Yeremiya 21:7 - Mawu a Mulluku

⁷ Vatulli viwa kineeromupharella wuukaporoni Zedekiya mwene a o Yuda ni enduna ddaye ni athu oohalla m'muzindoolla oovulluwa o mullilli, ettalla ni ekhoto. Kineerewaavelleella m'mattani mwa Nebukadinezara mwene a o Babiloni navettho wa adaniiwa ayo enapaalla owiipha. Ddawoona, eneerowiipha ni nsupada, kheyaamorella ethakaraka apaalle echifundo.’ ”

Yeremiya 21:7 ပူးပေါင်းရင်းမြစ်များ

Yeremiya 37:17

Nllapo nimodda Zedekiya ahaaruma athu wi yamwiithane Yeremiya nave mwenooyo aamwaakhella. Vano mwenooyo aamukohella vakhwipi mpa mwaye wi, “Ethiyo vookhalla mawu ayo Apwiya yuulleelliiwa?” Yeremiya ahaakhulla wi, “Ee, yookhallavo. Nyu amwene muneerovelleelliwa m'mattani mwa mwene a o Babiloni.”

Ezekiele 7:9

Ngiweerellani echifundo apaalle wuumorellani ethakaraka. Kineerewuullakani ekaamba ya ddaweera ddanyu navettho ekaamba ya ddoonanara nnddo ddiri va nyuwaano. Vano muneerodduwella wi mi tti Apwiya ayo enuullakani.’ ”

Yeremiya 13:14

Kineerowoopaniha miru wi enyenyane amoddamoddave, attiitthi ni aniiwa. Ngiweerella echifundo apaalle waamoriwella ethakaraka apaalle waakhululukella ophiyera kiwoonongille.”

Deuteronomo 28:50

Athwaayo enaakhalle oowalli nave khemumorella ethakaraka arive muthu naari mwaana apaalle awuulluvalla.

Ezekiele 9:10

Sika ngiweerella echifundo apaalle waamorella ethakaraka. Kineerewaallaka moollikana ni ddaweera ddiwa.

Ezekiele 8:18

Vano miyaano kineerewaallaka moosha murima, Ngaamorella ethakaraka nave ngiweerella echifundo. Naari yinlleke wa miyaano mookhuwa, ngiwaapella maaru.

Yesaya 47:6

Kahaashella murima athwaaka, kahaahambulla wonanko khe yoohallanaaka. Kahaavelleella m'mattani mwawo, weyaano khewaaweerelle echifundo waawummella murima naari awuulluvalla.

Yesaya 27:11

Enthambi dda miteekho ddumma ennaddikotholla nave atthiyana ennadditota wi ddikhalle ekhuni. Athu yaalla tti oohiiwesesa. Sika oyo aaphatusalle khaamoriwella ethakaraka nave oyo aapangille khaweerella echifundo.

Yeremiya 15:5

Apwiya enallota wi, “Ethiyo ttaani anuumorelle ethakaraka we Yerusalemu? Ethiyo ttaani anuurukunuwelleni uupwatheni? Ethiyo ttaani anaawuupwatheni?

Yeremiya 15:9

Moowe a anamwani atthanu ni eelli oongomowa, anavumella muddullu. Epiphi yommorella otthaana, oowullihiwa muru nave murima onimamvoreya. Oohalla attheene kineerewaavelleella wa adani wi ewiiphe ni nsupada. Mi Apwiya koollota.”

Yeremiya 22:25

Kineerewuuvelleella m'mattani mwa oopaalla owiipha, mwa ayo onawooveewe, Nebukadinezara mwene a o Babiloni ni athwaaye.

Yeremiya 27:6

Vano koovelleella ellapo ddittheddenenndda vamodda ni enama ddittheddene ddamuhakani wi ddimurumeyelleke Nebukadinezara murummwaaka, mwene a o Babiloni.

Yeremiya 34:3

Ddawoona, weyaano khovulluwa m'mattani mwaye vawi oneerophariwa nave oneerovelleelliwa wa olliye. Oneeromoona vamiitthoni ni vamiitthoni nave oneerollotana ni oyiiwana o Babiloni.

Ezekiele 23:28

“Mi Apwiya Mulluku kinallota wi, ‘Kineerewuuhiya m'mattani mwa adanaawo alle onawiiteewe ni onanariwana.

Yeremiya 14:12

Naari ehanlle ocha ngiiwa winlla wiwa. Naari evelleelleve mikutho ddooshellelliha ni dda ddoocha, ngaakhella. Koma kineerowoononga ni ekhoto, ettalla apaalle mullilli.”

Yeremiya 19:7

Va nipuro nenna kineerovirikaniha yoolinga ya athu a o Yuda ni a o Yerusalemu. Athu a mwemmo kineerowiiphiha wa adaniiwa okhotoni nave kineerowoonongiha wa athu awiitanana. Mitembo ddiwa kineerodditthattusa yoocha ya epallame ni enama ddamuhakani.

Yeremiya 20:4

Apwiya weekhiiwa aallota wi, ‘Kineerewuutthattusa yawoopiha wa weekhaawo navettho wa akhwaawo attheene. Akhwaawo eneerewiiphiwa ni adaniiwa ni nsupada woonaka ni miitthwaawo. Nave Yuda muttheene kineeromuvelleella wa mwene a o Babiloni. Amodda eneeropharelliwa wuukaporoni o Babiloni nave amodda eneerowiipha ni nsupada.

Yeremiya 32:4

Ddawoona, Zedekiya mwene a o Yuda khavulluwa wa Ababiloni koma aneerovelleelliwa wa mwene a o Babiloni, sika aneerewoonana vamiitthoni ni vamiitthoni nave aneerollotana.

Yeremiya 36:29

Vano omulleelle mwene Yehoyakimu a o Yuda wi, Apwiya enallota wi wahoosa nibukhunne voollotani wi, ‘Kaambiiwa tini olembilleewe wi mwene a o Babiloni aneerewoononga ellapweella, athu ni enama ddene?’

Yeremiya 50:17

Aisraele tti wonanko enkhosa ddoopallalleya, ddawiikarihiwa ni mikango. Mwene o Asiriya sika aambille owiipha Aisraelaayo, vatulli viwa aaphiya Nebukadinezara mwene a o Babiloni oyo aattakhunne ni makhuveene.

Maliro 2:20

Ngoonani, nyu Apwiya, wehani! Ethiyo ttaani oyo mwaambillekeenyu omuhoosa mwawi ddiidda? Ethiyo atthiyana yaattakhuneke aniiwa yaayarilliiwa? Ethiyo allupa mukutho ni anamallotella yiiphelliwa mu nipuro naweella na Apwiya?

Maliro 2:22

Wonanko mmo muniithanelleenyu o ehakallallo, tti mwemmo mukiithanelleenyu ddawoopiha ovenyera o embali ddittheddene. Nyu Apwiya, va nllapo na osha murima wanyu, khaavo oyo awonre othawa apaalle ovulluwa. Attheene kaayarilleemi ni waalleella, adanaaka yaawoononga.