1 Pita 2:20 - Laulau na Vinalu mine Salemo

²⁰ Mane amutou goli a inigogona pagu me sou valibili e amutou me amutou tabule a davutina do, ne amutou guale a sei golu na golu ie? Moni mane amutou goli a inigogona doana me sou valibili e amutou me amutou tabule a davutina do, io Salemo ei ni maibalave amutou.

1 Pita 2:20 ပူးပေါင်းရင်းမြစ်များ

Matiu 26:67

Io sou apisosoli a lagune Iesu, me sou valibili e ei. Me sanii sou sapegalegale ei

Matiu 5:47

Mane amutou vate oaso doana moni usino ne tamtamaine amutou, ne amutou vululusi a vanua sanii ne sei golu? Sou a vanua masala tamai sou goli simaido.

Malongolongona Kubaana mine Iesu Mak ei niage 14:65

Seido a vanunua sanii sou soke a apisosoline ei. Me sou papalesobe a matane ei a malo me sou ubi ei, me sou vei, “O no vei sei ubi e oo.” Me sou a papai so guale ei me sou valigalegale ei.

Malongolongona Kubaana mine Iesu Luk ei niage 6:32

“Mane amutou kale moni a vanunua sou kale amutou, de amutou ma damudamu lou ve Salemo ei ni maibalave amutou. A vanua na sinusu sou tamai sou kale a vanunua sou kale sou.

1 Korin 4:11

Lisa otosi asuasu mapigogoi seidei, amiteu ugu a vitolona, ma loone amiteu i tagasa sele, me amiteu kai a kinainai ei masisinge sele. Sou tibi maisabesabe amiteu. Me amiteu ma isa oto a luma namiteu ugu kuba i.

Galesia 4:18

Ei puiale mane amutou pipigo sagali na ogomulina inigogona kubaana. Taliuliu ne mu goli a inigogona do, me na malada eau ma pilu oto e amutou tamai.

Epesus 5:10

Namutou tove sagali a punogena inigogona Bibi Taula ei kale.

Pilipai 4:18

Io seidei eau niage a inade ieli mina veimuadena iiti i maido, eau gualesi a golugolu vuso amutou bilii e eau. Golugolu amutou sosove usinani, ei mapigogoi sele. Na malada eau guale sou a niabi iedo, Epafroditus ei maasi usinani, eau somiale maido, eau vonu sele. Niabi mine amutou odo, ei tomane a niabi ei isa a manginana doana, ede amutou bilii e Salemo. Salemo i mongemonge sele a gualena matana niabi iedo.

1 Pita 2:19

E, mane sou bilii sabubi a davutina usino ne amutou, moni namutou damutale e Salemo me mu tabule a davutina do, io Salemo ei ni maibalave amutou.

1 Pita 3:14

Moni mane amutou goli a inigogona bilesi, me amutou tabule a davutina a golu ie, io ne amutou mongemonge. Mane sou toenilae amutou, io amutou ma laelae lou e sou. Ma lilone amutou ni ma sagasaga lou.

1 Pita 3:17

Mane eitou guale a davutina a inigogona kubaana eitou goli, ei a masagana mine Salemo mei kubaana. Moni mane eitou guale a davutina a inigogona pagu eitou goli, ei a golu i pagu.