1 JUAN 2:22 - New Testament in Mixe Tlahuitoltepec

²² ¿Pønts ɨdøꞌøn ta̱a̱yꞌa̱jtp? Jaꞌats ɨdøꞌøn pøn wa̱mp ku ja Jesús kaꞌ yiknɨtsoꞌokꞌaty. Pø jaꞌaxɨ tkawa̱mp tkatsojkp ja Dios Teety møøt ja yꞌUꞌnk Jesús.

1 JUAN 2:22 ပူးပေါင်းရင်းမြစ်များ

MATEO 24:24

May ja wɨnda̱a̱yꞌa̱jtpɨ myeꞌendɨt jøts myikwɨnꞌøøndɨt, ñadyijyɨ ja ñadyejɨdɨt Cristo midi yiknɨtsokp, uk ñadyijyɨ ja ñabyɨkta̱ꞌa̱gɨt jadeꞌen sa̱m ja ja̱a̱ꞌy pøn Dios yjaꞌ tka̱jpxɨdɨp; jøts tna̱nkyꞌejxɨdɨt ja ejxa̱ꞌa̱n ja ejxpajt, ñadyijyɨ ttuꞌundɨt ja mɨla̱grɨ jøts ja ja̱a̱ꞌy ttawɨnꞌøøndɨt, jaꞌba̱a̱t ja twɨnꞌøønwa̱ꞌa̱ndɨt pøn ja Dios køꞌøm tø wyɨꞌijxyɨdɨ.

MATEO 24:5

Kumɨ may ja ja̱a̱ꞌy myeꞌendɨt jøts ja jadeꞌen ñadyejɨdɨt jøts ku ja yꞌøtsɨ, yɨdeꞌen ja wya̱ꞌa̱ndɨt: “Øts ɨdøꞌøn Cristo ja yiknɨtsokpɨ”; jøts mayts ja jadeꞌen twɨnꞌøøndɨt ja ja̱a̱ꞌy.

JUAN 8:44

Ja mɨkuꞌ jaꞌ mee mdeetyꞌajtpy; jaꞌ mee mgøjøꞌømɨtꞌa̱jtɨp jøts jaꞌ mdunwa̱ndɨp ti jaty ja ña̱nktyunwa̱jnɨp. Tsoꞌonda̱ꞌa̱gyɨp ja mɨkuꞌ yikja̱a̱ꞌyꞌooꞌknɨbøjkɨnɨ. Nɨjuunɨ ja tkayiktuñ ja tyɨɨbyɨ ja yjanchpɨ, jøts nɨjuunɨ tɨy janch kyakajpxy. Ku ja tya̱a̱yꞌaty, jadeꞌeñɨ ja kyajpxy sa̱yɨm ɨdøꞌøn ja myɨkuꞌatyɨn, jaꞌagøjxp ku yjantyimdya̱a̱yɨ, jøts jaꞌ ɨdøꞌøn tnɨwɨndsønꞌa̱jtp ja ta̱a̱yꞌa̱jtk ja wɨnꞌøøꞌnk.

1 JUAN 1:6

Kuts nwa̱a̱ꞌñɨndɨ ku ja Dios Teety nmøøt nꞌijtyɨndɨ jøts nɨkaꞌ nꞌukpaduuꞌnaꞌandɨ ja nꞌayuujk, nugo adøm ja nmɨdundɨgøy adɨɨjchɨndɨ. Yøꞌ ɨdøꞌøn møj ta̱a̱y ku jadeꞌen nugo nwa̱a̱ꞌñɨndɨ.

1 JUAN 2:18

Meets uꞌnktɨ una̱ꞌjktɨ, tø jaba̱a̱t tpa̱a̱ty ja et ja xøøw ku myenwa̱ꞌa̱ñ tuꞌuk ja ja̱a̱ꞌy pøn ja Cristo møk myɨdsepꞌa̱twampy, pøn meets nayɨdeꞌen tø xnɨja̱wɨ xnɨmadøy; ɨxya̱mts nayɨdeꞌen tø kyaxøꞌknɨdɨ namay pøn tmɨdsepꞌa̱jttɨp ja Cristo, paty jadeꞌen yiknɨja̱wɨ ku tø jaba̱a̱t ja et ja xøøw tpa̱a̱ty.

1 JUAN 2:23

Pønɨ pøn tkawa̱ndɨp tkatsoktɨp ja Dios Teety yꞌUꞌnk, ja Dios Teety ɨdøꞌøn wyɨnaty jadeꞌen kayiktsojkp; jøts pønɨ pøn twa̱ndɨp ttsoktɨp ja yꞌUꞌnk Jesús, ja Dios Teety ɨdøꞌøn wyɨnaty jadeꞌen yiktsojkp.

1 JUAN 2:4

Jøts pønɨ pøn wa̱mp ku ja yꞌuꞌnkꞌatyɨyɨ ja Dios jøts nɨkaꞌap ja tpaduujnɨyɨ ja kyutujk, jaꞌ nugo ka̱jpxɨgøøpy, nugo ja tya̱a̱yɨ.

1 JUAN 4:20

Pøn nugo wa̱mp: “Ndsøjkpy øts ja Dios”, jøts nɨ kaꞌanɨmdɨmts ja myɨguꞌuk ja twa̱ꞌa̱ñ ttsøky, jaꞌats ɨdøꞌøn ta̱a̱yɨp. Sudsoꞌampyts ja Dios tja̱a̱ktyimchokt, pø kaꞌaxɨ ja kyaxɨꞌɨky, ti jaꞌ net ja yja̱a̱ktsokp pø ja myɨguꞌukxɨ ja kyatsøjkpy pøn yjaꞌijxpy wiiñꞌa̱jy.

1 JUAN 4:3

Pønts jadeꞌen tkamɨbøjkp ja Jesús, jaꞌats ɨdøꞌøn ja Dios Teety kamøøtꞌejtɨyɨp; ja kaꞌøwyɨnma̱a̱ꞌñ ja neꞌegɨ yiktumpy midi tkamɨnamya̱a̱jyɨp ja Cristo. Tøxɨ xnɨmadowdɨ jøts ku ja myeꞌent ja kaꞌødyumbɨ øy juunɨ; tøts ɨdøꞌøn ja yjanchmiñ, pø jaanɨxɨ ja wyɨnma̱a̱ꞌñ ja ya̱ na̱xwiiñ.

1 JUAN 5:1

Pøn jaty tjanchja̱ꞌwɨdɨp ku ja Jesús yikejxy ya̱ na̱xwiiñ yiknɨtsokpɨ, jaꞌats ja Dios Teety uꞌnkꞌa̱jtɨyɨdɨp; pønɨ chojktɨp tam ja Dios Teety jadeꞌen, nayɨdeꞌents ɨdøꞌøn ja ttsojktɨt tpaꞌayoꞌodɨt pøn jaty ja Dios Teety yꞌuꞌnkꞌajtpy.

2 JUAN 1:7

Jats may ɨxya̱m ja wɨnꞌøøꞌmbɨdɨ pøn tkajanchja̱wɨdɨp ja Jesucristo ku ja yꞌatsna̱nkyꞌejxøø ja̱a̱ꞌyɨn. Pønts jadeꞌen wɨnꞌøøꞌmp, jaꞌats ɨdøꞌøn tkawa̱mp tkatsojkp ja Cristo.

JUDAS 1:4

Jabɨ tøxɨ ja ja̱a̱ꞌy jam tmɨdøkɨ ja wɨnꞌøøꞌnɨn jøts meets ja mdukpadunwa̱ꞌa̱ñɨdɨ midi ja tɨyꞌa̱jtɨn kyamøøt. Pø wa̱mpxɨ ja Dios kyajpxy jøts ja tyikꞌayoꞌomba̱a̱tt sa̱m pya̱a̱tꞌatyɨyɨ ku ja kyaꞌøyja̱a̱ꞌyꞌa̱ttɨ, wa̱ndɨpts jaꞌ øy ja ti ttuꞌundɨt maaꞌkxukɨdɨp ja Dios jaꞌ. Kaꞌap ja Dios Teety yjaꞌ ttsojkɨdɨ pøn xjaꞌa̱jtɨndɨp møøt ja nwɨndsønꞌa̱jtɨm Jesucristo.

APOCALIPSIS 3:9

Jamts wɨna̱a̱gɨn pøn nugo nadyejɨp israelɨt ja̱a̱ꞌy jøts øts njaꞌ ñadyijyɨ xyiktuujnɨ. Kaꞌ tyɨyꞌa̱jtɨn, ta̱a̱y ja pyɨktakpy ku ja mɨkuꞌ yjaꞌ tyiktuujnɨ, nay øts ndukupøkp jøts mwɨndsøꞌøgɨyɨt, mꞌejxka̱pɨyɨt ku mee ndsøky.