Yeremiya 50:17 - Mawu a Mulluku

¹⁷ Aisraele tti wonanko enkhosa ddoopallalleya, ddawiikarihiwa ni mikango. Mwene o Asiriya sika aambille owiipha Aisraelaayo, vatulli viwa aaphiya Nebukadinezara mwene a o Babiloni oyo aattakhunne ni makhuveene.

Yeremiya 50:17 ပူးပေါင်းရင်းမြစ်များ

Yeremiya 2:15

Athu a mitundu ddimodda ennathuruma wonanko mikango, ellapwaaye yooyitthattusa matepe. Mizinda ddene yaaddoononga, ddaatthattuwa moohikhalliwa.

1 Petro 2:25

Nyu mwaari wonanko enkhosa ddoohollowa koma vano moohokollosiwa wi mumuthware Mbusa ni Oowehera a okumaanyu.

Yowele 3:2

Kineerotthukumaniha mitundu ddittheddene ni oddiwaana ohito wa ntapo na Yehoshafati. Wenko kineeroweeruza ekaamba ya nnddo yaweerelliiwa Aisraele, athwaaka ni yoohallanaaka vawi ahaapallallesella mu ellapo ddiwa ddittheddene nave ayikawakawa ellapwaaka.

Yeremiya 50:6

“Athwaaka tti wonanko enkhosa ddoohollowa. Abusiiwa yahaavirikaniha ni waahollosa omiyaangoni. Yeeta shisha o asimiyaango ni omiyaangoni ophiyera yaatiwalla owaniwa.

Daniele 6:24

Vano mwene aalamula wi athu alle yamusumenlle Daniele yaaphare ni waavokhella mu nlliti namikangonne, alliwa vamodda ni awariwa ni aniiwa. Nave ehinaphiye vatthi va nlliti mikango ddahaakaphulla ddaanyenya makhuviiwa mattheene.

Ezekiele 34:12

Mmo mbusa anaashaashelleeye enkhosa ddaye ddapallalleyella wuuteete, miyaanottho kineereweera emoddamoddave yeeyo. Kineeroddivullusa orive weko nko ddapallalleyelliiwawo va enthawi ya epiphi ni ya ethapo.

Yeremiya 52:1

Zedekiya avollowille omwene ari ni miyakha 21 nave alamulelle miyakha khumi ni mmodda o Yerusalemu. Amennya yaari Hamutala, mwaana a Yeremiya a o Libina.

Yeremiya 51:38

Ababiloni eneerothuruma wonanko mukango nave eneerewinlla wonanko anamwani a mukango.

Yeremiya 49:19

Wonanko mukango wookhuma mu otthako dda o Yordani onoopopiheriiwa nikholla na enkhosa nooteteziwa phaama, moorurumusa kineerowiikarihella Aedomu woorekamella ni owaniwa. Vatulli viwa kineerewaahiyera awaalamulella kinaampaalleemi mwaneenaaka. Ethiyo ttaani anaaphwanaphwane ni miyaano? Ethiyo ttaani anaawore okiipa mullatu miyaano? Ethiyo tti mbusa oovi anaawore ollipana ni miyaano?

Yeremiya 5:6

Sika ekaambiiwa mukango wamuutthakoni onaawiiphiiwa, mumbulu woohakani onaawoonongiiwa. Nanthavi anaakhalleke vakhuviru ni mizinda ddiwa, aneeromukhaddulla arive muthu ookhuma vawi ddoochimwa ddiwa tti ddinchichi, omuhiya wiwa Mulluku wohaata.”

Yeremiya 4:7

Wonanko mukango onuupulluwa ovenyera va wiipittha, emoddamoddave yeeyo awoononga ellapo ootimulla. Animawa wi oononge ellapwaanyu, mizinda ddaye eneerodditthattusa matepe oohikhallavo muthu ookhallamo.

Yesaya 47:6

Kahaashella murima athwaaka, kahaahambulla wonanko khe yoohallanaaka. Kahaavelleella m'mattani mwawo, weyaano khewaaweerelle echifundo waawummella murima naari awuulluvalla.

2 Epilli 33:11

Sika ekaambiiwa Apwiya yaarumalliiwa oohoollella akhoto a mwene a o Asiriya ayo yamphanre Manase emukola mphunani, emmaka ni onyolo, emuyaana o Babiloni.

2 Epilli 28:20

Sika Tiligati Pilesere mwene a o Asiriya aawanana ekhoto nave yaamuhoosa wunchichi munipuroni moomullipiha.

2 Mamwene 24:1

Mu enthawi ya Yehoyakimu, Nebukadinezara mwene a o Babiloni aahella ekhoto ellapo ya Yuda nave Yehoyakimu aawatiheriwa omurumeyella wa miyakha miraru. Koma vatulli viwa aamuwukila Nebukadinezara.

2 Mamwene 15:29

Enthawi ya Peka mwene a o Israele, Tigilati Pilesere mwene a o Asiriya aagonjiha mizinda dda Iyoni, Abele Beti Maaka, Yanowa, Kedeshi, ni Hazori navettho ellapo dda Giliyadi, Galileya ni ellapo ettheene ya Nafutali. Nave ahaaphara athu attheene aayaana o Asiriya wuukaporoni.

2 Mamwene 15:19

Vatulli viwa Pulo mwene a o Asiriya aahella ekhoto ellapo ya Israele. Nave Menahemu aavelleella siliva oollemella makilogaramu 34,000 wa Pulo wi olliye amukavihere okeraatthiha omwenaaye.

2 Mamwene 24:10

Enthawi yeeyo akhoto a Nebukadinezara mwene a o Babiloni yaawa o Yerusalemu ewaapheella muzindooyo ni misasa ddakhoto.

2 Mamwene 25:1

Va muyakha waneetthanu ni sese wa omwene wa Zedekiya, nllapo naneekhumi na mweeri, Nebukadinezara mwene a o Babiloni aawa ni akhotwaaye attheene wi ehelle ekhoto muzinda wa Yerusalemu. Nave yaawaapheella virive veko ni misasa owaaka mikhuttu ddakhoto.

Yesaya 15:9

Maaddi o Diboni aattakanyihereya ni nikhame komave kineerowaana ddoohoosa ddinchichi va Diboni. Kineerowaana mukango wi omuphare arive muthu anaavulluwe o Mowabu ni anaahalle mwiillaponimmo.

Yeremiya 5:17

Aneerewuumallihellani ddoohata ddanyu ni ddoocha ddanyu. Eneerowiipha aniinyu aallopwana ni aatthiyana, eneerowiiphellanittho enkhosa ddanyu ni eng'ombe ddanyu. Eneerewoononga mipesa ddanyu ni namukuywaanyu. Eneerokumulla mwakhoto mizinda ddanyu mwaddiroromellaanyu.

Yeremiya 10:25

Owallaanyu okharelle mitundu nnddo ddihinuudduwellani, athu ayo ehinatitimiha nnddina nanyu. Alliwa yaawiipha athwaanyu, yahaatthollosa oohimuhiya naari mmodda, ellapwiiwa yaayitthattusa ntepe.

Yeremiya 21:7

Vatulli viwa kineeromupharella wuukaporoni Zedekiya mwene a o Yuda ni enduna ddaye ni athu oohalla m'muzindoolla oovulluwa o mullilli, ettalla ni ekhoto. Kineerewaavelleella m'mattani mwa Nebukadinezara mwene a o Babiloni navettho wa adaniiwa ayo enapaalla owiipha. Ddawoona, eneerowiipha ni nsupada, kheyaamorella ethakaraka apaalle echifundo.’ ”