Mika 4:10 - Mawu a Mulluku

¹⁰ Nyu athu a o Ziyoni, wuupuruwa ni wiipullella wonanko mutthiyana va enthawaaye yooyara. Vawi vano muneerovenyamo m'muzindanimmo wi mwakhalle m'mawaani. Muneeroya o Babiloni wuukaporoni komave muneerovullusiwawo vawi Apwiya eneerowoopollani wa adanaanyu.

Mika 4:10 ပူးပေါင်းရင်းမြစ်များ

Yesaya 48:20

Khumani mu ellapo ya Babiloni, thawani mu ellapo ya Akaldeya. Mullalleye ni okhuwa wunchichi ophiya o makomello a ellapo yavatthi, voollotani wi, “Apwiya ennamoopolla Yakobo, oorumeyelliiwa.”

Hoseya 13:13

Ddoovoreya wonanko dda mutthiyana aamuyaraka mwaana ddineerewaamorella. Koma tti wonanko mwaana oohikhalla ni ezeru, ookhoota okhumella otte va enthawaaye yooyariwa.

Hoseya 2:14

“Vano ngiiwani, kineeromukopa mutthiyanooyo wi kiyeena o echipululu, kamuhakallallihe ni mawu eechikondi.

Yesaya 45:13

Mi sika kamuvenyihalle Kirusi wi echilungamo yooneye, kineerewookolla orive musewu onaavireewemo. Aneeromakattho muzindaaka wa Yerusalemu ni waattaphulla athwaaka ayo eri muukaporoni, oohivelleella makobiri apaalle ddamukaphwani. Mi Apwiya Mulluku koollota.”

Yesaya 43:14

Apwiya, Oowoopollanaanyu, Aweella a Israele enallota wi, “Kineeroruma mulloko wa akhoto wallipane ni Babiloni wi kuuvulluseni. Kineerokumulla millako dda muzindooyo, ohakallalla wa athu oneerotthattuwa winlla.

2 Mamwene 20:18

Ddimodda mwa edduullu ddanyu ddineneerophariwa nave ddineerotthattusiwa allupa mutteko oohulliwa* wi yarumeyelleke o enyumba yoomwene o Babiloni.’ ”

Yawuupullulla 12:14

Nave mutthiyanooyo aavahiwa muuphello meelli muullupalli a mpungu wi avavellena oya onipuroni naye na ochipululuni. Wenko aneerokhallawo aweheriwaka wa miyakha miraru owaaka hafu, oohiphariwa ni enowa yuullupalli.

Hoseya 1:10

Aisraele eneerewaata wonanko mihava dda mu enyanja nnddo ohinaaworeewe owulinga ni oweerenga. Vano vanipuroni mvo yalleelliwiiwa wi, “Nyu khe athwaaka,” vaavottho aneerewaaromolla wi, “Anamwani a Mulluku Ookumi”

Yeremiya 15:21

Kineerowakihera wa athu oonanara nave kineerowoopolla wa athu eekuku. Mi Apwiya koollota.”

Masalimo 106:10

Sika ahaavullusa wa awiitananiiwa, aawoopolla o masiva a adaniiwa.

2 Epilli 36:20

Nave athu attheene yavulluwalle o nsupada ahaapharella wuukaporoni o Babiloni. Wenko yaatthattuwa oorumeyellaaye ni aanaaye ophiyera omwene wa Persiya okeraatthihiwe

2 Epilli 33:11

Sika ekaambiiwa Apwiya yaarumalliiwa oohoollella akhoto a mwene a o Asiriya ayo yamphanre Manase emukola mphunani, emmaka ni onyolo, emuyaana o Babiloni.

2 Mamwene 25:4

mpanda wa muzindooyo waaphovolliwa. Naari Ababiloni yawaapheelle muzindooyo komave akhoto attheene yaathawamo mahiiyu vookhumellani va mullako wa variyari va esiri piilli, vakhuviru ni emata ya mwene. Nave yaathawella o Araba.

Yeremiya 29:20

Attheenenyu ayo kawiikarelleemini wuukaporoni ovenyera o Yerusalemu oya o Babiloni mwiiwellelle mawu mi Apwiya.’

Yeremiya 48:41

Mizinda ddineerophariwa nave mipanda ddineerewaakhiwa. Nllapo nenno mirima ddoollipa o Mowabu ddineerotthukumella wonanko mutthiyana vooyarani.

Yeremiya 52:27

Nave mwene a o Babiloni aalamula wi ewuukuthe ni owiiphella o Ribula mu echigawo ya Hamati. Sika athu a o Yuda yaaphariwa okaporo waavenyiha mwiillaponi mwiwa.

Mika 5:3

Ekaamba ya yeella Mulluku aneerewaahiya Aisraele ophiyera mutthiyana amuyanre mwaana. Vaavo oohalla a mutundwaaye eneerohokollweella wa Aisraele akhwiiwa.

2 Epilli 36:23

“Nndda sika mwene Kirusi a o Persiya analloteeye wi, ‘Apwiya Mulluku a oddullu aakivaha moomwene mattheene a va ellapo yavatthi nave aakilamula wi kaamakellettho enyumba o Yerusalemu a o Yuda. Sika nyu attheene muri ayiwayiwa, Mullukwaanyu akhalle ni nyuwaano.’ ”

Yeremiya 4:31

Kahiiwa winlla wonanko wa mutthiyana vooyarani, wiipullella wonanko wa mutthiyana va oyepella waye wawaamba. Wenko waari winlla wa athu a mu Ziyoni, weeseesa okoka mpweya, etukhullelle muddullu mattiiwa ellotaka wi, “Otulli hiyaano, ninimangomowa, okumaahu woovelleelliwa wa ooniipha!”

Yeremiya 13:4

“Kusa ekuwo wakunlleeweelle nave oyimakelle muyuununi. Khawe mwawaakuva o muhinje wa Yufurate wayivitthe m'mittharini mwa malluku.”

Mika 5:2

Apwiya enallota wi, “We Betelehemu Efurata, ori mung'onong'ono variyari va matawoni a Yuda koma mwa weyaano muneerovenyera oolamulella Israele. Olliyoolla maambeellwaaye tti akhallekhalle, a mallapo oohaamba.”