Akolose 1:27 - Mawu a Mulluku

²⁷ Yoolinga ya Mulluku tti yawi athwaaye edduwelle yookhuweyaaye yawaata ni yootitimiheya variyari va athu oohimullapella Mulluku. Nave yookhuweyeeyo tti yawi Khrisitu ari mwa nyuwaano nave wi olliye tti yootiyerellaanyu wi mwaakhelle ntitimiho na Mulluku.

Akolose 1:27 ပူးပေါင်းရင်းမြစ်များ

Yohane 14:20

Nllapo nenno muneerodduwella wi miyaano kiri mwa Attiitthaaka nave nyuwaano muri mwa miyaano nave miyaano kiri mwa nyuwaano.

Aroma 8:10

Koma Khrisitu akhalla mwa nyuwaano, Munepooyo tti okumaanyu kaambiiwa moolungamihiwa ni Mulluku naari miilli ddanyu ddineerokhwa ekaamba ya machimo.

1 Yohane 4:4

Koma nyuwaano, anaaka, tti a Mulluku nave mohaagonjiha anamallotella awoottha kaambiiwa Munepa Waweella oyo ari mwa nyuwaano tti amasiva ohiyana ni munepa oyo ari mu ayo enakhalla mu ellapo yavatthi.

Agalatiya 2:20

sika khe miyaanottho kinakhalla mukumi koma tti Khrisitu anakhalla mwa miyaano. Okumi yoolla kiriimina, kinakhalla mu echikhulupililo mwa Mwaana a Mulluku, oyo aakikondille miyaano nave avelleella okumaaye ekaamba ya miyaano.

1 Akorinto 3:16

Ethiyo khamunadduwella wi nyuwaano tti enyumba ya Mulluku nave Munepa a Mulluku onakhalla mwa nyuwaano?

Yawuupullulla 3:20

Ngoonani, kiimenlle vamullakoni nave kinnookotha. Muthu iiwa mawaaka nave ahulla nchiwi, kineerovollowa kichena vamodda.

Yohane 14:17

Yoolla tti Munepa a yawoona. Ellapo yavatthi khewora omwaakhella kaambiiwa athu a mu ellapo yavatthi khenamoona apaalle omudduwella. Koma nyuwaano munnamudduwella kaambiiwa ari ni nyuwaano nave anakhalla mwa nyuwaano.

Agalatiya 4:19

Anaaka, kinnoonattho ovoreya woophwanaphwana ni ovoreya wa mutthiyana aayaraka ekaamba ya nyuwaano ophiyera makhallello a Khrisitu ekeraattheye mwa nyuwaano.

2 Akorinto 4:6

Mulluku aallotille wi, “Owala omolleelle ovenyera mwiipiphini.” Tti Mulluku mmoddamoddave yooyo enre owala waye wi omolleelle m'mirimani mwahu wi onivahe odduwella dda ntitimiho na Mulluku noomolleella va ekhove ya Khrisitu.

1 Timoteo 1:1

Ovenyera wa miyaano Paulo, murummwa a Khrisitu Yesu moollikana ni olamula wa Mulluku oovullusaahu navettho Khrisitu Yesu, otiyera wahu.

Akolose 2:3

Olliye tti yoohullella ya eyuuma yoovittheya ya ezeru ni odduwella wa Mulluku.

Yohane 14:23

Yesu aamwaakhulla wi, “Muthu akikonda miyaano aneerothwara mawaaka. Attiitthaaka eneeromukonda nave miyaano ni Attiitthaakaayo nineeroowa wa olliyooyo ni okhalla ni olliye.

2 Akorinto 6:16

Enyumba ya Mulluku enaattane ni mafano mwawiidde? Vawi hiyaano tti enyumba ya Mulluku Ookumi. Mulluku yeekhaaye aallota wi, “Kineerokhalla mwa alliwa, nave kineereweeteeta variyari viwa. Kineerokhalla Mullukwiiwa, nave alliwa beneerokhalla athwaaka.”

Akolose 3:11

Ekaamba ya yeella, khuwaavo ohiyana variyari va Ayuda ni athu ayo ehiri Ayuda, oophaddiwa ni oohiphaddiwa, athu a ellapo ddimodda, athu oohihuddera, akaporo ni athu eyo ehiri akaporo nave Khrisitu sika ari oopaalleya, Khrisitu ari mwa attheene.

Yohane 17:26

Nave kahaadduwelliha nyuwaano nave kineerovirellella weera ddiiddo. Vano echikondi muriinyuna mwa miyaano ekhalle mwa alliwa nave miyaanottho kikhalle mwa alliwaayo.”

Aefeso 2:22

Mu eyaattano ni Khrisitu nanyeenettho munimamakiwa vamodda ni amodda attheenaayo wi mukhalle nipuro nookhallamo Mulluku oweella mwa munepaaye.

Yohane 6:56

Ayo enacha mwiillaaka ni owirya nikhame naka enakhalla mwa miyaano nave miyaano kinakhalla mwa alliwa

Aefeso 1:7

Vawi noottaphulliwa ni nikhame na Khrisitu. Machimwaahu aakhululukiwa ekaamba ya waata wa echisomwaaye. Echifundo ya Mulluku tti yuullupalli,

Afilipi 4:19

Oyeella mwa Khrisitu Yesu Mullukwaaka aneerewuuvahani ddoopaalla ddanyu ddittheddene ovenyera mu eyuumaaye yawaata.

Aroma 9:23

Nave apaallattho wuupullulla waata wa ntitimiho naye, nno niithellelliwe va hiyaano aneerelleeye echifundo, ayo ekhoziwe moovallallella wi yaakhelle ntitimiho naye.

Aroma 5:2

Kaambiiwa naamukhulupilila Yesu Khrisitu aaneeriha wi noonena echisomo ya Mulluku, eyo eri matthipellellwaahu. Nave vano ninnahakallalla wi ninnatiyera okhalla ni ntitimiho na Mulluku!

Akolose 1:5

Nndda ddiri ddiidda kaambiiwa munatiyerella ddeko nnddo ddisungiwe oddullu. Vawi mwahiiwa dda nndda mvo yawoona, eyo tti othenga waphaama, wallalleyiwiiwa wa nyuwaano.

2 Akorinto 4:17

Nave ddookatamiha dding'onong'ono ninooneehu mvanndda ddineeroniphwanyella ntitimiho nuullupalli ni noohimalla, nookhwaranya ddookatahihannddo.

Luka 17:21

Khaavo muthu anaallote wi, ‘Ngawooneni ori wuno apaalle ori wulle!’ Kaambiiwa omwene wa Mulluku ori variyari vanyu.”

Mateyu 13:11

Nave ahaakhulla wi, “Wa nyuwaano woovahiwa odduwella ddookhuweya dda omwene wa Mulluku koma wa alliwaayo khonavahiwe.

2 Akorinto 2:14

Mulluku athokoziwe! Vawi mu eyaattano ni Khrisitu Mulluku annanihoollella enthawi ddittheddene wi nigonjiheke. Navettho Mulluku ananiphariha mutteko woovuwiha ddoodduwella dda Khrisitu virive veko wonanko nthuko naphaama.

Aroma 11:33

Eyuuma ya Mulluku tti yinchichi! Ezeru ddaye ni odduwella waye tti ddoowallamella! Khaavo anaawore wiiwesesa echiweruzwaaye! Khaavo anaawore wiiwesesa ettilla ddaye!

Aroma 2:4

Apaalle munnavevulla oreera murima waye wunchichi, olleva waye ni ovillella waye. Ethiyo khamunadduwella wi Mulluku tti ooreera murima kaambiiwa annuuhoollellani wi murukunuwe murima.

Aheberi 6:19

Nookhalla ni etiyerello yeella wonanko nangula* ookumaahu eyo eri yookeraattheya ni yoollipa nave ennavollowa ohiyana ni ekatani ya mu enyumba ya Mulluku yooddullu yaphiya muwari mwa nipuro naweella.