Daneɛl 7:28 - mzwDBL

²⁸ Waa la jaɡaa la. Men Daneɛl aa naa la, n ɔmɔ kohona n siebɔr ɡwaŋɛ, kɛ n kpɔ wobɛlbwa do n nyu bini.”

Daneɛl 7:28 ပူးပေါင်းရင်းမြစ်များ

Mumpar 37:10

Josef aa taa ɡɛ waa nɔ o mɛɛ ne o dɔɔranar be la, o mɛɛ kaoh dɛ ŋɔ, “Bɔkwa ɡe deeraa do ken? Amɔ n ne he nya ne he dɔɔranar ɛɛ bao dɛ́ ba ɡuŋi kɛɛ?”

Mumpar 37:11

Ate, o dɔɔranar la bwaawee ir o nɛɛ kɛrɛdɛ, kɛ o mɛɛ te kpɔ waa la do o nyu bini.

Daneɛl 10:16

Asɛ nyundua torome waa do kɛŋɔ nɛn kpɔ nɔn ba leɡe n nyoa, mɔɔ n pa mun pili nyoa dɛ bol wa. N ŋɔ o be ŋɔ, “Nomoa, n na weweele taeh wepila nɔ ta, asɛ a ɡel n bwara yɔr.

Daneɛl 10:8

Anomanta, a ka n ɡbo mɛɛ nyiŋi ɡɛ nyokpowaa nɔ, dɛ n ta bokpeɡa dɔe kpa, n siebɔr beɡre kɛŋɔ lale sie maa wola won ɛ wobɛlbwa.

Daneɛl 11:27

Gɛ koranar banɛ baa dɔ liichɔɡa tɛ dɔŋa nɔ ɛɛ pɛo so tiɡ ta dɛɛ neɡre dɔŋa, kɛ aa tɔnɔ bɛlbwaa dɔ tɛɛ ba, dɛkalkɛ saŋ baa lea cheɡ la ta dɛ ba.

Daneɛl 12:13

Kɛ hen Daneɛl, he te kaa, di kasinteŋ ka tel waa bwa jaɡa saŋ. Hɛɛ sewɔɔ kɛ hɛɛ iruu, dɛ́ dɔ he kembɔr waa bwa jaɡa saŋ.”

Daneɛl 12:9

O ŋɔ, “Daneɛl, kaa taraken, dɛkalkɛ a ɡɛ waa nɔ ɛ waa aa chɛ kɛ ba laa tɔ, dɛ marɛ o nyoa ka tel waa bwa jaɡa saŋ.

Daneɛl 4:16

Hé ɡel o liire charɛ ó kpɔ ol liire, o bɛ nɛn liire dɔ ka tel kɛŋɔ bene anuanɛ aa baa kaa.

Daneɛl 4:19

Ate, Daneɛl baa bera dɛɛ yerɔ Bɛltesasa la bwara yɔr kohona, o wili waa waa dɛ lii ta. Anomanta, kooro la ŋɔ, “Bɛltesasa, bɛ ɡel deera la kɛɛ a mun baɡla dɔe ɔmee.” Ate, Bɛltesasa chaŋe ŋɔ, “N naa kooro, n dɛ nyin kɛ deera nɔ ne a mun fe bɛ he waa ɛ, dɛ fee ɛ he dɔma wa.

Daneɛl 5:6

O siebɔr ɡwaŋɔ, o liire chɔɡ, asɛ ɔmee lawɔ kohona o natuune ɛɛ sa dɛɛ lɔ dɔŋa.

Daneɛl 7:15

Wepila men Daneɛl aa naa la ha mɛ taeh, doma ne liire bini bwa.

Daneɛl 8:1

Kooro Bɛlsasa aa di kora bene atoro ta la, men Daneɛl na wepila ja anɔ la n fa aa naa la habɔɔ.

Daneɛl 8:17

Ate, Gebreɛl ba che bɛne bela maa cheɡa la, asɛ n ɔmɛ kohona dɛ chole kpɔ sie pi harɛ. Anee o ŋɔ n be ŋɔ, “Nɛwɛnyini bie, n dɛ nyin he jemɛ kɛŋɔ wepila nɔ mun dɛ baɡle waa bwa jaɡa saŋ wa.”

Daneɛl 8:19

O ŋɔ n be ŋɔ, “N dɛ ba waa aa dɛ ba Korowii bandia kohona la habɔɔ bala he be bola. Wepila la dɛ baɡle waa bwa jaɡa saŋ wa.

Daneɛl 8:27

Men Daneɛl, dɛ n ɡwɛɡrɔ, n bwara wee mɛ la sie tama mɔɔ n ta won ba ir dɛ ɛ toma tɛ kooro. N ta wepila la mun noɛ, dɛ a ɡwaa n liire ta.

Amanesoma Mak Aa Chwera Tɔn 9:15

Nɛra la aa na Yeesu la, ba bwara yɔrɔ, asɛ ba chwa dɛ ba jaamo.

Amanesoma Luk Aa Chwera Tɔn 2:19

Asɛ Mɛɛre kpɔ waa la bwa do o nyu bini dɛɛ kari.

Amanesoma Luk Aa Chwera Tɔn 2:51

Belaa Yeesu ir ba chiɡ ŋwɛnɛ ta dɛ kaa Nasarɛt. Waa lɔ o nya ne o mɛɛ be la, dɛ o dɛ no ba deŋna wa. O nya kpɔ waa la bwa do o nyu bini dɛɛ kara.

Amanesoma Luk Aa Chwera Tɔn 9:44

“Hé cheɡ deŋne dɛ́ no waa nɔ maa dɛ ba he be bola nɔ, ásɛ dɛ bɛ soh! Ba dɛ ba Men Nɛn Bie lee do nɛra nɔn ta.”