1 Samuele 15:22 - Mawu a Mulluku

²² Koma Samuele aallota wi, “Ethiyo Apwiya enahakallalla ni tini, mukutho wooshellelliha ni mikutho ddimodda, apaalle wiiwellella mawaaye? Wiiwellella ni ovelleella mukutho, waphaama tti wiiwellella. Waapella maaru ni ovelleella makhura a enkhosa, waphaama tti waapella maaru.

1 Samuele 15:22 ပူးပေါင်းရင်းမြစ်များ

Hoseya 6:6

Vawi kinapaalla echikondi yoohisintheya ohiri mukuthove. Kinapaalla wi athu ekidduwelle miyaano Mulluku, ohiri mukuthove wooshellelliha.

Miyambo 21:3

Echilungamo ni echiweruzo ddinnaahakallalliha Apwiya okhwaranya ovelleella mukutho.

Mariko 12:33

Nave onapaalleya wi omukondeke Mulluku ni murimaawo muttheene ni maganizwaawo mattheene ni masivaawo mattheene navettho omukondeke mukhwaawo wonanko mmo oniikondelleewe weekha. Malamulo meellaalla tti oopaalleya ohiyana ni oheraatthi mukutho wooshellelliha wa Mulluku.”

Mateyu 9:13

Khaweni mwiiwesese ottaphullella wa mawu a Mulluku awi, ‘Kinapaalla echifundo ohiri mukuthove.’ Miyaano ngiwiille wi kiwiithane athu oolungama koma athu oochimwa.”

Oollalleya 5:1

Opwatheke phaama meetellwaawo waayaaka o enyumba ya Mulluku. Oyeellawo ohuddera tti wookhwaranya oyeellawo ovelleella mukuthove wonanko athu ookarangeya ayo ehinadduwella wi eyo eneeriiwa tti yoonanara.

Mateyu 12:7

Nave mawu a Mulluku eni, ‘Kinapaalla echifundo ohiri mukuthove.’ Mwadduwenlleke ottaphullella wa mawu yaalla, khamwaaweeruzeke wi aachimwa athu oohichimwa.

Mateyu 23:23

“Nyu, awoottha, ahuddihi a malamulo ni Afarisi, mookhalla ni otulli! Munnavelleella dda khumi dda ddoomella dding'onong'ono ddooddiviha yoocha. Koma munahiya wiiwellella mahuddero oopaalleya a malamulo amoddaalla, weeruza mwa echilungamo, weerella echifundo ni okhalla moororomelleya. Munaphwanella wi mweereke ddenndda oohihiya ddimoddannddo.

Mateyu 5:24

ohiye emphasweeyo vahoollo va nikuwa vaavo nave oye waambe waattana ni mukhwaawooyo, weera ddiiddo owe oheraatthi mukuthooyo.

Yeremiya 26:13

Koma mwahiya machimwaanyu ni waamba wiiwellella mawu a Apwiya Mullukwaanyu eneerewuukhululukellani, kheyuullakani moollikana ni mmo yallotelliiwa.

Eksodo 19:5

Sika mwaakiiwellellaka ni osunga echipanganwaaka, muneerokhalla athwaaka variyari va mitundu ddittheddene vawi ellapo yavatthi ettheene tti yaaka.

Yeremiya 11:7

Erive enthawi kaanaachenjeza makhollwaanyu ovenyera valle kaakhumihalleemi o Iguputo ophiyera ollello. Kaanaalleella wi yiiwellelleke mawaaka.’ ”

Yeremiya 11:4

eyo kakeraatthihalleemi ni makhollwaanyu kaakhumihalle o ellapo ya Iguputo.’ Kaakhumihalle mu eng'anjo yooviha kaallota wi, ‘Mwaakiiwellellaka ni weera nnddo kinuulleelleemini, nyu muneerokhalla athwaaka nave mi kineerokhalla Mullukwaanyu.

Genesis 4:4

Abele nayeenettho aakusa amodda a anamwani awaamba a enkhosa ddaye nave aavelleella wonanko mukutho enama yaphaama yamakhura. Sika Apwiya yaahakallalla ni Abele ni mukuthwaaye.

1 Samuele 13:13

Samuele aamulleella wi, “Moheerathi ddookarangeya, khamuthwarihalle nnddo Apwiya Mullukwaanyu, yuulamulalleniiwa. Mwathwarihalleke, yeerokeraatthiha omwenaanyu wi mwaalamulelle Aisraele enthawi yoohimalla.

1 Samuele 13:12

kaaganiza wi, ‘Afilisti eneeroowa wi ewane ekhoto ni miyaano weewuno o Giligala kihinaallapelle Apwiya wi ekikavihere.’ Sika kahiiwatihera wi kivelleelle mukuthoolla.”

Hoseya 8:13

Ennavelleella mikutho dda enama wa miyaano enattakhuna enama yamukuthweeyo koma mi Apwiya nginahakallallana naari vang'ono. Ngiwa kitiwalla onanara wiwa nave kineerewaallaka machimwiiwa. Kineerewaahokollosella wuukaporoni o Iguputo.