Levitiko 8:15 - Mawu a Mulluku

¹⁵ Vano Mose ahiipha eng'ombeeyo atthaveya eyaallaaye munikhameni amara va manyaka oowaapheella va nikuwa nave aaneelliha. Aaniithella nikhame noohalla vatthi va nikuwanno aneelliha. Sika aheera mutetho woopepesella machimo.

Levitiko 8:15 ပူးပေါင်းရင်းမြစ်များ

Levitiko 4:7

Vatulli viwa mullupa mukutho muullupalli amare nikhamenno va manyaka a va nikuwa nawoosellamo lubani* nno niri m'musasani wamutthukumano. Nikhame noohalla na eng'ombeeyo aniithelle vatthi va nikuwa na mukutho wooshellelliha, nno niri va mullako wa musasa wamutthukumano.

Aheberi 2:17

Nndda ddinattaphullella wi aphwanenlle akhalle wonanko mmodda a hiyaano mu ddittheddene wi akhalle mullupa mukuthwaahu muullupalli a echifundo ni oororomelleya voomurumeyellani Mulluku wi machimwaahu ekhululukiwe.

Aefeso 2:16

Okhwa wa Khrisitu vamutandani waamalliha wiitana wiwa. Mutanda wahaattaniha milloko miillinndde okhalla wonanko mwiilli mmodda ni waahokollosella attheene wa Mulluku.

Aroma 5:10

Naari adani a Mulluku koma nahaattanihiwa ni Mullukooyo oweella mu okhwa wa mwanaye. Sika vawi hiyaano nahaattanihiwa ni Mulluku, ndithu, okumi wa Khristu oneeronivullusa.

Daniele 9:24

“Miyakha 70 waatiha otthanu ni opiilli ddaakeraatthihiwa wi athwaawo ni muzindaawo waweella ehiye ddeekuku ni machimo. Epepeselle machimo wi echilungamo yoohimalla ephiye. Vano nndde woonilleewe m'masomphenya navettho nnddo ddallotelliwe ddineereweereya nave nipuro naweellesesa nineerokeraatthihiwattho.

Ezekiele 45:20

Mweereke emoddamoddave yeeyo va nllapo naneetthanu ni piilli na mweeri wi mumupepeselleke arive muthu oyo achimwalle moohipaalla apaalle moohidduwella. Sika enyumba ya Apwiya muneeroyisunga yaweella.’

2 Epilli 29:24

Vano allupa mukutho yaawiipha anankhorwaayo evelleella nikhame niwa va nikuwa monga mukutho woopepesella machimo a Aisraele attheene. Vawi mwene aalamula wi mukutho wooshellelliha ni woopepesella machimo ddeereye ekaamba ya Aisraele attheene.

Levitiko 16:20

“Amalliha weera mutetho woopepesella nipuro naweellesesa, mapuro mamodda a musasa wamutthukumano ni nikuwa, Aroni, mullupa mukuthooyo aweena epuri ekumi wa Apwiya.

Levitiko 6:30

Koma ahiche enama ya mukutho woopepesella machimo oyo nikhame niwa enawaaniiwa m'musasani wamutthukumano wi ekhululukelliwe machimo. Enameeyo ahiyiche koma ayishellellihe.”

Levitiko 4:30

Mullupa mukutho akuse nikhame na epuri yaamutthiyana ni eyaallaaye, animare va manyaka a va nikuwa na mukutho wooshellelliha nave iithelle nikhame noohallanno vatthi va nikuwa nenno.

Levitiko 3:8

atthinddaanyere nnatta naye va muru wa enkhoseeyo nave ayiiphelle va nthato na musasa wamutthukumano. Vano anamwani a Aroni evelleelle nikhame na enkhosanno vawiithani moowaapheella nikuwa.

Levitiko 3:2

Muthooyo atthinddaanyere nnatta naye va muru wa eng'ombeeyo nave ayiiphelle va mullako wa musasa wamutthukumano. Vano anamwani a Aroni, evelleelle nikhame na eng'ombenno vawiithani moowaapheella nikuwa.

Levitiko 1:11

Nave ayiiphelle ompoto wa nikuwa vamiitthoni va Apwiya, vano anamwani a Aronaayo yiithe nikhame vanikuwanimvo moowaapheella.

Levitiko 1:5

Vatulli viwa ayiiphe vamiitthoni va Apwiya nave anamwani a Aroni evelleelle nikhame na eng'ombenno voowiithani moowaapheella nikuwa nno niri va mullako wa musasa wamutthukumano.

Levitiko 4:25

Mullupa mukutho akuse nikhame na nankhoro a epuri ni eyaallaaye, animare va manyaka a va nikuwa na mukutho wooshellelliha nave iithelle nikhame noohallanno vatthi va nikuwa nenno.

Numeri 8:12

Vatulli viwa Alevaayo etthinddaanyere mattiiwa va miru dda anankhoro a eng'ombe nave weyaano ovelleelle eng'ombe emodda wi ekhalle mukutho woopepesella machimo emoddeeyo ekhalle mukutho wooshellelliha wa Apwiya weera mutetho woopepesella machimo a Alevi.