Yeremiya 48:11 - Mawu a Mulluku

¹¹ Apwiya yaallota wi, “Mowabu ookhalla va murendelleni ovenyera esombwaaye wonanko vinyo ookeraattheya phaama, oohimiminelliwa m'munoni mmodda. Ekaamba yawi khanaphariweke okaporo, makhallellwaaye tti amoddamoddave navettho wunkhella waye tti omoddamoddave.”

Yeremiya 48:11 ပူးပေါင်းရင်းမြစ်များ

Zefaniya 1:12

Va enthawi yeeyo kineerewaashaasha mu Yerusalemu ni enyali, kineerewaallaka athu awi moona okeraatthi wonanko vinyo ookeraattheya ayo m'murimani mwiwa enallota wi, ‘Apwiya kheneera yaphaama apaalle yoonanara.’

Zekariya 1:15

Kohaananariwella wunchichi athu a mitundu ddimodda ayo eri vamurendelleni. Vawi kaananariwelleemi athwaaka mooyeva koma alliwa sika yoonjereriiwa waahoosa athwaaka.

Nahumu 2:2

Vihanlle vang'ono wi Apwiya ehokollose ooriiheya wa Israele wonanko mmo wakhallelliiwa khalle, adani ehinaakhe ddeko ddittheddene ni woononga mipesa ddiwa.

Yeremiya 48:29

Nohiiwa dda wiitukhulla wa Mowabu. Olliye tti awiitukhulla, awiinyarulla, awiiwa ddaayeve nave tti awiitukhulla wunchichi.

Yesaya 24:3

Ellapo yavatthi eneerewoonongiwa, eneerotthollosiwa. Mi Apwiya koollota.

Yesaya 16:6

Athu a o Yuda enallota wi, “Nohiiwa dda wiitukhulla wa Amowabu vawi enniitukhulla wunchichi. Wiinyarulla wiwa, okota wiwa, osimbwa wiwa ni wiiriiha wiwa, ddittheddene khaddinna mutteko.”

Masalimo 123:4

Wa enthawi yoorekama, athu eeyuuma aaninyemulla, athu awiitukhulla aanivevulla.

Masalimo 55:19

Mulluku oyo anakhalla va mpando woomwene waambeella khalle, aneerokiwanella ekhoto, aneerewaagonjiha vawi khenapaalla osintha, khenamoova.

Yeremiya 51:34

Nebukadinezara mwene a o Babiloni oonoononga, oonipwesa ni onitathilla wonanko epalli yoohikhalla ni mutteko. Oonimirya wonanko ekonya, oovona ddoocha ddahu ddooddiva, vatulli viwa oonirapheya.

Yesaya 25:6

Va mwaango wa Ziyoni Apwiya Amasiva Mattheene eneerokeraatthihella mitundu ddittheddene dda athu machellello a ddoocha ddooddiva ni a vinyo aphaama, machellello a enama yoonuna ni a vinyo ooddivesesa.

Miyambo 1:32

Athu eenamwani eneerewiiphiwa ekaamba ya ohollowa wiwa. Nave ookarangeya eneerewoonongeya ekaamba ya ohipwatha wiwa.

Nahumu 2:10

Muzinda wa Ninive wohoonongeya, wootthattuwa ntepe, wootthaamiwa. Mirima ddinnoova, makuttha ennatthukumella, masiva kheyiivo, ekhove ddoomora ni woova.

Yeremiya 22:21

Kahuuchenjezani ddeko ddaweetelleewani phaama koma nyu mwaallota wi, ‘Nookhoota owiiwellellani.’ Nngu ttuukhalla wanyu ovenyera enamwanaanyu, khamuniiwellelleke mawaaka.

Yeremiya 48:12

“Sika vano chenjerani vawi enimawa mallapo ayo kinaarumeemi athu awi ammimine Mowabu wonanko vinyo. Vatulli viwa mino ddaye khaddikhalla ni ello, ddineeropwesiwa.