Genesis 35:2 - Mawu a Mulluku

² Sika Yakobo ahaalleella a mu nibanja naye nittheene ni athu attheene aariiyena wi, “Tathillani milluku ddeelleto nnddo ddiri variyari vanyu. Muddeellihe nyookhaanyu nave muware ddoowara ddaphaama.

Genesis 35:2 ပူးပေါင်းရင်းမြစ်များ

Eksodo 19:14

Vano Mose aakittha ovenyera omwaangoni, aphiya wa athwaayo nave ahaalleella wi eddeellihe nave athwaayo yaachapa ddoowara ddiwa.

Eksodo 19:10

Apwiya yaamulleella Mose wi, “Khawe wa athwaayo waalleelle wi eddeellihe ollello ni osiisello. Echape ddoowara ddiwa,

Yakobo 4:8

Mumwaatamelleke Mulluku nave olliye aneerowaatamellani. Muddeellihe, nyu athu oochimwa! Ellihani mirima ddanyu, nyu athu a mirima miilli!

Aheberi 10:22

Vano hankoni nimwaatamelle Mulluku ni mirima ddawoona ni mirima ddoohikayika mwa echikhulupililo. Hankoni nikhalle ni mirima ddeellihiwe voomiddiwani, yawuupusella murima yoohivaanyihiwa ni ddoochimwa nave ni miilli ddoohapihiwa ni maaddi aweella.

Ezekiele 18:31

Tathillani ddoonanara ddanyu ddakhalle nnddo mwakichimwenlleenyuna. Mukhalle ni murima wanaanweene ni munepa wanaanweene. Nyu Aisraele munaakhwelle tini?

Ezekiele 36:25

Kineerewuumiddani maaddi aphaama wi mweelle o ddittheddene ddawuuripihani. Navettho kineeroweellihani voovenyihani mafanwaanyu mattheene.

Yoswa 24:23

Yoswa aallotattho wi, “Venyihanivoni milluku ddeelleto ddiri variyari vanyu nave mwaallapelleke Apwiya Mulluku a Aisraele, moororomelleya.”

Yoswa 24:15

Vano waarumeyella Apwiya waawukatamihakani, mumutthoolle ollello oyo munaamurumeyellekeenyu apaalle milluku nnddo yaddirumeyelle makhollwaanyu ookhalla okhopella wa muhinje apaalle milluku dda Aamori ayo munakhalleenyuna mu ellapwiiwa. Koma miyaano ni a vanibanjani vaka ninaawaarumeyelleke Apwiya.”

Genesis 18:19

Koomutthoolla olliyoolla wi aalamule anaaye ni mabanjaaye amuhoollo wi yiiwellelleke mawaaka vaweerani ddaphaama ni ddoolungama. Yeera ddenndda, kineereweera ddittheddene kamulonjezilleemi.”

2 Akorinto 7:1

Akhwaaka ookondiwa, ddoolonjeza ddittheddenenndda ddaheeriwa wa hiyaano. Sika vano hankoni neellihe nnddo ddinaripiha mwiillaahu ni munepaahu nave hankonittho nikhalle aweella mu ddittheddene voomoovani Mulluku.

1 Samuele 7:3

Vano Samuele ahaalleella Aisraele attheene wi, “Mwaapaallaka ohokollweella wa Apwiya ni murimaanyu muttheene, muvenyihe milluku ddeelleto ni dda Ashitaroti variyari vanyu. Murimaanyu muttheene okhalle va Apwiya ni waarumeyella alliwave. Mweeddiiddo eneerewuuvullusani wa Afilisti.”

Deuteronomo 32:16

Yaamweeriha ehache ni milluku ddeelleto, ni ddaweera ddoonanara yaattatthamulla owallaaye.

Genesis 31:34

Rakelooyo aari asunge millukunnddo vatthi va saduro ya ekamira nave olliyooyo aakeraatthella vaavo. Labani ahaashaasha m'musasani koma khaaphwanyillemo.

Genesis 31:19

Labani aari akelle woochema enkhosa. Nave ari wenko, Rakele ahiiya milluku dda mpa mwa Labani attiitthinnya.

Yuda 1:23

Nave mwaavulluse amodda voowaakihani ovenyera omunlloni nave muweerelleke echifundo amoddattho koma muchenjere nave mwiitaneke ni yoowariiwa yooripihiwa ni machimo.

Agalatiya 4:8

Khalle khamwamudduwenlle Mulluku, sika mwaari akaporo a ddoophatusiwa ddoohikhalla milluku.

1 Akorinto 10:7

Nihillapelleke mafano wonanko amodda a yaayo. Vawi mawu a Mulluku enallota wi, “Athu yaayo yaakeraatthi wi eche ni owirya nave yaavenya yiina.”

Mitteko 19:26

Vano munnoona ni wiiwa nyookha ddineera Paulo. Olliye anallota wi milluku ddoosemiwa ni athu khe milluku nave ohaakopa athu anchichi mu Efesommu naarittho mu echigawo ettheene ya Asiya.

Daniele 5:4

Yaamuwirya vinyo nngu etitimihaka milluku ddagolide, ddasiliva, ddamukuwa, ddamukoko, ddamuteekho ni ddamalluku.

Ezekiele 20:7

Kahaalleella attheene wi, ‘Arive muthu atathille ddoonanara ddaye ddittheddene nnddo ddamuhakallalliha nave ahiiripihe ni mafano a o Iguputo, Mi tti Apwiya Mullukwaanyu.’

Yeremiya 16:20

Ethiyo muthu ttuuwora wiipangella milluku ddawoona? Apanga, kheddikhalla milluku.”

Yeremiya 13:27

Kohoona ddoonanara ddanyu, oraruwa wanyu, minkhella ddanyu ni ohulaanyu omiyaangoni ni ohakani. Otulli nyu a o Yerusalemu! Ethiyo munaakhalleve ooheellihiwa ophiyera niini?

Yeremiya 5:7

Apwiya enallota wi, “Kinuukhululukelleni mwawiidde? Aniinyu yookihiya miyaano, enallepella wa milluku ddawoottha. Miyaano kahaavaha ddoopaalla ddiwa ddittheddene komave yaaddivelliwa oraruwa, yatthukumana mu enyumba dda mahule.

Yesaya 52:11

Khumani, khumani, venyaniwoni mwawaakuva o Babiloninko, muhittannye ello yooripihiwa! Nyu ootukhulla eziwiya ddoopatulelliwa Apwiya, khumani, ddeelliheni.

Yesaya 1:16

Hapani, ddeelliheni nyookha nave venyihanivoni vamiitthoni vaka mitteko ddanyu ddoonanara. Ddawoona, hiyani weera ddoonanara

Oollalleya 5:1

Opwatheke phaama meetellwaawo waayaaka o enyumba ya Mulluku. Oyeellawo ohuddera tti wookhwaranya oyeellawo ovelleella mukuthove wonanko athu ookarangeya ayo ehinadduwella wi eyo eneeriiwa tti yoonanara.

Masalimo 51:7

Keelliheni ni hisope* o machimwaaka nave kineereweella, kihapiheni nave kineereweellesesa okhwaranya nthoche.

Masalimo 51:2

Mukihapihe o ddoolakwa ddaka ddittheddene, mukeellihe o machimwaaka.

Yobu 1:5

Vano mallapo a machellello yamalla, Yobu aanavenya ohinase ovelleella mikutho ddooshellelliha nave aanaddivelleella moollikana ni waata wa anamwanaayo wi yeellihiwe. Eera ddenndda vooganizani wi apaalle mmodda mwa anaaye aachimwa nave oomullotella epewe Mulluku m'murimani mwaye. Yobu aaneera ddenndda enthawi ddittheddene.

1 Epilli 16:26

Milluku dda athu tti mafano, koma Apwiya yaaphatusa ddamuddullu.

2 Mamwene 17:29

Koma orive mutundu wa athwaayo waavirellella opanga mafano a milluku ddiwa nave yaanaddihiya mu mapuro oollapellamo ayo Asamariya yaddimakilliiwa. Orive mutundu wa athwaayo waakhalla ni enyumba dda mullukwiiwa mu orive muzinda mmo yakhalliiwa.

2 Mamwene 5:10

Elisha aamurumihella amithenga oyo amulleelle wi, “Khawe wahape m'muhinjeni wa Yordani otthanu ni opiilli nave muneerochira ni weellihiwa.”

2 Samuele 7:23

Ethiyo tti athu aavi va ellapo yavatthi enaphwanaphwana ni athwaanyu Aisraele ayo mwaavullusalleenyu wi ekhalle aanyu? Mwahaavullusa ovenyera o Iguputo ni milluku ddaye nave mwaheera ddeko dduullupalli ddawoopiha voowiikarihani mitundu ddimodda vamiitthoni viwa. Mmu sika mwavuwihelleenyu nnddina nanyu.

Rute 1:15

Vano Naomi aamulleella Rute wi, “Ngamoone mbalaawo oohokollweella owaniwa ni wa milluku ddaye. Naweenettho hokollowa omuthwareke mbalawoolle.”

Oweeruza 10:16

Sika yaavenyihavo milluku ddeelletonndde yaamba waarumeyella Apwiya nave Apwiya yaamoriwa ethakaraka voowonani Aisraele ehoowaka.

Yoswa 24:20

Mwaahiya Apwiya Mullukwaanyu munarumeyella milluku ddeelleto, eneerewuurukunuwellani ni oweerellani yoonanara nave eneerewuutthollosani naari khalle yaweerelleni ddaphaama.”

Yoswa 24:2

Ahaalleella athu attheenaayo wi, “Nnddo Apwiya Mulluku a Aisraele enallotiiwa tti ddawi, ‘Khalle makhollwaanyu yakhalla okhopella wa muhinje wa Yufurate enallapella milluku ddimodda. Mmodda mwa makhollo yaalla aari Tera, attiitthinnya a Abrahamu ni Nahori.

Yoswa 23:7

Nave muhiniiwananaka ni athu alla ehanlle nave eri ni nyuwaano. Muhinaromollaka manddina a milluku ddiwa apaalle oyiromolla voollupellani apaalle oyirumeyella apaallettho oyikokhorella.

Deuteronomo 11:28

Koma matembelelo, mwaahiiwellellaka malamulwaalla nave mwahiya ettilla eyo kinuulamuleemini ollello ni orukunuwella wa milluku ddimodda ni oddillapella, milluku nnddo khalle mwahiddidduwenlleenyu.

Deuteronomo 7:25

Mwaashellellihe mafanwiiwa mattheene nave muhimusilile siliva apaalle golide oyo yamupangenlliiwa mafanwaayo. Muhiwe muddikusa ddenndda wi muhiphariwe m'musamphani vawi ddinnaananara Apwiya Mullukwaanyu.

Deuteronomo 6:14

Muhillapelleke milluku ddimodda nnddo ddinallapelliwa ni athu ayo ewaapheelleni.

Deuteronomo 5:7

“Ohikhalleke ni milluku ddimodda koma meeneve.

Numeri 31:24

Muchape ddoowara ddanyu va nllapo naneetthanu ni piilli nave muneereweellihiwa nave vatulli viwa muneerewaakhullelliwa ovollowa m'misasani.”

Levitiko 17:16

Koma aahichapa ddoowara ddaye nave aahihapa aneerophwanella ollakiwa.”

Levitiko 15:5

Arive muthu anaamuttannye bedaayooyo achape ddoowara ddaye nave ahape koma aneerokhalla ooripihiwa ophiyera misikuwa.

Eksodo 23:13

“Wiiwesese ddittheddene kuulleelleminndda. Ohiddillapelleke milluku ddimodda nave ohiromollekettho ni manddiniiwa.

Genesis 35:22

Yakobo ari mwiillaponimmo, Rubeni aakona ni Biliha, mmodda mwa awariye ang'onong'ono a attiitthinnya nave Yakobo ahiiwa ddenndda. Yakobo aari ni anamwani aallopwana khumi ni eelli.

Genesis 34:2

Shekemu, mwaana a Hamori Muhivi mwene a echigawo ya ellapweeyo, amoonille namwallooyo, aakonana momupharella.

Genesis 31:30

Kinnadduwella wi waatimulla kaambiiwa waapaallesesa ohokollweella owaninyu. Koma kaambiiwa tini okiiyerilleewe milluku ddaka.”

1 Samuele 16:5

Samuele ahaakhulla wi, “Ee, kaweella waarera. Kaweella waaheraatthella mukutho Apwiya. Muddeellihe nave niye naheraatthi mukutho.” Samuele aamupatula Yese ni anaaye aallopwana nave aamwiithana wi yavelleellena mukutho.

Yoswa 24:14

“Vano nyuwaano, mwaavahe olemu Apwiya nave mwaarumeyelleke mwawoona nave moororomelleya. Venyihani milluku nnddo makhollwaanyu yaddillapelliiwa okhopella wa mihinje wa Yufurate ni o Iguputo nave mwaarumeyelle Apwiya.