Malaki 1:11 - Mawu a Mulluku

¹¹ Ovenyera wookhuma nndduwa ophiyera woovollowa nndduwa nnddina naka ninaakhalle nuullupalli variyari va mitundu ddittheddene. Va nirive nipuro ennakoosella lubani* nave ennavelleella mikutho ddoopatuleya vawi nnddina naka tti nuullupalli variyari va mitundu dda athu ddittheddene. Mi Apwiya Amasiva Mattheene koollota.

Malaki 1:11 ပူးပေါင်းရင်းမြစ်များ

Yesaya 54:5

Oophatusaawo ari wonanko mamuno, Apwiya Amasiva Mattheene sika nnddina naye. Aweelloolle a Israele sika Oowoopollaawo, nnddina naye tti Mulluku a ellapo yavatthi ettheene.

Yesaya 45:6

Kineereweera ddenndda wi ovenyera wookhuma nndduwa ophiyera woovollowa nndduwa arive muthu adduwelle wi khaavo mmodda koma miyaanove. Mi sika Apwiya, khaavottho mmodda.

Yawuupullulla 5:8

Eerilleeye ddiiddo, ddoophatusiwa ddookumi ddisesenndde ni attekweene 24 yaakokhora vamiitthoni va mwaanaankhosooyo. Attheene yaakhalla ni magitala owaakattho embale dda golide ddooddalla ni mukutho wa lubani.* Ddawunkhellihanndda sika mavekello a athu a Mulluku.

Mateyu 28:19

Sika khaweni wa athu a mitundu ddittheddene mwaarukunuse ekhalle oohudderaaka vawaabatizani mu nnddina na Attiitthaaka ni na Mwaana ni na Munepa Waweella.

Zekariya 8:7

Mi Apwiya Amasiva Mattheene kineerewaavullusa athwaaka ayo eri wookhuma nndduwa ni woovollowa nndduwa.

Masalimo 50:1

Apwiya Mulluku Amasiva Mattheene animallota, anawiithana athu attheene a va ellapo yavatthi, ovenyera wookhuma nndduwa ophiyera woovollowa nndduwa.

Yawuupullulla 11:15

Nave mungelo aneetthanu ni piilli ahoopa nipallapata naye. Nave kahiiwa mawu oowella ovenyera oddullu oollota wi, “Omwene wa ellapo yavattheella tti wa Apwiihu ni wa Mesiyaaye.* Nave Apwiihu eneerolamulella wa enthawi ddoohimalla!”

Masalimo 141:2

Nivekello naka niwelle wa nyuwaano wonanko lubani,* otukhullella muddullu wa mattaaka okhalle wonanko mukutho wamisikuwa.

Masalimo 67:2

Ettillaanyu edduwanyeye va ellapo yavatthi, ovullusa wanyu variyari va mitundu athu ddittheddene.

Yawuupullulla 15:4

Athu attheene eneerowoovani nyu Apwiya, khaavo anaakhoote otitimiha nnddina nanyu, vawi nyuwaano tti aweella. Athu a mitundu ddittheddene eneeroowa ni wuullapellani nyuwaano, kaambiiwa mitteko ddanyu ddoolungama ddohooniwa wa athu attheene.”

1 Timoteo 2:8

Kinapaalla wi allopwana evekelleke m'mapuroni muttheene ni owelliha muddullu matta aweella moohivaanyihana apaalle moohikangana.

Afilipi 4:18

Kookhalla ni erive ello navettho ddawaata. Kookhalla ni ddittheddene kinapaalleemi vawi Epafrodito aawaana wa miyaano emphaso ddanyu ddittheddene. Ddiri wonanko yoovelleelliwa ya nthuko naphaama, yawaakhullelliwa ni yoomuddivella Mulluku.

Aroma 15:16

wi kikhalle oorumeyella a Khrisitu Yesu wa athu ayo ehiri Ayuda. Kinarumeyella wonanko mullupa mukutho kaallalleyaka othenga waphaama wa Mulluku wi athu ayo ehiri Ayuda ekhalle wonanko mukutho wawaakhelliwa ni Mulluku yaweellihiwa ni Munepa Waweella.

Aroma 12:1

Sika asinnaka ni arokoraka, kinimuuvekani ekaamba ya echifundo ya Mulluku wi mwiiheraatthi nyookhaanyu wi mukhalle mukutho wookumi, waweella ni wawaakhelliwa wa Mulluku. Ella sika ettilla yaphaama yoomullapellella.

Luka 1:10

Mulloko muullupalli wa athooyo waari ovekellaka vaatte va enthawi yawoosa mukuthooyo.

Malaki 1:14

Vano atembeleliwe muthu oolleka oyo anavelleella wa miyaano mukutho wa echiweto yoohikhalla ni mutteko komave arina mwa eziweto ddaye yaphaama eyo alonjezilleeye okivaha! Vawi miyaano tti mwene muullupalli nave athu a mitundu ddittheddene ennakoova.” Mi Apwiya Amasiva Mattheene koollota.

Zefaniya 3:9

“Enthawi yeeyo kineereweelliha eyano dda mitundu ddittheddene dda athu, wi attheene yiithaneke nnddina na Apwiya, yaarumeyelleke nimodda.

Zefaniya 2:11

Vano Apwiya eneerowoopopiha, eneerewoononga milluku ddittheddene dda va ellapo yavatthi. Sika athu attheene eneerewaallapella Apwiya, arive muthu vanipuroni vaye, orive mutundu wa athu o ellapwiiwa.

Mika 5:4

Olliye aneerollipihella nave ochiha enkhosa ddaye mwamasiva a Apwiya ni ntitimiho na nnddina na Apwiya Mullukwaaye. Nave eneerokhalla m'murendelleni vawi ottekweenaaye oneerokeraattheya va ellapo yavatthi ettheene.

Amosi 9:12

Enthawi yeeyo Aisraele oohalla eneerogonjiha ddoohalla dda o Edomu vamodda ni mitundu ddittheddene nnddo ddinadduwanyeya ni nnddina naka. Mi Apwiya koollota nave kineereweera killotilleeminndda.”

Yesaya 59:19

Sika athu eneerewoova nnddina ni ntitimiho na Apwiya ovenyera wookhuma nndduwa ophiyera woovollowa nndduwa. Apwiya wonanko muhinje woothamaka wookakhiwa ni ephevo.

Masalimo 113:3

Nititimiheye nnddina na Apwiya waambeella wookhuma nndduwa ophiyera woovollowa nndduwa.

Mateyu 8:11

Kinimuulleellani wi anchichi eneerovenyera wookhuma nndduwa ni woovollowa nndduwa nave eneerocha ni makhollwaahu, Abrahamu, Isaki ni Yakobo, va machellello mu omwene wa Mulluku.

2 Atesalonika 1:12

wi nnddina na Apwiihu Yesu nititimihiwe mwa nyuwaano ni nyuwaano mwa alliwaayo moollikana ni echisomo ya Mullukwaahu ni ya Apwiya Yesu Khrisitu.

Numeri 7:74

Aavelleellattho muchecho mmodda wa golide woollemella magaramu 110, wooddalla ni lubani.

Masalimo 45:17

Kineerovuwiha nnddina nanyu o mibado ddittheddene sika athu eneerewuuriihani wa enthawi yoohimalla.

Masalimo 48:10

Nyu Mulluku monga nnddina nanyu emoddamoddave yeeyottho ntitimiho nanyu ophiyera wookomella ellapo ettheene yavatthi. Nnattanatta nanyu nooddalla ni echilungamo.

Masalimo 111:9

Yahaavullusa athwiiwa, yaakeraatthiha echipanganwiiwa wi ekhalle ya enthawi yoohimalla. Nnddina niwa tti naweella ni nawoopiha.

Yesaya 12:4

Nllapo nenno muneerollota wi, “Athokozeni Apwiya, titimihani nnddina niwa. Mullalleye mitteko ddaye variyari va mitundu dda athu, muvuwihe wi nnddina niwa tti noopambana.

Yesaya 12:5

Wiipelleni Apwiya machipo antitimiho vawi aheera dduullupalli, adduwelliheni va ellapo yavatthi ettheene.

Yesaya 66:18

Kinnadduwella mitteko ddiwa ni maganizwiiwa. Nave kinimawa wi kaatthukumanihe athu a mitundu ddittheddene ni a ellotello ddittheddene. Ddawoona, eneeroowa nave eneerewoona ntitimiho naka.

Yeremiya 10:6

Khaavo oollikana ni nyu Apwiya, nyuwaano tti amasiva, nnddina nanyu nookhalla ni masiva muullupalli.

Yeremiya 10:7

Ttaani oyo ahinaawooveni, nyu mwene a mitundu dda athu? Vawi munnaphwanella wooviwa. Variyari va eezeru attheene ni va mamwene mattheene a va ellapo yavatthi, khaavo mmoddattho oollikana ni nyuwaano.

Daniele 2:45

Nngu sika ottaphullella wa nlluku nne moonilleenyu nakurumuwalle ovenyera omwaangoni, nihittannyiwe ni muthu nave ninyenya mukoko, mukuwa, olloko, siliva ni golide. Nyu amwene, Mulluku amasiva ohuudduwellihani ddamuhoollo. Ollohanngu tti woosimikizeya nave ottaphullellanngu tti wawoona.”

1 Epilli 16:25

Apwiya tti uullupalli, tti oophwanella otitimihiwa wunchichi, owoova okhwaranya milluku ddittheddene

Masalimo 48:11

Athu a o mwaango wa Ziyoni ehakallalle, a o Yuda ehakallalle ni echiweruzwaanyu yoolungama.

Masalimo 65:9

Vano munnayidalisa ellapo yavatthi ni oyihellella, munnayivaha eyuuma yinchichi. Muhinje wa Mulluku tti wooddalla ni maaddi, nyuwaano munnayivaha ddoohata, vawi tti mmo munapotokoselleenyu ddeko.

Masalimo 86:9

Nyu Apwiya, mitundu ddittheddene dda athu mwaddiphatusalleenyu ddineeroowa wa nyuwaano, ddineerewuukokhorellani, ddineerotitimiha ottekweenaanyu,

Masalimo 96:8

Tthamallani ntitimiho na nnddina na Apwiya, wannani ddoovelleella m'mathatoni a enyumbiiwa.

Masalimo 138:5

Eneerewiipa machipo ootitimiha ettilla dda Apwiya vawi ntitimiho na Apwiya tti nuullupalli.

Yesaya 19:21

Vano nllapo nenno Aiguputo eneerewaadduwella Apwiya. Ddawoona, eneerollapella vooheraatthini mukutho ni voovelleellani ddoovelleella navettho eneerekeweera nnddo yallupenlliiwa wa Apwiya.

Yesaya 30:27

Ngoonani, nnddina na Apwiya ninnooneya ovenyera woorekama. Enooniha osha murima muwari mwa munllo ni mwiisi woottikana. Enallota moowalli nave mawiiwa enaviha wonanko munllo wawoononga.

Yeremiya 4:2

Mullupelleke wi, ‘Mu nnddina na Apwiya Ookumi.’ Mweereke ddenndda mwawoona, mweechilungamo ni moororomelleya. Vano athu a mitundu ddittheddene eneerokiveka wi kaadalise nave eneerokitthamalla.”

Malaki 3:3

Nave eneeroowa wi yeeruze wonanko aweeka ni oomweelliha siliva. Aneereweelliha edduullu dda Levi ni oweeka wonanko golide ni siliva sika wi evelleelleke mikutho ddoophwanellella wa Apwiya.