35 ᐎᔭᐱᓂᔨᒡ ᒪᒃ, ᐊᓐᒡ ᕈᒻ ᐅᒋᒪᐅᒡ ᒋ ᐃᑎᓴᐛᐅᒡ ᐊᓂᔭ ᑲᒪᑯᓄᐛᓯᔨᒋ ᐊᓐᑕ ᑲᒪᑯᓄᐛᓯᐅᒋᐛᐱᒡ, ᒐᒋ ᐃᑕᔨᒋ ᐊᓂᔭ ᑲ ᓇᑭᑐᐛᐸᑎᒥᔨᒋ ᑲᒪᑯᓄᐛᓯᐅᒋᐛᐱᔪᐤ, ᒐᒋ ᐱᔅᑎᓇᔨᒋ ᐊᓂᔭᔪᐛ ᓇᐸᐛ᙮
ᒐᔅᑎᓇᔅ ᒋᑭ ᒪᒥᒋᒥᑯᐛᓐ ᐅᑦ ᐊᐧᑯᔪᐛᓱᐅᓐ ᐃᔪᐤ; ᑲ ᐃᔅᑯᐱᔨᒡ ᐊᐧᑯᔪᐛᓱᐅᓐ ᒪᒃ ᒋᑭ ᒋᐱᒋᑕᓐ᙮
ᐊᑯ ᒋᓴᔅ ᒂ ᐃᔅᒋᔄᑦ, “ᒧᔭᒻ ᑎᐸᔅᑯᓂᒐᐅᒋᐛᐱᒡ ᐃᑐᑕᐃᑯᔨᓇ ᑭᔭ ᒍᐤ ᐊᔭᒥᐊᐅᒋᐛᐱᒡ ᑭᔭ ᒋᓴᐅᒋᒪᐛ ᐊ ᑕᔨᒋ ᒐᒋ ᑎᐸᔅᑯᓂᑯᔨᓐ ᐊᑲᐎᔾ ᒥᑯᔅᑲᑕᔨᑕ ᑕᓐ ᒐ ᐃᔅᒋᔄᔨᓐ ᑭᔭ ᑕᓐ ᒐ ᐃᓯ ᓂᔎᐅᓯᑥᔨᓐ ᒐᒋ ᐅᒋ ᐎᒋᐃᓱᔨᓐ᙮
ᐊᑯ ᐊᓐᑕ ᐎᒋᒡ ᒂ ᐃᑐᑕᐊᑦ ᐊᓂᔭ ᑈᓚ ᑭᔭ ᓴᓂᓴ, ᒂ ᒥᔭᑦ ᒥᒋᒥᔪᐤ ᒐᒋ ᒥᒋᓱᔨᒋ᙮ ᓇᔅᒡ ᒪᒃ ᒋ ᒥᔽᔨᑎᒻ ᑭᔭ ᐊᓂᔭ ᐊᓐᑕ ᐊ ᐸᐃᑯᔅᑲᓇᓯᑦ ᒋ ᒧᒋᒐᔨᑎᒥᔪᐛ ᐊ ᑕᑈᐅᒐᔨᒪᒡ ᒋᓴᒪᓂᑐᐛ᙮
ᐊᑯ ᐊᓐ ᑲ ᓂᓇᑭᑐᐛᔨᑕᐧᒃ ᑲᒪᑯᓄᐛᓯᐅᒋᐛᐱᔪᐤ ᒋ ᐃᑕᐤ ᐊᓂᔭ ᑈᓚ, “ᐊᓐᒡ ᐅᒋᒪᐅᒡ ᐃᔅᒋᔄᐅᒡ ᒐᒋ ᐱᔅᑎᓂᑕᒡ, ᒪᒋᒄ ᒪᒃ ᒋᔭᒻ ᔅᑐᑕᒄ, ᓇᒪ ᐊᐛᓐ ᒋᑭ ᐅᒋ ᐎᔭᔅᑐᑕᑯᐛᐤ᙮”
ᐊᑯ ᐊᓐᒡ ᑲᒪᑯᓄᐛᓯᒡ ᒂ ᒋᐛᒡ ᓇᑕ ᒂ ᐎᑎᒧᐛᒡ ᐊᓂᔭᔪᐛ ᐅᒋᒪᐛ ᑕᓐ ᑲ ᐃᔅᒋᔄᔨᒋ ᑈᓚ᙮ ᐃᔅᐱ ᒪᒃ ᐱᔭᑕᒡ ᐊᓐᒡ ᐅᒋᒪᐅᒡ ᕈᒥᒡ ᐊ ᐃᓯ ᒥᓯᓇᓱᔨᒋ ᑈᓚ ᑭᔭ ᓴᓂᓴ, ᒋ ᓴᒋᓱᐅᒡ, ᐛᔅ ᒋ ᒋᔅᒐᔨᑎᒧᒡ ᐊᒋ ᐎ ᒥᒋᑐᑐᐛᒡ᙮
ᐊᑯ ᒪᒃ ᐊᓐᒡ ᐊᓐᑕ ᑲ ᒪᒧᐎᒡ, ᒂ ᐃᑕᒡ ᒐ ᐛᓯᐊᒡ ᐊᑲ ᐳᓂᔨᒐ ᐊ ᐊᔨᒧᒪᔨᒋ ᒋᓴᓴ ᑭᔭ ᒂ ᐱᔅᑎᓇᒡ᙮ ᓇᒪ ᐅᒋ ᒥᔅᑭᒧᒡ ᒐᒂᔪᐤ ᒐᒋ ᐅᒋ ᐛᐛᓯᐊᒡ ᐛᔅ ᒥᓯᐛ ᐊᓐᒡ ᐃᔪᒡ ᒋ ᒪᒥᒋᒪᐅᒡ ᒋᓴᒪᓂᑐᐛ ᐊᓂᔭᔪᐤ ᐅᒋ ᑕᓐ ᑲ ᐃᔅᐱᔨᒡ᙮ ᓇᒪ ᐅᒋ ᐛᐛᓯᐊᐅᒡ ᐛᔅ ᒋ ᑯᔅᑕᐅᒡ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ᙮
ᐊᓐᒡ ᒪᒃ ᓇᐸᐅᒡ ᑲ ᒪᒧᐎᒡ ᒋ ᑕᑈᑐᐛᐅᒡ ᐊᓂᔭᔪᐛ ᑲᒪᓕᔭᓚ ᐅᔭ ᑲ ᐃᔅᒋᔄᔨᒋ᙮ ᐊᑯ ᒂ ᐎᓴᒪᒡ ᐊᓂᔭᔪᐛ ᐊᑈᔅᑕᓇ, ᐊᑯ ᒂ ᐃᔅᒋᔄᒡ ᒐᒋ ᐸᐱᓯᔅᑕᐛᑭᓄᔨᒋ, ᑭᔭ ᒋ ᐃᑎᓱᒪᐅᒡ ᐊᑲ ᒥᓐ ᓂᑕ ᒐᒋ ᐛᐎᑎᒥᔨᒋ ᒋᓴᓴ ᐅᑦ ᐃᓯᓂᐧᑲᓱᐅᓂᔪᐤ, ᐊᑯ ᒂ ᐱᔅᑎᓇᒡ᙮