Aesaya 14:13 - mzwDBL

¹³ He fa liiro ŋɔ, ‘Mɛɛ teehnoo kaa nyundua. Korowii weweela baŋ lee mɛɛ ba n kookara kpɔe ka cheɡ, dɛ́ so kɛŋɔ kooro weekaŋle nyunduabɔr bwejen la ta, bela kwaa aa bea baa wola an na aa dɛ cheme la.

Aesaya 14:13 ပူးပေါင်းရင်းမြစ်များ

Job Tɔn 20:6

Ba dɛ ɛ mbarafo dɛɛ ɡɔɔ ba te, ba nyu kaa leɡe baama ta,

Yela 48:2

Korowii Saayɔn Bwejen wer, dɛ do jaŋne kohona, koojen la bwɛjen kpɔ silɛɛ baa tɛ harɛ nɔ ta nɛra bwa.

Aesaya 2:2

Tɔpere bɛl dɛ ba ásɛ bwe Korowii Dea aa chɔŋɛ o ta Jerusalam la waa ba hiah ɡwaa bwea bwa, ásɛ o sɔn le bwea bwa bini, ásɛ harɛre nɛra warɛ dɛ́ ba o ta.

Jeremia 49:16

He mbarafo neɡre heya kohona, he dɛ lii kɛ nomɛlbwa dɛ́ ɔmɛ heya, he dɛ neɡre he te. He soɡe bɔɔne bini bwejena dor. A lole kɛ he soŋnibɔr lɔ nyundua, kɛŋɔ kee yon ka sɔh o kɔr nyundujaɡla la, kɛ mɛɛ ɡeloo he le bela le harɛ.’

Ɛsekeɛl 27:3

ŋɔ bwɛjen waa lɔ mpo nyoa dɛ ɛ bonadibɔr tɛ nɛra baa lɔ mpo nyoa bobɛlbwa be ŋɔ men Nemenɛ Korowii ŋɔ, ‘Bwɛjen Taaya, he ŋɔ he wer ka tonɛ.’

Ɛsekeɛl 28:2

“Nɛwɛnyini bie, bol Taaya kooro be ŋɔ men Nemenɛ Korowii ŋɔ, ‘He dɛ ɡɔɔ he te dɛ ŋɔ he ɛ voɡ, he dɛ so voɡ kara ta mpo bare cheme. Kɛ nɛwɛnyinii hen, he ta voɡ ɛɛ, he dɛ lii kɛ he ne voɡ wejema kɛrɛdɛ.

Ɛsekeɛl 28:9

Hɛɛ won ŋɔ he ɛ voɡ nɛra baa dɛ ba ba kpoe la be naa? Nɛwɛnyinii hen, he ta voɡ ɛɛ nɛra baa kpoe la nɔn ta.

Ɛsekeɛl 29:3

Ŋɔ o be ŋɔ men Nemenɛ Korowii ŋɔ, ‘Ijipt kooro, n ne he dɔɔ, he do kɛŋɔ lɛŋɔ damanta dɛ do he nenabɔɔne ta. He ŋɔ Nael Moo ɛ he kon, he ɡbabirii ɛo.

Ɛsekeɛl 31:10

Name kenii men Nemenɛ Korowii ɛɛ bol waa aa dɛ ba daa waa kpeɡa kaa baama ta la pui. Waa do jaŋne kohona nomanta, o mbarafo.

Ɛsekeɛl 40:2

Korowii kpɔ mɛ kaa Israel harɛ ta ka chɔŋɛ bwejen bɛl waa kaa nyundua kohona doa chaahna ta. Bwejen la weekaŋle harɛbɔr, n na deene ane bela kɛŋɔ bwɛjen bɛl ken.

Daneɛl 11:36

Siiria kooro la ɛɛ ɛ ɡɛ waa dɛ nyinii, dɛɛ ɛ mbarafo, dɛɛ ɡɔɔ o te ŋɔ o ɡwaa voɡ bɛlbwa, hale Nemenɛ Korowii waa kana la. Wɛɛ ɛ ɡɛ waa nɔ bwaa ka tel saŋ Korowii aa tɛr o deŋne. Korowii ɛɛ ɛ waa waa bola ŋɔ wɛɛ ɛo laanee.

Daneɛl 5:20

Kɛ waa baa ɛ deŋnekpeɡ o nyu bini do kpeɡri wɛɛ ɛ mbarafo la, Korowii iru kora ta, jirima waa dɔa la paŋɔ.

Obadia 1:3

He mbarafo neɡre heya. He soɡe bɔɔne bini bwejena dor, dɛ yon ŋɔ, ‘Umee dɛ́ won ba n ne harɛ nɔ?’

Sefania 2:15

Gɛɛ bwɛjen o nɛra aa dɛ lii kɛ ba soɡe deŋnesɔɔhna ta, wobɛlbwa aa ban ha la ɛɛ ba nae. Ba yon ŋɔ, “Ya bwɛjen ɛ bwɛjen tenten, bwɛɛ bɛlbwa toole o habɔɔ kpa.” Hé na chɔɡa waa chɔɡa, ásɛ kpɔɡ bini ola kpɔ bela berɛ a chɔɔbɔra. Nɛra báa teŋe baa kaa bwa ɛɛ mamɔɔ dɛɛ for nɔɔra.

Matiu 11:23

Ásɛ he Kapeeneɔm tena ɡe, he fe dɛ nyin kɛ he ɡbaɡba ir kaa Korowii doa kɛɛ? Baa viɡri heyaa Bɔnsam nii taa. Nyokpowaa nɔ maa ɛa he bini nɔ, dɛ ba fe ɛa Sodom aa, Sodom fe ta lole ba le fini, Korowii fe ta on chɔɡɛ.

Amanesoma Luk Aa Chwera Tɔn 10:15

Asɛ he Kapeeneɔm tena ɡe, ɛrɛɛ chɛ kɛŋɔ ń bol he waɔ? He dɛ nyin kɛ he ir kaa Korowii be nyundua kɛɛ? Hɛɛ ba harɛɛ Bɔnsam nii taa.”

2 Tesalonika 2:4

Wɛɛ ɛ o tenee dɛ́ ɡwaa komɛlbwa nɛra aa dɛ toma dɛɛ yera ba dɔɔranar, hale wɛɛ kpɔ Korowii Dea berɛ sobɔr dɛ́ ŋɔ onee Korowii.