38 ᐊᑯ ᐊᓐᒡ ᑲᒪᑯᓄᐛᓯᒡ ᒂ ᒋᐛᒡ ᓇᑕ ᒂ ᐎᑎᒧᐛᒡ ᐊᓂᔭᔪᐛ ᐅᒋᒪᐛ ᑕᓐ ᑲ ᐃᔅᒋᔄᔨᒋ ᑈᓚ᙮ ᐃᔅᐱ ᒪᒃ ᐱᔭᑕᒡ ᐊᓐᒡ ᐅᒋᒪᐅᒡ ᕈᒥᒡ ᐊ ᐃᓯ ᒥᓯᓇᓱᔨᒋ ᑈᓚ ᑭᔭ ᓴᓂᓴ, ᒋ ᓴᒋᓱᐅᒡ, ᐛᔅ ᒋ ᒋᔅᒐᔨᑎᒧᒡ ᐊᒋ ᐎ ᒥᒋᑐᑐᐛᒡ᙮
ᐊᑯ ᐊᕈᑦ ᑲ ᐎ ᓂᐸᐊᑦ ᐊᓂᔭ ᒠᓇ, ᒥᒄ ᒪᒃ ᒋ ᑯᔅᑕᐤ ᐊᓂᔭ ᒍᐤ ᐃᔪᐛ, ᐛᔅ ᒋ ᑕᑈᑎᒧᒡ ᐊ ᐅᒋᔅᒋᐛᐃᒐᓱᔨᒋ ᒠᓇ᙮
ᒋ ᐎ ᒪᑯᓇᐅᒡ ᒪᒃ ᐊᓂᔭ ᒋᓴᓴ, ᒥᒄ ᒋ ᑯᔅᑕᐅᒡ ᐊᓂᔭ ᐃᔪᐛ ᑕᓐ ᒐ ᐃᑎᔨᒋ ᐛᔅ ᐊᓐᒡ ᐃᔪᒡ ᓇᔅᒡ ᒋ ᒐᔅᑎᓇᑕᔨᑎᒧᒡ ᒋᓴᓴ ᐊ ᒋᔅᒋᐛᐃᒐᓯᐅᔨᒋ᙮
ᐊᑯ ᒋᓴᔅ ᒂ ᐃᔅᒋᔄᑦ, “ᒧᔭᒻ ᑎᐸᔅᑯᓂᒐᐅᒋᐛᐱᒡ ᐃᑐᑕᐃᑯᔨᓇ ᑭᔭ ᒍᐤ ᐊᔭᒥᐊᐅᒋᐛᐱᒡ ᑭᔭ ᒋᓴᐅᒋᒪᐛ ᐊ ᑕᔨᒋ ᒐᒋ ᑎᐸᔅᑯᓂᑯᔨᓐ ᐊᑲᐎᔾ ᒥᑯᔅᑲᑕᔨᑕ ᑕᓐ ᒐ ᐃᔅᒋᔄᔨᓐ ᑭᔭ ᑕᓐ ᒐ ᐃᓯ ᓂᔎᐅᓯᑥᔨᓐ ᒐᒋ ᐅᒋ ᐎᒋᐃᓱᔨᓐ᙮
ᐎᔭᐱᓂᔨᒡ ᒪᒃ, ᐊᓐᒡ ᕈᒻ ᐅᒋᒪᐅᒡ ᒋ ᐃᑎᓴᐛᐅᒡ ᐊᓂᔭ ᑲᒪᑯᓄᐛᓯᔨᒋ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᒐᒋ ᐃᑕᔨᒋ ᐊᓂᔭ ᑲ ᓇᑭᑐᐛᐸᑎᒥᔨᒋ ᑲᒪᑯᓄᐛᓯᐅᒋᐛᐱᔪᐤ, ᒐᒋ ᐱᔅᑎᓇᔨᒋ ᐊᓂᔭᔪᐛ ᓇᐸᐛ᙮
ᐱᔭᑕᒡ ᒪᒃ ᐅᔭ ᐊ ᐃᔅᒋᔄᔨᒋ ᑈᓚ ᐊᓐᒡ ᑲ ᐎ ᓂᑐ ᒋᔅᒐᔨᒪᒡ ᑕᓐ ᑲ ᐃᓯ ᐅᓂᑐᑎᒥᔨᒋ ᒋ ᐊᑎ ᐊᓴᑲᐳᐎᒡ᙮ ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᓯᓴᒋᓯᑦ ᐃᔅᐱᔅ ᑲ ᒋᔅᒐᔨᒪᑦ ᑈᓚ ᑕᑈ ᕈᒻ ᐊ ᐃᑎᓯᓇᓱᔨᒋ, ᑭᔭ ᐊᓂᔭ ᐊᒋ ᒪᑯᐱᑕᑦ ᐃᓴᒂᔭᐱᔪᐤ ᐊ ᐊᐱᒋᑕᑦ᙮