1 Samuele 12:22 - Mawu a Mulluku

²² Apwiya kheyaatathilla athwiiwa wi nnddina niwa nuullupalli nihivevuwe vawi yahuutthoollani nyuwaano wi mukhalle athwiiwa.

1 Samuele 12:22 ပူးပေါင်းရင်းမြစ်များ

Afilipi 1:6

Nave kinimasimikiza wi Mulluku, oyo aambille mutteko waphaama yoolla mwa nyuwaano, aneerovirellella ophara ophiyera akuthullalle va Nllapo na owa wa Khrisitu Yesu.

Masalimo 106:8

Koma ahaavullusa ekaamba ya nnddina naye wi oonihe masivaaye muullupalli.

Deuteronomo 14:2

Nyuwaano moopatulelliwa wa Apwiya Mullukwaanyu vawi yahuutthoollani variyari va mitundu dda athu ddittheddene dda ellapo yavatthi wi mukhalle yoohallaniiwa.”

1 Mamwene 6:13

Nave kineerokhalla variyari va Aisraele, ngiwa kaahiya athwaaka Aisraele.”

Aroma 11:29

Vawi Mulluku khanasintha maganizwaaye aawiithanaka athu apaalle aawaavahaka emphaso.

Yeremiya 14:21

Muhinitathille ekaamba ya nnddina nanyu, Muhivevulle mpandwaanyu woomwene ni wantitimiho. Upuwellani echipanganwaanyu ni hiyaano nave muhiyitathille.

Yoswa 7:9

Akanani ni athu amodda attheene ookhalla mwiillaponimmu eneerewiiwa nave eneeronaapheella ni oniipha attheene. Ethiyo vano nyuwaano munaaweere tini oteteza nnddina nanyu nuullupalli?”

Aefeso 1:12

Sika eerille ddiidda wi hiyaano naari awaamba otiyerella mwa Khrisitu, nitetheella nave nititimihe ottekweene wa Mulluku!

Ezekiele 20:14

Koma ngeerille ddennddo wi nnddina naka, nihivevuwe variyari va athu a mitundu ddimodda ayo yakoonille kaakhumihaka Aisraelaayo mu Iguputo.

Ezekiele 20:9

Koma ngaaweerille ddennddo wi nnddina naka nihivevuwe variyari va mitundu ddimodda nnddo ddakhalla nimodda ni Aisraele. Vallethi kaari koonihalle masivaaka vamiitthoni va mitundunnddo vawaalleellani Aisraele wi eneerokhuma mu ellapo ya Iguputo.

Yesaya 43:25

Miyaano, ddawoona miyaano, tti oyo anakhululukella machimwaawo ekaamba ya ntitimiho naka nguupuwellaka machimwaawo.

Masalimo 94:14

Apwiya kheyaahiya athwiiwa, khetathilla yoohallaniiwa.

1 Petro 2:9

Nave nyuwaano tti mutundu wootthoolliwa, allupa mukutho oomwene, mutundu woopatuleya, athu a mwaneena Mulluku, ootthoolliwa wi mullalleye ddaweera dda Mulluku ddoottikhiniha, oyo aawiithanneni ovenyera mwiipiphini oya mu owala waye woottikhiniha.

Mateyu 11:26

Ee, Attiitthaaka, nndda ddeereye kaambiiwa ddahuuhakallallihani.

1 Akorinto 4:7

Ttaani aweerilleni nyuwaano uullupalli a athu amodda? Khahiyo Mulluku uuvahilleni erive ello muriinyuna? Vano muniitukhullella tini, wonanko eyo muriinyuna khe emphaso?

2 Epilli 15:2

nave aakumana ni Asa allota wi, “We Asa, kaapelle maaru, nyu Ayuda ni Abenjamini attheene, Apwiya eri ni nyuwaano enthawi ddittheddene mwaawaaroromellaka. Mwaawaashaashaka muneerewaaphwanya koma mwaahiya eneerewuuhiyani.”

Eksodo 32:12

Ethiyo munapaalla wi Aiguputwaayo elloteke wi, ‘Ahaakhumiha o Iguputo ni yoolinga yoonanara wi awiiphelle omiyaangoni ni waatthollosa va ellapo yavatthi?’ Hiyani owallaanyu wookhara wonanko munllooyo nave muhiwoononge athwaanyu.

Aefeso 1:6

Mulluku aheera ddenndda wi nititimihe echisomwaaye yoovahiwa wa hiyaano oweella mwa mwanaye ookondiwa.

Yohane 15:16

Nyuwaano khamwaakithoonlle miyaano koma miyaano kahuutthoollani ni oweerani wi muye mwimme ezipaso ddinchichi, ezipaso nnddo ddinaakhallewo wa enthawi yoohimalla. Sika vano erive ello munaavekeenyu Attiitthaaka mu nnddina naka eneerewuuvahani.

Malaki 1:2

Apwiya enallota wa athwiiwa wi, “Kinnuukondani nyuwaano.” Koma alliwa yahaakhulla wi, “Ethiyo moonihalle echikondaanyu va hiyaano mwawiidde?” Apwiya yahaakhulla wi, “Esau ni Yakobo yaari muthu ni mwanamunne koma kamukondille Yakobo ni edduullu ddaye

Maliro 5:20

Kaambiiwa tini munitiwanlleenyu moohihiyerera? Kaambiiwa tini munihiyalleenyu enthawi yoorekama?

Yeremiya 14:7

Athwaaka eninllella wa miyaano wi, “Nyu Apwiya, mweerevo ello ekaamba ya nnddina nanyu naari machimwaahu enihumullullaka aneeniihu, ohiroromelleya wahu tti wuullupalli, ddawoona, nohuuchimwellani.

Yesaya 48:11

Ekaamba ya miyaano, meeneve kinneera ddittheddene. Nnddina naka nivevulliwe mwawiidde? Ntitimiho naka ngiwa kikawana ni mmodda.”

Yesaya 42:16

“Kineerewaahoollella oohoona m'misewuni ehiddidduwenlliiwa, kineerewaavelleella va ettilla nnddo ehinavirekiiwa. Kineerotthattusa epiphi eri vahoollo viwa wi ekhalle owala, kineeromwaramwara phaama nipuro nookateyakateya. Nndda sika kinaaweerelleemi, ngaakhoota alliwa.

Yesaya 41:17

Oopaneya ni oohoowa vawaashaashani maaddi, koma oohaaphwanya nave ommilloni wiwa wohumma, mi Apwiya kineerewaakhulla ovekella wiwa, miyaano Mulluku a Israele ngiwa kaahiya.

Yesaya 37:35

Kineerowaakihera ni owuteteza muzindoolla ekaamba ya ntitimiho naka navettho echipanganwaaka ni Davide oorumeyellaaka.”

1 Epilli 28:9

Nave we Solomoni mwanaka, omudduwelle Mulluku a attiitthaawo nave omurumeyelleke ni murima muttheene ni okumaawo muttheene. Vawi Apwiya ennadduwella murima, maganizo ni minkhella dda arive muthu. Wawaashaasha oneerewaaphwanya koma waareya etulli eneerowutathilla wa enthawi yoohimalla.

2 Mamwene 21:14

Sika oohalla a athwaaka kineerewaavenyiha mu ellapo ni waavelleella m'mattani mwa adaniiwa. Nave adaniiwa eneerowiipha ni owaakha ddittheddene.

Deuteronomo 31:17

Ddeereya ddennddo, kineerewaashella murima wunchichi, kineerewaahiya nave eneerewoonongeya. Ddoohoosa ddawoopiha ddinchichi ddineerewaamorella. Nave nllapo nenno eneerodduwella wi ddenndda ddohaamorella ekaamba yawi miyaano, Mullukwiiwa, ngirittho ni alliwa.

Deuteronomo 9:5

Khe ekaamba ya echilungamwaanyu apaalle oreera wa murimaanyu wi muneerewaakha ellapwiiwa koma tti ekaamba yawi athwaayo tti oochimwa sika Apwiya enawiikarelliiwa navettho wi Apwiya tti oororomelleya va echipanganwiiwa eyo yallupenlliiwa wa makhollwaanyu Abrahamu, Isaki ni Yakobo.

Aheberi 13:5

Murimaanyu ohinakondaka makobiri, mukwanihiweke ni nnddo muriinyuna. Vawi Mulluku aallota wi, “Nguuhiyani apaalle wuuthawani.”

Aroma 11:1

Vano kinakoha wi, “Ethiyo Mulluku ohaakhoota athwaaye?” Khe ddiiddo. Mi tti Muisraele, edduullu ya Abrahamu navettho mmodda a nlloko na Benjamini.

Deuteronomo 7:6

Nyuwaano tti mutundu woopatuleya wa Apwiya Mullukwaanyu vawi yahuutthoollani wi mukhalle athwiiwa variyari va athu attheene a va ellapo yavatthi.

Deuteronomo 31:6

Khallani amasiva ni oollipa murima. Muhiwoove athu yaalla apaalle otathilla murima kaambiiwa Apwiya Mullukwaanyu eneerewuuhoollellani nave kheyuuhiyani nyookha apaalle wuutathillani.”

1 Mamwene 8:57

Apwiya Mullukwaahu ekhalle ni hiyaano wonanko yakhallelliiwa ni makhollwaahu, ahinihiye apaalle onitathilla.

Deuteronomo 31:8

Apwiya aneeniiwa eneerewuuhoollella nave eneerokhalla ni weyaano. Kheyuuhiya weekha apaalle wuutathilla, sika ohoove apaalle otathilla murima.”

2 Mamwene 14:27

Koma Apwiya kheyaallotille wi eneerewoononga omwene wa Israele va ellapo yavatthi. Sika yahaavullusa Aisraele oyeella mwa Yerobowamu mwaana a Yowashi.

Nehemiya 9:17

Yaakhoota wiiwellella nave kheyuupuwella ddoottikhiniha mweerilleenyu variyari viwa. Yahummiha mirima ddiwa nave yahiitthoollella owaahoollella wi ehokollweellettho wuukaporoni o Iguputo. Koma nyuwaano tti Mulluku ookhululukella, a murima waphaama, eechifundo, oohisha murima mwawaakuva, eechikondi yoohisintheya khemwaawaatathillalle.

Yesaya 43:7

arive muthu oyo anadduwelliwa ni nnddina naka, oyo kamphatusalleemi ekaamba ya ntitimiho naka, oyo kamoopilleemi ni ompanga.”

Yesaya 49:15

Apwiya yahaakhulla wi, “Ethiyo mutthiyana ttuumutiwalla mwanaye awaamwa apaalle oohimweerella echifundo mwaana oomuyara yeekha? Naari amutiwanlle mwanaye, miyaano, ngiwa kuutiwallani.

Yesaya 63:8

Apwiya enallota wi, “Alliwa tti athwaaka, anaaka ayo ehinaakoottotthe,” sika yahaavullusa.

Yeremiya 14:9

Kaambiiwa tini munakhalleenyu wonanko awiimella muru, wonanko akhoto oohiwora ovullusa? Komave nyu Apwiya muri variyari vahu, ninnadduwelliwa ni nnddina nanyu, muhinihiye weekhiihu.”