Hoseya 12:6 - Mawu a Mulluku

⁶ Vano nyu attheene hokollweellani wa Mullukwaanyu. Mukhalle a echikondi ni oolungama. Nave mumuroromelleke Mullukwaanyu enthawi ddittheddene.

Hoseya 12:6 ပူးပေါင်းရင်းမြစ်များ

Mika 6:8

Iyaayi, muthuwe, Apwiya yaawooniha khalle eyo eri yaphaama. Alliwa enapaalla wi weereke ddoolungama, okondeke echifundo ni weeta mwawiiyeviha vamiitthoni va Mullukwaawo.

Mika 7:7

Koma miyaano, kinaaroromelle Apwiya. Murimaaka kinaahiye va Mulluku Oovullusaaka vawi Mullukwaaka aneerokiiwa.

Hoseya 14:1

Nyu Aisraele, hokollweellani wa Apwiya vawi mwaamora ekaamba ya machimwaanyu.

Zekariya 7:9

“Mi Apwiya Amasiva Mattheene kinallota wi, ‘Mweeruzaneke moolungama, mumorellaneke ethakaraka ni weerellana echifundo.

Yakobo 2:13

Vawi muthu aweeruza moohikhalla ni echifundo nayeenettho Mulluku aneeromweeruza moohikhalla ni echifundo. Koma oyo ari ni echifundo khanoova echiweruzo ya Mulluku.

Yakobo 1:27

Ollapella wawoona ni waweella vamiitthoni va Mulluku ni Attiitthiihu tti waapwatha akhwaadduni ni anaamukhwelle mu ddoohoosa ddiwa navettho wiivaanyiha weekhaawo wi ohiripihiwe ni dda va ellapo yavatthi.

Mitteko 26:20

Kaallalleya waambeella wa athu a o Damasiko, a o Yerusalemu ni a mu Yudeya mutthemwene owaakattho variyari va athu ayo ehiri Ayuda. Kaallalleya wi enaphwanella ehiye machimwiiwa nave erukunuwelle wa Mulluku ni weera ddeko ddawooniha wi aahiya machimo.

Mitteko 2:38

Nave Petro aallota wi, “Arive muthu a nyuwaano arukunuwe murima nave abatiziwe mu nnddina na Yesu Khrisitu wi machimwaaye ekhululukiwe nave aneerewaakhella emphaso ya Mulluku, Munepa Waweella.

Zekariya 8:16

Ddoopaalleya weera tti ddawi arive muthu alloteke ddawoona ni mukhwaaye. Mweeruzeke mwawoona ni mwamurendelle m'mathatoni mwanyu.

Zekariya 1:3

Sika alleelle athu wi Apwiya Amasiva Mattheene eni hokollweellani wa miyaano nave kineerohokollweella wa nyuwaano.

Zefaniya 3:8

Apwiya enallota wi “Ekaamba ya yeella kitiyereni, mutiyere nllapo nno kinaawiipeemini mullatu vawi kooganiza ddootthukumaniha mitundu dda athu ni moomweniiwa mattheene wi kiwoonihelle onanariwa waka, yiiwe ovoreya wa owallaaka. Ellapo ettheene yavatthi eneeroosha ni munllo wa osha murima waka.”

Habakuku 2:3

Masomphenyaalla enatiyera enthawiiwa enthaweeyo khenakwakhwane, khe ddawoottha, yaselliwa tiyerani vawi eneerophiya, oohikayika.

Amosi 5:24

Koma echiweruzwaanyu yeete wonanko maaddi, echilungamwaanyu okhalle wonanko muhinje woohiwelleella.”

Yowele 2:13

Ahullani murimaanyu ohiri ddoowara ddanyuve.” Hokollweellani wa Apwiya Mullukwaanyu vawi alliwa tti eechifundo ni ooreera murima, oohisha murima mwawaakuva ni ooddalla ni echikondi yoohisintheya, ni oohiya ollaka.

Hoseya 10:12

Mumidde echilungamo nave muneerohata echikondaaka yoohisintheya. Tipulani ntthalla nanyu vawi enthawi yoowaashaasha Apwiya yookwakhwana. Waashaasheni Apwiya ophiyera ewiille wi emurupihe murimu amadaliso.

Hoseya 4:1

Nyu Aisraele, iwani mawu a Apwiya vawi aakhalla ni mullatu ni ookhalla mwiillaponi. Mullatweene tti wawi mwiillaponi khamuri ororomelleya apaalle oreera murima nave khenamudduwella Mulluku.

Yeremiya 22:15

Ethiyo onaganiza wi ori mwene kaambiiwa enyumba ddawo tti ddamukunguza? Attiittho yaakhalla ni erive ello, yaaneeruza moolungama ni moohiweha ekhove, ddittheddene ddaanaweetella phaama.

Yesaya 58:6

“Ohalla ocha nko kinapaalleemi tti wawi muttaphulle onyolo woohoosella, muttaphullettho mikwe dda nigoli,* mwaattaphulle oopaneya nave mwinttake nirive nigoli.

Yesaya 40:31

Koma ayo enaaroromella Apwiya, eneerewaakhella masiva anaanweene, eneerovava wonanko mpungu. Eneerekothamaka koma oohitopa, eneerekeweeta koma oohivelleveddeya.

Yesaya 31:6

Nyu Aisraele, hokollweellani wa Apwiya ayo mwaawukilalleenyu wunchichi.

Yesaya 30:18

Komave Apwiya ennatiyerella oweerellani echifundo alliwa tti ookhonzeka wi yuureerelleni murima ekaamba yawi Apwiya tti Mulluku eechilungamo. Oodalisiwa tti attheene enaaroromella Apwiya.

Yesaya 8:17

Kineerewaatiyerella Apwiya ayo yiipitthihalle ekhoviiwa va nibanja na Yakobo nave kineereewaatiyerellesesa.

Yesaya 1:16

Hapani, ddeelliheni nyookha nave venyihanivoni vamiitthoni vaka mitteko ddanyu ddoonanara. Ddawoona, hiyani weera ddoonanara

Miyambo 21:3

Echilungamo ni echiweruzo ddinnaahakallalliha Apwiya okhwaranya ovelleella mukutho.

Miyambo 1:23

Apellani maaru kaawuuhumullullakani vawi kinapaalla wuulleellani ddiri m'murimani mwaka nave mudduwelle maganizwaaka.

Masalimo 123:2

Mmo allupa mutteko aallopwana enaweheriiwa o nnatta na apwiiwa, mmo allupa mutteko aatthiyana enaweheriiwa o nnatta na apwiiwa aatthiyana, tti mwemmo ninawehereehu wa Apwiya Mullukwaahu, ophiyera eneerelle echifundo.

Masalimo 37:7

Khurumuwa vamiitthoni va Apwiya, waatiyere moohikhupanya. Ohinamukhupanyaka muthu oyo ddaaye ddinamweetella phaama apaalle muthu oyo anapambana mu ddoonanara nnddo addikhozilleeye.

Masalimo 27:14

Vano atiyere Apwiya. Khalla amasiva nave ollipe murima. Ddawoona, atiyere Apwiya.

Genesis 49:18

“Kinatiyerella ovullusa wa Apwiya.”

Ezekiele 18:30

“Sika vano mi Apwiya Mulluku kinallota wi, arive muthu mwa nyuwaano Aisraele kineeromweeruza moollikana ni mitteko ddaye. Rukunuwani murima, hiyani ddoonanara ddanyu wi machimwaanyu ehiwoonongeni.

Yowele 2:12

Koma naari ollellova, Apwiya enallota wi, “Lapani nave muhokollweelle wa miyaano ni murimaanyu muttheene. Hallani ocha, inllani ekutho ni omoriha ethakaraka.

Eksodo 3:15

Nave Mulluku aamulleellattho Mose wi, “Waalleelle Aisraele wi, ‘Apwiya Mulluku a makhollwaahu, Mulluku a Abrahamu, Mulluku a Isaki ni Mulluku a Yakobo sika akirumihalle wa nyuwaano.’ Nenna sika nnddina naka wa enthawi yoohimalla. Nenna sika nnddina nno ddinaakiromollellekiiwa mibado ddittheddene ddamuhoollo.

Amosi 4:13

Ngamooneni oyo aphatusalle miyaango ni opanga ephevo, anamuwululella muthu dda m'muruni mwaye, anatthattusa otthaana okhalla mahiiyu, aneeta va mapuro aweellesesa a va ellapo yavatthi, nnddina naye tti Apwiya Mulluku Amasiva Mattheene.