1 Akorinto 4:5 - Mawu a Mulluku

⁵ Sika muhimweeruze arive muthu enthawi yoophwanella ehinakwakhwane, owa wa Apwiya. Eneerewooniha ddawiipittheya dda mwiipiphini nave eneerewuupullulla maganizo a athu. Nave attheene eneerewaakhella ntitimiho naye na wa Mulluku.

1 Akorinto 4:5 ပူးပေါင်းရင်းမြစ်များ

Yakobo 5:7

Asinnaka ni arokoraka, villellani wonanko muthu oollima ophiyera owa wa Apwiya. Annatiyera wi ezipaso ddaphaama ddooneye m'matani mwaye. Annatiyera moovillella ophiyera ddirupelliwe ni murimu awaamba ni oomallihella.

2 Akorinto 5:10

Vawi hiyaano attheene ninaphwanella ophiyera vamiitthoni va Khrisitu wi neeruziwe ni olliyooyo. Arive muthu aneerothuviwa moollikana ni erive ello eerilleeye, yaphaama apaalle yoonanara.

1 Akorinto 3:13

Nave oreera wa mutteko wa arive muthu oneerewuupullulliwa va nllapo na echiweruzo vawi nllaponno nineerophiya ni munllo nave munllooyo sika onaalinge mitteko dda arive muthu.

Aheberi 4:13

Kheyiivo ello enavittheya vamiitthoni va Mulluku, ddeko ddittheddene ddinnakhalla vawooneya nave ddinnakhunuulliwa vamiitthoni vaye. Nave attheenehi ninaphwanella wi nimutthopoollelle mitteko ddahu.

2 Akorinto 10:18

Muthu oyo aniitetheella yeekha khanaakhullelliwa koma oyo anatetheelliwa ni Apwiya.

Aroma 2:16

Nave vano moollikana ni othenga waphaama kinallalleyeemi, mmu sika ddinaakhallelliiwa va nllapo nno Mulluku aneeruzeeye ddookhuweya m'mirimani mwa athu attheene oweella mwa Khrisitu Yesu.

Aroma 2:1

Vano nyuwaano munaweeruza amodda, ethiyo munaddeesa wi nyuwaano ttaani! Khamunna mawu oothawellavo vawi mwaaweeruzaka athu amodda koma nyuwaano muneerattho ddeko ddimoddave ddennddo eneeriiwa, munaddiipa mullatu nyookha.

Yawuupullulla 20:12

Nave kaawoona ookhwa, uullupalli ni ang'onong'ono, yiimenlle vamiitthoni va mpando woomwene. Mabukhu yaahulliwa, nibukhu nimodda nahulliwe naari nibukhu na akumi. Athu ookhwaayo yaheeruziwa moollikana ni mitteko ddiwa nnddo ddalembiwe m'mabukhunimmo.

Oollalleya 12:14

Vallethi Mulluku aneereweeruza ddittheddene ddaweereya, ddaphaama apaalle ddoonanara naari ni ddoovittheya ddene.

1 Petro 1:7

Ddoolinga ddiwa tti ddawi ddisimikize wi echikhulupilwaanyu tti yawoona. Naari golide, oyo anaworeya woonongeya, anneesiwa ni munllo. Nave vano echikhulupilwaanyu eyo eri yoowallamella wunchichi omukhwaranya golide, enaphwanellattho weesiwa wi evillelle. Sika muneerewaakhella ntitimiho va nllapo nawuupullulliwa Yesu Khrisitu.

Aroma 2:29

Koma Muyuda awoona tti muthu oyo ari Muyuda muwari, oophaddiwa m'murimani mwaye. Nave ella eneereya ni Munepa a Mulluku, ohiri ni malamulo oolembiwa. Muthu yooyo annatetheelliwa ni Mulluku, ohiri ni athu.

2 Akorinto 4:2

Noohiya ddaweera ddawiipittheya ni ddoowulliha muru nave ddaweera ddahu khe ddawoottha apaalle waanganyera mawu a Mulluku. Koma ninnallalleya ddawoona vaweella wiitetheella wonanko omboni wa arive muthu ni vamiitthoni va Mulluku.

Aroma 14:4

Ethiyo nyu ttaani wi mumweeruze mullupa mutteko a mwaneena? Tti apwinnya ayo enoona wi oolephela apaalle oopambana. Nave aneeropambana kaambiiwa Apwiya Mulluku sika enaamweerihe wi awore opambana.

Yohane 5:44

Nyuwaano munnatitimihana koma khamunaashaasha ntitimiho noovahiwa ni Mullukuve. Vano munaakhulupilile mwawiidde?

Yakobo 4:11

Asinnaka na arokoraka, muhillotellaneke ddoonanara. Oyo anallota ddoonanara dda ookhulupilila mukhwaaye apaalle omweeruza, anallotella ddoonanara moovaanyana ni malamulo komattho anaweeruza malamulo. Nave waweeruza malamulo, khorittho aweera malamulo koma aweeruza.

Luka 6:37

“Muhiweeruzeke athu amodda nave Mulluku khaweeruzani, muhinawiipaka mullatu athu amodda nave Mulluku khawa awiipani, mwaakhululukelleke athu amodda nave Mulluku aneerewuukhululukellanittho.

Mateyu 24:46

Oodalisiwa tti mullupa mutteko oyo apwinnya yaawaaka enaamuphwanyiiwa eeraka ddawi ddiidda.

Yawuupullulla 1:7

Ngoonani aneeroowa m'miraponi! Arive muthu aneeromoona naarittho alle yamuhomille. Malloko mattheene a va ellapo yavatthi eneeromwinllella. Sika ddinaakhalle ddiiddo!

1 Petro 5:4

Nave mbusa muullupalli ooneya, muneerewaakhella emphaso yantitimiho yoohinyaalla.

1 Atesalonika 5:2

Vawi nyuwaano nyookha munnadduwella phaamaddene wi nllapo na Apwiya nineerophiya wonanko mullupaawiiya mahiiyu.

Yohane 21:22

Yesu aamwaakhulla wi, “Kapaalla wi olliyoolla ahikhwe ophiyera kihokollowille, weyaano ddenndda orina mutteko tini? Kithware!”

2 Petro 3:4

nave eneerokoha wi, “Ethiyo Apwiinyu kheyaawuulonjezilleni wi eneeroowa? Eri wuuwi? Makhollwaahu aakhwa khalle nave erive ello tti wonanko mmo yaariiwa waambeella ophatusiwa wa ellapo yavatthi!”

Mateyu 25:23

Apwinnyaalle yaallota wi, ‘Woheera phaama, we mullupa mutteko aphaama ni oororomelleya, vawi waaroromelleya va ddeko dding'onong'ono, sika kineerewuutthoolla wi owehereke ddeko ddaka ddittheddene. Waawo ohakallalle ni miyaano, apwiiyo!’

Malaki 3:18

Vano athu eneerohiyaniha variyari va athu oolungama ni oohilungama, variyari va ayo enamurumeyella Mulluku ni ayo ehinamurumeyella.

Yuda 1:14

Enoki, muthu a mbado waneetthanu ni piilli ovenyera va Adamu, aallotella dda yaalla wi, “Ngoonani! Apwiya eneeroowa ni angelwiiwa ooheerengeya.

2 Petro 3:12

mwaatiyeraka Nllapo na Mulluku nave mweeseeseke oneeriha wi niwe veneva. Nllapo nenna oddullu oneerewoosiwa ni woonongiwa nave ddeko ddooddullu ddineeronyeta ni oviha wa munllo.

1 Akorinto 15:23

Nave arive muthu aneerovenyihiwa va enthawaaye. Vawaamba va attheene, Khrisitu, vatulli viwa ayo eri aaye a Khrisitu va enthawi anaaweeye.

1 Akorinto 11:26

Vawi enthawi ddittheddene munamucheenyu buledi yoolla ni omuwiryella kapu yoolla munallalleyella okhwa wa Apwiya ophiyera eneeriiwa ewe.

1 Akorinto 1:7

Sika kheyiivo emphaso ya Mulluku muyelleelleenyu, munatiyereenyu wuupullulliwa wa Apwiihu Yesu Khrisitu yaawaaka.

Aroma 2:7

Sika athu ayo enavirellellave weera ddaphaama nave enaashaasha ntitimiho ni okumi woohimalla ovenyera wa Mulluku, Mulluku aneerewaavaha okumi woohimalla.

Mateyu 24:30

Vano vaavo echizindikiro ya mi, Mwaana a Muthu, eneerewooneya muddullu. Navettho malloko mattheene a athu a va ellapo yavatthimva eneerekewinlla yaakoonaka mi Mwaana a Muthu kiwaaka vamiraponi ddooddullu ni masiva ni ntitimiho nuullupalli.

Oollalleya 11:9

We Musombwe, hakallalla ni esombwe. Murimaawo ohakallalle mallapo a esombwaawo moollikana ni mmo opaalla wa murimaawo ni mmo miitthwaawo enoonelliiwa koma dduwella wi Mulluku aneerowiipa mullatu wa ddittheddenndda.

1 Akorinto 3:8

Ohiyana khawiivo variyari va oomidda ni oohellella maaddi. Nave Mulluku aneeromuthuva arive muthu moollikana ni mutteko aphanreeye.

Mateyu 25:21

Apwinnyaalle yaallota wi, ‘Woheera phaama, we mullupa mutteko aphaama ni oororomelleya. Waaroromelleya va ddeko dding'onong'ono, sika kineerewuutthoolla wi owehereke ddeko ddaka ddittheddene. Waawo ohakallalle ni miyaano, apwiiyo!’

Yobu 12:22

Annuupullulla ddawiipittheya mwiipiphini, annatthattusa epiphi owala.

Yeremiya 16:17

Miitthwaaka ennoona makhallellwiiwa mattheene oonanara nave tti oohiipittheeya vamiitthoni vaka. Khaniivo naari nichimo nimodda nno kihinanidduwelleemi.

Yeremiya 23:25

Kohiiwa ddoollota dda anamallotella mmo enallotelliiwa ddawoottha mu nnddina naka enakhuwa wi, ‘Koolloha, koolloha!’

Hoseya 8:13

Ennavelleella mikutho dda enama wa miyaano enattakhuna enama yamukuthweeyo koma mi Apwiya nginahakallallana naari vang'ono. Ngiwa kitiwalla onanara wiwa nave kineerewaallaka machimwiiwa. Kineerewaahokollosella wuukaporoni o Iguputo.

Mateyu 10:26

“Muhiwooveke athu. Vano erive yawiipittheya eneerewuupullulliwa navettho erive yookhuweya eneerodduwanyeya.

Yohane 21:23

Sika epilli yeella yaavuwa variyari va oohuddera a Yesu wi oohuddera yoolla khakhwa. Koma Yesu khaallotille wi khakhwa, aallotille wi, “Kapaalla wi olliyoolla ahikhwe ophiyera kihokollowille, weyaano ddenndda orina mutteko tini?”

1 Akorinto 3:14

Eyo yaamakiwe va matthipello yaahisha ni munllo, oomakooyo aneerothuviwa.

1 Akorinto 11:16

Koma vakhalla muthu mmodda anapaalla ovaanyiha ddenndda, eyo kinaalloteemi tti yawi hiyaano naari mipingo dda Mulluku khaddinna makhallello mamodda ollapella.

Yakobo 5:9

Asinnaka ni arokoraka, muhillotellaneke ddoonanara wi Mulluku ahiweeruzeni. Ooweeruza ohiimella vamullakoni.

Miyambo 12:8

Muthu annariihiwa moollikana ni ezerwaaye koma ookhoromana murima annavevulliwa.

2 Akorinto 10:9

Nginapaalla wi kooneye wonanko kinimawoopopihani ni makalataakaalla.