2 Epilli 6:14 - Mawu a Mulluku

¹⁴ Aavekella wi, “Nyu Apwiya Mulluku a Israele, khaavo Mulluku oophwanaphwana ni nyuwaano, oddullu apaalle va ellapo yavatthi. Munnasunga echipangano ni wooniha echikondi yoohisintheya wa oorumeyellaanyu ayo eneeta vamiitthoni vanyu ni murimiiwa muttheene

2 Epilli 6:14 ပူးပေါင်းရင်းမြစ်များ

Eksodo 15:11

“Nyu Apwiya, ethiyo vookhalla mulluku mmodda oophwanaphwana ni nyuwaano? Ttaani ari wonanko nyuwaano, ootitimiheya ekaamba ya weella wanyu? Ttaani ari wonanko nyuwaano vaweerani mitteko dda masiva ni ddoottikhiniha?

Deuteronomo 7:9

Ekaamba ya yeella upuwellani wi Apwiya Mullukwaanyu tti Mulluku mmoddave nave tti oororomelleya. Olliye aneerosunga echipanganwaaye nave aneerewooniha echikondi yoohisintheya wa athu a mibado ddooheerengeya dda ayo enamukonda olliye ni wiiwellella malamulwaaye.

1 Atesalonika 2:12

Nahuullipihani murima, nahuukhurumusani murima nave naanuuvekani wi mukhalleke ni makhallello oomuhakallalliha Mulluku, oyo anawiithanani nyuwaano wi muvollowe mu omwenaaye nave mu ntitimiho naye.

Luka 1:50

Anaweerella echifundo ayo enamoova olliye ovenyera va mbado mmodda ophiyera mmodda.

Luka 1:6

Eellaalla yaari oolungama vamiitthoni va Mulluku nave yahiiwellella phaama malamulo ni ddoolamulella dda Apwiya.

Yeremiya 10:6

Khaavo oollikana ni nyu Apwiya, nyuwaano tti amasiva, nnddina nanyu nookhalla ni masiva muullupalli.

Masalimo 89:28

Kineeromukonda enthawi yoohimalla ni echikondaaka yoohisintheya, echipanganwaaka ni olliye khetathiya.

Masalimo 89:8

Ethiyo nyu Apwiya Mulluku Amasiva Mattheene, ttaani ari amasiva wonanko nyuwaano ororomelleya wanyu woowaapheellani?

Masalimo 89:6

Ethiyo ttaani muddullu anaaphwanaphwane ni Apwiya? Ttaani mwa ooddullu enaphwanaphwaniiwana?

Nehemiya 1:5

Vano kaallota wi, “Nyu Apwiya Mulluku ooddullu, Mulluku muullupalli ni awoopiha, oyo anasunga echipangano ni okhalla ni echikondi yoohisintha wa athu ayo enamukonda ni wiiwellella malamulwaaye.

1 Epilli 29:20

Nave Davide aallota wa mutthukumano muttheenoolle wi, “Atitimiheni Apwiya Mullukwaanyu.” Vano athu attheene yahaatitimiha Apwiya Mulluku a makhollwiiwa nave yaakokhora yaallapella Apwiya ni omuvaha olemu mwene.

1 Mamwene 18:36

Ekwakhwanne enthawaaye yoovelleella mukutho, namallotella Eliya aasusella vakhuviru ni nikuwanno avekella wi, “Nyu Apwiya Mulluku a Abrahamu, Isaki ni Yakobo, ollello ddidduwanyeye wi nyu sika Mulluku mu ellapo ya Israele navettho wi mi tti oorumeyellaanyu ni wi kineera ddittheddenendda kaambiiwa mullotille tti nyuwaano.

1 Mamwene 8:23

Aavekella wi, “Nyu Apwiya Mulluku a Israele, khaavo Mulluku oophwanaphwana ni nyuwaano, oddullu apaalle va ellapo yavatthi. Munnasunga echipangano ni wooniha echikondi yoohisintheya wa oorumeyellaanyu ayo eneeta vamiitthoni vanyu ni murimiiwa muttheene.

1 Mamwene 6:12

“Ollota dda enyumba onamakeeweella, waawiiwellellaka mawaaka ni malangizwaaka ni othwara malamulwaaka mattheene kineerokwakhwanihella oweella mwa weyaano lonjezano nno kakeraatthihalleemi ni attiittho Davide.

1 Mamwene 3:6

Nave Solomoni ahaakhulla wi, “Mwaahooniha echikondi yuullupalli ni yoohisintheya wa attiitthaaka Davide, oorumeyellaanyu kaambiiwa yaari oororomelleya, eechilungamo ni aphaama vamiitthoni vanyu. Nave mwaavirellella owooniha echikondi yuullupalli ni yoohisintheya vawaavahani mwaana oyo vano akeraatthille va mpandwiiwa woomwene.

Deuteronomo 4:39

Sika vano dduwellani ollello nave muhitiwalleke wi Apwiya sika Mulluku a oddullu ni ellapo yavatthi nave khaavottho mmodda.

Genesis 33:20

Nave aamaka nikuwa vaavo, aniromolla wi Eli Elohe Israele, ottaphullella wi Mulluku tti Mulluku a Israele.

Genesis 17:1

Abramu ari ni miyakha 99 Apwiya yaamooneyella emulleella wi, “Mi tti Mulluku Amasiva Mattheene. Vano wiiwellelleke enthawi ddittheddene nave ohichimweke

Genesis 5:24

Olliye ahaattana ni Mulluku mu okumaaye muttheene. Nave Enoki khaawooneyillettho, ekaamba yawi Mulluku aamukusa.

Luka 1:72

Aaweerella echifundo makhollwaahu nave ahuupuwella echipanganwaaye yaweella.

Daniele 9:4

Kaavekella wa Apwiya Mullukwaaka, waakhullella machimo wi, “Nyu Apwiya Mulluku muullupalli ni awoopiha, munnasunga echipanganwaanyu ni echikondaanyu yoohisintheya wa athu ayo enuukondani ni othwara malamulwaanyu.

Yeremiya 10:16

Koma Mulluku a Yakobo khari wonanko mafanwaalla, olliye sika oophatusa a ddittheddene. Israele tti mutundu wa yoohallanaaye, nnddina niwa tti Apwiya Amasiva Mattheene.

Masalimo 86:8

Nyu Apwiya, variyari va milluku, khaavo naari mmodda anaphwanaphwana ni nyuwaano, khaddiivo mitteko ddinaphwanaphwana ni mitteko ddanyu.

1 Epilli 29:10

Vano Davide ahaatitimiha Apwiya vamiitthoni va mutthukumano muttheene nave aallota wi, “Nyu Apwiya Mulluku a Israele, nikhollo na Yakobo mutitimiheye wa enthawi yoohimalla”

2 Samuele 7:22

Ddawoona, nyuwaano tti muullupalli, Apwiya Mulluku Amasiva Mattheene, moollikana ni nnddo niiwalleehu khaavo ari oophwanaphwana ni nyuwaano nave khaavo Mulluku mmodda koma nyeeneve.

Eksodo 3:15

Nave Mulluku aamulleellattho Mose wi, “Waalleelle Aisraele wi, ‘Apwiya Mulluku a makhollwaahu, Mulluku a Abrahamu, Mulluku a Isaki ni Mulluku a Yakobo sika akirumihalle wa nyuwaano.’ Nenna sika nnddina naka wa enthawi yoohimalla. Nenna sika nnddina nno ddinaakiromollellekiiwa mibado ddittheddene ddamuhoollo.

Genesis 35:10

Mulluku aallota wi, “Nnddina nawo tti Yakobo koma waambeella ollello nnddina nawo ninaakhalle Israele.” Sika ahaamba oromolliwa Israele.

Deuteronomo 3:24

‘Nyu Apwiya Mulluku, mohaamba omoonihella oorumeyellaanyu mitteko dda ottekweenaanyu ni masivaanyu. Oddullu ni vatthi khaavo mulluku mmodda oyo anaawore weera ddeko dda masiva wonanko nnddo muneereenyu.

Eksodo 8:6

Sika Aroni aatthoonyihella ekopwaaye vamaaddini nave anaphullu yaakhuma eddalla ellapo ettheeneeyo.

2 Epilli 6:17

Sika vano, nyu Apwiya Mulluku a Israele, akhullellani wi nnddo mwaalonjezilleenyu attiitthaaka Davide oorumeyellaayu, ddikwakhwanihelliwe.

2 Epilli 20:6

nave aallota wi, “Nyu Apwiya Mulluku a makhollwaahu, ethiyo khemuhiyo Mulluku oyo ari oddullu? Ethiyo khemuhiyo nyu munalamulella moomwene mattheene? M'mattani mwanyu mookhalla masiva ni ottekweene, sika wi khaavo muthu anaawore ollipana ni nyu.