Efesios 6:23 - Txa²wã¹sũ̱³na² Wãn³txa²

²³ Nxe³nx2ti³ju³kxai³lu² Txa²wã¹sũ̱³na² Txa²wã¹wĩ³nu²su² ha²kxai³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³ya³te²na² sa²kxai³lu² a³lxi²nyhu¹ah³lxin¹ju³ta² yũ³ha²kxai³ ã³nhãu²no³nyhu¹ah³lxin¹ju³ta² yũ³ha²kxai³ yxo²ĩ²yah³lxin¹ju³ta² yũ³ha²kxai³ nxe³sih¹nx2ti³jau³su² ten³sa³nha²wa².

Efesios 6:23 ပူးပေါင်းရင်းမြစ်များ

Joãu 14:27

Txa²hãu²na¹ju³ta² ã³nhãu²no³txa²lxa¹i¹. Hĩ¹na² ĩn²nxa³ti³xa³ta̱³lxa¹ ã³nxũ²kwa̱i³lxũ¹nx2ta¹i¹. Nxe³nx2ta¹ha²kxai³ wi¹lhin¹sxã³ yxau²xai³jah¹lxi³hẽ¹li¹. Yuh³xai²nãn¹tũ̱³ka̱³txai²na² hãu²non³sxã³ yxau²xai³tũ̱³ka̱³txi³sxa³i¹. “Hãu²no³ta¹xã¹.” Nain¹kxan²ti³, hãi¹nxe², hxi²waut3ta³lxain¹sxã³ yxau²xai³yai¹nhĩ̱³nx2na³li¹. Yxãn¹ta¹, Txai²na¹xai²na² txa²hãu²na¹ju³ta² txa²wi¹lhin¹khaix1na¹ju³ta² ã³nxũ²kwa̱i³lxũ¹nxa²lxa¹i¹. Nxe³nx2ta¹ha²kxai³, hãu²non³sxã³ yxau²xai³la¹kxa²yã¹nxe² yah³lxin¹tu¹wi¹. Yah³lxin¹kxai²nãn²tu̱³, hxi²waut3ta³lxi³nhyah¹lxa³nha²kxai³, yuh³lxa³kxi²yah³lxa³nha²kxai³ nxe³jah³lxi³hẽ¹li¹.

Romanos 1:7

Yah³lxin¹jut3su², txai²na² Pau²lah³lo²na¹xai²na² ũ³wha²li¹la³kxi¹nx2ta¹wa². Wxãi²na² Ro²ma²thĩ³nãn¹tũ̱³ka̱³txi³ ĩ³nxai²na² Txa²wã¹sũ̱³na² Si³yxau³tãu³a¹ a³lxi¹nx2ti³sxã³ wxa²hait1so¹nx2ti³na³la². Je³su²jah³lai²na² wãn³txa² yxo²ĩ²yah³lxin¹te² ĩ³nxai²na²: — Sũ̱³na² Si³yxau³tãu³na¹xai²na² Txa²nũ̱³ka̱³txi³lo³txa²lxa¹i¹. Nxe³nx2ti³na³la². Nxe³tũ̱³ka̱³txi³ ĩ³nxai²na² Txa²wã¹sũ̱³na² Si³yxau³tãu³a¹ Txa²wã¹wĩ³nu²su² na³la². A²nxe³te²a² A²ki³lha³lxa² a²ĩ³lxa² Je³su² Kris²tu³jah¹la² Txa²wã¹hxi²kan¹ta² Si³yxau³tãu³lxã²na³la². Ha¹lin¹ya³te²nãu³xai²na² kãin² thã̱i³ti³la² a³lxi¹nx2ti³si¹jau³nũ³su² te³ni², wxa²nxũ²kwa̱i³nãu³a² ã³nhãu²no³txa²lxi³si¹jau³nũ³su² te³ni², nxe³ti³ten³nxa²lxa¹nha²wa².

Romanos 15:33

Na¹ha²kxai³, Txa²wã¹sũ̱³na² Si³yxau³jah¹la² wxa²hãu²no³ti³hi¹tẽ³jah¹lo²su² jah¹la² sa²hau³ko³txa²txi³ju³ta² ten³sa³nha²wa².

1 Korĩntios 1:3

Nxa¹ha²kxai³ Txa²wã¹sũ̱³na² Si³yxau³tãu³a² Txa²wã¹wĩ³nu²su² nxe³te²nãn²tu̱³ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² nxe³te²nãn²tu̱³ nxe³ya³sxã³ kãin² thãi³ti³la² a³lxi²nx2ti³si¹hi² wxa²nxũ²kwa̱i³nãu³a² ã³nhãu²no³txa²lxi³si¹hi² nxe³nx2ti³si¹ha¹jau³su² ten³sa³nha²wa².

2 Korĩntios 13:11

Nxa²ha¹te¹ txa²wã³tã̱³nãu³xãi³. ówa²su¹ta¹tu¹wa². Ka³lih³sxã³ yxau²xai³jah¹lxi³hẽ¹la². Txa²wãn³txai²li² sa²yxo²wet1sah¹lxi³hẽ¹la². Sa²ye³kwẽ²kxi²waun¹nyha¹jah³lxi³hẽ¹la². Wi¹yxo²we¹nyhu¹sxã³ yxau²xai³jah¹lxi³hẽ¹la². Hãu²non³sxã³ yxau²xai³jah¹lxi³hẽ¹la². Nxe³sxã³ Txa²wã¹sũ̱³na² sa²kxai³lu² a³lxi²waun¹nyhu¹ki̱³ju³ta² ũ³hũ¹nẽ³jah¹lo²su² te²kxai³lu² sa²hãu²no³tẽ³ju³ta² ũ³hũ¹nẽ³jah¹lo²su² te²kxai³lu² ã³si³tẽ³kxi¹nx2ti³tu¹wa².

Kálatas 5:6

Nxe³ha²kxai³ hãi¹nxe³sxã³ Je³su² Kris²tu³jah¹lai²na² wãn³txa² yxo²ĩ²sĩ¹na¹wa². Sĩ¹na¹ha²kxai³ Ju³te²a² a²ki³lha³lxa² kãi³ai¹nhxai²kxai³ jã¹nxe³ki̱³ju³ta² kãi³ta̱³nxa² hãi¹nxã¹ta̱³nxa² ĩ²lu³ju³ta² kwa²hãi¹nxe³hĩ̱³nx2na³la². Yxãn¹ta¹ Je³su² Kris²tu³jah¹lai²na² wãn³txa² yxo²ĩ²sxã³ a³lxi²waun¹nhyu¹ki̱³kxai²nãn²tu̱³ wain³te²lo³tẽ³ju³ta² yũ²na³la². Nxe³ju³ta² so¹lxi³ wain³na³la².

Kálatas 6:16

Nxe³ju³tai²li² yxo²ĩ²nhain¹kxai²nãn²tu̱³ a²ẽ¹nãu³ai²na² Txa²wã¹sũ̱³na² ã³nhãu²no³ju³ta² yũ³ha²kxai³ thãi³ti³la² wi¹lĩ²ju³ta² yũ³ha²kxai³ nxẽn³tain¹tu¹wa². Yxo²ĩ²tũ̱³ka̱³txa² yxo²ha³kxa¹ te²yã¹nxa²xai³ain¹tu¹wa².

Efesios 6:24

Jã¹nxe³jut3su² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ ya²la³tu̱³ wxa²ẽ¹nãu³ai²na² a̱u³txi³ a³lxi²sa²tẽ³yah³lxi³te²si¹lxa². Nxe³yah³lxin¹te² ĩ³nxai²na² Sũ̱³na² thãi³ti³la² a³lxi¹nx2ti³ju³ta² ten³sa³nha²wa². Jã¹nxa¹jau³su² jau¹xai²li² nxe³ya³nx2ta¹wa². Ta³lun²na¹wa².

1 Tesalonisẽnses 5:8

Jã¹nxe³sxã³ kwa³jan³ta² so³ta²to²nãu³xa² a²wã²la²ka³lo³a² kwa³thi³la³ka³lo³a² ũ³whi²kxi²nyhain¹te²ju²hẽ³la². Kwa³thi³la² a²ha³la³san¹ka³lo³an²tu̱³ ũ³whi²kxi²nha² kwa³thi³la² ũ³nhe³hẽ¹nha²ka³lo³an²tu̱³ ũ³nhe³hẽ¹nha² nxe³ain¹te²ju²hẽ³la². Nxain¹ju³tan¹te²kxa³ya̱n³tu̱³ ã³nhe¹lain¹kxai²nãn²tu̱³ ũ³hĩx1to³nyhai¹nhĩ̱³nx2nxa³wa². Jã¹nxe³kxe³hũ̱³nxe² nxe³te²ki̱³na¹xai²na² a³lan²ti³hũ̱³ju³ta² yxau³ki̱³te²ki̱³na¹xai²na² Je³su²jah³lai²na² wãn³txa² yxo²ĩ²sxã³ yxau²xai³ki̱³sa²kxai³ a³lxi²waun¹nyhu¹sxã³ yxau²xai³ki̱³sa²kxai³ Je³su²jah³la² txa²wã¹ko̱³nxe³ti³ kãi³ki̱³ju³ta² ã³wa²su¹tẽ³jah¹la² a³ka³nxi²ju³ta³nũ³a² yxo²ĩ²sxã³ yxau²xai³ki̱³sa²kxai³ nxe² yxau²sa²te³a³sah¹lxi³hẽ¹la².

2 Tesalonisẽnses 1:3

Txa²wã³tã̱³nãu³xãi³. Ka³li³sa²sĩn¹nha²wa². Txa²wã¹sũ̱³na² wãn³txa² ã²la² nũ̱³kxũn³sxã³ sa²yxo²we¹ti² wxa²nũ̱³ka̱³txai²na² ã²la² kãin² a³lxi²waun¹nyhu¹i² nxe³yah³lxi³sĩn¹ta¹hi¹nhẽ¹la². Yah³lxi¹nha²kxai³ Txa²wã¹sũ̱³na² nxe³sĩ¹na¹te³nah¹lxi¹: — Sũ̱³nãi³. Tũ̱¹ka̱³txai²li² wxa²wãn³txa² kxan²ti³ sa²yxo²we¹txai¹nha²kxai³ ĩ³sa²nẽn¹kxi¹nxa²sĩ¹na¹nhai¹. Nxe³sĩ¹na¹jau³xa² wain³na³la². Jã¹xah³lxin¹ju³kxai³lu² wxa²nũ̱³ka̱³txa² kãin²khãu³nha² a²nũ²a² ã̱³xa² ĩ³ko̱x1ko̱¹son²ki² nxe³nx2ti³ta¹hai¹nhẽ¹la². Nxe³nx2tain¹kxan²ti³ ha³ya³kxa² Txa²wã¹sũ̱³na² wãn³txa² sa²yxo²we¹txa³i² ĩ³nxũ²kwa̱i³lxũ¹nyhu¹i² yah³lxi³sĩn¹ta¹hi¹nhẽ¹la². Nxe³ju³ta² Txa²wã¹sũ̱³na² wãn³txa² yxo²ĩ²tũ̱³ka̱³txi³nãu³xa² ĩ³hen³txain¹sĩ¹nhxai²na¹hẽ³la². Ju¹tai²li² Txa²wã¹sũ̱³na² sa²nẽn¹kxi²sĩn¹to³ha¹wa².

2 Tesalonisẽnses 3:16

Nxe³jut3su² nxe³kxan²ti³ Txa²wã¹sũ̱³na² ã³nhãu²no³tẽ³ju³ta² wxa²ẽ¹nãu³ai²na² kxan²ti³ ĩ³hãu²no³tẽ³lhi¹nha¹jau³su² ĩ³ye³kxain¹sĩ¹na¹wa², Txa²wã¹sũ̱³na²sa³. A²nxe³jah¹la² hi²sen³su² wxa²nũ̱³ka̱³txa² yxo²ha³kxa¹ ã³si³tẽ³kxi¹nx2ti³tu¹wa².

1 Timoteo 1:14

Nxe³sa³nũ²la² Je³su² Kris²tu³jah¹lo²kxai³lu² thãi³ti³la² a³lxi² wa³to²hi²ha²kxai³ wi¹lhin¹khai¹nxe³ha²kxai³ yxo²ĩ²si¹sain¹jau³su² ĩ³yau¹ũ³sai¹ni² a³lxai¹na¹ju³ta³nũ³a² ũ³hũ¹sai¹ni² Je³su² Kris²tu³jah¹la² nxe³sa³na²hẽ³la². ónũ²nxi²sxã³ yxau³a³sa³ha²kxai³ nxe³sa³na²hẽ³la².

1 Timoteo 1:3

Nxe³ha²kxai³ Ma³se³to²na²ko³xa² ai³te³lhxã³ nxa¹hĩ¹nai³tã² e³kxi¹nxa²ha¹tai¹ti²tu³wa². Nxe³nxa²ha¹te³nah¹lxi¹: — E²fe³so³thĩ³na² hãi¹sxã³ yxau³sẽ¹li¹. A²nũ²a² ĩ²li³te²a² wãn³txa² ki³han³jau³xa² ĩ³tih³nxe³nyhai¹nha³tai¹. Nxe³te²a² ha³ya³kxa² o²la³kxain¹si¹hin¹jau³su² ĩ³ye³kxi¹tai¹nhẽ³li¹. Wãn³txa² ki³han³jau³su² jau³xa² ã³na¹i² wxa²wĩ³na²nãu³xu¹tai²na² he¹ta¹hxai²hẽ¹li¹. Nxe³jau³xai²na² ya²la³tu̱³txa³kxai²nãn²tu̱³ ã³na¹i² nxe³ain¹si¹hin¹jau³su² ĩ³ye³kxi¹tai¹nhẽ³li¹. Nxe³jau³xai²li² a²ẽ¹nãu³ai²na² hxi²kan¹txi³ yxo²ĩ²ki̱³jau³sxa³wa². Yxãn¹ta¹ Txa²wã¹sũ̱³na² wãn³txa² so¹lxi³ hxi²kan¹txi³ yxo²ĩ²ki̱³jau³xai²la¹wa².

1 Timoteo 5:8

A²nxe³jut3su² a²yah³la²nãu³su² ta̱³nxa² a²xa³ka³lxu²nãu³su² ta̱³nxa² a²nũ̱³ka̱³txa² sa²hau³ko³tai¹nxa³kxai²nãn²tu̱³ Je³su² Kris²tu³jah¹la² wãn³txa² e²nai¹nhĩ̱³nx2na³la². Je³su²jah³lai²na² wãn³txa² yxo²ĩ²xa³te²a² wi¹wa³to²hi²hĩ̱³nx2na³la².

1 Petro 5:14

A³lxi²waun¹nha¹ju³ah³lxi³sxã³ wi¹lĩ³hen³txi³nha¹jah³lxi³hẽ¹la². Je³su² Kris²tu³jah¹la² a²hãu²ju³ta² yxau²xai³yah³lxin¹ju³ta² ten³sa³nha²wa².

3 Joãu 1:14

Ye³jen¹na² wxã³sxã³ ĩ²nxa²ha¹tu¹wa². Na²ha¹kxai²nãn²tu̱³ wxa²ne³nxẽ³na² ĩ³ye³kxi¹nxa²ha¹tu¹wa². Wxa²ẽ¹nãu³ai²na² ĩ³wi¹lhi²nxe³sxã³ yxau²xai³lin¹ju³ta³nũ³a² ten³sa³nha²wa². Wxa²ya̱³lxi³nãu³xai²na² a²ha³ta̱³nxa² ũ³sa²si¹hã³ũh¹nxain¹na³la². Ĩ³ye³kxi¹nxa²ha¹jau³su² ã³wa²su¹ya³nxa²ha¹wa². Ta³lun²ya³nxa²ha¹wa².

Apokalipse 1:4

Nxa²ha¹te¹ ha³te̱h³nxã³nxai²na² txai²li² Jo³ãu²ah³lo²na¹xai²na² ũ³wha²li¹jah¹lo²sa¹wa². Je³su²jah³lai²na² wãn³txa² yxo²ĩ²sxã³ yxau²xai³tũ̱³ka̱³txi³nãu³xa² A²si³a³ko³xan¹te²nãu³xa² nxe² 7 nxe³ tũ̱³ka̱³txi³ ĩ³nxai²na² ũ³wha²li¹la³kxi¹nx2ta¹wa². Nxe³nx2ta¹jau³xa²sa¹. — Txa²wã¹sũ̱³na² wi¹lhin¹ti³hi¹txa²lxi³ju³ta² ten³sa³ha²kxai³ ã³nhãun²nha²ju³ta² ũ³hũ¹nxa²lxi³ju³ta² ten³sa³ha²kxai³ Txa²wã¹sũ̱³na² nxe³si¹nx2ti³jau³su² ten³sa³nhai¹. A²nxe³sxã³ Txa²wã¹sũ̱³nu²kxai³lu² a²wi¹lhĩ¹nu¹ta²kxai³ jah¹lain²txi³ ka³te̱n³ti³ yxau²xai³lha²kxai³ nxe³hĩ¹nãn¹te²tu̱³ jah¹lain²txi³ ka³te̱n³ti³ yxau²xai³lha²kxai³ kxãn³nãu³a¹ jah¹lain²txi³ ka³te̱n³ti³ yxau²sa²tẽ³ha²kxai³ nxe³ Jah¹lo²su² na³li¹. A²nxe³jah¹lain²txi³ wi¹lhin¹ti³hit1txa²ti³si¹ha¹jau³su² ten³sa³nhai¹. Te²yã¹nxe³ju³ta² Txa²wã¹sũ̱³na² Yãu³ka³jxah¹lo²nãu³xa² nxe² 7 nxe³te²nãu³xa² Txa²wã¹sũ̱³na² yen³nãu³a² yxau²xai³lain¹na³li¹. Nxe³tũ̱³ka̱³txai²na² te²yã¹nxũn³sxã³ wi¹lhin¹ti³hi¹txa²ti³si¹ha¹jau³su² ten³sa³nhai¹.