2 Kol 6:16 - Musamu Wamubwete 2013

¹⁶ Nkya nyukusunu yiri ha kakati dya Nzo ya Nzaambi na biteki? Bukuri beetuneenu turi Nzo ya Nzaambi yamwooyo, bunu bwaleele Nzaambi ti: «Me sa nzakala ha kakati dya bo, na me sa nyeyende na bo, Me sa mba Nzaambi bo, na bo sa baba baatu baami.»

2 Kol 6:16 ပူးပေါင်းရင်းမြစ်များ

Musamu wamubwete watina Matayi 16:16

Simoni Petelo wabvutula, waleele ti: «Ye ngo Kiristo, Mwaana wa Nzaambi ya mwooyo.»

Musamu wamubwete watina Matayi 6:24

«Kuri muutu ko wuri lo bangusini kusalila bamfumu boolo; mukwongo nde lo sa kabele wamosi, na kutya wakaka; bunu pe sa kakaangama mu wamosi, na kunyaafuna wakaka. Ka lutsiitsa kusalila Nzaambi kiteesu kimosi na mboongo ko.»

Musamu wamubwete watina Luka 5:36

Yesu wabateele se nkuma yimayi: «Kuri muutu ko wuri lo taburi kiteendi mu kinkuta kyamoono, mu kuloondo kinkuta kyakikulu. Bukuri nde nkati lo kaakiri kinkuta kyamoono, na kiteendi kikayisiri mu kyo, kyahele kuyelemene mu kinkuta kyakikulu.

Musamu wamubwete watina Yowane 14:23

Yesu wabvutula, waleele kuri nde ti: «Mbuti muutu tiiri me, lo sa kakebe Maampu maami; na Taayi dyaami sa kamutya, na kuri nde sa tweende, na beetu sa twadzakala kuri nde.

Musamu wamubwete watina Yowane 6:56

Wunde wudya muswinyi waami, na wunwa makila maami, wasa kikuundi mu me, na me mu nde.

Mukaanda kuri bari Loma 8:11

Mbuti Mpeeve ya wunde wafulukisi Yesu mu bafwa, yadzakala mu beenu, lo wunde wafulukisi Kiristo mu bafwa, sa kaha bumwooyo kuri manyutu meenu ma mfwiilu, mu Mpeeve yaandi yadzakala mu beenu.

Mukaanda kuri bari Loma 8:9

Beenu lwahele kuba mu muswinyi, ngo luri mu Mpeeve, mbuti heki Mpeeve Nzaambi yadzakala mu beenu. Mbuti muutu wahele na Mpeeve ya Kiristo, lo nde kari wa Kiristo ko.

Mukaanda kuri bari Loma 9:26

na ha kibeendu ki baba baleele kuri bo ti: "Beenu luri kaanda dya me ko", haho sa babateele baala ba Nzaambi ya mwooyo.»

1 Kol 10:21

Beenu kalutsiitsa kunwa mbasa ya Mfumu, na mbasa ya mampeeve mamabi ko; beenu kalutsiitsa kudya kintwaari ha taabala na Mfumu, na kudya se kintwaari ha taabala na mampeeve mamabi ko.

1 Kol 6:19

Buri beenu lwahele kuyaaba ti, nyutu beenu, ngo Nzo-nzaambi Mpeeve Yangisi, yiri mu beenu, yi luri lwataambula kuri Nzaambi, na lwahele kubweese kuba ba beenu-meene?

Mukaanda kuri bari Efeso 2:20

Beenu lwatuunguma ha yulu lufulu lwa bantumu na babikiri, Kiristo Yesu nde-meene ngo tari dya ha kuumbu.

Mukaanda kuri bari Efeso 2:22

Mu nde, beenu se luri lwatuunguma mu kintwaari, mu kuba nzo yi dzakalaa Nzaambi mu Mpeeve.

Mukaanda kuri bari Efeso 3:17

Nde kadzakisa Kiristo kunsa mitima myeenu mu kanyi, na luba lwamene myaansi na lwatuunguma kunsa ntiilu,

1 Tim 3:15

mpisi heki, ti hayuku me nziingiri mu kwiisa, lo ye yaaba bunu bwa kudyaatila mu nzo ya Nzaambi, yiri dibuundu dya Nzaambi yamwooyo, kuunsi na kitsuku kya ngwanwa.

2 Tim 1:14

Kebe maampu mamabwete mawuunguku mu ye, kuri Mpeeve Yangisi yidzakalaa mu beetuneenu.

Mukaanda kuri Bahebeleho 3:6

Ngo Kiristo, wuri bunu Mwaana mu nzo, na nzo yiyo ngo beetu, mbuti tukebiri kifiki na kimweese kya nsiitu.

Mukaanda kuri Bahebeleho 8:10

Lulelusunu lu nyisa me na nzo ya Isaheli, luri bumabu: ha mambisa ma biluumbu bibyo, bu leele Mfumu: me sa nyabaha mangisi maami, me sa nyamatina mu mitima mya bo: me sa mba Nzaambi bo na bo sa baba baatu baami.

Mukaanda wa Yakobo 4:5

Buri beenu lutsimini ti, kwa mungengi Matinu mari mu kuleele ti: "Nzaambi tiiri mu bukwa mpeeve yi kari kasuusa mu beetu"?

1 Pet 2:5

na beenu-meene se, bunu matari mamwooyo, beene batuunguma mu nzo ya kimpeeve, mu kuyirika kingaanga kyangisi, mu kuha bikabu byayoku byakimpeeve, byataambulu kuri Nzaambi mu Yesu Kiristo.

1 Yow 4:12

Kuri muutu ko wumwaamono Nzaambi. Mbuti tutilisinaa beetu na beetu, lo Nzaambi wusanaa kikuundi mu beetu, na ntiilu yaandi mu beetu yayeki yakuka.

1 Yow 4:15

Mpisi wunde wutaambula ti Yesu Mwaana Nzaambi, lo Nzaambi wasa kikuundi mu nde, na nde wasa kikuundi mu Nzaambi.

Nyabusulu ya Yowane 2:1

Tina kuri mbasi ya dibuundu dya Efeso: «Wakwaata bambwetete nsaamu mu kooko kwaandi kwa lubakala, wuri mu kweyende hansa bitetukulu nsaamu bya miinda byawoolo, mimami kari mu kuleele:

Nyabusulu ya Yowane 21:3

Me nyayuka mbeembu yayinene yapala mu mboloko yabaleele ti: «Mono, musaampu Nzaambi weki ha kakati dya baatu! Nde sa kadzakala na bo, na bo sa baba kaanda dyaandi; na nde ha kakati dya bo, sa kaba [Nzaambi bo].

Nyabusulu ya Yowane 21:7

Wunde wuluuluka sa kataambula saala dimadi, me sa mba Nzaambi yaandi, na nde sa kaba mwaana waami.