Wiile 1:18 - mzwDBL

¹⁸ Korowii te waa toɡrɔ tɛ mɛ, kɛ menee vɛh waa waa do mɛ a ta. Hé no n be, he nɛra haa lɔ bobɛlbwa, dɛ́ na wenaale maa lɔ o ta. Ba lawɛ n bonɔɔna ne toli bwa laa ta kaa harɛfala ta.

Wiile 1:18 ပူးပေါင်းရင်းမြစ်များ

1 Koranar 13:21

Asɛ o kpɔ takpeɡ bol waa o dɔŋ waa le Juda harɛ la be ŋɔ, “Korowii ŋɔ, ‘He ta waa maa bola la noɛ, dɛ vɛh waa maa doe a ta la.

Ɛsra 9:13

Waa aa pu yaa nɔ bwa le ya wechɔɡa aa ɡela ya di bolchɔɡe la. Kɛ ane a bwa, N Naa Korowii yaa dɛ tomɛ, tamaa kenii he tɛr ya deŋne. He ta ɡelɛ a ɡwaa ya nɛ, dɛ ɡel ya bini bane dɔ ya nyuune dɛ ta so le.

Nehemia 9:26

Kɛ ba ɛɛ deŋnekpeɡ dɛ le he habɔɔ. Ba laa ba liire kpɔ he Mmara ta teŋa ta. Ba kpoo he keamere baa kah ba ŋɔ, bá charɛ ba liire ba he be la. Ba bol wedoŋa dɛ taah he sɔn la.

Nehemia 9:33

He waa toɡrɔ dɛ dɔ kasinteŋ kɛŋɔ he tɛr ya deŋne, a lole kɛŋɔ ya ɛ wechɔɡa.

Yela 107:11

dɛkalkɛ ba ɛ Nemenɛ Korowii deŋnekpeɡ, dɛ vɛh waa waa baɡ ba ta teŋa.

Yela 119:137

N Naa Korowii, he waa toɡrɔ, he Mmarare ɡe do wer.

Yela 119:75

N Naa Korowii, n jemɔ kɛŋɔ he bole pae toɡrɔ, he che kasinteŋ ta dɛ tɛr n deŋne.

Yela 145:17

N Naa Korowii, waa haa dɛ ɛ bwa toɡrɔ, he dɛ nyin he kontaala bwa.

Kaala 9:27

Belaa Ijipt kooro yerɛ Mosis ne Arɔn dɛ ŋɔ, “Taraken n nao kɛŋɔ n ɛ wechɔɡa, Korowii waa toɡra. N ne n nɛra sɛh chɔɡre.

Jeremia 12:1

Jeremia ŋɔ, “N Naa Korowii, saŋ bɛlbwa maa kpɔ n waa bil he sie la, he konee dɛɛ do som. Mɛɛ bol he waa bola dɛ́ pa bole aŋwɛnɛ ta waa. Ɛrɛɛ nyubinikpeɡ tena wobɛlbwa yon dɛɛ chiɡ ba kɛrɛdɛ nɔɔ? Ɛrɛɛ nɛnchɔɡa ɛɛ dɔ bosɔɔhna nɔɔ?

Jeremia 32:23

Kɛ baa bala dɛ ba so o ta la, ba vɛh he Mmarare la, ba ta waa haa do ba a ta kɛɛ waa haa baɡ ba la ta teŋɛ. A waa he kpɔ wenaale nɔ bwa ba ta ba nɛɛ la.

Jeremia 4:17

Ba cheɡɔ bar Jerusalam kɛŋɔ baala aa dɛ daah koo, dɛkalkɛ o nɛra ɛɛ mɛ deŋnekpeɡ. Men Korowiirii bola.’

Jeremia 49:12

Waa Korowii aa dɛ bol laanee nɔ. “Dɛ nɛra baa wola chɛɛ kɛŋɔ ń tɛr ba deŋne nyɔ n danana nee aa, ɛrɛɛ maa wola won tɛr he deŋne ɔ? Haa won le deŋnetɛra la nyoa, a chɛ kɛ hé nyɔ n danana ne.

Wiile 1:12

Jerusalam wio kɛ nɛn ken, dɛ ŋɔ nɛra baa teŋa baa kaa be ŋɔ, “Hé nyiŋ mɛ, amɔ nomɛl ɡe lole dɛɛ na n wenaale nɔ dɔŋa aa? Wenaale Korowii baah aa dia kohona o kpɔ ba ta n nɛɛ saŋ nɔ ta nɔ.

Wiile 3:42

“N Naa Korowii, ya ɛ wechɔɡa dɛ ɛɛ deŋnekpeɡ, he ta ya wechɔɡa kpɔe kɛ yaa.

Wiile 5:16

Komɛlbwa toole ya won dɛɛ tamane o waa kpa. Ya ɛ wechɔɡa nomanta, wenaale kohona ba ya nɛ.

Daneɛl 9:5

Ya ɛ wechɔɡa dɛ koni, dɛ ɛ nyubinikpeɡ, dɛ le he habɔɔ. Ya bɛɡɔ le waa haa do yaa a ta ne he Mmarare ta.

Daneɛl 9:7

N Naa Korowii, he waa toɡrɔ, ya di sihiih fini. Juda ne Jerusalam tena, ne Israel tena haa lɔ yaa peɡre harɛre aa lɔ bojaŋa ne anɔ la aa bɛna ta bwa, dɛkalkɛ ya waa ta kasinteŋ dɔe tɛɛ.

Emɔs 8:13

Awola tɔpere la, toli ne bonɔɔna ba bwara aa kpeɡa sie ɛɛ bir baa bá choɡli, nyɔɡre wa.

Sefania 3:5

Korowii ta lɔ bwɛjen la bini, o waa toɡrɔ, waa wola wedoŋa nyin. Tɔpere bɛlbwaa wɛɛ di o nɛra kasinteŋ, waa wola habɔɔ le saŋ bɛlbwa, kɛ ane a bwa, sihiih aa wechɔɡ-ɛɛra baa lɔ o ta la kpo.

Sekaria 1:6

N cheɡɛ n bonɔɔna baa ɛ n keamere nɛɛ dɛ kpɔ me Mmarare ne n waa tɛ he naawa dɛ ja ba, kɛ ba vɛah dɛ dɔ a deŋnetɛra. Belaa ba charɛ ba liire ŋɔ men Korowii Maa Ɛ Koronar Bwa Kooroo tɛr ba deŋne ɡɛ aa chɛa. Deŋnetɛra aa chɛ ba laanee ba dɔ le Korowii Waa Ɛ Koranar Bwa Kooro be ɡɛ waa ŋɔa wɛɛ ɛo la.”

Tɔn Pɔɔl Aa Chwerɛ Rom Tena 2:5

He deŋne kpeɡri. Haa ɡelɛ he tea bini ɛɛ chɔɡ he wechɔɡa wa. He ɡelɔ Korowii bwaawee ɛɛ do kan he nɛɛ tɔpere bɛlbwa. Awola waa ba pa bole kasinteŋ ne la, o baah ɛɛ di he nɛɛ taeh.

Tɔn Pɔɔl Aa Chwerɛ Rom Tena 3:19

Ya jemɔ kɛŋɔ waa Mmara la aa dɛ baɡle la, nɛra baa dɛ teŋɛ Mmara la ta laanee Mmara la ɛɛ baɡle, ásɛ nomɛlbwa bɛ won dɔ wobɛlbwa bol Korowii sie, ásɛ o won bol nomɛlbwa waa dɛ́ pa bole.

Mmarare 32:4

O do kɛŋɔ Bwetal dɛɛ lɛ yaa, o wobɛlbwa toɡrɔ dɛ dɔ kasinteŋ. Waa nyosone teŋe, waa aa maɡra dɛ toɡree wɛɛ ɛ.

Sitɔɔla 1:7

Belaa kooro la ŋɔ, “N fa teŋni koranar fifraanuanɛ nanibala ne nonibala, ba tɔɔ kondikompuɡrere dɛɛ di n tiɡ ta. Korowiirii ɡela waa maa ɛɛ ba la ɡure n nyu ta la.” Ba kpɔɔ kaa bwɛjen Jerusalam o ka sewɛ.

1 Samoɛl 15:23

Dɛ he ɛ Korowii deŋnekpeɡ aa, a do kɛŋɔ haa dɛ tomɛ voɡa ken, bambikpeɡ ɡe do kɛŋɔ voɡa toma. Haa vɛh Korowii waa la nomanta, o ɡe vɛɛh kooro.”