2 Akorinto 1:12 - Mawu a Mulluku

¹² Ninnakotella wi yawuupusella murimaahu ennanisimikizella wi naakhalla moolungama ni moororomelleya makamaka nakhalleehu ni nyuwaano. Khanaawerille nndda oweella mu ezeru dda athu koma oweella mu echisomo ya Mulluku.

2 Akorinto 1:12 ပူးပေါင်းရင်းမြစ်များ

1 Akorinto 2:13

Sika vano khenallota ddenndda mu mawu oohuddihiwa ni ezeru dda athu koma ni mawu oohuddihiwa ni Munepa vawi ninnatthopoolla ddawoona dda munepa wa ayo erina Munepa.

2 Akorinto 2:17

Hiyaano khaninaphwanaphwana ni athu amodda anchichi ayo enakusa othenga wa Mulluku wonanko tti malonda oohiwallamella mutengo koma kaambiiwa Mulluku oonirumiha hiyaano, ninavuwiha othenga mwawoona vamiitthoni vaye oweella mwa Khrisitu.

1 Atesalonika 2:10

Nyuwaano tti ambonaahu ni Mullukuttho wi makhallellwaahu wa nyuwaano munakhulupilila, yaari aweella, oolungama ni oohikhalla ni yoolakwa.

1 Petro 3:21

Maaddaayo yaari echizindikiro ya obatizo oyo onuuvullusani vano. Obatizo khe ovenyiha nihiryo na vamwiillini koma echipangano ni Mulluku ovenyera va yawuupusella murima yaphaama ekaamba yawi Yesu Khrisitu aavenyihiwa wa okhwa.

Aheberi 13:18

Munivekellelleke hiyaano naari nihikayikaka wi nookhalla ni ello yoonivaanya m'murimani mwahu vawi ninneeseesa weera ddittheddene mwa phaama.

2 Akorinto 8:8

Nginallota yeella moolamula. Koma vawoonihani ntthitti na athu amodda voovahani, kinaaka koone echikondaanyu yaarimi eri yawoona.

2 Akorinto 4:2

Noohiya ddaweera ddawiipittheya ni ddoowulliha muru nave ddaweera ddahu khe ddawoottha apaalle waanganyera mawu a Mulluku. Koma ninnallalleya ddawoona vaweella wiitetheella wonanko omboni wa arive muthu ni vamiitthoni va Mulluku.

1 Akorinto 15:10

Koma ni echisomo ya Mulluku miyaano kiri mmu kikhallelleemi nave echisomo aakivahilleeye kheyaari yoohikhalla ni mutteko. Koophara mutteko moollipiha ohiyana ni amurummwa amodda attheene naari khe miyaano koma echisomo ya Mulluku eyo enaphara mwa miyaano.

Mitteko 24:16

Nave sika kinnallipihella mallapo mattheene okhalla muthu oohikhalla ni mullatu vamiitthoni va Mulluku ni athu.

Mitteko 23:1

Paulo ahaawehesesa attekweene a millatu a Ayudaalle* allota wi, “Ayuda akhwaakanyu! Ollota dda okhalla waka ni Mulluku, miyaano nginna mullatu ophiyera ollello vaava.”

Yobu 13:15

Naari akiiphe, kineromuroromellave, kinerotthopoolla mullatwaaka vamiitthoni vaye,

1 Petro 3:16

Nave mweere yeella mwawiithaallella ni moolemu. Khallani ni yawuupusella murima yaphaama wi mwaallotelliwaka epewe, ayo enallota ddoonanara dda makhallellwaanyu aphaama oomuttakihera Khrisitu, ewulliwe muru ekaamba ya ddoollota ddiwannddo.

1 Timoteo 1:5

Yoolinga ya wuulamula waka tti yawi waahuddihe athu okondana ovenyera m'murimani waweella ni yawuupusella murima yooreera ni echikhulupililo yawoona.

Afilipi 1:10

wi muwore otthoolla eyo eri yaphaama. Sika khamukhalla ni machimo ni yawiipiwana mullatu va Nllapo na owa wa Khrisitu.

Aefeso 6:14

Sika vano imellani mookhozeka ni yawoona wonanko laamba oomakelliwa moollipa muyuununi mwanyu nave echilungamo wonanko yoowara yawiitetezella ekhakaddaanyu,

Agalatiya 6:4

Arive muthu anaphwanella eeseke makhallellwaaye. Yakhalla aphaama sika akotelleke mitteko aphanreeye yeekha, voohiphwanaphwanihani ni mitteko aphanre mmodda.

2 Akorinto 11:3

Koma kinoova wi maganizwaanyu enaavirikanyihiwe nave wi muneerohiya wiivelleella wanyu woororomelleya wa Khrisitu wonanko mmo Heva aallekiweeye ni olleka woochenjera wa enowa.

2 Akorinto 1:17

Ethiyo munaganiza wi kaganizeemi ddenndda ngaadduwella keereemi? Ethiyo apaalle kinooneya wonanko muthu, awaakhullella ni okhoota enthawi emoddave yeeyo?

1 Akorinto 5:8

Hankoni vano nihakallalle ni Paskaahu oohikhalla ni yisiti akhalle, yisiti a ddoonanara nave a machimo koma ni buledi oohikhalla ni yisiti, buledi a yaweella ni a yawoona.

1 Akorinto 4:4

Vawi nginoona ello yookivaanyiha m'murimani mwaka koma yeella khenasimikizella wi miyaano tti oolungama. Apwiya sika enakeeruza miyaano.

Aroma 9:1

Kinallota ddawoona nave nginoottha ekaamba yawi kiri mu eyaattano ni Khrisitu. Yawuupusella murima yaaka, yoolamuliwa ni Munepa Waweella, ennakikhallella omboni wi nginoottha

Yesaya 38:3

“Nyu Apwiya, upuwellani wi kaanuurumeyellani moororomelleya ni mwawiivelleella nave kaaneera ddawuuddivellani.” Eerille ddiiddo ahaamba winlla moovoreyiwa murima.

Yoswa 24:14

“Vano nyuwaano, mwaavahe olemu Apwiya nave mwaarumeyelleke mwawoona nave moororomelleya. Venyihani milluku nnddo makhollwaanyu yaddillapelliiwa okhopella wa mihinje wa Yufurate ni o Iguputo nave mwaarumeyelle Apwiya.

Yakobo 4:6

Koma echisomo ya Mulluku tti yuullupalli wunchichi. Sika mawu a Mulluku eni, “Mulluku annaahiiha awiitukhulla koma annaweerella echifundo awiiyeviha.”

Tito 2:7

Weyaano okhalleke echisanzo ya makhallello aphaama mu ddittheddene. Ehuddihwaawo ekhalleke yawoona navettho ohuddiheke moolemu.

1 Akorinto 1:17

Khrisitu khaakirumalle miyaano wi kibatize. Koma aakirumalle wi killalleye othenga waphaama moohipharihani mutteko mawu eezeru manchichi wi okhwa wa Khrisitu vamutandani ovirellelle okhalla ni masiva.

1 Akorinto 12:8

Munepa anamvaha muthu mmodda othenga wa ezeru nave Munepa mmoddamoddave yooyo anamuvaha muthu mmodda othenga woodduwelliha.

2 Samuele 22:22

Miyaano kaathwara ettilla dda Apwiya, ngaachimwalle voomuhiyani Mullukwaaka.