐ, ᑭᑭᒋᔪᐅᓐ, ᑭᔭ ᐸᔅᑕᒧᐅᓐ᙮
ᐊᑯ ᐊᓐ ᓇᐸᐤ ᒂ ᐃᑕᑦ, “ᒐᒄ ᐎᓱᐛᐅᓇ ?” ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ ‘ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᐱᓯᒂᑎᓯ, ᐊᑲᐎᔾ ᒋᒧᑎ, ᐊᑲᐎᔾ ᒋᑭ ᓂᑎᔭᒋᒪᐤ ᐊᐛᓐ,
ᐊᑯ ᒋᓴᔅ ᒂ ᐃᑕᑦ, “ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ‘ᐊᔭᒥᐊᐅᒋᐛᑉ ᒋᑭ ᐃᓯᓂᐧᑲᑕᐤ ᓂᒡ᙮’ ᒥᒄ ᒪᒃ ᒋᔨᐛᐤ ᑲᒋᒧᑎᒡ ᐎᒋᐛᐤ ᐊᐅᑯᓐ ᐊ ᑕᐱᒋᑕᔭᒄ ᐅ ᒋᓴᐊᔭᒥᐊᐅᒋᐛᑉ᙮” ᐊᐅᑯᓐ ᒪᒃ ᐅᔭ ᑲ ᐃᓯ ᐎᑎᒧᐛᑦ ᒋᓴᔅ ᐊᓂᔭ ᑲ ᐊᑕᐛᔨᒋ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮
ᓇᒪᔭᔪᐤ ᐊ ᒋᔅᑎᒪᒐᔨᒪᑦ ᐊᓂᔭ ᑲ ᒋᔅᑎᒪᑎᓯᔨᒋ ᐊᓂᔭ ᐛᒋ ᐃᔅᒋᔄᑦ, ᐎᔾ ᒋ ᐎ ᐅᑎᓂᒪᓱᐤ ᐊᓂᔭ ᓱᓇᔭᔪᐤ ᐛᔅ ᐊᐅᑯᓐ ᑲᒋ ᐃᑎᑦ ᒪᓐ ᐊᑎ ᐎᔾ ᐊᒋ ᓂᓇᑭᑐᐛᔨᑕᐧᒃ ᐊᓂᔭ ᓱᓇᔭᔪᐤ ᑲᒋ ᒥᔭᑭᓄᔨᒋ ᒋᓴᓴ ᑭᔭ ᐅᒋᔅᒋᓄᐊᒧᐛᑭᓂᔪᐛ᙮
ᐅᔭ ᐃᑎᓱᐛᐅᓇ, “ᐊᑲᐎᔾ ᐱᓯᒂᑎᓯ, ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᒋᒧᑎ, ᐊᑲᐎᔾ ᒧᔅᑕᓂᒧᐤ ᑯᑎᒃ ᐊᐛᓐ ᑕᓐ ᐊ ᐃᓯ ᐊᔭᑦ᙮” ᑯᑎᑲ ᒪᒃ ᐃᑎᓱᐛᐅᓇ ᐊ ᐃᑎᒂᒋ, ᒥᓯᐛ ᒪᒧᐤ ᒋᑭ ᒋ ᐃᓯ ᑭᓄᐛᐸᑕᑭᓄᐛ ᐊᓐᑕ ᐊᓐ ᐸᐃᒄ ᐃᑎᓱᐛᐅᓐ ᑲ ᐃᑎᓱᐛᒥᑲᒡ, “ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮”
ᑭᔭ ᒪᒃ ᐊᓐᒡ ᑲᓂᑕᐅᒋᒧᑎᒡ, ᑭᔭ ᒪᒃ ᐊᓐᒡ ᒧᔅ ᑲ ᒧᔅᑕᓇᔨᑕᒡ ᒐᒂᔪᐛ, ᑭᔭ ᒪᒃ ᐊᓐᒡ ᑲ ᐎᒋᐸᒡ, ᑭᔭ ᒪᒃ ᐊᓐᒡ ᓂᑎᒥᒄ ᑲ ᐃᑕᒋᒪᒡ ᑯᑎᑲ ᐊᐛᔪᐛ, ᑭᔭ ᒪᒃ ᑲᒋᒧᑎᒡ, ᓇᒪ ᐛᒋ ᐸᐃᒄ ᐅᒡ ᒋᑭ ᐅᒋ ᐊᓂᔅᒐ ᐊᔭᐅᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮
ᑭᔭ ᐊᓐ ᐊᐛᓐ ᑲ ᑭᒐᒧᑎᑦ ᒋᐸ ᐳᓂᐤ ᐊ ᑭᒐᒧᑎᑦ᙮ ᐃᔭᐱᒡ ᒋᐸ ᐊᑐᔅᒐᐤ ᑯᐃᔅᒄ ᐊ ᐃᑎᑦ ᐊ ᐎ ᐎᒋᐃᓱᑦ ᑭᔭ ᐊᑐᔅᒐᒐ ᐊᑯᑕ ᒐᒋ ᐅᒋ ᐎᒋᐊᑦ ᑲ ᒋᔅᑎᒪᑎᓯᔨᒋ ᐊᐛᔪᐛ᙮
ᐊᑲᐎᔾ ᒪᒃ ᐊᐛᓐ ᐅᔭ ᒋᑭ ᐅᒋ ᐎ ᐃᓯ ᐅᓂᑐᑐᐛᐤ ᐎᐧᑲᓂᓴ᙮ ᔅᒋ ᐎᑎᒪᑎᓇᓐ ᓱᒃ ᐊᒋ ᐃᔭᒂᒥᑕᒡ ᐅᑎᐸᔨᒋᒐᐤ ᒐ ᐛᐛᓯᐊᑦ ᒥᓯᐛ ᐊᐛᔪᐛ ᐅᔭ ᑲ ᐃᓯ ᐅᓂᑐᑎᒥᔨᒋ᙮
