Mika 2:7 - Mawu a Mulluku

⁷ Ethiyo nyu a nibanja na Yakobo, ddenndda tti ddoophwanella oddillota? Ethiyo oreera murima wa Apwiya woomalla? Ethiyo nndda sika eerilleeye? Ethiyo mawaaka khenawiiha ddaphaama wa aweeta moolungama?’ ”

Mika 2:7 ပူးပေါင်းရင်းမြစ်များ

Masalimo 84:11

Vawi Apwiya Mulluku sika nndduwa ni yawiitetezella, ennaneerella echifundo ni onivaha olemu, Apwiya khenawiimana ddaphaama athu oolungama.

Yeremiya 15:16

Kiiwalleemi mawaanyu kaawaakhella wonanko yoocha nave yaakivaha othapella ni ehakallallo. Nyu Apwiya Amasiva Mattheene, valle miyaano kinadduwelliwa ni nnddina nanyu.

Masalimo 15:2

Tti oyo aneeta moohilakwa, oyo aneera ddoolungama erive enthawi, oyo anallota ovenyera vatthi va murima.

Zekariya 4:6

Vano olliye aakilleella wi kimulleelle Zerubabele mawu a Apwiya awi, “Ddawoona, oneeropambana koma ohiri ni ekhoto apaalle ni masivaawo koma ni munepaaka. Mi Apwiya Amasiva Mattheene koollota.

Hoseya 14:9

“Oyo aniiwesese addisunge. Vawi ettilla dda Apwiya tti ddoolungama nave oolungama enneetamo koma oochimwa ennakwakwatuwamo.”

Yesaya 50:2

Ethiyo kaambiiwa tini kawiilleemi koma oohimphwanya muthu apaalle kiithanilleemi koma oohaakhulliwa? Ethiyo muwonwaaka tti wookhuveya wi khowora woopolla apaalle nginna masiva oovullusella? Ngoona ni ohumullulla wakeve kinnummiha enyanja, mihinje ddinnatthattuwa echipululu. Ekaamba yoorama maaddi, ehomba ddinnunkha ni okhwa ni nthona.

Miyambo 28:18

Oyo aneeta moororomelleya eneerovulluwa koma oyo anakhoromaniha meetellwaaye aneerewiikuha.

Miyambo 10:29

Apwiya tti mpanda woomuteteza muthu ooreera murima koma tti woonongeya wa muthu oochimwa.

Miyambo 10:9

Aweeta mwawookowa khanoova koma ookhoromaniha ettilla ddaye aneerophariwa.

2 Timoteo 3:5

Eneereke wooneya wonanko oollapella koma masiviiwa yahaakhoota. Athu yaayo ohaathwareke.

2 Akorinto 6:12

Khe hiyaano nihinuuhiyani vamurimani vahu koma nyuwaano sika muhinanihiya vamurimani vanyu.

Aroma 7:13

Ethiyo ello yaphaameella sika yeerihalle okhwa waka? Khe ddiiddo! Yoochimwa sika yeerihalle. Voopharihani mutteko yaphaama yeella, machimo yaakiipha miyaano wi yawoona ya yoochimweeyo yuupullulliwe. Sika vano, ekaamba ya malamulo machimo yohooneya wi tti oonanara wunchichi.

Yohane 8:39

Yaamwaakhulla wi, “Attiitthiihu tti Abrahamu.” Yesu ahaakhulla wi, “Mwaariki anamwani a Abrahamu mwaawerekeweera wonanko mmo Abrahamu eerelleeye.

Mateyu 3:8

Mweereke ddeko ddawooniha wi moorukunuwa murima wonanko muteekho onimma ezipaso ddaphaama.

Mika 3:9

Ngiiwani, nyu oohoollella a nibanja na Yakobo, oolamulella a nibanja na Israele! Munniitana ni echilungamo, munnakhoromaniha ddeko ddawookowa.

Yeremiya 2:4

Nyu edduullu dda Yakobo, nyu mabanja mattheene a Israele, iwani mawu a Apwiya.

Yesaya 58:1

Apwiya enallota wi, “Khuwa wunchichi, ohihiyerere! Llipiha okhuwa wonanko nipallapata! Alleelle athwaaka dda olakwa wiwa ni a nibanja na Yakobo dda machimwiiwa.

Miyambo 14:2

Oyo aneeta mwawookowa annawoova Apwiya koma aneeta mookhoromana annaavevulla.

Miyambo 2:7

Apwiya ennavelleella ezeru yaphaama wa athu oolungama nave ennaateteza ayo eri oororomelleya.

Masalimo 119:65

Nyu Apwiya, mookeerella echifundo mi oorumeyellaanyu moollikana ni mawaanyu.

Numeri 11:23

Apwiya yaamukoha Mose wi, “Ethiyo muwono wa Apwiya tti wookhuveya? Vano oneerewoona naanweene vaava ddeko nnddo killotilleemi ddeereyaka apaalle iyaayi.”

Masalimo 119:68

Nyuwaano tti ooreera murima, ddaweera ddanyu tti ddaphaama, kihuddiheni malamulwaanyu.

Masalimo 18:26

Wa athu ooreera murima, munnaddooniha oreera murima. Koma wa athu oonanara munnaddooniha onanara.