Luka 12:32 - Mawu a Mulluku

³² “Muhoove, nyuwaano ayo muri wonanko mulloko wa enkhosa ddooweerengeya vawi Attiitthaanyu yaakonda wi yuuvaheni omweniiwa.

Luka 12:32 ပူးပေါင်းရင်းမြစ်များ

Aheberi 12:28

Vawi nohaakhella omwene woohitikheya nimuthokozeke Mulluku nave nimullapelleke moophwanellella, moolemu ni mwawoova.

Yawuupullulla 1:6

Nave aaneeriha wi nikhalle omwene wa allupa mukutho oomurumeyella Mulluku Attiitthinnya. Wa Yesu Khrisitu okhalle ntitimiho ni masiva wa enthawi yoohimalla! Amen.

Afilipi 2:13

kaambiiwa Mulluku anaphara mutteko mwa nyuwaano wi mupaalle nave muwore omwiiwellella.

Luka 10:21

Yesu addalliwe ni Ehakallallo ya Munepa Waweella, enthawi yeeyo Yesu aallota wi, “Attiitthaaka, Apwiya ooddullu ni ellapo yavatthi, kinimuutitimihani kaambiiwa mwaavittha ddeko ddenndda wa athu oohuddera ni eezeru muupullulla wa athu oohihuddera. Ee, Attiitthaaka, nndda ddeereye kaambiiwa ddahuuhakallallihani.

Mateyu 25:34

Vano miyaano, mwene, kineerollota wa ayo a o nnattanatta wi, ‘Waani wuno nyu athu oodalisiwa ni Attiitthaaka! Waani mwaakhelle omwene oyo mwaakhozelliweenyu waambeella voophatuwani va ellapo yavatthi.

Yesaya 40:11

Eneeropwatha enkhosa ddiwa wonanko mbusa, eneerewaatthukumaniha anamwanankhosa ni waakhupaarella, eneeroddihoollella phaama enkhosa ddawaamwiha.

2 Atesalonika 1:11

Ella sika ekaambiiwa ninuuvekellelleehuni enthawi ddittheddene wi Mullukwaahu aweereni nyuwaano oophwanellella okumi oyo aawiithanelleeyeni. Ninavekattho wi ni masivaaye akwakhwanihe minkhella ddanyu ddaweera ddaphaama ni ddaweera mutteko wa echikhulupililo,

2 Petro 1:11

Mwawi ddiidda muneerewaakhullelliwesesa ovollowa mu omwene woohimalla wa Apwiihu ni Oovullusaahu Yesu Khrisitu.

Mateyu 14:27

Enthawi yeeyo Yesu aallota wa alliwaayo wi, “Llipani murima! Tti miyaano, muhoove.”

Yeremiya 3:19

Apwiya enallota wi, “We Israele, ddeerokiddivella wuuhiya variyari va anaaka, wi kuuvahe ellapo yaphaama, yoohallana yooreeresesa okhwaranya ellapo ya mitundu ddimodda dda athu. Kapaalla wi mukeereke attiitthi, wi khamuwa mukihiyattho miyaano.

Yawuupullulla 22:5

Khowa okhallattho mahiiyu navettho ookhallawaayo khewa epaallattho enyali apaalle nndduwa kaambiiwa Apwiya Mulluku sika enaakhalle owala wiwa, eneerolamulellattho wonanko mamwene wa enthawi yoohimalla.

2 Atesalonika 1:5

Ddittheddenenndda ddinasimikizella wi echiweruzo ya Mulluku tti yawoona wi mwaphwanyeye muri oophwanella ovollowa mu omwenaaye oyo munahoosiwelleenyu.

Aroma 6:23

Vawi mallivello a machimo tti okhwa. Koma emphaso ya Mulluku tti okumi woohimalla mu eyaattano ni Khrisitu Yesu Apwiihu.

Yakobo 2:5

Ngiiwani, asinnaka ni arokoraka ookondiwa! Mulluku ahaatthoolla athu oohoowa a mu ellapo yavattheelle wi ekhalle eeyuuma mu echikhulupililo navettho wi yaakhelle omwene oyo aalonjezilleeye wa ayo enamukonda.

Yohane 18:36

Yesu aallota wi, “Omwenaaka khori wa ellapo yavattheella. Omwenaaka wakhanlleke wa ellapo yavattheella akhotwaaka yaawerowanana ekhoto wi kihivelleelliwe wa Ayuda koma omwenaaka khori wa ellapo yavatthimva.”

Yesaya 41:14

We Yakobo, oofooka wonanko enyambo, ohoove, we Israele, ohoopopiheye, oovullusaawo tti miyaano, Aweella a Israele.

Mateyu 20:16

Vano Yesu aamalliha ni wi, “Sika oomallihella eneerokhalla awaambeella nave awaambeella eneerokhalla oomallihella.”

Mateyu 7:15

“Chenjerani ni anamallotella awoottha; enaphiya wa nyuwaano yooneyaka oomaalleya wonanko enkhosa koma muwari mwiwa eri enama ddawoopiha

Yesaya 53:6

Attheene naahollowa wonanko enkhosa, arive muthu mwa hi eetella ddaaye, koma Apwiya yaamureya olliye machimwaahu.

Mitteko 20:28

Sika mwiiwehereke nyookha owaakattho mpingo muttheene oyo Munepa Waweella uuvahilleeyeni wi muwehereke. Mukhalle abusa a mpingo wa Mulluku oyo awukullalleeye ni nikhame na Mwanaye.

Mitteko 20:29

Kinnadduwella wi kavira, oneeroowa enama ddamuhakani ddawoopiha variyari vanyu nave ddineerewoononga mpingooyo.

1 Akorinto 1:21

Vawi Mulluku mu ezeru ddaye aheeriha wi athu ehimudduwelle olliye voopharihani mutteko ezeru ddiwa. Koma Mulluku aapaalla waavullusa athu ookhulupilila mwa othenga wookarangeya ninallalleyeehu.