Yakobo 5:10 - Mawu a Mulluku

¹⁰ Asinnaka ni arokoraka, upuwellani anamallotella ayo yaallotille mu nnddina na Apwiya. Muweere yaalla wonanko echisanzo ya ovillella naari mu ddoohoosa.

Yakobo 5:10 ပူးပေါင်းရင်းမြစ်များ

Aheberi 13:7

Muwuupuwelleke oohoollellaanyu ayo yuuhuddihalleni dda othenga wa Mulluku. Muupuwelleke wi yakhalla mwawiidde. Mweeseeseke ottakihera echikhulupililo eyo yaariiwana.

Mitteko 7:52

Makhollwaanyu yaamuhoosa arive namallotella. Yaawiipha athu ayo khalle yallalleyille dda owa wa muthu oolungama oyo mwaamuvelleenlleenyu wi iiphiwe.

Mitteko 3:21

Anaphwanella wi akhalle oddullu ophiyera ekwakhwanihiwe enthawi yoopotokosa ddeko ddittheddene wi ddikhalle ddanaanweene moollikana ni ddallotille Mulluku oweella mwa anamallotella aweella murima ayo yaariwo mallapo akhalle.

Luka 6:23

Hakallallani ddeko ddenndda ddaaweereyellakani nave mwiine ni ehakallallo kaambiiwa muneerothuviwa wuullupalli oddullu. Vawi makhollo a athu oonanaraayo yaheera ddimoddamoddave ddennddo wa anamallotella.”

Yeremiya 2:30

Kuullakelleni nivuddo nave khemwaahuddenrevo ello. Wonanko mukango wattalla, mwaawiipha anamallotellaanyu ni nsupada.

Yesaya 39:8

Sika Hezekiya aamulleella Yesaya wi, “Mawu a Apwiya ollotilleewaalla tti aphaama.” Voollotani ddenndda aallota m'murimani mwaye wi, “Vineerokhalla murendelle ni omaalleya mallapo mattheene a okumaaka.”

2 Epilli 36:16

Koma athwaayo yaanaavevullave amithenga a Mulluku ni mawaaye nave yaanaattheya anamallotellaaye ophiyera Apwiya yahaashella murima nave khaarivo oowaakihera.

Luka 13:34

“Yerusalemu, Yerusalemu! Athwaawo ennawiipha anamallotella nave ennaavokha malluku owiipha athu yarumihelliwiiwa ni Mulluku! Tti mallapo makavi kapanlleemi waakhupaarella athwaawo attheene wonanko mwanakhu anaakhupaarelleeye asaanaaye vatthi va muuphellwaaye koma nyuwaano khamwaapanlle.

Yeremiya 26:16

Vano oohoollella ni athu amodda yahaalleella allupa mukutho ni anamallotella wi, “Muthoolla khaphwanenlle wiiphiwa vawi allotille ni hiyaano mu nnddina na Apwiya Mullukwaahu.”

Yeremiya 23:22

Yakhanlleke ni miyaano va mutthukumanwaaka, yaaweerollalleya mawaaka wa athwaaka ni waavenyihamo athwaaka mu ettilla ddiwa ddoonanara wi ehiye machimwiiwa.”

Yakobo 4:11

Asinnaka na arokoraka, muhillotellaneke ddoonanara. Oyo anallota ddoonanara dda ookhulupilila mukhwaaye apaalle omweeruza, anallotella ddoonanara moovaanyana ni malamulo komattho anaweeruza malamulo. Nave waweeruza malamulo, khorittho aweera malamulo koma aweeruza.

Yakobo 5:7

Asinnaka ni arokoraka, villellani wonanko muthu oollima ophiyera owa wa Apwiya. Annatiyera wi ezipaso ddaphaama ddooneye m'matani mwaye. Annatiyera moovillella ophiyera ddirupelliwe ni murimu awaamba ni oomallihella.

Yakobo 5:9

Asinnaka ni arokoraka, muhillotellaneke ddoonanara wi Mulluku ahiweeruzeni. Ooweeruza ohiimella vamullakoni.

Yakobo 5:13

Ethiyo ookhallavo mmodda a nyuwaano ari mu ddoohoosa? Avekelle. Ethiyo ookhallavo mmodda a nyuwaano anahakallalla? Iipe ddoomutitimiha Mulluku.