Tɔn Pɔɔl Aa Chwerɛ Rom Tena 4:6 - mzwDBL

⁶ Gɛɛ ya Juu tena nabaa Devid faa baɡle nomɛlbwa Korowii aa wola o we-ɛɛla nyiŋe, asɛ dɛ lɛo kɛ nɛndɛɛɡe o waa su o siwi la waa kɛŋɔ o na som la.

Tɔn Pɔɔl Aa Chwerɛ Rom Tena 4:6 ပူးပေါင်းရင်းမြစ်များ

2 Timoti 1:9

Onee lɛ yaa, dɛ le yaa ŋɔ yá ba ɛ o nɛra dɛ́ do ɡoroŋ tɛo. Ya tondɛɛɡa ɛɛ waa laa o le yaa, kɛ o liire waa dɔa tɛ yaa, ne ɡɛ waa na ya sum dɛ cha yaa waa o le yaa. Yeesu Kristo nɛɛ o che dɛ na ya sum, dɛ cha yaa dɛ le yaa mɔɔ dɛ ta komɛlbwa.

1 Kɔrent 1:30

Korowiirii ɡela he ne Yeesu Kristo pɛ, ásɛ ya che o nɛɛ dɛ dɔ Korowii wejema. O nɛɛ a che Korowii na yaa kɛ nɛndɛɛɡa dɛ berɛ kpɔ yaa ɛ o kwa. Onee kpɔ seo dɛ yawɛ yaa le ya wenaale ta.

Felepae 3:9

ásɛ ya bwa won pɛ, ásɛ n ɛ nɛndɛɛɡe, n waa su Korowii siwi. N ta ŋɔe ŋɔ ń che Mmara ta teŋa ta dɛ́ ɛ nɛndɛɛɡe n waa su o siwi. Kɛ n dɛ nyin ń che yarada maa dɛ yarada Yeesu Kristo la ta, dɛ́ ɛ nɛndɛɛɡe n waa su o siwi. Nɛndɛɛɡe ɛɛ le Korowii be o kpɔ dɛɛ tɛ nɛra la bwa baa yarada Yeesu.

2 Kɔrent 5:21

Dɛ wechɔɡa bɛlbwa toole Yeesu Kristo nɛ, kɛ ya kɛrɛdɛ nomanta, Korowii ɡelɔ o lɛ ya wechɔɡa che, ásɛ dɛ ya ne o pɛo waa, ya waa won su Korowii siwi ó lɛ yaa kɛ nɛndɛɛɡaa yan.

Ɛfesos 1:3

Hé ɡel ya kpɛɛ ya Dɔɔ Yeesu Kristo Mɛɛ Korowii, dɛkalkɛŋɔ o cha yaa wedɛɛɡa la bwa aa le o Domadɛɛɡe be la ta, asɛ yaa na som o be nyundua, pɛɛ ya ne Yeesu Kristo aa pɛa la wa.

Galaasia 3:14

Korowii fa baɡɛ Abraham nyoa ŋɔ wɛɛ sweero andɛɛɡaa. Gɛ aa ɛ ásɛ nɛra baa wola Juu tena ɛɛ che Yeesu Kristo nɛɛ dɛ dɔ a ɡɛ wedɛɛɡe nɔ la, a waa o lɛ nyotaahna la dawɛ o nɛɛ dɛ lɛ yaa le a ta la, ásɛ a che yarada ta Korowii tɛ yaa o Domadɛɛɡe la waa baɡɛ nyoa ŋɔ wɛɛ tɛ yaa la.

Tɔn Pɔɔl Aa Chwerɛ Rom Tena 4:11

O pen teŋa la ɛ we-ɛɛle bɛl waa dɛ baɡle kɛŋɔ o yarada waa o won ɛ nɛndɛɛɡe o waa su Korowii siwi, dɛ baɡle kɛŋɔ waa wola teŋe mɔɔ la, dɛ o waa su Korowii siwi. Nɛra baa wola Juu tena ɛɛ, baa wola pen teŋe dɛɛ yarada Korowii asɛ o lɛɛ ba kɛ nɛndɛɛɡa ba waa su o siwi la, ba mɛɛɛ Abraham.

Tɔn Pɔɔl Aa Chwerɛ Rom Tena 1:17

Yeesu Amanesoma laanee dɛɛ baɡle ɡɛ Korowii aa dɛ nyin kɛŋɔ nɛwɛnyini do ásɛ ya waa su o siwi. Le waa la mumpar ka tel a jaɡa bwa, o waa yaradae waa ɡboo a bwa. Korowii Tɔn baɡlɔ kɛŋɔ, “Naate o wa aa toɡra dɛ su Korowii siwi la, wɛɛ yaradao dɛ́ dɔ o nyu.”

Aesaya 54:17

Dɔmkon bɛlbwa toole bá won kpɔ che he nɛɛ á maɡre. Nomɛlbwa waa kpɔ waa dawɛ he nɛɛ la, wɛɛ di bolchɔɡee. Mɛɛ che n bonɔɔna habɔɔ, bá di bole ba dɔma nɛ. Men Korowiirii bola.”

Yela 112:1

Hé kpɛɛ Korowii! Nomɛlbwa waa dɛ tomɛ Korowii, o sie ɛɛ lɛ o Mmarare ta kohona la, o na som.

2 Pita 1:1

Men Seemɔn Pita maa ɛ Yeesu Kristo bonɔɔ dɛ ɛ o torome la, men chwerɛ tɔn nɔ dɛɛ tɛ he nɛra haa dɛ yarada Yeesu Kristo waa ɛ ya Korowii ne ya Lɛɛ la. O wa aa toɡra nomanta, o tɛ heyaa ya yarada waa wera nɔ dɔŋ.

Galaasia 4:15

He sie fa aa lɛ n nɛɛ kohona la, taraken te bɔkwa waa bera ba nɔ? Mɛɛ wonoo ŋɔ ɡɛ saŋ la he fe wonaa, he fe foromi he sibie kwaraa tɛ mɛ.

Tɔn Pɔɔl Aa Chwerɛ Rom Tena 4:24

Ya nɛra yaa dɛ yarada Korowii waa ir ya Dɔɔ Yeesu seo ta la, ya bwaa ba chwera tɛ. Ya bwaa Korowii ɛɛ ba lɛɛ kɛ nɛndɛɛɡa, ya waa su o siwi.

Tɔn Pɔɔl Aa Chwerɛ Rom Tena 4:9

A ɡɛ som nae nɔ Devid aa bol o waa nɔ, dɛ Juu tena aa dɛ teŋe pena nɔ, ba ɡboo dɛɛ ba som nae yaa, kɛ nɛra baa wola pena teŋe bwaa o ŋɔ? Too, baa baɡla Korowii Tɔn bini ŋɔ, “Abraham yarada taa a che asɛ o waa su Korowii siwi” nɔ,

Tɔn Pɔɔl Aa Chwerɛ Rom Tena 3:27

Aa do ɡɛ nɔ, ya dɔ ŋwɛnɛ kɛŋɔ ya ta nyoa aa? Ya ta ŋwɛnɛ dɔe. Ɛrɛ taa a che yaa wola won ta nyoa nɔɔ? Mmara ta teŋa ta laa a che. Yeesu Kristo yaradae laanee tɔ ɡɛ waa nɔ bwa ŋwɛnɛ,

Daneɛl 9:24

Korowii do bene fifraanuanɛ bele anuanɛ cheɡ kɛŋɔ he nɛra ne bwɛjen Jerusalam ɡel wechɔɡa ɛɛ. Baa kpɔ wechɔɡa bɛlbwaa kɛ, ásɛ waa aa toɡra do le saŋ bɛlbwa dɛɛ la. Gɛ aa ɛ ásɛ wepila ne Korowii waa aa dɛ ba bala ɛ kpela, ásɛ ba berɛ kpɔ Korowii Dea la do o nɔn ta.

Jeremia 33:16

A ɡɛ saŋ la, mɛɛ lɛ Juda ne Jerusalam nɛra bwaa, ásɛ ba so deŋnesɔɔhna ta. Ásɛ baa yerɛ bwɛjen Jerusalam ‘Korowii Waa ɛ Ya Lɛɛ.’ ”

Jeremia 22:6

Gɛ Korowii aa dɛ bol laanee nɔ. “A lole kɛŋɔ Juda koodem wer kɛŋɔ Gelead harɛ ne Lɛbanɔn bwejena n be, kɛ kasinteŋ, mɛɛ ɛɔ kɛŋɔ pua hɛŋle ɡbo harɛ, kɛŋɔ bwɛɛre nɛra aa wola toole a ta ken.

Mmarare 33:29

Israel tena, he na som to. Nomɛlbwa ta heyaa tele, he ɛ nɛra Korowii aa lɛ heya. O ɡbaɡbaa he ɡbemɡbe ne he tokobi. Onee dɛ́ lɛ heya dɛ́ ɡel he yo le. He dɔma ɛɛ ba ɡuŋi he siee, dɛɛ soŋe ŋɔ he sune ba nɛ, ásɛ he tiɡri ba nɛ.’ ”

Matiu 25:19

Aa baa biɡri la, bonɔɔna la dɔɔ la balɔ dɛ ba ŋɔ bɛ́lbwa ba chaɡle ɡɛ waa kpɔ o suuɡa ɛ.

Tɔn Pɔɔl Aa Chwerɛ Rom Tena 4:5

Kɛ nɛn waa wola wobɛlbwa ɛɛ dɛ kpɔ o yarada do Korowii ɡbo nɛɛ kɛŋɔ o won wechɔɡ-ɛɛra nɛndɛɛɡa ɛɛ la, a cheɡɛ o yarada la ta asɛ Korowii lɛo kɛ nɛndɛɛɡe o wa ɛɛ su o siwi.

Tɔn Pɔɔl Aa Chwerɛ Rom Tena 4:7

O bolɔ ŋɔ, “Nɛra Korowii aa kpɔ ba wechɔɡa kɛ ba, waa wola a waa lii kpa la, ba na som.

Jems 2:18

Bɛl lole nomɛl ɛɛ ŋɔɔ yaradae ɡboo wɛɛ yarada Korowii, ásɛ bɛl ɡe ŋɔ wedɛɛɡaa o ɡee ɛ. Kɛ ɡɛ ɡe aa won maɡre. Ɛrɛɛ hɛɛ ba wona baɡ mɛ he yarada dɛ he ta wedɛɛɡa ɛɛ dɛɛ ja a ta nɔ? N te, mɛɛ che n wedɛɛɡa ɛɛ taa, ásɛ he jemɛ kɛ n dɛ yarada Korowii.