Aheberi 6:1 - Mawu a Mulluku

¹ Vano hankoni nivirellelle ni mahuddero awooniha owaraalla. Noonjerere mahuddero mamodda vaddullu va mahuddero awaamba a dda Khrisitu. Nihikeraattheyettho va ddawaamba nnddo ddiri matthipello awi orukunuwe murima ohiya mitteko ddoohivaha okumi woohimalla, dda waamba omukhulupilila Mulluku,

Aheberi 6:1 ပူးပေါင်းရင်းမြစ်များ

Aheberi 9:14

Koma Khrisitu khaarina machimo nave ahiiheraatthi yeekhaaye wonanko mukutho mwa Munepa woohimalla. Ella sika ekaambiiwa nikhame naye niriiwa ni masiva manchichi oorukunusa murimaahu woochimwa okhalla waphaama wi niheereke ddeko nnddo ddinaanihoollelle wookhwa koma wi niwore omurumeyella Mulluku Ookumi.

2 Akorinto 7:1

Akhwaaka ookondiwa, ddoolonjeza ddittheddenenndda ddaheeriwa wa hiyaano. Sika vano hankoni neellihe nnddo ddinaripiha mwiillaahu ni munepaahu nave hankonittho nikhalle aweella mu ddittheddene voomoovani Mulluku.

Mitteko 26:20

Kaallalleya waambeella wa athu a o Damasiko, a o Yerusalemu ni a mu Yudeya mutthemwene owaakattho variyari va athu ayo ehiri Ayuda. Kaallalleya wi enaphwanella ehiye machimwiiwa nave erukunuwelle wa Mulluku ni weera ddeko ddawooniha wi aahiya machimo.

Aheberi 12:13

Etakani m'misewuni ddaphaama, sika athu ookhwa meto ehivirellelle okhwa meto koma echirihiwe.

Mateyu 21:32

Vawi Yohane Oobatiza awa wa nyuwaano aawoonihani ettilla ya echilungamo yoopaalleya wi mukuse koma khamwaakhulupililalle koma ookhomiha misonkho ni atthiyana ooraruwa yaamukhulupilila. Koma naari nyuwaano moonilleenyu ddenndda khamwaarukunuwalle murima vatulli viwa wi mumukhulupilile.”

Aheberi 7:11

Naari malamulo a Mose ellotaka wi allupa mukutho ekhalleke edduullu dda Levi, allupa mukuthwaalla kheyaawora oweelliha athu. Vano vaapaalleya wi viwe mullupa mukutho wonanko Melkizedeki, oyo ahiri edduullu ya Aroni.

Aefeso 4:12

Enre ddenndda wi athu a Mulluku ekhozekelle mutteko woomurumeyella Khrisitu wi ellipihe mwiilli wa Khrisitooyo,

Yohane 12:44

Yesu aakhuwa wi, “Oyo anakhulupilila mwa miyaano, khanakhulupilila mwa miyaanove koma mwa oyo aakirumalle.

Yohane 5:24

“Ddawoona, kinimuulleellani wi, oyo aniiwa ni wiiwellella mawaaka nave anakhulupilila mwa yooyo aakirumalle ookhalla ni okumi woohimalla. Yoolla kheeruziwa koma ookhuma khalle wa ookhwa avollowa mu okumi.

Mateyu 3:2

Allalleya wi, “Rukunuwani murima kaambiiwa omwene wa Mulluku wohaatamella!”

1 Timoteo 3:16

Ndithu, ella tti yoovittheya yawoona yuullupalli ya echikhulupililwaahu yawi, “Yooyo ahuupullulliwa mu mwiilli wa muthu, Munepa aamweerella omboni wi olliye tti awoona. Nave ahooniwa ni angelo. Aallalleyiwa mwa athu a mitundu ddittheddene, aakhulupililiwa mu ellapo yavatthi ettheene, nave aawellihiwa oddullu mu ntitimiho.”

2 Akorinto 7:10

Vawi ovoriiwa murima woovenyera wa Mulluku onnarukunusa murima wi ovullusiwe nave khaavo muthu anaakhalle ni ethakaraka ni ovoriiwa murima wenko. Koma ovoriiwa murima woovenyera wa athu onnawaana okhwa.

2 Timoteo 2:19

Koma matthipello oollipa ayo yatthipelliwe ni Mulluku khewora otikhiwa. Nave va matthipellellwaayo voolembiwa mawu awi, “Apwiya ennaadduwella ayo eri ayiwa” navettho “Arive muthu anaromolla nnddina na Apwiya ahiye ddoonanara.”

Mitteko 20:21

Wa Ayuda ni athu ayo ehiri Ayuda kahaachenjeza wi erukunuwe murima ewe wa Mulluku nave ekhulupilile mwa Apwiihu Yesu.

Mitteko 11:18

Yiiwalliiwa yeella, yaahiya omuhumullulla wulle nave yaamutitimiha Mulluku, ellota wi, “Vano Mulluku ohaavaha athu ayo ehiri Ayuda ekari yawi ehiye machimo nave ekhalle ni okumi woohimalla!”

Mitteko 3:19

Sika rukunuwani murima nave muwe wa Mulluku wi uukhululukelleni machimwaanyu

Yohane 14:1

Yesu ahaalleella oohudderaaye wi, “Muhikhupanyeke, mukhulupilileni Mulluku, kikhullupililenittho miyaano.

Mariko 6:12

Sika yaaya yallalleyaka wi athu erukunuwe mirima.

Mariko 1:1

Nngu sika waambeya wa othenga waphaama woollota dda Yesu Khrisitu, Mwaana a Mulluku.

Mateyu 4:17

Ovenyera enthawi yeeyo Yesu ahaamba ollalleya othengaaye wi, “Rukunuwani murima kaambiiwa omwene wa Mulluku wohaatamella!”

1 Yohane 4:12

Khaavo muthu amoonille Mulluku. Koma naakondanaka, Mulluku annakhalla mu eyaattano ni hiyaano nave echikondaaye ndithu ennakhalla mwa hiyaano.

1 Petro 1:21

Oweella mwa olliyooyo, munnamukhulupilila Mulluku oyo aamuvenyihalle wa ookhwa nave amuvaha ntitimiho sika vano echikhulupilwaanyu ni otiyera wanyu tti dda va Mulluku.

Yakobo 1:4

Ovillella wonngu waapharaka muttekwiiwa phaama muneerowaraalla wunchichi mu echikhulupililo ohirama erive ello.

Aheberi 11:6

Khaavo anaamuhakallallihe Mulluku ahinna echikhulupililo vawi oyo anapaalla omwaatamella Mulluku akhallena echikhulupililo yawi Mullukooyo ookhallawo. Nave aneerewaathuva athu enamwaashaasha.

Akolose 4:12

Epafra, mmodda a mullokwaanyu ni oorumeyella a Khrisitu Yesu anuuvahanittho mooni. Enthawi ddittheddene annallipihella wuuvekellani, omuveka Mulluku wi aweereni oohitikheya, oowaraalla mu echikhulupililo ni oosimikiza wiiwellella yoopaalla ya Mulluku.

Akolose 1:28

Sika ninnallalleya dda Khrisitu wa arive muthu. Ninnachenjeza ni ohuddiha ni ezeru ddittheddene wi niweena arive muthu vamiitthoni va Mulluku ari oowaraalla mu eyaattano ni Khrisitu.

Aefeso 2:5

vawi naariihu ookhwa m'munepani voohiiwellellani aanivenyiha vamodda ni Khrisitu. Echisomo ya Mulluku sika yuuvullusalleni.

1 Petro 5:10

Nave mwahoosiwalle wa enthawi yooyeva, Mulluku a echisomo ettheene, oyo awiithanilleni wi mukawanena mu ntitimiho naye noohimalla mu eyaattano ni Khrisitu, olliye yeekhaaye aneerewuuhokollosellani masivaanyu, aneerewuullipihani navettho aneerewuukeraatthihani.

Aefeso 2:1

Khalle nyuwaano mwaari ookhwa m'munepani ekaamba ya ohiiwellella wanyu ni machimwaanyu.

1 Akorinto 13:10

Koma ddookwakhwanella ddaphiya, vano ddoohikwakhwanellannddo ddineeromalla.

Mitteko 17:30

Mulluku khalle ahaahiya athu oohaallaka vawi kheyaamudduwella koma vano annaalamulella athu attheene orive weko wi erukunuwe murima.

Mitteko 2:38

Nave Petro aallota wi, “Arive muthu a nyuwaano arukunuwe murima nave abatiziwe mu nnddina na Yesu Khrisitu wi machimwaaye ekhululukiwe nave aneerewaakhella emphaso ya Mulluku, Munepa Waweella.

Mateyu 7:25

Nave murimu aarupa, mihinje ddaaddalla navettho ephevo yahoopa mwamasiva va enyumbeeyo koma kheyaakumuwalle kaambiiwa yaamakiwa vanllukuni.

Mateyu 5:48

Munaphwanella wi mukhalle aweella wunchichi vawi Attiitthaanyu ooddullu tti aweella.

Miyambo 4:18

Koma ettilla ya athu oolungama tti wonanko owala wa ohinase nko onaanjerereya vang'ono vang'ono ophiyera otthaana.

1 Timoteo 6:19

Vawi vaweerani ddiidda eneerewiisungella eyuuma eyo enaakhalle matthipello a muhoollo wi epharesese okumi oyo ori okumikumi.

Luka 6:48

Anaphwanaphwana ni muthu oyo voomakani enyumbaaye, aakata moowallamella nave atthipella enyumbeeyo vanllukuni. Muhinje waaddalla ni maaddi, ephiya va enyumbeeyo nave kheyaatikheye kaambiiwa yaamakiwa phaama.

Zekariya 12:10

“Vano athu a nibanja na Davide ni attheene a o Yerusalemu kineerewaakawella murima wooddalla ni echifundo ni woovekella. Sika yamuweha oyo yamuhomilliiwa, eneeromwinllella wunchichi wonanko enamwinllelliiwa mwaana akhalla mmoddave.

Mateyu 21:29

Mwaanooyo ahaakhulla wi, ‘Nginapaalla miyaano.’ Koma vatulli viwa aasintha maganizo, ayaawo.

1 Akorinto 2:6

Nave kinallalleya othenga wa ezeru wa athu oowaraalla m'munepani. Nave khe ezeru ya ellapo yavattheella apaalle ya oolamulella a ellapweella, ayo masiviiwa enamalla.

Akolose 3:14

Nave va makhallello yaalla, mupwesererevo echikondi, eyo enamakellella ddeko ddittheddene vamodda okhalla emodda yaphaama.