Zekariya 2:10 - Mawu a Mulluku

¹⁰ Apwiya enallota wi, “Nyu a o Ziyoni, ipani moohakallalla vawi kinimawa nave kinaakhalle variyari vanyu.

Zekariya 2:10 ပူးပေါင်းရင်းမြစ်များ

Mateyu 28:20

Nave mwaahuddihe wi yiiwellelleke ddeko ddittheddene kuulamulalleemini nyuwaano. Nave miyaano kiri ni nyuwaano mallapo mattheene ophiyera omalla wa ellapo yavatthimva.”

Zekariya 8:3

Mi Apwiya Amasiva Mattheene kineerohokollweella o Ziyoni nave kinaakhalleke o Yerusalemu, muzindaaka waweella. Sika Yerusalemu aneeroromolliwa Muzinda Woororomelleya. Mwaango wa mi Apwiya Amasiva Mattheene oneeroromolliwa Mwaango Waweella.

Yohane 1:14

Mawu yaalla yaakhalla muthu, ooddalla ni echisomo ni yawoona, ekhalla variyari vahu. Nahoona ntitimiho naye, ntitimiho nno aakhenlleeye wa Attiitthinnya vookhallani mwaniwa mmoddave.

Zekariya 9:9

Nyu athu a o Ziyoni, hakallallani wunchichi! Nyu athu a o Yerusalemu, thapellani! Ngoonani, mwenaanyu animawa wa nyuwaano! Anawa ari oopambana ni oogonjiha koma awiiyeviha ni oomuwella bulu, mwananankhoro a bulu.

Zefaniya 3:17

Apwiya Mullukwaawo eri ni weyaano tti amasiva oovullusa. Eneerohakallalla ekaamba ya weyaano, kheyuuhumullulla ekaamba ya echikondiiwa, eneerohakallalla ni weyaano voowiipani machipo oohakallalliha.

Ezekiele 37:27

Enyumbaaka eneerokhalla variyari viwa. Miyaano kineerokhalla Mullukwiiwa nave alliwa eneerokhalla athwaaka.

Levitiko 26:12

Kineereweeta variyari vanyu. Miyaano kineerokhalla Mullukwaanyu nave nyuwaano muneerokhalla athwaaka.

Yawuupullulla 21:3

Kahiiwa mawu oowella ellotiwaka ovenyera o mpando woomwene awi, “Vano enyumba ya Mulluku eri variyari va athu! Aneerokhalla ni athwaayo navettho eneerokhalla athwaaye. Mulluku aneerokhallana vamodda nave aneerokhalla Mullukwiiwa.

Yohane 14:23

Yesu aamwaakhulla wi, “Muthu akikonda miyaano aneerothwara mawaaka. Attiitthaaka eneeromukonda nave miyaano ni Attiitthaakaayo nineeroowa wa olliyooyo ni okhalla ni olliye.

Yeremiya 33:11

muneerewiiweya mawu oohakallalla ni oothapella, mawu a ootthella ni ootthelliwa. Mu enyumba ya Apwiya muneerewiiweyattho nchipo na athu oovelleella mikutho ddawaathokoza wi, ‘Athokozeni Apwiya Amasiva Mattheene vawi alliwa tti aphaama echikondiiwa tti yoohisintheya.’ “Kineerewaahokollosella ddaphaama ddiwa wonanko vawaamba. Mi Apwiya koollota.”

Yeremiya 30:19

Athu eneerewiipa machipo owaatitimiha, vineerewiiweya okhuwa woohakallalla. Kineerowaatiha, khekhallattho aweerengeya, kineerewaavaha eyuuma, khenyaambusiwa.

Yesaya 66:14

Muneerohakallalla vawoonani ddenndda vawi makhuvaanyu eneerewunnuwa wonanko munyepu. Sika muneerodduwella wi mi Apwiya kinnaakavihera oorumeyellaaka nave kinnaananariwella adanaaka.”

Yesaya 51:11

Ayo mwawooponlleenyu eneerohokollowa, eneerophiya o Ziyoni nchipo niri vayanoni, othapella woohimalla eneerewooneya va ekhove ddiwa. Eneerokhalla ni ehakallallo ni ottaphuwa, ethakaraka ni wiipullella ddineeromalla.

Yesaya 12:6

Nyu athu a o Ziyoni, khuwani ni wiipa moohakallalla vawi Aweella a Israele tti muullupalli variyari vanyu.”

Yawuupullulla 2:1

“Omulembelle oohoollella a mpingo wa o Efeso wi, “Alla sika mawu oovenyera wa oyo atukhunlle etheneeri dditthanu ni piilli mu nnattanatta mwaye nave aneeta variyari va ddoohiyavo enyali dditthanu ni piilli dda golide awi,

Afilipi 4:4

Hakallallani mu eyaattano ni Apwiya enthawi ddittheddene! Kinallotattho yeella wi, hakallallakani!

Malaki 3:1

Apwiya Amasiva Mattheene enallota wi, “Ngoonani, kineeromuruma amithengaaka wi akipotokoselle ettilla. Sika Apwiya munawaashaasheenyu eneerophiya o enyumbiiwa moorurumusa. Amithenga a echipangano oyo munahakallalleenyuna aneeroowa. Mi Apwiya Amasiva Mattheene koollota.

Zekariya 14:5

Nyuwaano muneerothawa vooweellani mu ntapo nenno na variyari va mwaango. Muneerothawa wonanko mwathawelleenyu enthawi ya echivomezi va enthawi ya Uziya mwene a o Yuda. Vatulli viwa Apwiya Mullukwaanyu eneeroowa vamodda ni aweelliiwa attheene.

Yeremiya 31:12

Athu eneeroowa yiipaka mookhuwa va miyaango dda Ziyoni, eneerohakallalla wunchichi ekaamba ya ddaphaama ddinchichi ddoovenyera wa Apwiya. Ddaphaamanndda tti tirigu, vinyo anaanweene, makhura owaaka anamwanankhosa ni a asaanaang'ombe. Okumiiwa onaakhalle wonanko emata yoohellella, alliwa khewa emoriwa ethakaraka.

Yesaya 61:10

Vano kineerohakallalla wunchichi mwa Apwiya, murimaaka oneerottaphuwa mwa Mullukwaaka. Vawi olliye ookiwariha ddoowara ddoovullusa ookiwariha mukanjo weechilungamo. Mi kiri wonanko ootthella oowara enduwira wonankottho ootthelliwa oowara ddooreeriha ddoowallamella mutengo.

Yesaya 54:1

Apwiya enallota wi, We mutthiyana oohiyara, ipa moohakallalla, we ohinooneke ovoreya wa oyara, khuwa ni woopa ellullu. Vawi mutthiyana oohiyiwa aneerokhalla ni anamwani awaata omukhwaranya mutthiyana ootthelliwa.

Yesaya 42:10

Muwiipelle Apwiya nchipo nanaanweene! Nyu ookhalla mu ellapo yavatthi ettheene, atitimiheni! Nyu ddoophatusiwa ddittheddene dda mu enyanja, ariiheni. Nyu ellapo ddawaatamella attheene ookhalla wenko wiipelleni.

Masalimo 68:18

Nyuwaano mwaawella oddullu, mwahaaphara athu anchichi monga amundende, mwahaakhella emphaso wa athu, naari wa athu oowukila, wi mwakhallekena wenko, nyu Apwiya Mulluku.

Masalimo 40:7

Vano kaallota wi, “Koowa, munibukuni moolembiwa dda miyaano.

Yesaya 35:10

Ayo Apwiya yawooponlliiwa eneerohokollowa, eneerophiya o Ziyoni yiipaka moohakallalla. Wenko eneerohakallalla wa enthawi yoohimalla, eneerothapella ni ohakallalla, ethakaraka ni winlla ddineeromalla.

Eksodo 29:45

Kineerokhalla variyari va Aisraele nave kineerokhalla Mullukwiiwa.

Yesaya 37:22

kinallota dda olliye wi, ‘We Senakeribu, Ziyoni annuuvevulla ni wuuttheya, Yerusalemu annapukusa muru otulli wawo moohinyulla.

Ezekiele 48:35

Sika waapheella muzinda muttheenooyo onaakhalle mamita 9,000 nave nnddina na muzindooyo wa enthawi yoohimalla ninaakhalle Apwiya eri vaava.”

Zekariya 1:16

Sika ekaambiiwa kihokollweelleemi o Yerusalemu ni murima weechifundo. Enyumbaaka eneeromakiwattho wenko nave eneerokusattho mukwe woolingella wi emakettho muzinda wa Yerusalemu, Mi Apwiya Amasiva Mattheene koollota.’

Zekariya 2:5

Mi Apwiya kinallota wi, “Kineerokhalla mpanda wamunllo waapheella muzindooyo nave kinaakhalle mwemmo ni ntitimiho naka nittheene.”

Zekariya 2:11

Enthawi yeeyo athu anchichi eneeroowa wa mi Apwiya, muneerotthattuwa athwaaka nave kineerokhalla variyari vanyu.” Vano muneerodduwella wi Apwiya Amasiva Mattheene sika ekirumalle.

Deuteronomo 28:64

Nave Apwiya eneerewuupallallesani variyari va mitundu ddittheddene ovenyera woomallihella omodda wa ellapo yavatthi ophiyera woomallihella omoddattho. Wenko munaarumeyelleke milluku ddimodda, ddamiteekho ni ddamalluku, nnddo nyuwaano ni makhollwaanyu mwahiddidduwenlleenyu waambeella khalle.

Yesaya 48:20

Khumani mu ellapo ya Babiloni, thawani mu ellapo ya Akaldeya. Mullalleye ni okhuwa wunchichi ophiya o makomello a ellapo yavatthi, voollotani wi, “Apwiya ennamoopolla Yakobo, oorumeyelliiwa.”

Yesaya 52:11

Khumani, khumani, venyaniwoni mwawaakuva o Babiloninko, muhittannye ello yooripihiwa! Nyu ootukhulla eziwiya ddoopatulelliwa Apwiya, khumani, ddeelliheni.