1 Koranti 3:12 - Nyaa Shɔɔ Ɓɔɔ Laa a Ɓɛɛ

¹² Zang ɓɔɔ ri tuu zinariya, zang ɓɔɔ ri tuu azurufa, zang ɓɔɔ ri tuu ɓarɛ tari ɓɔɔ shaa nyaa dɔɔli ɓɛɛ, ri mãa gãa nɛɛ mani ka yuu doo gãa kɔ zang loo ɓee. A zang ɓɔɔ ri see ɓarɛ laa, nɛɛ wisi, a ɓɔɔ furu vuu, ri mãa gãa nɛɛ mani, ka yuu doo gãa keɓe.

1 Koranti 3:12 ပူးပေါင်းရင်းမြစ်များ

Zang Shonang Yeesɔ 20:30

Ka teteng manɛ, zang ɓɔɔ ri naa risi ruu niizang ditɔ, wu nwang kaa naa sèé, nɛɛ tɔɔ ri gɔ̃ɔ zang ɓɔɔ ri dũng Laa ri dũng kaa rikɔ.

Rooma 16:17

Manzung, ɓɔɔ ri dũng doo Laa kɔ ɓɛɛ, n gaa nɔɔ katɔ, nɔɔ gãng jĩng ka zang ɓɔɔ ri basɛ teteng zang, a ri ti shing zang ɓɔɔ ri shing danggn, ri yaa gbalang Laa ɓɛɛ. Ri tusu nɔɔ vuu náa ɓɔɔgn naa ɓɔɔ zang tusu nɔɔ tɔ ɓɛɛ kpang. Nɔɔ yaa gbalang ɓarɛ katɔ.

1 Koranti 3:11

Ka ruu ɓɔɔ, zang ɓɔɔ lòó doo gãa ɓɔɔgn takpang. Doo gãa ɓɔɔ Laa looyi, ɓi wukɔ Yeesɔ Kirisi.

1 Koranti 3:13

Diki ɓɔɔ shonang zang naa tusu bii kagn a ditɔ. Ka ruu ɓɔɔ, ka diki kaɓa, ɓɔɔ Yeesɔ Kirisi gbãayu ka koo keɓe, Laa naa gãsɛ shonang zang ɓu nɛɛ waa, waa kɔ naa túsù kati waasɛ̃ naa ɓɔɔ zɔ̃ng shonang zang ɓu nwàng ɓɛɛ.

2 Koranti 2:17

Ruu ɓuru naa zang dɔɔli ɓɔɔ, Ruu Laa nwàng ri ɓarɛ kaa gbalang ɓɔɔ ri kãa vuu shaanang nɛɛ mani ɓɛɛ kpang. Ruu palɛ shonang ɓuru nɛɛ yeti gbete. Ruu kɔɔ Ruu Laa ɓuru naa ɓɔɔ Laa tusu ruu gbalang ɓɛɛ. Naa zang nyaa shonang ɓiɓɛ, a ɓɔɔ kaa naa zang shonang Yeesɔ Kirisi.

2 Koranti 4:2

Rùu dɔ̃ vuu ɓɔɔ zang waasɛ katɔ, nɛɛ vuu yusɛ̃ɛ tɔ piti nɛɛ kaa. Ruu palɛ vuu tɔ̀ɔ́ nɛɛ sèé kpang. Ruu ti risi Ruu Laa tɔ̀ɔ́ wu raa sèé kpang. Ruu kɔɔ rúu ɓɔɔ niizang ka dalɛ, ka tĩng Laa. Ruu kasɛ nɛɛ zang ɓu wu zi ka yeti ɓiɓɛ nɛɛ ruu ɓuru zang tɔ̃ɔ.

Kolosi 2:8

Nɔɔ gãng jĩng kagn, zang ɓɔɔ nɛ̀ɛ́ nwãarɛ nɔɔ nɛɛ zũnang ɓɔɔ a nɛɛ bìí shɔnzang, ɓɔɔ nwàng zang vuu tɔ̃ɔ kpang ɓɛɛ. Zũnang ɓɔɔ nwáng ɓi nɛɛ vuu ɓɔɔ dabang ri tusu ka tĩng a ɓɔɔ nɛɛ nyaa dannang sèé ɓɔɔ shɔnzang ri túsù ɓɛɛ, wu nɛɛ bii Yeesɔ Kirisi kpang ɓɛɛ.

1 Timoti 6:3

Zang ɓɔɔ nɛɛ tusu vuu ɓɔɔgn ɓɔɔ daa gbete nɛɛ ruu ɓɔɔ niizang ɓɔɔ Kpanti ɓuru Yeesɔ Kirisi nɛɛ vuu ɓɔɔ ruu tusu ka yuu gbalang Laa kɔ ruu dũng ɓɛɛ kpang.

2 Timoti 2:20

Ka yeti gãa bang, juwa kagn ɓɔɔ zang palɛ nɛɛ zinariya ɓɔɔ nɛɛ azurufa kɔ shɛ̃ɛning kpang. Zang pálɛ̀ ɓɔɔ nɛɛ laa, a zang mãa ɓɔɔ nɛɛ tapɔng. Zang shing ɓɔɔ ɓi ka ruu vuu shaanang ka nɔng mung, ɓɔɔ zang palɛ shonang ɓi nɛɛ mani diki diki.

2 Timoti 3:13

A zang ɓɔɔ ri palɛ vuu shi kpang nɛɛ zang ɓɔɔ, ri tuu waa nyaating zang ɓɔɔ ri palɛ vuu nɛɛ mani ɓɛɛ, ri shaarɛ katɔ, shaarɛnang ɓarɛ daa nɛɛ tĩng kɔ jong. Ri nwãarɛ zang, zang ti nwãarɛ ri.

2 Timoti 3:7

Zang soro keɓe, diki diki ri kasɛ nɛɛ zang kpɛ̃ɛrɛ ri vuu, a ri zi vuu ɓɔɔ niizang kaa takpang doo nɛɛ mani.

2 Timoti 4:3

Diki naa a ditɔ, diki ɓɔɔ zang ɓaa shoo ka vuu tɔ̃ɔ ɓɔɔ zang tusu kpang. Ri dũng ɓarɛ vuu ɓɔɔ yeti ɓarɛ kasɛ ɓɛɛ. Ri kpalɛ zang ɓɔɔ ri tusu vuu, nɛɛ ri tùsù ri vuu ɓɔɔ bii sháa ri, rì kasɛ tãanang ɓɛɛ.

Yahudi 13:9

Nɔɔ yáa vuu ɓɔɔ zang tusu, ɓɔɔ ka zɔ̃ng zɔ̃ng, nɛɛ ɓɔɔ nɔɔ tãa gngn kpang, wu shing nɔɔ, nɔɔ ning gbalang kpang. Ɓi tɔ̃ɔ ɓɔɔ Laa palɛ ruu kɔ, mã ruu danggn, wu vuu shaanang ɓɔɔ ruu shaa ka zɔ̃ng zɔ̃ng ɓɛɛ kpang. Vuu shaanang keɓe, ti nwàng zang ɓɔɔ ri shaayi vuu tɔ̃ɔ kpang.

1 Bituru 1:7

Vuu gãsɛnang alɛ ka bii manɛ, tɔ̀ɔ, zang ri zi kati nɛɛ danggn ɓɔɔ nɔɔ shing ka bii Laa ɓi ɓɔɔ niizang kɔ nwani. Zinariya ɓɔɔ lasɛ katɔ ɓɛɛ, zang dɔɔ ka waa, tɔ̀ɔ, zang zirɛ nɛ́ɛ ɓɔɔ tɔ̃ɔ ɓɛɛ. Zang palɛ danggn shinnang manɛ ɓɔɔ ɓa zinariya shinang katɔ doo nɔngkɔ. Zang gãsɛ danggn ɓɔɔ nɔɔ shing ka bii Laa kãntang keɓe, ka ruu ɓɔɔ, ka diki ɓɔɔ Yeesɔ Kirisi naa nwang nyaa, zang wu dɔɔ nɔɔ, zang ti a nɔɔ bannang ka ruu danggn ɓɔɔ nɔɔ shing ɓɛɛ.

Vuu ɓɔɔ zang nwangsɛ Yɔhana 2:14

A vuu shi kpang ɓɔɔ nɔɔ palɛ kaa gn, ɓɔɔ n kasɛ kpang ɓɛɛ. Zang ɓɔɔ kagn ka teteng manɛ ɓɔɔ ri palɛ vuu ɓɔɔ yɔɔ ɓɔɔ zang ɓaa wu nɛɛ Balamu tusu zang ɓɛɛ. Balamu ɓɔɔ kpɛ̃ɛrɛ Balak naa ɓɔɔ wu shing zang Isirela, ri palɛ vuu shi kpang, nɛɛ ri shaa vuu shaanang ɓɔɔ zang a vaka, nɛɛ ri palɛ dũndũng.

Vuu ɓɔɔ zang nwangsɛ Yɔhana 21:18

Zang mãa binting ɓɔɔ kiiri gari ɓɛɛ ɓi nɛɛ tari ɓɔɔ kɔlɔ katɔ, ɓɔɔ zang ɓaa nɛɛ Jasifa ɓɛɛ. A gari bìí zang mãa ɓi kaa nɛɛ zinariya, ɓɔɔ kalang kalang, kɔlɔ katɔ naa vĩilaa.

Vuu ɓɔɔ zang nwangsɛ Yɔhana 3:18

Ka ruu nɔngkɔ, n kɔɔ nɔɔ, nɔɔ arɛ nɔ́ɔ hoo zɔ̃ng zinariya ɓɔɔ zang dɔɔ nɛɛ waa nɛɛ, tɔ̀ɔ, bii ɓiɓɛ wu turɛ wu nwang kaa tɔ̃ɔ ɓɛɛ, tɔ̀ɔ, nɔ́ɔ nwang kaa zang ying ɓɔɔ niizang ɓɛɛ. Nɔɔ ti arɛ nɔɔ hooro fɔ̃ɔrɔ puru nɔ́ɔ hãayi, tɔ̀ɔ, bii bɔ̃bɔ̃rɔ manɛ wu shing kaa tɔ̀ɔ́ yusɛ̃ɛ wu tuu nɔɔ kpang. Nɔɔ hoo gãnang ɓɔɔ zang tɛ̃̀ɛ́ nɔɔ ka jĩng ɓɛɛ, tɔ̀ɔ, nɔ́ɔ zi nɔng kati.