17 ᐃᔅᐱ ᒪᒃ ᑕᑯᓯᓂᒡ ᐅᑕ, ᑎᐛᒡ ᓂᒋ ᐎ ᓂᓇᐃᐱᔨᑕᐛᓐ ᒐᒋ ᑎᐸᔅᑯᓇᑭᓄᔨᒋ ᑈᓚ᙮ ᐊᓐ ᐎᔭᐸᒡ ᓂᒋ ᐃᑐᑕᓐ ᑎᐸᔅᑯᓂᒐᐅᒋᐛᐱᒡ᙮ ᐃᔅᐱ ᒪᒃ ᑲ ᐛᐛᔨᐱᔭᓐ ᐊᐅᑯᐤ ᒂ ᐃᑎᓱᐛᔭᓐ ᒐᒋ ᐸᒋ ᐱᑎᑲᐊᑭᓄᐅᑦ ᐊᓐ ᑲ ᐎ ᑎᐸᔅᑯᓇᑭᓄᐅᑦ, ᐊᐅᒄ ᐅ ᑈᓪ᙮
ᒪᒂᒡ ᒪᒃ ᑈᓚᑦ ᐊ ᐊᐱᑦ ᐊᓐᑕ ᑎᐸᔅᑯᓂᒐᐅᒋᐛᐱᒡ ᐎᐛ ᒋ ᐸᒋ ᐃᑎᓴᐛᔪᐛ ᐊᐛᔪᐛ ᒐᒋ ᐃᑎᑯᑦ, “ᐊᑲᐎᔾ ᐎᔭᔅᑐᑐᐤ ᐊᓐ ᑲ ᑯᐃᔅᑯᑕᑎᓯᑦ ᓇᐸᐤ᙮ ᐛᔅ ᐊᓐ ᓇᔅᒡ ᓂ ᒥᑯᔅᑲᑕᔨᑎᒥᐃᑯᐛᓐ ᑕᓐ ᑲ ᐃᓯ ᐳᐛᑎᒃ ᑕᐱᔅᑲᔨᒡ᙮”
ᐊᑯ ᑈᓪ ᒂ ᐃᔅᒋᔄᑦ, “ᐅᑕ ᐅ ᑲ ᓂᐳᐅᔭᓐ ᓯᓴᕐ ᐅᑎᐸᔅᑯᓂᒐᐅᒋᐛᐱᒡ ᐊᑯᑕ ᐅᑕ ᓂᐸ ᑎᐸᔅᑯᓂᑯᐅᓐ ᐛ ᑎᐸᔅᑯᓂᑯᐛᓇ᙮ ᑕᐸ ᑎᑯᓂᔪᐤ ᑕᓐ ᑲ ᐃᓯ ᐅᓂᑐᑐᐅᒂᐤ ᐅᒡ ᒍᐤ ᐃᔪᒡ᙮ ᒋᔾ ᓇᓂᑎᒻ ᒋ ᒥᔪ ᒋᔅᒐᔨᑕᓇᒐ ᐅ᙮
ᐊᑯ ᐊᓐᒡ ᑲ ᑎᑯᓂᔨᒡ ᑕᓐ ᑲ ᐎᓯ ᐊᑕᒪᔨᒪᒡ ᑈᓚ, ᓇᒪ ᐅᒋ ᐃᓯ ᐊᑕᒪᔨᒪᐅᒡ ᐊᓂᔭ ᑲ ᐃᑕᔨᒥᒂᐤ ᒐ ᐃᓯ ᐊᑕᒪᔨᒪᒡ᙮
ᓴᓯᑲᓐ ᒪᒃ ᔭᓇᐤ ᑭᔭ ᒪᒃ ᐸᐃᑯᔪᐛ ᒋᓯᑲᐛ ᒋ ᐃᔅᐱᔅ ᑕᐤ ᒥᓐ ᐸᔅᑕᔅ ᐊᓐᑕ ᒋᕈᓯᓕᒥᒡ᙮ ᐊᑯ ᒂ ᐃᑐᑕᑦ ᐊᓐᑕ ᓯᓴᕆᔭᒡ᙮ ᐎᔭᐱᓂᔨᒡ ᒪᒃ, ᒋ ᐊᑎ ᐛᐛᔨᐳᐤ ᐊᓐᑕ ᑎᐸᔅᑯᓂᒐᐅᒋᐛᐱᒡ ᐃᔅᐱ ᒥᓯᐛ ᑲ ᒪᒧᐎᔨᒋ ᐊᓂᔭ ᑲ ᐎ ᑎᐸᔅᑯᓇᔨᒋ ᑈᓚ᙮ ᐊᑯ ᑲ ᐃᑎᓱᐛᑦ ᑈᓚ ᒐᒋ ᐸᒋ ᐱᑎᑲᐊᑭᓄᔨᒋ᙮