Yeremiya 30:19 - Mawu a Mulluku

¹⁹ Athu eneerewiipa machipo owaatitimiha, vineerewiiweya okhuwa woohakallalla. Kineerowaatiha, khekhallattho aweerengeya, kineerewaavaha eyuuma, khenyaambusiwa.

Yeremiya 30:19 ပူးပေါင်းရင်းမြစ်များ

Yeremiya 33:22

Kineeroddiruuwiha edduullu dda oorumeyellaaka Davide ni oorumeyellaaka allupa mukutho Aalevi nave enaate wonanko etheneeri ddooddullu apaalle muhava wa mukhwipi mwa enyanja.”

Yesaya 51:11

Ayo mwawooponlleenyu eneerohokollowa, eneerophiya o Ziyoni nchipo niri vayanoni, othapella woohimalla eneerewooneya va ekhove ddiwa. Eneerokhalla ni ehakallallo ni ottaphuwa, ethakaraka ni wiipullella ddineeromalla.

Yesaya 60:22

Naari nibanja ning'onong'ono nineerotthattuwa nlloko, mwananlloko nineerotthattuwa mutundu wamasiva. Kineereweera ddenndda mwawaakuva enthawi yaphiya, mi tti Apwiya.”

Yesaya 35:10

Ayo Apwiya yawooponlliiwa eneerohokollowa, eneerophiya o Ziyoni yiipaka moohakallalla. Wenko eneerohakallalla wa enthawi yoohimalla, eneerothapella ni ohakallalla, ethakaraka ni winlla ddineeromalla.

Ezekiele 36:37

“Mi Apwiya Mulluku kinallota wi, ‘Kineerowaakhullellattho Aisraele wi ekiveke nnddo enapaalliiwa wi kiweerelle. Kineerewaaruuwiha athwiiwa wonanko enkhosa.

Zekariya 10:8

“Kineerewiipa mutturu wi athwaaka etthukumane vamodda. Kineerowoopolla nave eneerewaata wonanko mmo yakhallelliiwa khalle.

Yeremiya 31:4

Nyu Aisraele, kineerewuumakanittho wi mukeraattheye. Muneerohakallalla vawiipani asikoma nave muneerothaanana nimodda athu awiina moohakallalla.

Zekariya 12:8

Nllapo nenno Apwiya eneerewaateteza ookhalla o Yerusalemu mwawi athu oofooka wunchichi mwa alliwa enaakhalle amasiva wonanko Davide. Sika nibanja na Davide ninaakhalle noolamulella wonanko Mulluku, wonanko mungelo a Apwiya awaahoollella.

Zekariya 8:19

“Ohalla ocha* wa mweeri waneesese, waneetthanu, waneetthanu ni piilli ni waneekhumi onaakhalle ohakallalla ni othapella o nibanja na Yuda. Mukondeke ddawoona ni murendelle.”

Ezekiele 37:26

Kineerokeraatthihana echipangano yamurendelle. Echipangano yeella eneerokhalla yayiwa wa enthawi yoohimalla. Kineerewaakeraatthiha ni Waaruuwiha nave kineerohiya enyumbaaka variyari viwa wa enthawi yoohimalla.

Yesaya 12:1

Nllapo nenno arive muthu aneerollota wi, “Kinnuuthokozani nyu Apwiya, vawi naari mwakishenlle murima, osha murima wanyu waariirya nave mwaakikhurumusa murima.

Nehemiya 8:12

Nave athu attheene yaarowa owaniwa wi yache ni owirya navettho wi yaakawelle athu amodda ddoocha wi yeereye ehakallallo yuullupalli ekaamba yawi yahiiwesesa mawu a malamulo ayo yeerengiwe wa alliwa.

Ezara 6:22

Nave yaahakallallella Ehakallallo ya Buledi Oohikhalla ni Yisiti wa mallapo matthanu ni meelli. Vawi Apwiya yaaweeriha wi ehakallalle nave aarukunusa murima wa mwene a o Asiriya mwawi aaweerella echifundo nave ahaakavihera va mutteko woomakattho enyumba ya Mulluku, Mulluku a Israele.

1 Petro 1:7

Ddoolinga ddiwa tti ddawi ddisimikize wi echikhulupilwaanyu tti yawoona. Naari golide, oyo anaworeya woonongeya, anneesiwa ni munllo. Nave vano echikhulupilwaanyu eyo eri yoowallamella wunchichi omukhwaranya golide, enaphwanellattho weesiwa wi evillelle. Sika muneerewaakhella ntitimiho va nllapo nawuupullulliwa Yesu Khrisitu.

Yesaya 60:19

Khaviwa vipaalleyattho nndduwa wi nuumolleelle otthaana apaalle mweeri wi wuumolleelle mahiiyu. Koma mi Apwiya sika kinaakhalle omolleella wawo woohimalla, miyaano Mullukwaawo sika kinaakhalle owala wawo.

Yesaya 52:9

Nyu matepe a Yerusalemu, khuwani moohakallalla, Apwiya ahaakhurumusa murima athwiiwa, aamoopolla Yerusalemu.

Zekariya 2:4

Awaamboolle aallota ni mukhwaaye wi, “Akuva, mulleelle musombwe akusalle mukwe woolingella wi muneerokhalla athu anchichi ni eziweto ddinchichi mu Yerusalemu mwawi khavipaalleya omaka mpanda.”

Yeremiya 31:27

Apwiya enallota wi, “Enthawi enimawa mvo kinaadaliseemi ellapo ya Israele ni Yuda ni athu anchichi nave ni eziweto ddinchichi.

Yesaya 51:3

Mi Apwiya kineeromukhurumusa murima Ziyoni, oyo enakhalla mu matepaaye. Naari ellapwaaye eri echipululu, kineeroyitthattusa wonanko Edeni. Naari ellapwaaye eri nihaka, kineeroyitthattusa wonanko emata ya Apwiya. Wenko athu eneerohakallalla ni ottaphuwa, eneerewiipa machipo ookititimiha ni ookitthamalla.

Yesaya 27:6

Mallapo enawaayo Yakobo aneerotthipella misisi, Israele aneerophuwa ni ottaphulla malluwa. Ellapo ettheene yavatthi eneeroddalla ni ezipaso ddaye.

Masalimo 53:6

Ovullusiwa wa Israele ophiye ovenyera o Ziyoni, Apwiya yahokollosella murendelle wa athwiiwa, Yakobo aneerohakallalla, Israele aneerothapella.

Nehemiya 8:17

Vano athu attheene ayo yahokollowille wuukaporoni yaamaka misasa enakhalla mwemmo nave yaahakallalla wunchichi vawi waambeella enthawi ya Yoswa mwaana a Nuni ophiyera nllapo nenno, Aisraele yaari ehineereke ddenndda.

Yohane 17:22

Kaakawanana ntitimiho mwakivahilleenyu wi ekhalle amodda, wonanko mmo nyuwaano ni miyaano niri amodda.

Yesaya 60:9

Ddenndda tti esitima ddoovenyera o ellapo ddawoorekama, dda o Tarishishi ddiri vahoollo. Ddinaakitthiha aniinyu ayo emukusalle siliva ni golide wi atitimihe nnddina na Apwiya Mullukwaanyu, ekaamba yawi Aweella Aisraele ahuuriihani.

Yesaya 55:5

Vano muneerewiithana mitundu nnddo muhinaddidduwelleenyu, mitundu ddoohuudduwellani ddineeroowa mwawaakuva wi ddikhalle ni nyuwaano, ekaamba ya mi Apwiya Mullukwaanyu, Aweella a Israele oyo kinuuvahani oriiheya.”

Yeremiya 17:26

Athu eneerekovenyera o mizinda dda Yuda ni echigawo ettheene yawaapheella Yerusalemu, echigawo ya Benjamini, yamatapo, yamiyaango ni yoomwera, ekusalle mikutho ddooshellelliha, mikutho dda ddoocha, mikhutho ddalubani* ni mikutho ddoothokozella, oyaana o enyumba ya Apwiya.

Ezekiele 37:10

“Sika kahaamba ollotella moollikana ni mmo Apwiya yakilamulelliiwa. Vano mpweya waavollowa mwa alliwaayo nave ookhwaalle yaakhalla ni okumi yiimella. Yaari mulloko muullupalli wa akhoto.

Yesaya 26:15

Koma nyu Apwiya, mohoonjerera mutundwaahu, ddawoona, moowunnuwiha. Mohoonjerera ellapwaahu, mohaakhellavo ntitimiho mohunnuwiha malire mattheene.

Yeremiya 3:16

Vano mwaata mwiillaponimmo, athu khewa ellotattho dda nibokosi na echipangano na Apwiya. Khewa eniganizera m'murimani mwiwa apaalle onuupuwella apaalle onipaalla nave khewa enipangattho nimodda.