Yeremiya 44:2 - Mawu a Mulluku

² “Apwiya Amasiva Mattheene, Mulluku a Israele, enallota wi, ‘Mohoona ddawoopiha nnddo kamorihelleemi va Yerusalemu ni mizinda ddittheddene dda o Yuda. Vano ddittheddenennddo ddootthattuwa ntepe, khamunakhalla athu.’

Yeremiya 44:2 ပူးပေါင်းရင်းမြစ်များ

Yeremiya 34:22

Koma kineerewaalamula nave kineerewaahokollosellattho o muzinda yoolla. Eneerowuuhella ekhoto ni owaakha nave eneerowoosa ni munllo. Sika mizinda dda Yuda kineerodditthattusa ntepe, moohikhalla athu. Mi Apwiya koollota.”

Yeremiya 9:11

Apwiya yaallota wi, “Yerusalemu kineeromutthattusa ntepe, kineeromutthattusa mookhalla akhatwe. Mizinda dda o Yuda ddineerohiyiwa, khamukhalla athu.”

Yesaya 6:11

Vaavo kaakoha wi, “Apwiya, ethiyo ddennddo ddineereye ophiyera niini?” Alliwa yahaakhulla wi, “Ophiyera mizinda dditthattuwalle matepe, enyumba ddihinna athu ookhallamo nave ellapo etthattuwalle echipululu.

Mika 3:12

Sika vano ekaamba ya nyuwaano, Ziyoni aneerollimiwa wonanko emata, Yerusalemu aneerotthattuwa ntepe nave mwaango wa enyumba ya Apwiya oneerotthattuwa otthako.

Yeremiya 4:7

Wonanko mukango onuupulluwa ovenyera va wiipittha, emoddamoddave yeeyo awoononga ellapo ootimulla. Animawa wi oononge ellapwaanyu, mizinda ddaye eneerodditthattusa matepe oohikhallavo muthu ookhallamo.

Zekariya 1:6

Ethiyo mawaaka ni malamulwaaka ayo kaalleelleemi oorumeyellaaka anamallotella kheyaamorenlle makhollwaanyu? Sika alliwa yaalapa ni ollota wi, ‘Ddawoona, Apwiya Amasiva Mattheene yaaneerella nnddo yallotilliiwa moollikana ni makhallellwaahu ni mitteko ddahu ddoonanara.’ ”

Maliro 5:18

Mwaango wa Ziyoni wootthattuwa ntepe, akhatwe sika eneeteetamo.

Maliro 1:16

Ekaamba ya ddenndda kiniminlla, miitthwaaka ennamora miitthori, vawi ookikhurumusa murima khari vakhuviru, ookillipiha murima oorekamella. Athwaaka ehanlle weekhiiwa, vawi mudani oonigonjiha.

Maliro 1:1

Ha! Khalle waari muzinda wooddalla ni athu, ollello ohanlle weekhiiwa. Khalle waari woovuwa variyari va mitundu dda athu, ollello wootthattuwa wonanko naamukhwelle. Khalle waari mwene aamutthiyana, ollello wootthattuwa kaporo.

Yeremiya 44:22

Ekaamba ya yeella, Apwiya kheyaawonre ovillella mitteko ddanyu ddoonanara nnddo mwaddeereenyu. Sika ellapwaanyu yaatthattuwa ntepe, ello yooryiryiha mwiilli ni yootembeleliwa, ellapo yoohikhalla ni athu, wonanko ekhallelliiwa ollellova.

Yeremiya 25:11

Ellapo ettheeneella enaakhalle ntepe ni ello yoonanara. Va miyakha 70 mitundu ddenndda ddineeromurumeyella mwene a o Babiloni.

Yeremiya 7:34

Khowa wiiweyattho mawu oohakallalla ni oottheya o mizinda dda o Yuda ni o misewu dda mu Yerusalemu. Khawiiweyattho mawu oothapella, a ootthella ni ootthelliwa vawi ellapo eneerotthattuwa otthako.’ ”

Yesaya 24:12

Muzinda wootthattuwa ntepe nave millako ddiwa ddookumuwa.

2 Mamwene 21:13

Kineeromullaka Yerusalemu wonanko mmo kamweerelleemi Samariya ni Ahabu ni nibanja naye. Sika kineeromweelliha Yerusalemu vawaavenyihamoni athwaaye wonanko mmo muthu aneerelleeye ni embale, annayihuwa ayigudumeya.

Yoswa 23:3

Mooddoona ddittheddene Apwiya yeerelliiwa mitundu ddimodda ekaamba ya nyuwaano vawi Apwiya Mullukwaanyu sika yuuwanelleni ekhoto.

Deuteronomo 29:2

Mose aawiithana Aisraele attheene aalleella wi, “Mwaaddoonella nyookha nndde Apwiya yamweerelliiwa mwene a o Iguputo ni enduna ddaye ni ellapwaaye ettheene.

Levitiko 26:43

Koma yaambe oyihiya ethaya wi ehakallallelle miyakha ddawiithuuwa, ellapweeyo yaahikhalla ni athu. Vano alliwa eneerollakeya ekaamba ya machimwiiwa vawi yaakhoota nnddo kaalamulalleemi nave mirima ddiwa ddahiitana ni malangizwaaka.

Eksodo 19:4

‘Mwahoona nnddo kaweerelleemi Aiguputo navettho mmo kuutukhullalleemini wonanko epallame ya mpungu enaatukhullelliiwa aniiwa m'muuphelloni mwiwa nave kahuuphiyihani wa miyaano.

Levitiko 26:31

Kineerotthattusa mizinda ddanyu wi ddikhalle matepe, kineerotthattusattho mapurwaanyu oollapellellamo wi ehikhalle ni athu nave ngaakhullella wi kiiwe nthuko nookiddivella na ddoovelleella ddanyu.

Yeremiya 44:23

Otulli yoolla wohuumorellani ekaamba yawi moosa lubani ni mwahaachimwella Apwiya vookhootani wiiwellella mawiiwa ni voohithwarani malamulo ni malangizwiiwa mattheene.”

Daniele 9:12

Ddawoona, moheera nnddo mwanilleelleenyu vamodda oonihoollellaahu. Moonimorihella otulli wawoopiha hiyaano ni Yerusalemu, otulli wawi khonooneyeke waambeella khalle va ellapo yavatthi ettheene.

Yeremiya 8:3

Athu attheene oohalla mwa athu a mutundu woonanaroolla, orive weko kiwiikarilleemiwo eneerotthoolla okhwa okhwaranya wi eneerovirellella okhalla ni okumi. Mi Apwiya Amasiva Mattheene koollota.”