1 FWANK 4:4 - Mixe Juquila

⁴ Nitítʉty, miidsʉty Dios mjaꞌaꞌa̱jtʉdʉp. Tʉ xymyʉmada̱ꞌa̱ktʉ tadʉ andakpʉty, mʉt ko yʉ Espíritʉ Santʉ diꞌibʉ miidsʉty mʉʉt mꞌittʉ, niꞌigʉ yʉꞌʉ myʉ́jʉty es kʉdiinʉmʉ kaꞌoybyʉ diꞌibʉ ja ya̱ naxwiiñ.

1 FWANK 4:4 ပူးပေါင်းရင်းမြစ်များ

FWANK 12:31

Tyamʉ net ja tiempʉ tʉ jyaꞌty ma̱ yʉ naxwíñʉdʉ ja̱ꞌa̱y yajpayoꞌoyaꞌañ, es tyamʉ net yajkutujkʉnjuudʉt diꞌibʉ ya̱ naxwiiñ anaꞌamp.

FWANK 14:30

Kyajts nnakykya̱jxa̱ꞌa̱ñ may mʉt miidsʉty, mʉt ko miimp ja diꞌibʉ anaꞌamp pʉ́nʉdyʉ naxwíñʉdʉ winma̱ꞌa̱ñ jaꞌaꞌa̱jtʉdʉp, oy ni ti madakʉn tkamʉdaty mʉt ʉj.

FWANK 16:11

es mʉt ko Dios pyayoꞌoy tʉyꞌa̱jtʉn mʉʉt, jaꞌa ko tʉ yajtuknibʉjta̱a̱gʉ es tyʉydyúnʉdʉt ja mʉjkuꞌugópk diꞌibʉ ꞌyaneꞌempy pʉ́nʉdyʉ naxwíñʉdʉ winma̱ꞌa̱ñ jaꞌaꞌa̱jtʉdʉp.

FWANK 17:23

Ʉj nꞌítyʉts tiꞌigyʉ mʉt yʉꞌʉjʉty, es mij mꞌity tiꞌigyʉ mʉt ʉj, es dʉꞌʉn kexy kaꞌpxy ꞌyíttʉt tiꞌigyʉ ja wyinma̱ꞌa̱ñʉty éxtʉm ʉdsa̱jtʉm nꞌijtʉm, es dʉꞌʉn ja naxwíñʉdʉ ja̱ꞌa̱yʉty tꞌíxtʉt kots mij xykyejxy, es ko mij nandʉꞌʉn xytsyoktʉ yʉ nꞌʉxpʉjkpʉty éxtʉmts ʉj mij xytsyeky.

ROMANɄS 8:31

Es mʉt ko tʉ nnija̱ꞌa̱m tʉgekyʉ tya̱a̱dʉ, ¿ti dʉn mba̱a̱t nꞌaktimka̱jxʉm? Mʉt ko Dios xypyudʉjkʉm ʉdsa̱jtʉm, ¿pʉ́n xymyʉdsipꞌa̱jtʉm?

ROMANɄS 8:37

Ni diꞌibʉdsʉ taadʉ xykyatukmastuꞌudʉt ja Kristʉ. Pes yʉꞌʉ dʉꞌʉn diꞌibʉts xytyukmʉmadakp tʉgekyʉ tya̱a̱dʉ, mʉt ko yʉꞌʉ xytsyojkʉm.

1 KORINTɄ 2:12

Es ʉdsa̱jtʉm kyaj tʉ nꞌaxá̱jʉm ja winma̱ꞌa̱ñ diꞌibʉ ya̱ naxwiiñ, yʉꞌʉyʉ sitʉy ja winma̱ꞌa̱ñ diꞌibʉ yajkypy ja Espíritʉ Santʉ diꞌibʉ tsoꞌomp ma̱ Dios, es dʉꞌʉn njaygyujkʉm tʉgekyʉ diꞌibʉ Dios xyñamoꞌoyʉm.

1 KORINTɄ 6:13

Wiingátypyʉ mjʉna̱ꞌa̱ndʉ: “Yʉ jeꞌxy nigojʉ es jodoty ñʉjxʉt, esʉ jot nigojʉ es tꞌaxá̱jʉt ja jeꞌxy.” Per ʉjts mij nꞌanma̱a̱ydyʉp ko Dios yajminaampy ja tiempʉ ma̱ kyaj nnakyyajtuna̱ꞌa̱nʉm ja jot es ni ja jeꞌxy. Per ni wiꞌix tsoo mba̱a̱t mgajʉna̱ꞌa̱ndʉ ko yʉ nniniꞌxꞌa̱jtʉm tʉ yajpʉjtaꞌaky es nmʉꞌinduꞌunʉm, pes ja nniniꞌxꞌa̱jtʉm yʉꞌʉ dʉꞌʉn Nindsʉnꞌa̱jtʉm ꞌyoyꞌa̱jtʉngyʉjxm, esʉ Nindsʉnꞌa̱jtʉm yʉꞌʉ dʉꞌʉn nniniꞌxꞌa̱jtʉm ꞌyoyꞌa̱jtʉngyʉjxm.

2 KORINTɄ 4:4

Kyaj tmʉbʉktʉ ko yʉ Jesús yʉꞌʉ dʉꞌʉn ja Kristʉ, mʉt ko ja mʉjkuꞌu diꞌibʉ ya̱ naxwiiñ anaꞌamp, yʉꞌʉ yajkujuundákʉp. Yʉꞌʉ kyaj ñaꞌíxyʉty es kyudʉꞌx kyujá̱jʉdʉt ja oybyʉ ayukʉ jya̱jʉn diꞌibʉ ñimadyakypy ja myʉjꞌa̱jtʉnʉ Jesukristʉ, diꞌibʉ dʉn tiꞌigyʉ éxtʉmʉ Dios.

2 KORINTɄ 6:16

Kyaj ni nʉꞌʉn kyatuknáxyʉty ja Diosʉ tyʉjk mʉdʉ agojwinnáx. Pes ʉdsa̱jtʉmʉ dʉꞌʉn ja Diosʉ tyʉjk, éxtʉm ja Dios jyʉnáñ ma̱ yʉ jyaaybyajtʉn: Jikyꞌátʉpts es jʉdítʉpts mʉt yʉꞌʉjʉty. Ʉjtsʉ dʉꞌʉn xyDyiosꞌáttʉp es yʉꞌʉdyʉdsʉ dʉꞌʉn nja̱ꞌa̱yꞌáttʉp.

ÉFESɄ 2:2

xypyaduundʉ naxwíñʉdʉ ja̱ꞌa̱yʉ wyinma̱ꞌa̱ñʉty es xypyanʉjxtʉ ñʉꞌʉ tyuꞌu ja mʉjkuꞌu diꞌibʉ ꞌyaneꞌempy nidʉgekyʉ diꞌibʉ kyajpyʉm tmʉmʉdoy ja Dios.

ÉFESɄ 3:17

es mʉt ko miidsʉty tʉ xyꞌaxá̱jʉdʉ ja Kristʉ éxtʉmʉ Yajnitsókpʉ, nꞌamdeebyʉts es ja Kristʉ ꞌyítʉt winʉ xʉʉ winʉ tiempʉ mjodoty winma̱ꞌa̱ñótyʉty. Dʉꞌʉn miits xymyʉdáttʉt ja tsojkʉn, éxtʉm ti tukjijpyʉ ꞌyity, kyaj yiꞌxy.

ÉFESɄ 6:10

Mʉguꞌugítʉty, éxtʉm tim okpʉ nga̱jxwíjʉnʉts nꞌanʉʉmʉdʉ ko mʉk mnaybyʉjta̱ꞌa̱gʉdʉt tiꞌigyʉꞌa̱jtʉngyʉjxm ma̱ Nindsʉnꞌa̱jtʉm, diꞌibʉ niꞌigʉ mʉkꞌa̱jtʉn myʉda̱jtypy.

1 FWANK 2:1

Nitítʉty, tyámʉts miits nnijáyʉdʉ kʉdiibʉ mbekytyúndʉt. Per pʉn jaa pʉ́n pyekytyúñ, nmʉda̱jtʉm tuꞌuk diꞌibʉ xyñika̱jxtútʉm Dios windum. Yʉꞌʉ dʉꞌʉn ja Jesukristʉ diꞌibʉ tyiimpy ja tʉyꞌa̱jtʉn.

1 FWANK 2:13

Uꞌunkteedyʉty, nnijáyʉdʉts miits mʉt ko tʉ xyꞌixyꞌattʉ Jesukristʉ diꞌibʉ taayʉm ko naxwíñʉdʉ tsyondaky. Ʉna̱ꞌkʉty, nnijáyʉdʉts miits mʉt ko tʉ xymyʉmada̱ꞌa̱ktʉ ja mʉjkuꞌugópk. Nitítʉty, nnijáyʉdʉts miidsʉty mʉt ko tʉ xyꞌixyꞌattʉ Dios.

1 FWANK 3:20

ko nbekyjya̱ꞌa̱m, Dios niꞌigʉ myʉ́jʉty es kʉdiinʉm ʉdsa̱jtʉmʉ njotꞌa̱jt nwinma̱ꞌa̱ñꞌa̱jtʉm, ñija̱ꞌa̱p yʉꞌʉ tʉgekyʉ.

1 FWANK 3:24

Pʉn nguydyuꞌunʉm ja Diosʉ ꞌyanaꞌamʉn, jikyꞌa̱jtʉm mʉt yʉꞌʉ, es yʉꞌʉ jyikyꞌaty mʉt ʉdsa̱jtʉm. Nnija̱ꞌa̱m ko yʉꞌʉ jyikyꞌaty ma̱ ʉdsa̱jtʉm, mʉt ko tʉ xymyoꞌoyʉm ja Espíritʉ Santʉ.

1 FWANK 4:13

Es mʉt ko Dios tʉ xymyoꞌoyʉm yʉ Espíritʉ Santʉ, tʉ xytyukꞌijxʉm ko yʉꞌʉ ꞌyity mʉt ʉdsa̱jtʉm, es ʉdsa̱jtʉm nꞌijtʉm mʉt yʉꞌʉ.

1 FWANK 4:16

Es dʉꞌʉn nnija̱ꞌa̱m es nmʉbʉjkʉm ko Dios xytsyojkʉm. Dios yʉꞌʉ dʉꞌʉn ja tsojkʉn, es pʉn nnaydsyojkʉm nixim niyam, Dios jikyꞌa̱jtp mʉt ʉdsa̱jtʉm, es ʉdsa̱jtʉm njikyꞌa̱jtʉm mʉt ja Dios.

1 FWANK 4:6

Per ʉdsa̱jtʉm Dios xyjaꞌaꞌa̱jtʉm. Diꞌibʉ Dios ꞌyijxyꞌajtypy, myʉdooꞌijtypy ja ayuk diꞌibʉ nga̱jxwa̱ꞌxʉm. Per diꞌibʉ kyaj Dios jyaꞌaꞌátyʉty, kyaj xymyʉdooꞌijtʉm. Es dʉꞌʉn mba̱a̱t nꞌʉxka̱jpʉm pʉ́n myʉda̱jtypy ja Espíritʉ Santʉ diꞌibʉ tʉyꞌa̱jtʉn yajkypy, es pʉ́n myʉda̱jtypy ja kaꞌoybyʉ diꞌibʉ winꞌʉꞌʉmp.

1 FWANK 5:19

Nnija̱ꞌa̱m ʉdsa̱jtʉm ko Dios xyjaꞌaꞌa̱jtʉm esʉ mʉjkuꞌugópk yʉꞌʉ jaꞌaꞌa̱jtʉdʉp tʉgekyʉ diꞌibátyʉ naxwíñʉdʉ winma̱ꞌa̱ñ jaꞌaꞌa̱jtʉdʉp.

1 FWANK 5:4

mʉt ko nidʉgekyʉ ʉdsa̱jtʉm diꞌibʉ xyꞌuꞌunkꞌa̱jtʉm ja Dios, nmʉmadákʉm es kyaj nduꞌunʉm ja naxwíñʉdʉ winma̱ꞌa̱ñ. Nmʉmadákʉm mʉt ko nmʉbʉjkʉm ko ja Jesús yʉꞌʉ Kristʉ, Diosʉ ꞌyUꞌunk.

DIꞌIBɄ JATANɄP 12:11

Yʉ nmʉguꞌukꞌa̱jtʉm tʉ tmʉmada̱ꞌa̱ktʉ mʉt yʉꞌʉgyʉjxmʉ Borreeguꞌungʉ ñeꞌpyñ, mʉt ja ꞌyayuk es mʉt ja tyʉyꞌa̱jtʉn diꞌibʉ tʉ yajka̱jxwaꞌxy. Pes kyaj tjʉjptsʉꞌkʉdʉ ꞌyoꞌkʉn, niꞌigʉ tmʉdundʉ Dios oytyimꞌooktʉt.