«Kyaari kuri ye Koradzi! Kyaari kuri ye Betesayida! Bukuri mbuti bimaangu byayirimini kuri beenu, ngo byayirimini ku Tiro na Sidoni, nkani na kidzika bo balweeti matsaaka na kuyoolo lufuta, nkani baketi yiinga madyeele.
Ngo mayulu na butoto bya lumalu, mu maampu momamosi, biri byawuunguku mu ntoono mbaawu, na byakebu mu kiluumbu kya mutsuundu, na kya mfukusulu baatu, bahele na kinzaambi.
Mu didyo, ntiilu yiri yakuka ha kakati dya beetu, mpisi heki tubeeneenu na nsiitu mu kiluumbu kya mutsuundu, bukuri bunu bu kari nde, bunubwo se beetu turi mu nsi yimayi.
Me nyamono mboloko yadzaangama yahembeke, na wunde waba wadzakala ha yulu yo. Yulu na butoto byayitika ha busu bwaandi, na ka kwasii bweese kuba kibeendu kuri byo ko.
Me nyamono se bafwa, bakuutu na bilesi, bateleme ha busu bwa mboloko. Nyamono se badzibula mikaanda, na badzibula mukaanda mukimi, wuri mukaanda wamwooyo. Bafwa, babatsuundisa bunu bwaba myatinu mu mikaanda, bunu bwaba biyiriki bya bo.