Ezara 9:7 - Mawu a Mulluku

⁷ Waambeella enthawi ya makhollwaahu ophiyera ollello nikhallelle ochimwa wunchichi. Vano ekaamba ya machimwaahwaayo, hiyaano, mamwene a ellapo ddimodda ni allupa mukuthwaahu noovelleelliwa m'mattani mwa mamwene a mwiillaponi wiiphiwa okhotoni, opharelliwa wuukaporoni, waakhiwa ddeko ni owullihiwa muru wonanko mmo ddikhallelliiwa ollello.

Ezara 9:7 ပူးပေါင်းရင်းမြစ်များ

2 Epilli 29:6

Vawi makhollwaahu yaari oohiroromelleya nave yaheera ddoonanara vamiitthoni va Apwiya Mullukwaahu. Yahaahiya Apwiya, yaareya ekotho nko wakhalla Apwiya, yahaareya etulli.

Maliro 5:7

Makhollwaahu yaachimwa nave kheyiiwo, vano nootukhulla machimwiiwa.

Yeremiya 44:22

Ekaamba ya yeella, Apwiya kheyaawonre ovillella mitteko ddanyu ddoonanara nnddo mwaddeereenyu. Sika ellapwaanyu yaatthattuwa ntepe, ello yooryiryiha mwiilli ni yootembeleliwa, ellapo yoohikhalla ni athu, wonanko ekhallelliiwa ollellova.

Yeremiya 25:18

Yaakiruma o Yerusalemu, o mizinda dda o Yuda, wa mamwenaaye ni enduna ddaye wi etthattuwe matepe, ello yawoopiha ni yoottheyiwa monga ddikhallelliiwa ollello.

Nehemiya 9:30

Orive muyakha mwaanaavillella nave mwaanaachenjeza ni munepaanyu oweella mwa anamallotellaanyu komave kheyaapella maaru. Sika ekaambiiwa mwaavelleelleenyu m'mattani mwa athu a mu ellapo ddimodda.

2 Epilli 30:7

Muhikhalle wonanko makhollwaanyu ni abalaanyu ayo yaari oohiroromelleya wa Apwiya Mulluku a makhollwiiwa ayo yaatthattusalle ello yawoopiha monga munoonellaanyummu.

1 Samuele 12:15

Koma mwaahiiwellellaka mawu a Apwiya, munawukila malamulwiiwa, mudduwelle wi eneerewuullakani nyuwaano ni mwenaanywiine.

Numeri 32:14

Vano nyuwaano mbado wanaanweene wa athu oochimwa muri wonanko makhollwaanyu vawi munapaalla wi mwaanjerere osha murima wawoopiha wa Apwiya va Aisraele.

1 Mamwene 8:47

Vano eri wuukaporoninko yaadduwella ochimwa wiwa erukunuwa murima ni oveka wa nyuwaano mwawiiyeviha mu ellapo ya athu ayo yaaphanre okaporo, voollotani wi, ‘Noochimwa, noohollowa, noheera ddoonanara.’

Ezara 9:13

Nave ddittheddenenndda ddinimorelle ekaamba ya machimwaahu muullupalli. Naarive ddiri ddiiddo, nyu Mullukwaahu munillakille vang'ono moohillikana ni machimwaahu nave mooneeriha wi nihalle wonanko ddikhallelliiwammu.

Yeremiya 3:25

Vano nikonaathi moowulliwa muru nave ovevuwa wahu onikhuneelle. Vallethi hiyaano ni makhollwaahu nahaachimwella Apwiya Mullukwaahu, waambeella enamwanaahu ophiyera ollello. Khaniiwellenlle mawu a Apwiya Mullukwaahu.”

Yeremiya 32:23

Koma yaavollowilliiwa mwiillaponimmu ni waakha wi ekhalla yayiwayayiwa, yaakhoota owiiwellellani apaalle othwara malamulwaanyu. Yaakhoota weera nnddo mwaalamulalleenyu. Sika ekaamba ya yeella, mohaamorihella ddoohoosa ddittheddenenndda.

Yeremiya 32:32

Athu a o Israele ni Yuda, mamweniiwa, enduna ddiwa, allupa mukuthwiiwa, anamallotelliiwa ni attheene ookhalla o Yerusalemu ni o Yuda, yaakishiha murima ni mitteko ddiwa ddoonanara.

2 Epilli 34:24

‘Mi Apwiya kinallota wi kineeromoriha ddoonanara va muzindoolla ni va athu attheene a mwemmo monga mwa matembelelo mattheene a mu nibukhu nno neerengiwe vamiitthoni va mwene a o Yuda.

Yesaya 64:4

Waambeella khalle khaavo oyo oonille apaalle iiwalle dda Mulluku mmodda oollikana ni nyuwaano, ooweerella ddawi ddiidda athu ootiyerella va olliye.

Yeremiya 44:9

Ethiyo mootiwalla ddoonanara ddittheddene nnddo yeerille makhollwaanyu, mamwene a o Yuda ni awariwa navettho nyuwaano ni awarinyu, o ellapo ya Yuda ni m'misewuni dda mu Yerusalemu?

Ezekiele 11:9

Kineerowiikarani m'muzindanimmo nave kuneerewuuvelleellani wa alleto wi yuullakeni.

Ezekiele 39:23

Athu a mu ellapo ddimodda eneerodduwella wi Aisraele yaaphariwa okaporo ekaamba ya machimwiiwa nave ekaamba ya ohiroromelleya. Kahaareya etulli nave kahaavelleella m'mattani mwa adaniiwa. Vano attheenaayo yaakhwa vakhotoni.