Aheberi 3:6 - Mawu a Mulluku

⁶ Koma Khrisitu tti oororomelleya wonanko mwaana oolamulella enyumba ya Mulluku. Hiyaano sika enyumba ya Mulluku, nallipa murima ni okhulupilila nnddo ninatiyereehu.

Aheberi 3:6 ပူးပေါင်းရင်းမြစ်များ

2 Akorinto 6:16

Enyumba ya Mulluku enaattane ni mafano mwawiidde? Vawi hiyaano tti enyumba ya Mulluku Ookumi. Mulluku yeekhaaye aallota wi, “Kineerokhalla mwa alliwa, nave kineereweeteeta variyari viwa. Kineerokhalla Mullukwiiwa, nave alliwa beneerokhalla athwaaka.”

1 Akorinto 3:16

Ethiyo khamunadduwella wi nyuwaano tti enyumba ya Mulluku nave Munepa a Mulluku onakhalla mwa nyuwaano?

1 Petro 2:5

Waani wonanko malluku ookumi wi nyuwaano mupharihiwe mutteko voomakani enyumba ya Munepa, nko munaarumeyelleke wonanko allupa mukutho aweella oheraatthi wa Mulluku mukutho wa Munepa ni wawaakhelliwa oweella mwa Yesu Khrisitu.

Aheberi 10:35

Sika muhinatathilla ollipa wanyu murima vawi muneerothuviwa wuullupalli.

Aheberi 6:11

Ninnapaalla wunchichi wi arive muthu a nyuwaano avirellelle wooniha ollipa murima ophiyera omamallihelloni, mvo ddeko munatiyereenyu ddinaakwakhwanihiwiiwa.

1 Akorinto 6:19

Ethiyo khamunadduwella wi mwiillaanyu tti enyumba ya Munepa Waweella oyo anakhalla mwa nyuwaano navettho aavahiwe wa nyuwaano ni Mulluku? Khamunakhalla a nyuwaano weekhiinyu.

Aheberi 10:23

Nillipihelle waakhullella moohikayikella nnddo ninadditiyereehu vawi oyo anilonjezille ddenndda tti oororomelleya.

Aheberi 4:11

Vano hankoni moollipihella nivollowe mu wiithuuwanngu wi variyari vahu vihikhalle mmodda oolephela ovollowa ekaamba yoohiiwellella wonanko yenriiwa khalle.

Aheberi 3:14

Vawi attheenehi tti akhwaaye a Khrisitu okusella naphara moohitikheya echikhulupilwaahu naariihuna vawaamba valle ophiyera omamallihello.

Yawuupullulla 3:11

Koma ophiyera kiwiille, nyuwaano munaphwanella muphare moollipiha eyo muriinyuna wi ahikhallevo mmodda anawaakheni emphaswaanyu.

Aheberi 4:14

Nookhalla ni mullupa mukutho muullupalli oyo ayiille oddullu akhalla vamiitthoni va Mulluku, Yesu, Mwaana a Mulluku. Sika hankoni niphare moollipiha dda echikhulupililwaahu.

Aheberi 1:2

Koma mu mallapo oomallihellaalla anallota wa hiyaano oweella mwa Mwanaye. Mwa olliyoolla Mulluku aaphatusa ellapo ni ddittheddene ddinakhalla mwemmo. Nave Mulluku aamutthoolla wi omamallihello wene ddeko ddittheddene ddikhalle ddaayeddaaye.

1 Timoteo 3:15

Nave kaselliwa, kalatoolla aneeroowoonihani mmo muthu anaphwanelleeye okhallella mu enyumba ya Mulluku, eyo eri mpingo wookumi, opoto ni matthipello a yawoona.

Akolose 1:23

Koma munaphwanella muvirellelle okhulupilila va matthipello oollipa awoona nave muhitikheyeke va otiyera wanyu mwaakhenlleenyu mwiiwalle othenga waphaama. Miyaano Paulo kaakhalla oorumeyella a othenga waphaama yoolla oyo ollalleyiwe wa arive muthu va ellapo yavatthi.

Mateyu 10:22

Athu attheene eneerowiitani kaambiiwa nyuwaano tti oohudderaaka. Koma oyo anaavillelle ophiya o mamallihello, aneerovulluwa.

1 Atesalonika 5:16

Hakallallani mallapo mattheene.

Aroma 15:13

Mulluku oyo ananivaha otiyera uddalliheni ni oohakallalla ni murendelle kaambiiwa munnamukhulupilila. Sika otiyera wanyu oneerovirellella wunnuwa ni masiva a Munepa Waweella.

Mateyu 24:13

Koma oyo anaavillelle ophiya o mamallihello, aneerovulluwa.

Yawuupullulla 2:25

Koma ophiyera kiwiille, nyuwaano munaphwanella muphare moollipiha eyo muriinyuna.

Yawuupullulla 2:18

“Omulembelle oohoollella a mpingo wa o Tiyatira wi, “Alla sika mawu oovenyera wa Mwaana a Mulluku, oyo miitthwaaye tti wonanko mallumi amunllo, manyallwaaye oowala wonanko mukoko wooreerihiwa awi,

2 Atesalonika 2:16

Ninaaveka Apwiihu Yesu Khrisitu weekhiiwa ni Mulluku Attiitthiihu oyo oonihalle echikondaaye wa hiyaano wi anivahe ollipa murima woohimalla ni etiyerello yaphaama oweella mwa echisomwaaye.

Aroma 5:2

Kaambiiwa naamukhulupilila Yesu Khrisitu aaneeriha wi noonena echisomo ya Mulluku, eyo eri matthipellellwaahu. Nave vano ninnahakallalla wi ninnatiyera okhalla ni ntitimiho na Mulluku!

Masalimo 2:12

Mukokhorelleni moomugonjella mwanaye, wi ahuunanariwelleni, wi muhoonongeye, vawi khanallekella osha murima. Oodalisiwa tti ayo enathawella wa olliye.

1 Petro 1:8

Munnamukonda naari muhimonne nave munnakhulupilila mwa yooyo naari vano muhimonne. Sika munnahakallalla wuullupalli ni murimaanyu muttheene,

Agalatiya 6:9

Sika nihitope vaweerani ddaphaama vawi enthawi eneerokwakhwana eyo nineereehu nitthukumanihe ddoohata.

Aroma 11:22

Wehesesani phaama echifundo ya Mulluku ni owallaaye. Annawoopella owalli ayo echimwalle koma annaweerellani echifundo nyuwaano mwavirellella okhulupilila echifundwaaye. Nave mwaaheera ddiiddo nyuwaano Mulluku aneerowinttakani.

Mateyu 16:18

Sika kinuuvaha nnddina nawi Petro ottaphullella wi, ‘nlluku’. Vanllukuni vaava kineeromakavo mpingwaaka nave masiva a okhwa khewugonjiha.

Aroma 12:12

Muhakallalleke ekaamba ya otiyera wanyu. Muvillelleke mwaahoosiwaka nave muvekelleke moohihiyerera.

Agalatiya 6:10

Sika vano nakhalla ni enthawi ninaphwanella neereke ddaphaama wa arive muthu nave makamaka ayo eri a mu nibanja nahu na echikhulupililo.

Aefeso 3:12

Mu eyaattano ni Khrisitu ni oyeella mu echikhulupilwaahu mwa olliye, ninnallipa murima oya vamiitthoni va Mulluku moohikayikella.

Aheberi 4:16

Sika hankoni moohikayikella naatamelle o mpando woomwene wa Mulluku nko ori echisomo wi naakhelle echifundo, echisomo ni nikavihero mu enthawi yoophwanellella.

Aheberi 6:18

Mwawi ddiidda vookhalla ddeko piilli nndda, ollupella ni olonjeza. Khaddisinthiwa nave ddinnooniha wi Mulluku khoottha. Sika wa hiyaano nathawenlle wa olliye naaphwanya ollipihiwa murima wuullupalli wi niphare moollipa etiyerello eyo ninaakhelleehu muhoollo.

Aheberi 7:19

Vawi malamulo a Mose kheyaaworille weeriha ddeko ddittheddene okhalla ddaphaama. Koma vano noovahiwa etiyerello yuullupalli eyo enanaatamelliha vakhuviru ni Mulluku.

Aheberi 10:19

Asinnaka ni arokoraka, nikhame na Yesu ninanillipiha murima wi nineerovollowa mu nipuro naweellesesa.

Aheberi 10:21

Sika vano nookhalla ni mullupa mukutho muullupalli oyo analamulella enyumba ya Mulluku.

Aheberi 11:1

Okhalla ni echikhulupililo onattaphullella wi ohikayikella ddeko ninatiyerelleehu ni osimikiza wi ddeko nnddo nihinaddooneehu ddookhallawo.

1 Petro 4:17

Enthawi yookwakhwana wi echiweruzo yaambe nave athu a Mulluku sika enaambe weeruziwa. Yaamba ni hiyaano, enaamalle mwawiidde wa ayo ehinakhulupilila othenga waphaama wa Mulluku?

Yawuupullulla 2:26

Wa ayo enaapambane, yeeraka nnddo kinapaalleemi ophiyera omamallihello, kineerewaavaha olamulello va athu a mitundu ddittheddene.

Ezekiele 46:10

Vano mwene athaananekena. Avolloweke ni athwaayo yaavollowaka nave akhumeke yaakhumaka.