Luka 8:13 - Mawu a Mulluku

¹³ Mmiddo oyo wamorenlle va ethaya ya vamallukuni tti athu ayo enaakhella moohakallalla mawu a Mulluku koma khenna misisi dduullupalli. Vawi enakhulupilila enthawi yooyeva koma va enthawi ya weesiwa, ennahiya enthawi yeeyo.

Luka 8:13 ပူးပေါင်းရင်းမြစ်များ

Yohane 5:35

Yohane aari wonanko enyali ni yoowala nave nyuwaano mwaatthoolla ohakallallana owalanko enthawi yoyeva.

Hoseya 6:4

Koma Apwiya enallota wi, ‘Nyu Aefuremu, kiweereni tini? Nave nyu Ayuda, kiweereni tini? Echikondaanyu ennathiima wonanko ethapo yoohinase, tti wonanko nikame noohillekella wumma.

Ezekiele 33:32

Wa alliwa we khe ello, ori muthu shisha awiipa machipo a echikondi ni mawu aphaama voomwiipani gitala. Wiiwa mawaawo mattheene enniiwa koma khenaaphariha mutteko.

Miyambo 12:12

Athu oonanara yoopaalliiwa tti ophwanya yoonanara wi yeereke koma athu oolungama khenasuseya.

Yuda 1:12

Yaalla sika enaripiha machellellwaanyu oohakallallella eyaattano mumpingoni vawi ennikonda weekhiiwa moohiwulliwa muru. Tti wonanko mirapo ddookakhiwa ni ephevo nave ddoohimurupiha murimu. Tti wonanko miteekho ddoohimma ezipaso naari ophiyalle omamallihello wa enthawi yoohata ezipaso. Tti wonanko miteekho ddootulliwa nave ddaakhwa.

2 Petro 2:22

Eyo yeereye wa alliwa enooniha ddawoona dda miyambi ddawi, “Mwanapwa annahokollweella acha nnddo arapheyilleeye” navettho wawi, “Ekumba yoohapihiwa ennahokollweella wuupuruwa vamatokwini.”

2 Petro 2:20

Athu ayo yathawille khalle ddeko ddoonanara dda va ellapo yavattheella oweella mu waadduwella wiwa Apwiya ni Oovullusaahu Yesu Khrisitu, vano yaphariwattho nave enalamulelliwa ni ddeko ddoonanaranndda, ennakhalla oonanaresesa ohiyana ni vawaamba.

Aheberi 10:39

Koma hiyaano khanihiyoni athu ayo enahokollweella mutulli ni woonongeya koma niri athu ookhulupilila wi nivulluwe.

Aefeso 3:17

Nave kinaveka wi Khrisitu akhalle m'murimani mwanyu oyeella mu echikhulupililo. Kinavekella wi mutthipelle misisi ni ollipa mu echikondi,

Yesaya 58:2

Ennakaashaasha nllapo ni nllapo voopaallani wi edduwelle ettilla ddaka. Wonanko mutundu waweera ddoolungama oohihiya malangizo a Mullukwiiwa, alliwa ennakiveka malangizo oolungama nave ennahakallalla okaatamella miyaano Mullukwiiwa.”

Yakobo 2:26

Sika vano, mwiilli woohikhalla ni munepa tti wookhwa, mwawi ddiiddattho echikhulupililo yoohikhalla ni mitteko tti yookhwa.

1 Timoteo 1:19

ni opharesesa echikhulupililo ni yawuupusella murima yooreera. Athu amodda yaatathilla yawuupusella murimiiwa, sika echikhulupililwiiwa yahoonongeya.

1 Atesalonika 3:5

Ella sika ekaambiiwa kimurumihalleemi Timoteo. Miyaano ngaawore ovillella, sika kaamuruma olliyooyo wi oone echikhulupilwaanyu. Vawi koova wi apaalle Satana aaweesani nave wi muttekwaahu muttheene waari woohikhalla ni mutteko.

Akolose 2:7

Tthipellani misisi ddanyu moowallamella mwa olliye, okumaanyu omakeye va olliyooyo nave mukhalle oollipa mu echikhulupilwaanyu wonanko mmo mwahuddihiweenyu. Nave muthokozeke wunchichi.

Agalatiya 3:4

Ethiyo ddeko ddittheddene ddeereyille wa nyuwaano khaddinna mutteko? Khe ddiiddo!

Agalatiya 3:1

Agalatiya ookarangeya nyu, nyuwaanothi moollowiwa! Mwaalleelliwa phaamaddene dda otthomeyiwa vamutandani wa Yesu Khrisitu!

1 Akorinto 15:2

Muneerovullusiwa ni othenga waphaama oyo kallalleyeemi mwawuphara moollipiha. Ddaahikhalla ddiiddo sika echikhulupilwaanyu tti yoohikhalla ni mutteko.

Yohane 15:6

Muthu aahikhalla mwa miyaano annavokhiwa vaatte wonanko enthambi yawumma. Nave enthambi ddennddo ddinnatthukumanihiwa ddivokhelliwa vamunlloni ddisha.

Yohane 15:2

Alliwa ennuuha erive enthambi ya miyaano ehinimma ezipaso nave ennaphaddera erive enthambi eyo eniimma ezipaso wi yimme ezipaso ddawaata.

Miyambo 12:3

Ochimwa khonamuteteza muthu koma oolungama khanasuseya.

Yobu 19:28

Koma nyuwaano munallota wi, ‘Ethiyo ninaamuhoose mwawiidde vawi anahoowa ekaamba ya ddavamuru vaye?’

Akolose 1:23

Koma munaphwanella muvirellelle okhulupilila va matthipello oollipa awoona nave muhitikheyeke va otiyera wanyu mwaakhenlleenyu mwiiwalle othenga waphaama. Miyaano Paulo kaakhalla oorumeyella a othenga waphaama yoolla oyo ollalleyiwe wa arive muthu va ellapo yavatthi.

1 Akorinto 13:2

Naari kirina emphaso ya onamallotella naari kidduwellaka ddittheddene ni wiiwesesa ddoovittheya ddittheddene; naari kirina echikhulupililo yuullupalli yoowora osusa miyaango koma kaahikhalla ni echikondi, nginna mutteko.

Mariko 6:20

Vawi Herode nayeene aanamoova Yohane nave aamusunga wi ahiiphiwe kaambiiwa aanadduwella wi Yohane tti muthu oolungama ni aweella murima. Herode aamwiiwellellaka Yohane allotaka, aanahalleelliwa wuullupalli komattho enthawi yeeyo aanahakallalla.

1 Yohane 2:19

Athu yaalla yavenyenre mwa hiyaano koma yaathawamo nave ella sika ekaambiiwa yavenyilliiwa variyari vahu; yaakhanlleke a eyaattanwaahu, yeerokhalla ni hiyaano. Nave yaavenyavo wi vidduwanyeye wi attheenaayo kheyaari a hiyaano.

Luka 8:12

Mmiddo wamorenlle muttillooyo onaphwanaphwana ni athu ayo yiiwalle mawu a Mulluku. Koma Satana annawa awaakha m'murimani mwiwa mawu a Mullukwaayo wi ehikhulupilile navettho ehivullusiwe.

Luka 8:14

Mmiddo wamorenlle variyari va miiwa onaphwanaphwana ni athu ayo yiiwalle mawu a Mulluku. Koma vatulli viwa ennakhuneelliwa ni ddookhupanyiha ni ddoohakallalliha okumi ni okonda eyuuma. Nave ezipaso ddiwa khaddinawaraalla.