Mukaanda kuri bari Kolosayi 1:29 - Musamu Wamubwete 2013

²⁹ Mu bubwo se, me nyiri mu kubama, mu kwenwaana bunu buri makwa maandi, mari mu kwesala mu me, mu mpinu.

Mukaanda kuri bari Kolosayi 1:29 ပူးပေါင်းရင်းမြစ်များ

Musamu wamubwete watina Luka 13:24

«Nwanikinee mu kukoto mu mweelu wasweeteme, bukuri me nyiluleele ti, balaka sa basaka kukoto, ngo ka babangusina ko.»

Mukaanda kuri bari Loma 15:20

Mu didyo, me nyaba na musoongo mu kweyaabisa Musamu Wamubwete, mumwo muri bakiri bahele kutaanguna Kiristo, mpisi heki me mpele kutuunga ha yulu lufulu lwa ŋani.

Mukaanda kuri bari Loma 15:30

Bampaangi, me nyilusyaamisa, mu Mfumu yeetu Yesu Kiristo, na mu ntiilu ya Mpeeve, mu kunwaana kintwaari na me, mu nsaambulu kuri Nzaambi, mu ntoono me.

1 Kol 12:11

Myominso mimyo, yini Mpeeve yo yimosi na yiniyo yikwemiyirika, na yikwekabula bunu bu katiiriri kuri muutu-muutu.

1 Kol 12:6

Biyiriki biri mu bitsuumbu-bitsuumbu, ngo Nzaambi yiniyo, yiyirikaa momanso mu bobanso.

1 Kol 15:10

Mu bweese bwa Nzaambi, me nyiri bu nyiri, na bweese bwaandi ku nyiri me, bwasii ba bwabuunu ko, kasi me nyabvula kusala na bobanso, ngo kari me ko, kasi bweese bwa Nzaambi buri mu me.

2 Kol 11:23

Bisari bya Kiristo bari? Me nzoonsulu bunu kilawuku, mu kuleele ti me mvuriri na bo; mu bisalu bya makwa, me mvuriri na bo; mu maboroko, me mvuriri na bo; mu nkuba kubwilikila, me mvuriri na bo; na me mvuriri kuba mu nsisi dza lufwa mu ntaangu ngo ntaangu.

2 Kol 13:3

bukuri beenu luri mu kusaka kimbaangi ti Kiristo wudzoonsaa mu me. Nde wahele na buyonsi kuri beenu, ngo kasi wusoongaa mpinu dzaandi mu beenu.

2 Kol 5:9

Hango-nkuumbu, beetu di tutiiri mu kubweeye kuri nde, ti tuba mu nyutu yi, bunu pe tupala mu yo.

2 Kol 6:5

mu biwa, mu maboroko, mu nwanusunu, mu bisalu byamakwa, mu kwekyeelele bwiisi, mu maloomi,

Mukaanda kuri bari Efeso 1:19

na nkya nzaangumunu, ya bvulula, ya mpinu dzaandi, mu ntoono beetu basiila kanyi, bunu buri mpinu dza makwa ma lutumu lwaandi,

Mukaanda kuri bari Efeso 3:20

Kuri wunde wakuka mu kuyirika, kwakinkulu, ha yulu momanso ma tuloombaa bunu pe ma tutsimaa, bunu buri mpinu dzikwesala mu beetu,

Mukaanda kuri bari Efeso 3:7

Mu ntoono Musamu Wamubwete, me nyayeki kisari, bunu buri kikabu kya bweese bwa Nzaambi bu baheeri kuri me, bunu buri kisalu kya mpinu dzaandi.

Mukaanda kuri bari Filipo 1:27

Beenu ngo bari dyaatileenu mu kiteesu kyayelemene na Musamu Wamubwete wa Kiristo, mpisi heki, ti hayuku me nyiisiri kulumono, bunu pe nyahele kuba na beenu, me nyuka ti beenu luri na keketee mu mpeeve yomosi, na luri mu kwenwaana mu kitsimi kyokimosi, mu ntoono kanyi mu Musamu Wamubwete,

Mukaanda kuri bari Filipo 1:30

mu kwenwaana kikiindu kyokimosi ki luri lwamono mu me, na ki luri mu kweyuka natee lumalu ti me nyiri mu kwenwaana.

Mukaanda kuri bari Filipo 2:13

bukuri Nzaambi koosalaa mu beenu, na kusa kuri ti, lutya na lusala bunu buri kutya kwaandi kwakubwete.

Mukaanda kuri bari Filipo 2:16

bu luri lwakaangama mu maampu ma mwooyo. Mu mimyo me nyiba na kimweese mu kiluumbu kya Kiristo, bukuri me nyasii kudzumuna kwa buunu ko, na nyasii mono mpasi kwa buunu ko.

Mukaanda kuri bari Kolosayi 2:1

Mukwongo, me ntiiri ti beenu luyaaba, nkya mudziingu me nyiri mu kwenwaana, mu ntoono beenu, mu ntoono bari ku Lahodikya, na mu ntoono babo bakiri kidziri kya me kumono pe mu muswinyi.

Mukaanda kuri bari Kolosayi 2:12

Beenu baludziikiri mu mampeembe kintwaari na nde, mu mbotokulu; mu nde se, beenu bari balufukisa mu kanyi, mu mpinu dza Nzaambi wamufulukisi mu bafwa.

Mukaanda kuri bari Kolosayi 4:12

Epafara, wa beenu-meene wuluheekiri mboto. Nde nkutu Kiristo Yesu, wukwelunwanikina mpisi ntaangu mu nsaambulu, mpisi heki beenu luteleme nangwii, luba bakuka mu kuyirika momanso matiiri Nzaambi.

1 Tes 2:9

Mukwongo, baambukeenu mwooyo, bampaangi, mu kisalu kya makwa na mpasi dza beetu: beetu twaluyikisa Musamu Wamubwete wa Nzaambi, mu kwesala butsuku na mwiini, mpisi heki ti mosi mu beenu kahele kutubuungula.

2 Tes 3:8

Beetu twasii kudya byandya bya muutu kwa buunu ko; ngo kunsa kisalu kya makwa na kunsa mpasi, butsuku na mwiini, beetu twasala mpisi heki mu beenu, muutu kahele kutubuungula.

2 Tim 2:10

Hango-nkuumbu, me nyiri mu kwekiindisa mutima mu myominso, mu ntoono basoolu, mpisi heki bo se babaka mvuukulu yiri mu Kiristo Yesu, na nkeembu ya mantaangu momanso.

Mukaanda kuri Bahebeleho 12:4

Beenu lwakiri kutanda mpe mu kunwaanisa masumu, natee mu kiteesu kya makila.

Mukaanda kuri Bahebeleho 13:21

kaluha makwa ma kuyirika myominso myamibwete, mu kukukisa kutya kwaandi, kayirika mu beetu mamo mamabwete, ha busu bwa Yesu Kiristo, kuri nde kuba nkeembu mu bibvu ngo bibvu. Amene!

Nyabusulu ya Yowane 2:3

Ye wuri na kifiki, ye wakuunda mpasi mu dyaambu dya nkuumbu yaami, ye wahele kuholo-bito.