Yeremiya 42:18 - Mawu a Mulluku

¹⁸ “Apwiya Amasiva Mattheene, Mulluku a Israele, enallota wi, ‘Wonanko mmo kaashelleemi murima athu ookhalla o Yerusalemu, emoddamoddave yeeyo kineerewuushellani murima nyuwaano mwaya o Iguputo. Muneerotthattuwa ello yoonanara ni yawoopiha, yootembeleliwa ni yoonyaambusiwa. Khamuwa moonattho nipuro nenna.’ ”

Yeremiya 42:18 ပူးပေါင်းရင်းမြစ်များ

Yeremiya 7:20

Sika vano Mi Apwiya Mulluku kineerewaallaka wunchichi moosha murima. Osha murima waka oneeromorella va enyumbaaka, athu, enama, miteekho ni mmiddo nave oneerokhara wonanko munllo woohithiimiheya.

Yeremiya 29:18

Kineerowiipha ni ekhoto, ettalla ni mullilli nave kineerewaatthattusa ello yawoopiha wa athu a ma omwene mattheene a va ellapo yavatthi. Enaakhalle ootembeleliwa ni awoopiha, oosoonyiwa ni oovevuwa variyari va mitundu ddittheddene dda athu nko kawiikarelleemiwo.

Yeremiya 18:16

Ellapwiiwa aayitthattusa ntepe ni yoonyaambusiwa wa enthawi yoohimalla. Arive muthu ooviramo aneerekottikhina navettho aneerekotikha muru.

Yeremiya 44:12

Kineerewaakusa athu oohalla o Yuda ayo yallipihenlle oya o Iguputo wi yakhalle wenko, attheenaayo eneerotthollowa. Eneerewiiphelliwa mu ellapo ya Iguputo, amodda enaakhwe ni ekhoto nave amodda ni ettalla. Ang'onong'ono ni uullupalli enaakhwe ni ekhoto apaalle ni ettalla. Nave eneerotthattuwa ello yoonanara ni yooriiryiha mwiilli, ello yootembeleliwa ni yoovevulliwa.

Yeremiya 24:9

Kineerewaatthattusa ello yawoopiha yoonanara wa mamwene mattheene a va ellapo yavatthi, ello yoovevuwa, yoohikhalla ni mutteko, yoottheyiwa ni yootembeleliwa orive weko kinaawiikarelleemiwo.

Yeremiya 22:27

Muneeropaalla ohokollowa koma khemuwora ohokollowa.”

Yesaya 65:15

Athwaaka ootthoolliwa eneeroromolla nnddina nanyu vootembelelani nave mi Apwiya Mulluku kineerowiiphani. Koma oyo anakiiwellella miyaano kineeromuvaha nnddina nanaanweene.

Yawuupullulla 14:10

amuwirye yeekha vinyo a Mulluku, vinyo oohisungunula a onanariwa waye nko ahenlleeye mu kapu a osha murima waye! Attheene eneera ddenndda eneerollakiwa ni munllo owaaka sulufure vamiitthoni va angelwaaye aweella ni mwaanaankhosa.

Zekariya 8:13

Nyu mabanja a Yuda ni Israele, khalle mwaari echizindikiro ya matembelelo variyari va mitundu ddimodda dda athu. Koma vano kineerewuuvullusani wi mukhalle echizindikiro ya madaliso. Muhoove, llipani murima.”

Nahumu 1:6

Ethiyo ttaani anaawore wiimella vamiitthoni va Apwiya, alliwa eshille murima? Ethiyo ttaani anaawore ovillella o owalliiwa? Alliwa enniitha owalliiwa malluku ennaphweeya vamiitthoni viwa.

Daniele 9:27

Enduneeyo eneerokeraatthiha echipangano yoollipa ni athu anchichi wa miyakha khumi ni miilli. Viviralle hafu a enthawi yeella, eneerohiiha ovelleella mikutho ni ddoovelleella ddimodda. Eneerohiya Yoonanara Yawoononga vaddullu va enyumba ya Mulluku nave eneerokhallavo ophiyera aweera ddenndda allakiwe ni woononga nko Mulluku amukeraatthihelleeye.”

Daniele 9:11

“Aisraele attheene aapwesa malamulwaanyu nave aahollowa, aakhoota wiiwellella mawaanyu. Sika mawu ootembelela ni oollupella ayo yalembiwe mu malamulo a Mose, oorumeyella a Mulluku, aanimorella ekaamba yawi nohuuchimwellani.

Ezekiele 22:22

Muneereweekeya wonanko mmo siliva aneekeyelleeye vamunlloni. Sika muneerodduwella wi mi tti Apwiya ayo yuushenlleni murima.”

Maliro 4:11

Apwiya aasha murima wunchichi, aamorihella vatthi osha murima wiwa wamunllo. Aakhariha munllo o Ziyoni oyo woonongille matthipello a muzinda.

Maliro 2:4

Aakunga muuriiwa wonanko mudanaahu, aakunga ekhonyiiwa wonanko mudani. Aawiipha attheene ayo naawehaahu mookotella variyari va anamwani aatthiyana, Ziyoni. Owalliiwa wakhara wonanko munllo.

Yeremiya 29:22

Ekaamba ya athu eellaayo, manddiniiwa eneerekoromolliwa ni Ayuda ookhalla o Babiloni vawaatembelelani akhwiiwa. Eneerekollota wi, ‘Apwiya eweerelle wonanko mmo yaweerenlliiwa Zedekiya ni Ahabu ayo yoosiwe mwene a o Babiloni!’

Yeremiya 26:6

enyumba ella kineeroyoononga wonanko kamoonongelleemi Shilo. Vano muzindoolla kineerowutthattusa ello yootembeleleya wa mitundu ddittheddene dda va ellapo yavatthi.’ ”

Yeremiya 25:9

kineerowiithaniha malloko mattheene ompoto ni oorumeyellaaka Nebukadinezara, mwene a o Babiloni. Kineerewaaruma wi ehelle ekhoto ellapweella ni athwiiwa navettho athu a mitundu ddimodda ddawaapheella ellapweella. Ddawoona, kineerewaatthollosa ni waatthattusa ello yoonanara, yoovevuwa ni yoosoonyiha wa enthawi yoohimalla.

Yeremiya 6:11

Sika ekaambiiwa kooddalla ni osha murima wa Apwiya, ngiwora owusunga.” Vano Apwiya yaallota ni miyaano wi, “Ithellella osha murimanko va anamwani aweeta m'musewuni ni va mutthukumano wa asombwe vawi naari mullopwana ni mwaariye, a embwi ni awuulluvalla wunchichi eneerophariwa.

2 Epilli 34:25

Athwaayo aakihiya, enavelleella mikutho wa milluku ddimodda ni okichimwella ni mafanwiiwa, mitteko ddittheddene dda mattiiwa. Sika osha murima waka wookharella muzindoolla nave khowa othiima.’

Numeri 5:27

Mutthiyana awirya maaddi, akhalla wi ahiiripiha apaalle akhalla wi kharoromelleye wa mamune, maaddi amatembelelwaalle eneerovollowa m'mirimani mwaye nave aneerewoona ovoreya. Erukullwaaye eneerewiipa mukhoveni mwaye muneeronyaalla nave nnddina naye nineerokhalla tembelelo variyari va mutundwaaye.

Yesaya 30:3

Koma muneerowulliwa muru ni echitetezo ya Farao navettho ni nipuro noovulluwellavo na o Iguputo.

Yeremiya 23:40

Kineerewuuvevullani wa enthawi yoohimalla, kineerewuuwullihani muru moohitiwalleya.’ ”

Yeremiya 33:5

Ababiloni enimawa wi ehelle ekhoto nave enyumba ddiwa ddineeroddalla ni mitembo dda athu ayo kawiiphalleemi moowalli ni moosha murima. Muzinda yoolla koowureya etulli ekaamba ya ddoonanara dda athwiiwa.

Yeremiya 44:6

Sika owalli wa osha murima waka waakhara wonanko munllo m'mizindani dda Yuda ni m'misewuni dda o Yerusalemu. Mizindannddo ddaatthattuwa matepe oohiyiwa monga ddikhallelliiwa ollellova.

Yeremiya 44:8

Kaambiiwa tini munattatthamulleenyu owallaaka vaweerani ddoonanara ni mattaanyu navettho vawoosellani lubani milluku ddimodda mu ellapo ya Iguputo mmo munakhalleenyu? Munaddoononga nyookha ni okhalla ello yootembeleliwa ni yoovevulliwa mmwiitthoni mwa athu a mitundu ddittheddene dda va ellapo yavatthi.

Yeremiya 44:22

Ekaamba ya yeella, Apwiya kheyaawonre ovillella mitteko ddanyu ddoonanara nnddo mwaddeereenyu. Sika ellapwaanyu yaatthattuwa ntepe, ello yooryiryiha mwiilli ni yootembeleliwa, ellapo yoohikhalla ni athu, wonanko ekhallelliiwa ollellova.

Ezekiele 20:34

Kineerewuuvenyihani variyari va mitundu ddimodda ni wuutthukumanihani ovenyera o ellapo nnddo mwapallalleyelleenyuwo ni nnatta naka namasiva ni muwonwaaka woottaphurusa wooniha osha murima.

Maliro 2:6

Aapwanyulla enyumbiiwa wonanko musasa, Apwiya aamalliha o Ziyoni mallapo a ehakallallo ni a Sabata. Nave eshille murima wunchichi, aamuvevulla mwene ni allupa mukutho.

Hoseya 7:16

Ennarukunuwella wa mulluku oohikhalla ni mutteko woohikhalla wa Mulluku ookhwaranya ddittheddene. Tti wonanko muura woollova. Owaahoollelliiwa eneerewiiphiwa ni nsupada ekaamba yawi ennakillotella ddeepewe. Sika a o Iguputo eneerewaattheya wunchichi.”