14 Kineerewaalluphella Aefuremu nave kineerewaapuramella Ayuda wonanko mukango. Kineerewaakhaddulla nave kineerovenyavo, khaavo anaawore waavullusa.”
Oohalla a Yakobo enaakhalle variyari va mitundu ddinchichi dda athu wonanko mukango variyari va enama ddamuhakani. Anaakhalle wonanko mukango onavira variyari va mulloko wa enkhosa oyo onnaddiphara ni oddikhaddulla, oohikhallavo ooddivullusa.
Ehikitthalle wonanko mukango, ehikikhaddulle vihiri ookivullusa.
Vano ganizani phaama nndda, nyu ayo munamutiwalla Mulluku wi kineerewuukhaddullani, khaavothi anaawuuvulluseni.
Oothamaka khawora othawa, amasiva khakhallattho ni masiva naari akhoto khewora wiivullusa.
Okhuwa wiwa tti wonanko othuruma wa mikango apaalle misote nnddo ddininlla mwawoopiha voopharani enama nave ddinarowana oohikhallavo naari mmodda awaakihera.
Aakiwukila wonanko echimbalangondo apaalle wonanko mukango okiipitthenlle.
Naari vawiillipihani meekha, munnakisaya wonanko mukango, munnakoopopiha ni masivaanyu.
Naari mudduwellaka wi ngilakwille khaavo anaakivulluse m'mattani mwanyu.
Eneerekewiipha eng'ombe ddanyu moonaka ni miitthwaanyu koma enameene oohichana. Eneerekowaakhani abulwaanyu mwamakani ni oyaana waamodda, nyuwaano moonaka ni miitthwaanyu nave kheyuuhokollosellakani. Enkhosa ddanyu ddineerovelleelliwa wa adanaanyu nave khaavo naari mmodda anuukavihereni.
Apwiya ahaahiya athwiiwa wonanko mukango woohiya nikhungu niwa nave ellapwiiwa yootthattuwa ntepe ekaamba ya ddoohoosa dda ekhoto ni osha murima wawoopiha wa Apwiya.
“Hankoni nihokollweelle wa Apwiya, aanikhaddulla koma eneeronichiriha. Aaniphoriiha koma eneeromaka makhwataahu
“Onani wi miyaano sika Mulluku mwaneena, nave khaavo mulluku mmodda. Kinniipha nave kinnavahattho okumi, kinnaphoriiha nave kinnachirihattho, khaavo oomuvullusa muthu m'mattani mwaka.
Kineerewoononga miteekho ddaye ddampesa ni ddanamukuyu nnddo alloteeye wi, ‘Yaalla sika mallivellwaaka ayo ezibwenzi ddaka ddakivahilliiwa.’ Kineeroyitthattusa otthako nave enama ddamuhakani ddineerewoononga.
Kahaachiha evona koma evonille yahiitukhulla nave yaakitiwalla.