Sɛɡla 14:14 - mzwDBL

¹⁴ Nɛn waa ɡel wedɛɛɡa ɛɛ dɛ́ dɔ deŋnetɛra, nɛndɛɛɡa ɡe ɛɛ dɔ ba we-ɛɛla kembɔr.

Sɛɡla 14:14 ပူးပေါင်းရင်းမြစ်များ

Yela 109:17

N dɔm la dɛ nyin nɛra taahna, ɡel o taahna ɡure o nyu ta. O hah sweera dɛ tɛ o dɔŋ, bɛ ɡel nomɛlbwa swee tɛ o ɡe.

Sɛɡla 12:14

Nɛn kembɔr lɔ anɔ la waa bol ne o we-ɛɛle ta. Anee ɡela wɛɛ dɔ kwaa aa chɛo.

Sɛɡla 12:21

Wechɔɡa aa nɛn o wa aa toɡra pu, kɛ nɛnchɔɡe te ne wejoree.

Sɛɡla 14:10

Nomɛlbwa toole dɛ jemɛ waa aa dɛ ha o dɔŋ, kɛɛ ɡɛ o silɛɛ aa doa.

Sɛɡla 14:15

Gɛnee yon dɛɛ yarada wobɛlbwa waa dɛ no, kɛ wejereme te dɛ́ nyiŋi o vala bini.

Sɛɡla 18:20

He bol wedɛɛɡaa, he dɛ vaɡɛ kɛŋɔ haa di kondikondɛɛɡa ken, wobol aa wera ɡelɔ he baah ɛɛ sɔɔhne.

Sɛɡla 9:12

He jemɛ wa aa, aa do werii tɛɛ, he vɛah ɡe aa, hɛɛ na waa.”

Jeremia 17:5

Waa Korowii aa dɛ bol laanee. “Nomɛlbwa waa kpɔ o te dawɛ nɛwɛnyini nɛ, dɛɛ hwɛɡɛ o bokpeɡa ta dɛ berɛ habɔɔ kpo men Korowii la, o bwɛɛlɛ.

Jeremia 2:19

Hé ɡbabir nyubinikpeɡii dɛ́ ɡel he dɔ deŋnetɛra. Vɛɛh haa vɛɛh mɛ la ɡe ɡel he di bolchɔɡe. He ɡbabir nyiŋi dɛ́ na ɡɛ haa ɛ wechɔɡa he tea bini chɔɡ, ɡɛ saŋ haa vɛh men Korowii haa dɛ tom mɛ, haa wola men ɔmɛ la wa. Men Korowii, Koranar Bwa Kooroo bola.

Jeremia 8:5

Bɔkwa waa bala nɛra nɔ berɛ habɔɔ kpo mɛ nɔɔ? Ɛrɛɛ saŋ bɛlbwa Jerusalam tena ɛɛ le habɔɔ nɔɔ? Ba sie ta dɛ lɛ waa aa ɛ nyosone ta, baa nyin kɛ bá berɛ ba n be.

Ɛsekeɛl 22:31

Mɛɛ kpɔ n banfuih ba ta ba nɛɛ kohona, dɛ́ chɔɡ ba, ba waa baa ɛa la wa. Men Nemenɛ Korowiirii bola.”

Hosia 4:16

Israel tena deŋne kpeɡri, kɛŋɔ naneenanar a deŋne aa kpeɡa ken. Ɛrɛɛ men Korowii ɛɛ ba wona kpɔa la dibɔr kɛŋɔ baa teɡɛ pebiiri dɛɛ la dibɔr ɔ?

Sefania 1:6

Mɛɛ chɔɡ banɔ la baa berɛ habɔɔ dɛ vɛh n nɛɛ teŋa, ne banɔ la baa wola n be ba ń baɡ ba waa laanee.

Amanesoma Jɔn Aa Chwera Tɔn 4:14

Kɛ nomɛlbwa waa nyɔ nee maa dɛ tɛo la te, nyɔɡre aa on kpo bwa. Nee maa tɛo la ɛɛ ɛo kɛŋɔ bule aa lɔ naate bini dɛɛ bule nee aa dɛ tɛ mkpa aa wola jaɡa dɔe bwa.”

2 Kɔrent 1:12

Webeŋkpoŋii ɡela ya baŋa pa. Anee kɛŋɔ yaa wonoo ŋɔ bambile bwa ne kɛŋɔ wobɛlbwa yaa ɛa harɛ bonɔ la, tepoŋ ne bambile bwa nee ya ɛa Korowii ŋwɛnɛ ta, a laa kɛ waa yaa ɛa he be la. Korowiirii sune ya nɛɛ dɛ cha yaa ya ɛa. Harɛ bonɔ wejema ne laa ya ɛa.

Galaasia 6:4

Hé bɛlbwa nyiŋi o we-ɛɛla na. Dɛ a wer aa, ó ɡel o sie lɛ. Kɛ he bɛ he te kpɔ dɛɛ maɡɛ dɔŋa dɛɛ nyin sɔn,

Galaasia 6:8

Dɛ nɛn teŋɛ o nɛwɛnyini mar wechɔɡa aa suu pɛla kwaa nɛɛ dɛ du wechɔɡa aa, sewee wɛɛ ba koma. Dɛ nɛn teŋɛ Korowii Domadɛɛɡe la tetoowaa ta dɛ du wedɛɛɡa aa, wɛɛ komɛ mkpa aa wola jaɡa dɔe bwa laanee Domadɛɛɡe la be.

Hibru 3:12

Anomanta, yabala, hɛ́ɛ nyiŋi kɛrɛdɛ ásɛ he bini bɛlbwa bɛ liichɔɡa ba dɔ kɛŋɔ waa Korowii waa lole saŋ bɛlbwa laanee yarada, dɛ́ ba vɛh o waa ta teŋa.