HECHOS 15:7 - New Testament in Mixe Tlahuitoltepec

⁷ Tø wyɨnaty jeky tka̱jpxꞌøyɨdɨ, jøts ja Pedro tyanaagyukɨyɨɨꞌñ jøts tnɨma̱a̱y: ―Meets mɨguꞌuktøjktɨ, mee mnɨja̱ꞌwɨp jøts ku øts ja Dios jekyɨp xwɨwich, jøts øts ndukmadoꞌot ja ja̱a̱ꞌy pøn kaꞌisraelɨt ja̱a̱ꞌdyɨ, sudsoꞌampy ja nwɨndsønꞌa̱jtɨm xpojkpɨmaaꞌkxɨndɨt jøts ja tmɨbøktɨt.

HECHOS 15:7 ပူးပေါင်းရင်းမြစ်များ

JUAN 15:16

Kameedsɨpxɨ tø xpɨkta̱ꞌa̱ky; pø øtsxɨ mee køꞌøm tø nwɨꞌixy, jøts mee tø ndanɨpiky jøts nøjkx ja mdunk yikxon xyikwɨngaxøꞌøktɨ, jøts wan tmøjɨ wan tkajaꞌajɨ. Jadeꞌents ja Dios Teety mmoꞌojɨdɨt pønɨ ti jaty mꞌamɨdoodɨp ku ø xka̱jpxpa̱a̱ttɨt amumjoojt.

JUAN 3:27

Xjats ja Juan ja tnɨma̱a̱y: ―Kaꞌ pøn ti tnɨyjaty pønɨ kaꞌap Dios myøꞌøyɨ.

HECHOS 1:16

―Meets mɨguꞌuktøjktɨ, tø døꞌøn ja jadeꞌen yjanchjaty sa̱ ja Dios kyajpxy wya̱ꞌa̱ñ, ku ja Espíritu Santo jap jadeꞌen køꞌøm wya̱a̱ñ, midi ja David kya̱jpxna̱jx ku ja ojts tnɨmadya̱ꞌa̱ky ja Judas, jaꞌ pøn tuuꞌwa̱a̱w ja ja̱a̱ꞌy jøts yikma̱tst ja Jesús.

HECHOS 1:24

Xjats ja ja̱a̱ꞌy yɨdeꞌen tꞌajotꞌa̱ttøø ja Dios Uꞌnk: ―Nwɨndsønꞌa̱jtɨm Jesucristo, mets mnɨja̱ꞌwɨp sa̱ jaty pøn jaduꞌuk jaduꞌuk wyɨnmay, yø ja̱a̱ꞌy ɨxa øøts tø nwɨwich namajtsk, tuknɨja̱ꞌwɨk øøts pønɨ pøn me mdsøjkpy,

HECHOS 10:19

Kumɨ jaꞌ wyɨnaty ja Pedro myɨmaapy myɨda̱jpñɨm midi wyɨnaty tø tꞌixy, wɨnets ja Espíritu Santo ñɨma̱a̱jyøø: ―Nɨdɨgøøk ɨxya̱m ja ja̱a̱ꞌy mꞌɨxa̱ꞌa̱yɨyɨ.

HECHOS 10:20

Pɨdøꞌøk, wɨna̱k jøts xmøødɨt yø ja̱a̱ꞌy, kidi ti xpawɨnmay, nay øts yøꞌ ngugajpxy.

HECHOS 13:2

Tuꞌukpɨ xøøw ɨdøꞌøn ya̱ꞌa̱t ja̱a̱ꞌy jadeꞌen ñamyujkɨdøø jøts ja nwɨndsønꞌa̱jtɨm twɨndsøꞌjkɨdøø, ayuuꞌa̱jttɨp ɨdøꞌøn wyɨnaty ku ja Espíritu Santo wya̱a̱ñ: ―Jɨgaxtɨ yø Bernabé møøt yø Saulo, jøts ttuꞌundɨt midi øts yø tø ndanɨwa̱a̱dsowɨdɨ.

HECHOS 15:14

Tø ja Simón Pedro tjanɨgajpxy sudsoꞌampy ja Dios tø tmøꞌøy ja mayꞌa̱jt myɨdukꞌojk pøn kaꞌ yꞌisraelɨtja̱a̱ꞌyɨdɨ, jøts ku ja Dios ja nayɨdeꞌen tꞌuꞌnkꞌaty tꞌuna̱ꞌjkꞌaty jaꞌabɨ ja̱a̱ꞌdyɨ.

HECHOS 15:2

Wɨnets ja Pablo møøt ja Bernabé møkꞌampy ojts møøt ñagyajpxyɨdɨ ja ja̱a̱ꞌy, jøts ku kaꞌ jadeꞌen yꞌøyɨ yøꞌøbɨ wɨnma̱a̱ꞌñ. Wɨnets ja Pablo ja Bernabé yikpɨkta̱ktøø møøt wɨna̱a̱gɨn ja ja̱a̱ꞌy jøts jam ñøjkxtɨt Jerusalén, jamts tja̱a̱kꞌatska̱jpxꞌøyɨdɨt jaꞌabɨ wɨnma̱a̱ꞌñ møøt jaꞌadɨ pøn jaty ja Jesús kyudanaabyɨꞌajtpy, jøts møøt ja møja̱a̱ꞌdyøjktɨ pøn jaty jam møja̱a̱ꞌyꞌa̱jttɨp tsa̱ptøjkjotp.

HECHOS 15:39

Xjats ñagya̱jpxɨdɨ jeky ja Pablo møøt ja Bernabé, kaꞌ ja wyɨnma̱a̱ꞌñ yꞌuknabya̱jtnɨyɨdɨ jøts jadeꞌeñɨ ñawya̱ꞌkxɨnɨyɨdøø; wɨnets ja Bernabé tmøødɨyɨɨꞌñ ja Marcos, jøts tyøjkɨdøø ba̱rkɨjøtpy jøts ñøjkxtɨ ma̱ et txøøwɨ Chipre,

HECHOS 20:24

Kaꞌats øts yø nmøjpɨkta̱ꞌa̱ky; wan ø tꞌøøky, kaꞌap ø nnabyaꞌayøyɨ jaꞌagøjxp jøts øts øy jotkujk kuwa̱nɨ nyikyøꞌøwya̱ꞌa̱ñ yø ndunk, kunɨm yjøpkøxt midi øts nwɨndsønꞌa̱jtɨm Jesús tø xmøꞌøy, jøts øts ja ja̱a̱ꞌy øy tsuj ndukmadoꞌot ku ja Dios køꞌøm tpaꞌayøy ja ña̱xwiiꞌñɨt ja̱a̱ꞌy.

HECHOS 21:16

Wɨnets øøts ja nmɨguꞌuk wɨna̱a̱gɨn xjamyøøtꞌa̱jty midi tsɨnaadyɨp Cesarea, jøts tuꞌuk midi kuga̱jpꞌa̱jtp Chipre, jaꞌ xyøøw Mnasón midi wyɨnaty jekyɨp ja Dios kyajpxy tø tpabøjknɨyɨ, jaꞌats øøts xyikja̱ꞌa̱da̱ꞌa̱kwa̱mp jam Jerusalén ma̱ wyɨnaty ja tyøjk tjagyepy.

HECHOS 3:18

Xjats ja Dios tø tjanchyikꞌaduky ja wya̱nda̱ꞌa̱ky ku myagya̱jpxna̱xpɨ ja tyikwa̱a̱ñ: jøts ku ja yiknɨtsokpɨ wyɨnaty jadeꞌen yꞌayoꞌomba̱a̱twa̱ꞌa̱ñ.

HECHOS 4:25

Nayɨ mets ja David ja Espíritu Santo mdukyikꞌaga̱jpxɨyɨɨꞌñ ku ja xyikwa̱a̱ñ yɨdeꞌen: ¿Tigøjxp ku ja̱a̱ꞌy ka̱jp ka̱jp nugo jotkøjxpɨm tꞌejxtɨ pøn ya̱ jagaguga̱jpꞌa̱jttɨp, pønts ya̱ kuga̱jpꞌa̱jttɨp, jøts yø tmɨdundɨgøøwya̱mɨdɨ ja nwɨndsønꞌa̱jtɨm?

HECHOS 9:15

Wɨnets ja nwɨndsønꞌa̱jtɨm wya̱a̱ñ: ―Nøjkx xꞌatsꞌixy ja Saulo, tø øts ja nwɨꞌixy, nyiktunwampy øts jaꞌ, abikya̱jp øts ja ngaxwa̱ꞌa̱ñ. Japts øts xꞌatsnɨga̱jpxt xꞌatsnɨmadya̱ꞌa̱kt, jøts ja ttukmadoꞌot ja jamɨt ja̱a̱ꞌdyɨ møøt jaꞌ wyɨndsøndøjktɨ jøts nayɨdeꞌen ja ya̱ꞌa̱t israelɨt ja̱a̱ꞌdyɨ.

FILIPENSES 2:14

Ejtnɨ xonɨ tukɨꞌɨyɨ xuꞌundɨt, kidi amɨkajpxy xpøktɨ,