Mitteko 14:22 - Mawu a Mulluku

²² Yahaallipiha murima ni waalleellesesa wi evirellelle okhulupilila. Yahaahuddiha wi, “Ninaphwanella wi nikumane ni ddoohoosa wi navollowe mu omwene wa Mulluku.”

Mitteko 14:22 ပူးပေါင်းရင်းမြစ်များ

1 Petro 5:10

Nave mwahoosiwalle wa enthawi yooyeva, Mulluku a echisomo ettheene, oyo awiithanilleni wi mukawanena mu ntitimiho naye noohimalla mu eyaattano ni Khrisitu, olliye yeekhaaye aneerewuuhokollosellani masivaanyu, aneerewuullipihani navettho aneerewuukeraatthihani.

2 Timoteo 3:12

Nave attheene ayo enapaalla okhalla mu okumi woomullapella Mulluku mwa eyaattano ni Khrisitu Yesu eneerohoosiwa.

Yohane 16:33

Kohuulleellani ddenndda wi mukhalle ni murendelle ekaamba ya miyaano. Ellapo yavatthi eneerewuuhoosani koma llipani murima vawi miyaano koogonjiha ellapo yavatthi.

Aroma 8:17

Vawi hiyaano tti anaaye, nineerewaakhella madaliso anaasungelleeye athwaaye, ninaakhelle ddenndda nimodda ni Khrisitu vawi noona ddoohoosa ni Khrisitu, nineerewaakhellattho ntitimiho naye.

Yawuupullulla 2:10

Muhoove dda ddeko ddittheddene munaakumaneneenyu. Ngoonani, Satanooyo aneeroweesani vawuuhiyani mundende amodda a nyuwaano nave ohoosiwanngu onaakhalle wa mallapo khumi. Khallani oororomelleya wa miyaano naari mwiiphiwe nave kineerewuuvahani emphaso yookumi.

Akolose 1:23

Koma munaphwanella muvirellelle okhulupilila va matthipello oollipa awoona nave muhitikheyeke va otiyera wanyu mwaakhenlleenyu mwiiwalle othenga waphaama. Miyaano Paulo kaakhalla oorumeyella a othenga waphaama yoolla oyo ollalleyiwe wa arive muthu va ellapo yavatthi.

2 Timoteo 1:8

Ohiwulliweke muru ovelleella omboni dda Apwiihu naari dda miyaano kiriimi mundende ekaamba ya Khrisitu koma okawane ni miyaano ddoohoosa ekaamba ya othenga waphaama mu masiva a Mulluku.

Mitteko 18:23

Akhanlleeye wenko, aatimulla nave aaya o echigawo ya Galatiya ni Frijiya, aallipihaka murima ookhulupilila attheene.

Mateyu 10:38

Oyo ahinatukhulla mutandaaye anakithwara miyaano khanaphwanella okhalla oohudderaaka.

Yawuupullulla 7:14

Kaamwaakhulla wi, “Apwiya, munadduwella tti nyuwaano.” Aakilleella wi, “Yaalla sika athu ayo yavillenlle mu ddoohoosa ddawoopiha. Yaahuwa nave yeelliha ddoowara ddiwa ni nikhame na mwaanaankhosa.

2 Petro 1:11

Mwawi ddiidda muneerewaakhullelliwesesa ovollowa mu omwene woohimalla wa Apwiihu ni Oovullusaahu Yesu Khrisitu.

Mitteko 9:16

Vawi kineeromooniha mmo anaahoowelleeye wunchichi ekaamba ya nnddina naka.”

1 Akorinto 1:8

Eneerewuullipihani murima ophiyera va mamallihello wi muhikhalle ni yoochimwa va Nllapo na Apwiihu Yesu Khrisitu.

Mitteko 15:41

Vano Paulo ni Sila yavirenlle o Siriya ni Silisiya, waallipiha murima athu a m'mipingoni.

Mitteko 15:32

Yudasi ni Sila ayottho yaari anamallotella yahaarera enthawi yoorekama ekambiranaka mawu oollipiha murima ni oovaha masiva.

Luka 24:26

Khaphwanenlle Mesiya* wi allakiwe ahinavollowe mu ntitimiho naye?”

Mateyu 16:24

Vano Yesu aallota wa oohudderaaye wi, “Muthu aapaallaka okithwara iikhoote yeekhaaye, atukhulle mutandaaye akithware miyaano.

Mitteko 11:23

Aphiyalleeyewo ahoona echisomo ya Mulluku vaathwaayo. Aahakallalla nave aallipiha mwiilli attheenaayo wi evirellelle ookhulupilila mwa Apwiya ni murimiiwa muttheene.

Yohane 15:20

Upuwellani kuulleelleemini wi, ‘Kaporo khanaakhwaranya apwinnya.’ Amodda yaakihoosa miyaano, sika amodda eneerewuuhoosanittho nyuwaano. Amodda yaathwara ehuddihwaaka, sika amodda eneerothwarattho yaanyu.

Yesaya 35:3

Mullipihe matta oofooka, mwaavahe masiva makuttha oovelleveddeya.

Yawuupullulla 1:9

Miyaano Yohane, mwanamunninyu nave mukhwiinyu mu ddoohoosa, mu ovillella ni mu oovollowa mu omwenaaye ekaamba yoomuthwara Yesu. Kaahiyiwa va echilumba ya Patimo kaambiiwa kaallalleya mawu a Mulluku ni ovelleella omboni dda Yesu.

Yuda 1:3

Akhwaaka ookondiwa, kaapaallesesa wuulembellani dda ovullusiwa nko attheene nirinaahu mwa Yesu Khrisitu. Koma kahoona wi tti waphaama wuulembellani vano wi kuuvekeni wi mullipanena oteteza echikhulupililo eyo Mulluku aavahilleeye athwaaye aweella omoddave wenko.

1 Atesalonika 3:13

Mwa yeella aneerewuullipihani mirima ddanyu nave muneerokhalla aphaama ni aweella vamiitthoni va Mullukwaahu ni Attiitthiihu yaawaaka Apwiihu Yesu vamodda ni athwaaye attheene.

Mitteko 13:43

Athu yapallalleyiiwa va mutthukumanooyo, Ayuda anchichi ni athu ayo yahaari Ayuda koma yathwara echikhulupililo ya Ayuda yahaathwara Paulo ni Baranaba. Amurummwa eellaalla yahaalleella athwaayo ni waallipiha murima wi evirellelle okhulupilila echisomo ya Mulluku.

Mitteko 6:7

Mawu a Mulluku yaavirellella ovuwa. Nave ookhulupilila a mu Yerusalemu yahaata nave allupa mukutho anchichi yahaakhullella echikhulupililweeyo.

Mariko 10:30

eneerewaakhella 100 m'mallaponi yaalla nnddo yahiyalliiwa monga enyumba, asinniwa, arokoriwa, ameewa, aniiwa ni emata ni ddoohoosa nave mallapo amuhoollo eneerewaakhella okumi woohimalla.

Mariko 9:47

Nave niittho nawo nuuchimwiha, onikhorokottemo! Tti waphaama wa weyaano wi wavollowe mu omwene wa Mulluku ni niittho nimodda ohiyana ni okhalla ni miittho meelli ovokhiwe mu gehena.

Yohane 3:5

Yesu ahaakhulla wi, “Ddawoona, kinimuulleellani wi, khaavo muthu anaawore ovollowa mu omwene wa Mulluku aahiyariwa mwa maaddi ni Munepa Waweella.

Mateyu 19:24

Kinimuulleellanittho wi tti yavakhuviru wi ekamira* evire vamullakoni va singano ohiyana ni wi muthu eeyuuma avollowe mu omwene wa Mulluku.”

Yohane 15:18

“Athu a ellapo yavatthi yawiitani nyuwaano, upuwellani wi yaakiita miyaano ehinawiiteni nyuwaano.

Mitteko 11:26

Amuphwanyilleeye, aamukusella o Antiyokeya nave wa muyakha muttheene yaakumana ni mpingo ni ohuddiha mulloko wa athu muullupalli. Waari o Antiyokeya nko ookhulupilila yaambilliiwa oromolliwa wi akhrisitu.

Mitteko 11:29

Sika oohuddera yahiiwanana wi tti waphaama wi erumiheke ddeko ddawaakavihera ookhulupilila akhwiiwa o Yudeya moollikana ni eyuumiiwa.

Mitteko 14:20

Koma ookhulupililaayo yatthukumanniiwa moomwaapheella, aavenya nave aahokollweella mu etawoni moomulle. Osaka wene olliye ni Baranaba yaaya o Derbe.

Mitteko 14:28

Nave yaakhalla wenko enthawi yoorekama ni ookhulupililaayo.

Afilipi 1:29

Vawi moovahiwa ekari ohiri vookhulupililanive mwa olliye komattho ohoowa ekaamba ya olliye.

1 Petro 2:21

Mulluku aawiithanellani ohoosiwa vawi Khrisitu mwaneena aahoosiwa ekaamba ya nyuwaano nave ahuuhiyerani echisanzo wi muthware manyallwaaye.

1 Petro 5:9

Muhitikheye mu echikhulupilwaanyu nave mumurapelleke kaambiiwa munnadduwella wi ookhulupilila akhwiinyu mu ellapo yavatthi ettheene ennoona ddoohoosa ddoophwanaphwana ni ddenndda.