1 ᐱᑕᕐ 2:1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᓇᔅᒡ ᒪᒃ ᐊᑯ ᐳᓂᑕᒄ ᒥᓯᐛ ᒪᔭᑎᓯᐅᓐ᙮ ᐳᓂᒄ ᐊᑯ ᐊ ᑭᑭᒋᔭᔭᒄ, ᑭᔭ ᐊᑲᐎᔾ ᐎ ᐃᑕᔨᑕᑯᐃᓱᒄ ᑕᓐ ᐊᓐ ᐊᑲ ᒋᒋᐛ ᐃᑕᔨᑕᑯᓯᔭᒄ, ᐊᑲᐎᔾ ᒋᑭ ᐅᒋ ᑎᑯᓐ ᐊ ᐛᐅᑕᔨᒥᑐᔭᒄ᙮ ᑭᔭ ᐊᑲᐎᔾ ᓂᑎᒥᒄ ᐃᓯ ᐊᔨᒧᒪᐧᑯᒡ ᐊᐛᓐᒋ᙮

1 ᐱᑕᕐ 2:1 ပူးပေါင်းရင်းမြစ်များ

ᑎᐱᑦ ᐅᓂᑭᒧᐅᓇ 32:2

ᓱᐛᔨᑕᑯᓱᐤ ᐊᓐ ᐃᔪᐤ ᒥᒐᑎᓯᐅᓂᔪᐤ ᐊᑲ ᒐᒂᓐ ᐃᑎᒋᑎᒪᑯᑦ ᑎᐸᔨᒋᒐᓱᐛ, ᑭᔭ ᐅᑦ ᐊᒐᐧᑯᒡ ᐊᑲ ᐱᒋᔅᑲᑯᑦ ᑭᑭᒋᔭᐅᓂᔪᐤ᙮

ᑎᐱᑦ ᐅᓂᑭᒧᐅᓇ 34:13

ᑭᓄᐛᔨᑕ ᒋᑕᔨᔾ ᑲ ᒪᔭᑎᒡ ᐅᒡ, ᑭᔭ ᒋᑐᓐ ᒐ ᐊᑲ ᒋ ᒥᒋᐃᔨᒥᒥᑭᒡ᙮

ᑎᐱᑦ ᐅᓂᑭᒧᐅᓇ 37:1

ᐊᑲᐎᔾ ᒥᑯᔅᑲᒋᐃᑎᓱᐤ ᐅᒥᒋᔨᑐᐅᒡ ᐅᒡ, ᐊᑲ ᑭᔭ ᐅᑕᔨᒥᒡ ᐊᓐᒡ ᑲ ᒥᒐᑎᓯᐤ ᐃᑎᒡ᙮

ᑎᐱᑦ ᐅᓂᑭᒧᐅᓇ 73:3

ᐛᔅ ᓂᒋ ᐅᑕᔨᒪᐅᒡ ᒋᔎᐧᑲᓐᒡ, ᐃᔅᐱ ᐎᔭᐸᑎᒪᓐ ᐊᔅᐱᔅ ᒥᔽᐱᒪᐅᓯᒡ ᐅᒥᒋᑥᐅᒡ᙮

ᒪᑎᔪᐤ 15:7

ᒋᔨᐛᐤ ᑲ ᐊᔭᒥᐊᐧᑲᓱᔭᒄ ᐊᐅᒄ ᒋᔨᐛᐤ ᑕᑈ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐊᔨᒧᒥᑕᒄ᙮

ᒪᑎᔪᐤ 23:28

ᐊᑯᓐ ᑕᑈ ᒧᔭᒻ ᐊ ᐃᓯᓇᑯᓯᔭᒄ᙮ ᓇᔅᒡ ᒋ ᒥᔪᓇᑯᓯᓇᐛᐤ ᐅᔅᒡ ᐊᓐᑕ ᐊ ᑭᓄᐛᐱᒥᑯᐅᔭᒄ ᒥᒄ ᐱᒡ ᐊᓐᑕ ᒋᔭᐛᒡ ᐱᓯᒄ ᐊᔭᒥᐊᐧᑲᓱᐅᓐ ᑭᔭ ᒥᒋᑐᑎᒧᐅᓐ ᒋᑦ ᐃᓯᓇᑯᓯᓇᐛᐤ᙮”

ᒪᑎᔪᐤ 24:51

ᐊᑯ ᒐ ᐛᐛᓯᐊᑭᓄᐅᑦ ᓇᔅᒡ ᒐᒋ ᐛᐎᓯᒐᔨᑕᐧᒃ᙮ ᐊᑯ ᒪᒃ ᒐ ᐃᓯ ᐱᔅᑎᓇᑭᓄᐅᑦ ᐊᓐᑕ ᑲ ᐊᔭᒥᐊᐧᑲᓱᔨᒋ ᐊ ᑕᔨᒋ ᒐᒋ ᓂᓇᐧᑲᑕᔨᒧᑦ᙮ ᐊᑯᑕ ᐊᓐᑕ ᒐ ᒪᒡ ᑭᔭ ᒐ ᒪᒥᑕᔭᐱᑕᓯᒡ ᒐ ᐃᔅᐱᔅ ᓂᓇᐧᑲᑕᔨᒧᒡ᙮”

ᒪᑎᔪᐤ 7:5

ᒋᔾ ᑲ ᐊᔭᒥᐊᐧᑲᓱᔨᓐ, ᓂᔅᑎᒻ ᐎᐎᐱᑕ ᐊᓐ ᒥᔅᑎᒄ ᑲ ᒥᒐᔎᒡ ᒋᔅᒋᓯᑯᒡ ᐊ ᑎᒂᒡ ᐊᑯ ᒪᒃ ᒐ ᒥᔪ ᐛᐸᑎᒥᓐ ᒐᒋ ᐎᐎᐱᑎᒧᑦ ᑲ ᐱᓯᓐᑦ ᒋᐧᑲᓂᔅ᙮”

ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 12:15

ᓂᐸ ᒋᓯᐧᑲᓱᓇᓐ ᐊ ᑭᔭ ᒪᒃ ᓇᒪᐎᔾ ?” ᒋᓴᔅ ᒪᒃ ᒋ ᒋᔅᒐᔨᒪᐤ ᐊ ᐎ ᐎᔭᓯᐃᑯᑦ ᐅᔭ ᐊ ᐃᓯ ᑯᒂᒋᒥᑯᑦ ᐊᑯ ᒂ ᐃᑕᑦ, “ᒐᒂᓐ ᐛᒋ ᐎ ᐸᒋ ᑯᒂᒋᐃᔭᒄ ? ᐸᓱᐛᐧᒄ ᒪ ᓱᓇᔭᐱᔅᑯᔅ, ᒐ ᑭᓄᐛᐱᒥᒃ᙮”

ᓗᒃ 11:44

“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ, ᒋᔨᐛᐤ ᑲ ᐊᔭᒥᐊᐧᑲᓱᔭᒄ, ᐛᔅ ᐊᐅᑯᓐ ᐊ ᐃᓯᓇᑯᓯᔭᒄ ᒧᔭᒻ ᓂᒂᔅᑲᓐ ᐊᑲ ᐅᒋ ᒋᔅᒋᓄᐛᒋᑕᑭᓄᐅᒡ᙮ ᐃᔪᒡ ᑕᐧᑯᔅᑲᑕᒧᒡ ᐊᑲ ᒋᔅᒐᔨᑕᒡ ᒐᒂᔪᐤ ᐊᓐᑕ ᑕᒥᒡ ᐊ ᑎᑯᓂᔨᒡ᙮”

ᓗᒃ 12:1

ᒪᒂᒡ ᒪᒃ ᐊᓐ ᐊ ᐃᑎᓇᓄᐅᒡ, ᒥᒐᑥᐤ ᒐᓯᐱᔪᐤ ᐃᔪᒡ ᒋ ᐛᔅᑲᑲᐳᐅᒡ ᐊ ᓂᑐᑐᐛᒡ ᒋᓴᓴ᙮ ᐊᓂᔭ ᐊ ᐃᔅᐱᔅ ᒥᒐᑎᒡ ᓇᔅᒡ ᒋ ᑎᑎᑯᐃᔅᑕᔅᑲᑐᒡ᙮ ᓂᔅᑎᒻ ᒪᒃ ᒋᓴᔅ ᒋ ᐃᑕᐤ ᐅᒋᔅᒋᓄᐊᒧᐛᑭᓇ, “ᐃᔭᒂᒥᔅᑐᐛᐧᑯᒡ ᐸᕆᓯᔨᒡ ᐊᓂᔭ ᐊ ᐃᑕᔨᑕᑯᓯᒡ ᐛᔅ ᐊᔭᒥᐊᐧᑲᓱᒡ᙮ ᒧᔭᒻ ᐸᒂᓯᑭᓐ ᑲᐅᐱᔨᒡ ᑲ ᐃᑕᔨᑕᒂᒡ ᐊᑯᓐ ᐊ ᐃᑕᔨᑕᑯᓂᔨᒡ ᐊᓂᔭ ᐊ ᐃᑎᒡ᙮

ᓗᒃ 6:42

ᑕᓐᑕ ᒐᒋ ᐅᒋ ᐃᑎᑦ ᒋᐧᑲᓂᔅ, ‘ᓂᑭ ᐎᐧᑯᒋᑕᓐ ᒋᐱᓯᓄᐅᓐ, ᐊᑲ ᒪᒃ ᐛᐛᒡ ᒋ ᐛᐸᑎᒥᓐ ᐊᓐ ᒥᔅᑎᒄ ᐊᓐᑕ ᒋᔾ ᒋᔅᒋᓯᑯᒡ ᑲ ᑎᒂᒡ’ ? ᒋᑦ ᐃᑕᔨᒪᐅᒡ ᐊᐛᓐᒋ ᒐᒋ ᐃᑕᔨᒥᔅᒡ ᐊ ᑯᐃᔅᑯᑕᑎᓯᔨᓐ ᐊᑲ ᒪᒃ ᑯᐃᔅᑯᑕᑎᓯᔨᓐ᙮ ᒋᔾ ᑲ ᐊᔭᒥᐊᐧᑲᓱᔨᓐ, ᓂᔅᑎᒻ ᐎᐧᑯᒋᑕ ᐊᓐ ᒥᔅᑎᒄ ᒋᔅᒋᓯᑯᒡ ᑲ ᑎᒂᒡ, ᑭᔭ ᒐᒋ ᓇᐃᐱᔨᓐ᙮ ᐊᑯ ᒪᒃ ᒐ ᐎᐧᑯᒋᑕᐅᑦ ᒋᐧᑲᓂᔅ ᐅᐱᓯᓄᐅᓐ᙮”

ᒠᓐ 1:47

ᐃᔅᐱ ᒪᒃ ᒋᓴᔅ ᐎᔭᐱᒪᑦ ᓇᑕᓂᔭᓚ ᐊ ᐸᑕᔅᑎᒧᑕᔨᒋ ᒋ ᐃᑕᐤ, “ᐊᐅᒄ ᒋᒋᐛ ᐃᔅᕋᐃᓪ ᐃᔪᐤ, ᓇᔅᒡ ᑕᑈ ᑯᐃᔅᑯᑕᑎᓯᐤ᙮”

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 1:29

ᐱᒋᔅᑲᑯᐅᒡ ᓂᓇᐧᑯᐤ ᒥᒐᑎᓯᐅᓂᔪᐤ ᑭᔭ ᒪᔭᑎᓯᐅᓂᔪᐤ, ᑭᔭ ᐱᒋᔅᑲᑯᐅᒡ ᒧᔅᑕᓂᒪᒐᐅᓂᔪᐤ ᑭᔭ ᐛᐧᑲᑕᔨᒧᐅᓂᔪᐤ᙮ ᓇᔅᒡ ᐱᒋᔅᑲᑯᐅᒡ ᐅᑕᔨᒧᐅᓂᔪᐤ, ᑭᔭ ᒧᔅ ᐎ ᓂᐸᐃᐛᐅᒡ, ᑭᔭ ᒧᔅ ᒪᒥᒋᐱᔭᐊᐅᒡ ᐊᐛᔪᐛ, ᐱᓯᒄ ᑭᔭ ᐛᐎᔭᓯᒧᐛᐅᒡ, ᑭᔭ ᓇᔅᒡ ᐱᒋᔅᑲᑯᐅᒡ ᐛᐧᑲᓱᐛᐅᓂᔪᐤ᙮ ᐱᒋᔅᒂᑲᑐᐛᐅᒡ ᑭᔭ,

1 ᑯᕆᓐᑎᔭᓇ 14:20

ᓂᐧᑲᓂᓯᑐᒄ, ᐊᑲᐎᔾ ᐊᐛᓯᐤ ᒪᒥᑐᓇᔨᑎᒧᒄ᙮ ᒧᔭᒻ ᐅᔅᒋᐛᓴᒡ ᐊ ᐃᑕᔨᑕᑯᓯᒡ ᐊᑲ ᒋᔅᒐᔨᑕᒡ ᐊ ᐃᑕᔨᑕᑯᓂᔨᒡ ᒥᒋᑐᑎᒧᐅᓂᔪᐤ ᐊᐅᑯᓐ ᒧᔭᒻ ᑭᔭ ᒋᔨᐛᐤ ᒋᐸ ᐃᑕᔨᑕᑯᓯᓇᐛᐤ᙮ ᒧᔭᒻ ᐊᐛᓐ ᓴᔅ ᐊᒋ ᐃᓯ ᓂᑕᐅᒋᑦ ᐊᐅᑯᓐ ᒋᐸ ᐃᓯ ᒪᒥᑐᓇᔨᑕᓇᐛᐤ᙮

1 ᑯᕆᓐᑎᔭᓇ 5:8

ᐊᑯ ᒪᒃ ᑭᓄᐛᔨᑕᑕᐤ ᐊᒋ ᐱᒪᒋᐃᑯᐅᔭᐧᒄ᙮ ᐛᐱᓇᑕᐤ ᐊᓐ ᐛᔅᑭᒡ ᑲᐅᐱᔨᒡ ᐊᐅᒄ ᒥᒋᑥᐅᓐ ᑭᔭ ᒥᓯᐛ ᑕᓐ ᐊ ᐃᓯ ᒪᔭᑎᒡ᙮ ᐊᓐ ᒪᒃ ᐊᔅᐱᔅ ᒥᔽᔨᑎᒪᐧᒄ ᐊᒋ ᐱᒪᒋᐃᑯᐅᔭᐧᒄ ᑯᐃᔅᒄ ᐃᓯ ᐱᒪᑎᓯᑕᐤ ᑭᔭ ᑕᑈᐅᓂᒡ ᐃᓯ ᐃᔨᒥᑕᐤ᙮

2 ᑯᕆᓐᑎᔭᓇ 12:20

ᓂᑯᔅᐱᓇᔨᑕᓐ ᐅᑎᑎᑎᑯᒐ ᐃᔭᒡ ᒐ ᐃᑕᔨᑕᑯᓯᔭᒄ ᑕᓐ ᑲ ᐃᓯ ᐱᑯᓴᔨᒧᔭᓐ ᒐ ᐃᑕᔨᑕᑯᓯᔭᒄ᙮ ᒂᔄᓐ ᑭᔭ ᒋᔨᐛᐤ ᐃᔭᒡ ᒋᑭ ᐃᑕᔨᒥᓇᐛᐤ ᑕᓐ ᑲ ᐃᓯ ᐱᑯᓴᔨᒧᔭᒄ ᒐ ᐃᑕᔨᑕᑯᓯᔭᓐ᙮ ᓂᑯᔅᐱᓇᔨᑕᓐ ᒥᒐᑦ ᐊᓐᑕ ᐊ ᑎᓯᔭᒄ ᒐᒋ ᐊᔅᑕᒥᑐᔭᒄ ᒐᒋ ᐅᑕᔨᒥᑐᔭᒄ ᒋᔄᓱᐅᓐ ᒐᒋ ᑎᒂᒡ ᒪᒃ ᒥᒋᐱᔨᑐᐅᓐ᙮ ᓂᑯᔅᐱᓇᔨᑕᓐ ᒥᒐᑦ ᐊᓐᑕ ᐊ ᑎᓯᔭᒄ ᒐᒋ ᐱᐳᑯᓄᒧᐛᔭᒄ ᒐᒋ ᒪᒪᔭᔨᒪᑯᒡ ᑯᑎᑭᒡ ᐊᐛᓐᒋ ᒪᒃ ᒋᒋᐛ ᒐᒋ ᐃᑕᔨᒥᓱᔭᒄ ᑭᔭ ᒐᒋ ᒥᒥᑯᔅᑲᒋᐊᑯᒡ ᑯᑎᑭᒡ ᐊᐛᓐᒋ᙮

ᐃᐱᓯᔭᓇ 4:31

ᐳᓂᒄ ᐊ ᐅᔅᑐᐛᔨᑎᒪᒄ, ᐊ ᐊᐧᑯᔪᐛᓯᔭᒄ ᑭᔭ ᐊ ᒋᔄᓯᔭᒄ᙮ ᐳᓂᒄ ᑭᔭ ᐊ ᒪᔭᔨᒐᔭᒄ ᑭᔭ ᐊ ᒋᐧᑲᓇᑯᐎᑐᔭᒄ᙮ ᓇᒪ ᓇᔅᒡ ᒋᐸ ᐅᒋ ᐊᔭᓇᐛᐤ ᐛᐧᑲᓱᐛᐅᓐ᙮

1 ᑕᓴᓗᓂᔭᓇ 2:3

ᐃᔅᐱ ᑲ ᐎ ᒐᔅᑎᓇᒋᒥᑕᒡ ᑕᓐ ᐊ ᐃᓯ ᑕᑈᒥᑲᒡ ᒥᔽᒋᒧᐅᓐ ᓇᒪ ᒋ ᐅᒋ ᑭᑭᒋᔭᒥᑎᓇᓐ᙮ ᓇᒪ ᓂᑎᒥᒄ ᓂ ᐅᒋ ᐃᑎᓇᓐ ᑭᔭ ᓇᒪ ᒋ ᐅᒋ ᐎ ᐎᔭᓯᐃᑎᓇᓐ ᐊᓐᑕ ᒐᒋ ᐅᒋ ᑕᑈᑎᒪᒄ ᒥᔽᒋᒧᐅᓐ᙮

1 ᑎᒧᑎ 3:11

ᐎᐛᐛ ᒋᐸ ᑕᑈᐅᒐᔨᑕᑯᓯᔪᐛ ᑭᔭ ᓇᒪ ᒋᐸ ᐅᒋ ᓂᑎᒥᒄ ᐃᑕᒋᒪᐅᒡ ᐊᐛᔪᐛ ᑭᔭ ᐸᐧᑲᒡ ᒋᐸ ᐃᓯ ᐱᒪᑎᓯᐅᒡ ᑭᔭ ᐃᔭᒂ ᒋᐸ ᐃᑐᑎᒧᒡ ᒥᓯᐛ ᒐᒂᔪᐤ᙮

ᑕᐃᑕᔅ 2:3

ᑭᔭ ᐎᑎᒧᐅᒡ ᒋᓴᐃᔎᓯᒡ ᐅᐱᒪᑎᓯᐅᓄᐛᒡ ᒋᐸ ᓄᑯᓂᔪᐤ ᒋᓴᒪᓂᑐᐛ ᐊ ᐱᒪᑎᓯᔅᑐᐛᒡ᙮ ᓇᒪ ᒋᐸ ᐅᒋ ᐱᐸᒪᒋᒪᐅᒡ ᐊᐛᔪᐛ ᒐᒋ ᒥᒐᒋᒪᒡ, ᓇᒪ ᑭᔭ ᒋᐸ ᐅᒋ ᐎᒋᐸᐅᒡ,

ᐃᑉᕈᐛ 12:1

ᒪᒥᑐᓇᔨᒪᑕᐅᒋ ᒪ ᐊᓐᒡ ᑲ ᒥᒐᑎᒡ ᐊᐛᓐᒋ ᓇᔅᒡ ᑲ ᐛᐸᑎᔨᐛᒡ ᐊ ᑕᑈᔭᔨᒪᒡ ᒋᓴᒪᓂᑐᐛ᙮ ᐅᔭ ᐊᒋ ᐃᑎᒡ, ᐊᐅᑯᓐ ᑭᔭ ᒋᔭᓄᐤ ᒋᐸ ᐃᑎᓇᓄᐤ᙮ ᐊᑯ ᒪᒃ ᐊᓐ ᐅᒋ ᑭᔭ ᒋᔭᓄᐤ ᐳᓂᑕᑕᐤ ᒥᓯᐛ ᐊᓂᔭ ᒐᒂᔪᐛ ᐊ ᐅᓇᐃᑯᔭᐧᒄ ᒐᒋ ᐃᑕᑎᓯᔭᐧᒄ ᐊᓂᔭ ᑕᓐ ᐊ ᐃᓯ ᓂᑐᐛᔨᒥᑕᐧᒄ ᒋᓴᒪᓂᑐᐤ ᒐᒋ ᐃᑕᑎᓯᐛᐧᒄ᙮ ᑭᔭ ᒥᓯᐛ ᐛᐱᓇᑕᐤ ᐊᓂᔭ ᒥᒋᑥᐅᓇ ᑲ ᐎ ᑎᐸᔨᒥᑯᔭᐧᒄ, ᑭᔭ ᒐ ᐱᒥᐸᔨᑐᔭᐧᒄ ᐊᓐᑕ ᐊ ᑯᒂᒋᔅᑭᑕᐅᑐᓇᓄᐅᒡ ᐊᓐᑕ ᐊᒐᐧᑯᐅᓂᒡ ᐃᔅ ᐸᑐᔅ ᒋ ᐅᑎᑎᒪᒂ ᐊᓐᑕ ᓇᑐᐛᔨᒥᑕᐧᒄ ᒋᓴᒪᓂᑐᐤ ᒐᒋ ᐃᔅᐸᑕᐛᐧᒄ᙮

ᒋᒥᔅ ᐅᒥᓯᓇᐊᒪᒐᐅᓐ 1:21

ᐛᐱᓂᒧᒄ ᒥᓯᐛ ᐎᓂᓱᐅᓐ ᑭᔭ ᒥᓯᐛ ᒥᒐᑎᓯᐅᓐ᙮ ᐱᔅᑎᓂᓱᒄ ᒋᓴᒪᓂᑐᐤ ᐊ ᑕᑦ, ᑎᑎᒺᐧᒄ ᐅᑦ ᐃᔨᒧᐅᓐ ᒋᑕᐃᐛᒡ ᑲ ᐱᑕᐊᐧᒃ ᐊᓂᔭ ᒐᒋ ᐱᒪᒋᐃᑯᐛᒄ᙮

ᒋᒥᔅ ᐅᒥᓯᓇᐊᒪᒐᐅᓐ 3:14

ᒥᒋ ᐅᑕᔨᑎᒧᐅᓐ ᒪᒃ ᐊ ᐊᔭᐛᒂ ᒋᑕᐃᐛᒡ, ᒪᒃ ᒥᒄ ᒧᔅ ᒋᔨᐛᐤ ᓂᑲᓐ ᐎ ᐃᓯ ᐱᔅᑎᓂᓱᔭᒂ, ᐊᑲᐎᔾ ᒪᒥᒋᒧᒄ ᑭᔭ ᐊᑲᐎᔾ ᒋᑭ ᐅᒋ ᑭᑭᒋᔭᓇᐛᐤ ᐊ ᐎ ᑲᑕᔭᒄ ᑕᑈᐅᓐ᙮

ᒋᒥᔅ ᐅᒥᓯᓇᐊᒪᒐᐅᓐ 4:11

ᓂᐧᑲᓂᓯᑐᒄ ᐊᑲᐎᔾ ᒥᒋ ᐊᔨᒧᒥᑐᒄ᙮ ᐊᐛᓐ ᐊ ᒥᒋ ᐊᔨᒧᒪᑦ ᐎᐧᑲᓂᓴ ᒪᒃ ᐊ ᑎᐸᔅᑯᓇᑦ ᐊᑐᐛᔨᑎᒻ ᐎᓱᐛᐅᓂᔪᐤ ᑭᔭ ᑎᐸᔅᑯᓂᒻ᙮ ᒧᔭᒻ ᑕᐸᔅᑯᓂᒧᐎᓇ ᐎᓱᐛᐅᓐ ᓇᒪ ᒋ ᓂᓇᐃᑕᓐ ᑭᔭ ᑎᐸᔅᑯᓂᒐᓱᐤ ᒋᑦ ᐃᑕᐃᓱᓐ᙮

ᒋᒥᔅ ᐅᒥᓯᓇᐊᒪᒐᐅᓐ 4:5

ᒋᑦ ᐃᑕᔨᑕᓇᐛᐤ ᐊ ᐊᑲ ᑕᑈᒥᑲᒡ ᐊᓐ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᑲ ᐃᑎᔅᑕᒡ, “ᐊᓂᔭ ᑲ ᐸᔭᒋᓯᔨᒋ ᐊᒐᒂ ᒋᓴᒪᓂᑐᐤ ᑲ ᒥᔨᑕᐧᒄ ᒐᒋ ᑕᔨᒋ ᐊᓐᑕ ᒋᐱᒪᑎᓯᐅᓇᒡ ᐃᔭᒂ ᒋ ᓂᓇᑭᑐᐛᔨᒥᑭᓄᐤ ᒥᒄ ᒋᓴᒪᓂᑐᐛ ᐊ ᑕᔨᒋ ᒐᒋ ᐃᓯ ᐱᒪᑎᓯᔭᐧᒄ᙮” ᐊᓐ ᐊᒐᐧᒄ ᐅᑕᔨᑎᒻ ᐊᑲ ᐃᑐᑎᒪᐧᒄ ᑕᓐ ᐊ ᐃᓯ ᓂᑐᐛᔨᒥᑕᐧᒃ ᒋᓴᒪᓂᑐᐤ ᒐᒋ ᐃᑐᑎᒪᐧᒄ᙮

ᒋᒥᔅ ᐅᒥᓯᓇᐊᒪᒐᐅᓐ 5:9

ᐊᑲᐎᔾ ᒪᒪᒡ ᐃᑎᑐᒄ, ᓂᐧᑲᓂᓯᑐᒄ, ᑭᔭ ᓇᒪ ᒋᑭ ᐅᒋ ᑎᐸᔅᑯᓂᑯᓇᐛᐤ᙮ ᓴᔅ ᒥᒋᒪ ᐸᒋ ᑕᐤ ᑎᐸᔅᑯᓂᒐᓱᐤ, ᓴᔅ ᒐᑲᑦ ᓄᑯᓱᐤ᙮

1 ᐱᑕᕐ 2:16

ᑕᑈ ᑭᑈ ᔅᒋ ᐎᐧᑯᒋᐃᑯᓇᐛᐤ, ᒥᒄ ᒪᒃ ᒋᓴᒪᓂᑐᐤ ᐅᑦ ᐊᐱᒋᐊᑭᓇ ᒋᔨᐛᐤ᙮ ᐊᑲᐎᔾ ᐃᑕᔨᑎᒧᒄ ᒐᒋ ᒥᒋᑐᑎᒪᒄ ᐊᓐ ᐅᒋ ᐊᒋ ᐎᐧᑯᒋᐃᑯᐎᔭᒄ ᒥᒋᑥᐅᓂᒡ ᐅᒡ᙮

1 ᐱᑕᕐ 2:22

“ᓇᒪ ᓂᑕ ᐅᒋ ᒥᒋᑐᑎᒻ ᑭᔭ ᓇᒪ ᓂᑕ ᓂᑎᒥᒄ ᐅᒋ ᐃᓯ ᐃᔨᒧᐤ, ᒧᔅ ᑯᐃᔅᒄ ᒋ ᐃᓯ ᐃᔨᒧᐤ᙮”

1 ᐱᑕᕐ 3:10

ᐛᔅ ᐃᑎᔅᑕᐤ ᒥᓯᓇᐃᑭᓂᒡ, ᐊᐛᓐ ᑕᑈ ᐛ ᒥᔽᔨᑎᒧᒂ ᐊ ᐱᒪᑎᓯᑦ ᑭᔭ ᐸᑯᓴᔨᒧᒂ ᒐᒋ ᒪᒥᔪᐱᔨᑦ, ᐊᑲᐎᔾ ᒋᑭ ᐅᒋ ᒥᒋ ᐃᔨᒧᐤ ᑭᔭ ᐊᑲᐎᔾ ᒋᑭ ᐅᒋ ᐎᒋ ᑭᑭᒋᔭᐤ᙮

1 ᐱᑕᕐ 4:2

ᐊᑯ ᒪᒃ ᑕᓐ ᐊᔅᒄ ᒐ ᐃᔅᐱᔅ ᐱᒪᑎᓯᒂ ᐅᑕ ᐊᔅᒋᒡ ᓇᒪ ᐊᑯ ᒋᐸ ᐅᒋ ᑎᐸᔨᒥᑯᐤ ᐎᔾ ᑕᓐ ᐊ ᐃᓯ ᒧᔅᑕᓇᔨᑕᐧᒃ ᑎᐱᔨᐛ ᒐᒋ ᐃᑕᑎᓯᑦ ᒪᒃ ᐃᐛᒃ ᒋᓴᒪᓂᑐᐛ ᑕᓐ ᐊ ᐃᓯ ᓂᑐᐛᔨᒥᑯᑦ ᐊᔪᐅᒄ ᐊᓂᔭ ᒋᐸ ᐎ ᓂᓇᑭᑐᐛᔨᑎᒥᐃᑯᐤ ᒐᒋ ᐃᑐᑕᐧᒃ᙮

1 ᐱᑕᕐ 4:4

ᓇᔅᒡ ᒪᒃ ᒋᒥᔅᑲᑕᔨᒥᑯᐛᐅᒡ ᐊᓐᒡ ᐊᑲ ᑕᑈᑕᒡ ᐊᑲ ᐎᒐᐛᑯᒡ ᐊᓂᔭ ᐊ ᐊᒂᑕᔨᑕᑯᓯᒡ ᐊ ᐃᓯ ᐱᒪᑎᓯᒡ ᑭᔭ ᓇᔅᒡ ᐛ ᒪᒪᔭᔨᒥᑕᑯᒡ᙮

ᒋᔅᒐᔨᑕᑯᑕᒐᐅᓐ 14:5

ᓇᒪ ᓂᑕ ᐅᒋ ᑭᑭᒋᔭᐅᒡ, ᐊᑲ ᓂᑕ ᐅᒋ ᐅᓂᔨᑎᒡ ᐃᓯ ᑭᓄᐛᐱᒥᑯᐅᒡ ᒋᓴᒪᓂᑐᐛ᙮