Yeremiya 4:1 - Mawu a Mulluku

¹ Apwiya enallota wi, “Mwapaalla ohokollowa, nyu Aisraele, hokollweellani wa miyaano nave muvenyihevo mafanwaanyu vamiitthoni vaka nave muhiwe muhollowattho.

Yeremiya 4:1 ပူးပေါင်းရင်းမြစ်များ

Yowele 2:12

Koma naari ollellova, Apwiya enallota wi, “Lapani nave muhokollweelle wa miyaano ni murimaanyu muttheene. Hallani ocha, inllani ekutho ni omoriha ethakaraka.

Yeremiya 3:22

Nyu athwaaka oohiroromelleya hokollweellani wa miyaano, kineerewuuchirihani wi mukhalle ororomelleya. Nyu munallota wi, “Ninimawa wa Apwiya vawi alliwa tti Mullukwaahu.

Ezekiele 43:9

Vano ehiye oraruwa wiwa, voollapellani milluku ddimodda nave evenyihevo mitembo ddamamwene ddiwa ddihikaatamelle. Nave kineerokhalla ni alliwa wa enthawi yoohimalla.

Yeremiya 25:5

Alliwa yaanallotella wi arive muthu mwa nyuwaano ahiye makhallellwaaye oonanara ni mitteko ddaye ddoonanara wi mukhalle mu ellapo eyo Apwiya yuuvahilliiwani nyuwaano ni makhollwaanyu wa enthawi yoohimalla.

Yeremiya 3:12

Khawe wallalleye ompoto othenga wawi, ‘We Israele oohiroromelleya, hokollowa, Apwiya sika ennallota. Owallaaka khuvirellella vawi miyaano tti eechifundo, ngiwa kuunanariwella wa enthawi yoohimalla.

Yeremiya 3:1

Apwiya enallota wi, “Muthu amwallana ni mwaariye nave mutthiyanooyo avenyavo atthelliwa ni mullopwana mmodda, ethiyo mullopwana awaambooyo ttuumuhokollweella? Ethiyo eera ddenndda, ellapo kheripihiwa wunchichi? Koma we Israele, woheera ddoohule ni ookondiwa anchichi. Ethiyo ttuuhokollweella wa miyaano?

Genesis 35:2

Sika Yakobo ahaalleella a mu nibanja naye nittheene ni athu attheene aariiyena wi, “Tathillani milluku ddeelleto nnddo ddiri variyari vanyu. Muddeellihe nyookhaanyu nave muware ddoowara ddaphaama.

Hoseya 14:1

Nyu Aisraele, hokollweellani wa Apwiya vawi mwaamora ekaamba ya machimwaanyu.

Hoseya 2:2

“Mumuhumullulle meenyu, mumuhumullulle vawi khe mwaaraka nave miyaano ngihiyottho mamune. Mumuhumullulle wi ahiye oraruwa, ezibwenzi ddaye addivenyihe vamirimani vaye.

2 Epilli 33:8

Sika ngaakhullellattho wi Aisraele evenyihiwemo mu ellapo eyo kaavahilleemi makhollwaanyu alliwa yaawiiwellellaka moororomelleya ddittheddene kaalamulalleemi navettho yaathwaraka malamulo ayo Mose oorumeyellaaka aalamulalleeye.”

2 Epilli 15:8

Asa iiwalle ollotella wa Azariya mwaana a Odedi, aallipa murima nave aavenyihawo mafano oonanara o ellapo ettheene ya Yuda ni ya Benjamini. Aavenyihawottho mafano o mizinda nndde aakhilleeye o ellapo yamiyaango ya Efuremu nave aapotokosa nikuwa na Apwiya nno naari vahoollo va nikhote na enyumba ya Apwiya.

2 Mamwene 23:24

Mallapo yaayo Yosiya ahaavenyihamottho athu a makhanga, amasenga, terafimu navettho mafano mamodda mattheene, owaakattho ddoonanara ddittheddene nnddo ddaari o ellapo ya Yuda ni o Yerusalemu. Eerille ddenndda wi asunge malamulo ayo yalembiwe mu nibukhu nno mullupa mukutho Hilikiya aniphwanyilleeye mu enyumba ya Apwiya.

2 Mamwene 23:13

Vatulli viwa mwenooyo ahoonongattho mapuro oollapellamo mafano ayo yaari wookhumella nndduwa wa Yerusalemu, omwera wa mwaango wa Woonongeya. Makuwaayo Solomoni, mwene a o Israele ahaamakella nifano noonanara na Asidoni nooromolliwa Ashitoreti ni na Amowabu nooromolliwa Kemoshi navettho na Aamoni nooromolliwa Milikomu.

1 Samuele 7:3

Vano Samuele ahaalleella Aisraele attheene wi, “Mwaapaallaka ohokollweella wa Apwiya ni murimaanyu muttheene, muvenyihe milluku ddeelleto ni dda Ashitaroti variyari vanyu. Murimaanyu muttheene okhalle va Apwiya ni waarumeyella alliwave. Mweeddiiddo eneerewuuvullusani wa Afilisti.”

Oweeruza 10:16

Sika yaavenyihavo milluku ddeelletonndde yaamba waarumeyella Apwiya nave Apwiya yaamoriwa ethakaraka voowonani Aisraele ehoowaka.

Hoseya 7:16

Ennarukunuwella wa mulluku oohikhalla ni mutteko woohikhalla wa Mulluku ookhwaranya ddittheddene. Tti wonanko muura woollova. Owaahoollelliiwa eneerewiiphiwa ni nsupada ekaamba yawi ennakillotella ddeepewe. Sika a o Iguputo eneerewaattheya wunchichi.”

Ezekiele 18:13

ookongoliha wi apindulevo ello apaalle waakhella yawoonjereravo. Ethiyo muthu awi ddiidda ttuukhalla ni okumi? Iyaayi, khakhalla ni okumi. Ekaamba yawi aheera ddoonanara ddittheddenenndda, aneerokhwa nave nikhame naye nineerokhalla vamuru vaye.”

Ezekiele 11:18

Yavollowa mwiillaponimmo eneerovenyihamo mafano mattheene oonanara.

Yeremiya 36:3

Apaalle nibanja na Yuda ttuuwiiwa dda ddawoopiha ddittheddene nnddo kinaamorihelleemi. Sika arive muthu aneerohiya makhallellwaaye oonanara. Vano kineerewaakhululukella ddoonanara ddiwa ni machimwiiwa.”

Yeremiya 35:15

Kahaaruma wiilliwiilli amurummwaaka anamallotella wi yuulleelleni wi, ‘Arive muthu mwa nyuwaano ahiye mitteko ddaye ddoonanara. Mupotokose makhallellwaanyu nave muhiye othwara milluku ddimodda, muhiddillapelleke. Sika muneerokhalla mu ellapo eyo kuuvahilleemini nyuwaano ni makhollwaanyu.’ Koma nyu khamwaapwathillewo, khamwaakiiwellelle.

Yeremiya 24:9

Kineerewaatthattusa ello yawoopiha yoonanara wa mamwene mattheene a va ellapo yavatthi, ello yoovevuwa, yoohikhalla ni mutteko, yoottheyiwa ni yootembeleliwa orive weko kinaawiikarelleemiwo.

Yeremiya 15:4

Kineerewaatthattusa ello yawoopiha wa athu a moomwene mattheene a va ellapo yavatthi ekaamba ya nnddo Manase mwaana a Hezekiya, mwene a o Yuda, eerilleeye o Yerusalemu.”

Yeremiya 4:4

Musunge lonjezano nanyu ni miyaano Apwiinyu nave mwiivelleelle ni murimaanyu muttheene wa miyaano. Nyu athu a o Yuda ni a o Yerusalemu muheereke ddenndda wi owallaaka ohiwe wonanko munllo nave ohuukharelleni moohithiimiheya ekaamba ya ddoonanara muneereenyu.”

Yeremiya 3:14

“Nyu athu oohiroromelleya, hokollowani nyu athu oohiroromelleya vawi apwiinyu tti miyaano. Kineerewuuhokollosellani o Ziyoni, mmodda ovenyera o orive muzinda nave eelli ovenyera o orive nibanja.

Yesaya 31:6

Nyu Aisraele, hokollweellani wa Apwiya ayo mwaawukilalleenyu wunchichi.

Yoswa 24:14

“Vano nyuwaano, mwaavahe olemu Apwiya nave mwaarumeyelleke mwawoona nave moororomelleya. Venyihani milluku nnddo makhollwaanyu yaddillapelliiwa okhopella wa mihinje wa Yufurate ni o Iguputo nave mwaarumeyelle Apwiya.

Deuteronomo 27:15

“ ‘Atembeleliwe arive muthu oopanga nifano noosema apaalle nawoopa, ello yoopangiwa ni muthu eeruso, ello yawaananara Apwiya ni yoollapella mwawiipittheya.’ “Nave athu attheene yaakhulle wi, ‘Amen!’

Deuteronomo 4:30

Mwakhalla mu ddoohoosa nave ddeko ddittheddenenndda ddaweereyellani vatulli viwa muneerohokollweella wa Apwiya Mullukwaanyu nave muneerewiiwellella mawiiwa.

Yeremiya 7:3

Apwiya Amasiva Mattheene Mulluku a Israele enuulleellani wi, ‘Musinthe makhallellwaanyu ni ddaweera ddanyu nave kineerowaakhullellani ovirellella okhalla vanipuroninna.

Yeremiya 7:5

“Musinthe makhallellwaanyu ni ddaweera ddanyu nave mweerellaneke ddoolungama.

Yeremiya 7:7

Mwiiwellella mawaaka kineerowaakhullellani wi mukhalle vanipuroni nenna, mu ellapo eyo kaavahilleemi makhollwaanyu wa enthawi yoohimalla.

Yeremiya 15:19

Sika Apwiya yahaakhulla wi, “Wahokollweella wa mi, kineerowaakhellattho nave oneerokirumeyellattho. Waallotaka ddawoona ohiri ddoohikhalla ni mutteko onaakhalle namallotellaaka. Athu yaalla eneerohokollweella wa weyaano koma we khohokollweella wa alliwa.

Yeremiya 18:11

Khawe vano waalleelle athu a o Yuda ni a o Yerusalemu wi Apwiya enallota wi, ‘Mi kookhozekella wuumorihellani otulli ni wuullakani. Nyu attheene, hokollowani, arive muthu ahiye ettilla ddaye. Nave potokosani makhallellwaanyu ni ddaweera ddanyu.’

Zekariya 1:4

Muhikhalle wonanko makhollwaanyu ayo yiiwalle mawu a anamallotella akhalle ootthopoolla othengaaka wawi, ‘Hiyani makhallellwaanyu oonanara ni oochimwa.’ Koma alliwa kheyaawiiwellelle naari vang'ono, Mi Apwiya koollota.

2 Epilli 34:33

Yosiya aavenyiha ddeko ddoonanara ddittheddene o ellapo ddittheddene dda Israele nave aaweeriha athu attheene a o Israele wi yaarumeyelleke Apwiya Mullukwiiwa. Mwawi athwaayo kheyaahiyalle waarumeyella Apwiya Mulluku a makhollwiiwa.